* تهادوا تحابوا........ والهدية حاجة .. والتزاماتك حاجة تانيه.. يعني مش تجيب لبنتك بلوزه وفستان( كسوة الصيف ) تلبسها وتقول لها دي هدية عيد ميلادكِ ، لأن ده من صميم واجبك تجاهها .. والهدية كمان مش انك تروح تدي والدتك خمسين جنيه وتقولها اصل انا احترت اجيبلك ايه فقولت اديكي الفلوس تجيبي اللي على مزاجك.!! لأن دي جليطه..انما الهدية انك تفكر شويه في الشخص اللي حتديله الهدية.. هو بيحب ايه.. والهدية دي ممكن تفرّحه أو لأه .. أو ماكنش عامل حسابه عليها.. ولو كانت في مناسبة قويه تبقى حاجة تعيش معاه.. يعني مثلا ماتجيبش لأخوك قميص أو جزمه عشان نجح في البكالوريوس عشان حيدوبوا.. انما تجيبله قلم حلو مثلا يكتب بيه .. ويفتكرك بيه على طول .. وده طبعا ما يمنعش انك تجيب لوالدك مثلا حاجة بسيطه جدا لو ما معكش فلوس.. المهم انك افتكرت الـمناسبة.. كمان ما ينفعش انك تجيب شنطة وجزمه لمراتك في كل عيد جواز لـمـدة تلاتين سنه.. حاجة تزهق وتفلق..كمان ما تقولش لحد جايبلك هدية كرافته مثلا انك مش بتحب اللون ده أو كان نفسك في شبشب !! أو تقولي لجوزك وهو راجع من السفر .. ايه ده .. دي قماشه وحشه قوي أو بتشكوكني!! الخلاصه ماتكسفش حد جايبلك هديه.. كتر خيره انه افتكرك .. واستعملها قدامه مره او اتنين وبعدين ارميها ولا احرقها انت وذوقك.. واحلى هدية هي اللي من غير سبب.. مجرد لقيت حاجه تليق على فلان قمت جايبها له على طول..عشان فاكره .. هو كمان حيحبك ..
* أمّن على حاجتك.. موبايلك ومفاتيحك ومحفظتك .. بالذات وانت مسافر.. مش عيب .. ناس كتير بالذات الشباب الصغير من 10 – 18 سنة بيفتكروا انه عيب اني آخد بالي من حاجتي.. وده بيسبب ضياع وسرقة حاجات كتير.. وكتير الواحد ضيّع حاجات .. بس مره ورا مرة اكتشفت .. لأ .. وبعدين .. لازم أخلي بالي من نفسي.. ومن حاجتي.. أعدي الشارع صح.. مش عيب إني أعدي من نفق المشاه.. في الخارج لازم.. وأستنى إشارة المرور..عشان العربيه ما تخبطنيش.. مش شطارة اني أعدي كورنيش اسكندرية والعربيات ماشية بسرعة.. وأتخبط .. يا فرحتي.. ولا عيب إني أشوف اني أخدت موبايلي وشنطتي قبل ما أمشي من الكافيه.. لأن كتير الواحد بينسى.. وبعدين اتهم الجرسون .. لأ.. صحصح.. وركّز.. كمان ماينفعش أسافر بالطياره وانا ما عملتش double check إن التذكرة معايا .. وهكذا .. الأمثلة كتيرة جدا.. وماحدش حينفعني في كل الأمثلة دي غير نفسي وتركيزي..وآخد كارنية النادي قبل ما أروح.. وأشيل فلوس في حته مستخبية من شنطتي عشان لو اتزنقت أو اتسرقت..واتأكد إني قفلت باب الشقة .. طيب وإيه الفايده.. الفايده اني ما خسرش حاجتي.. وما أغرّمش أبويا فلوس .. وأبقى شاطر ومركز تقوم الشركة تديني مسئوليات أكتر وترقيني .. لغاية ما أبقى المدير العام أو الرئيس.. أو أعرف أفتح شركة خاصة.. عمركش شفت واحد صاحب شركة .. بينسى مفاتيحه.. ولا وزير نسي الخطبه اللي حيقولها في المؤتمر..
هناك تعليقان (2):
أنا طبعا مش هعلق او اقول رايي في الكلام طبعا لانه لا يجوز كل مره حضؤتك بتفاجئنا بالمواضيعوبتبقى حلوه اوي وفي وقتها كمان....
انا الحمدالله مش بضيع حاجاتي لاني منظم الى حد كبير وده يعني النمطية في اسلوب حفظ الاشياء...
بس مش عارف ليه بقى عنده مشكله كبيره مؤخرا كبيره اوي النسيان او التوهان ومش عارف فجأه كدا ظهرت انا مكنتش كده خالص.. لدرجة اني احيانا بنسى اسماء اقاريبي ولاد خالاتي مثلا لدقايق وطبعا بجد صعوبة شبه مستحيلة في تذكر اسامي الناس وده بيسبب احراج اوي...
وعندي مشكله تانيه يا ريت تعليق عليها بسرعه عشان عايز حد كبير ينصح وانا لازم اخد قرار..لو انسان مجتهد وممتاز ولما اشتغل قبل كده او اتدرب اثبت كفاءه غير عادية، بس till nowمفيش غير فرصة شغل واحده وهي في نفس المكان اللي هو اتدرب فيه ومع ذلك لو اشتغلت عايزين يدوني ملاميم بمعنى الكلمهu can imagine 200 leمش عارف اوافق وساعتها يبقى ارتبط على الاقل 3 شهور ولو جالي حاجة تانية وانا شغال مش هقدر اسيب واروح، ولا اقول لأ و لو قلت لأ حاسس اني برفص النعمة، والمدير عشانه يعرفني قالي كلمة ليا، قالي تبقى شيخ العمي في مكان ولا تبقى واحد منهم احسنلك!!وقالي خد خبرة سنة وبعد كده امشى !!!!
شكرا على السؤال .... مفيد
أولا لازم تعمل تمرين عاى الذاكره مثلا: خلي شوية أرقام دايما في دماغك مش على ذاكرة التليفون...واستعمل بعض الضربيات الحسابية بداغك مش الآله الحاسبة... وطلع صور قديمة وأقعدد افتكر اسامي الناس اللي فيها..
ولما تشوف حد ناسي اسمه خليك وراه لغاية ما تجيب اسمه وده أصلا حيكون سهل لو اديت لكل واحد علامة مميزه في الذاكرة الفوتوغرافية ، بمعنى ده بيفكرك بكذا أو شبه اللمثل الفلاني واربط الأشكال بالأسامي
الثانية بقى يا حلو :فأنا حازود دلوقتي مقطعين جداد كانو لسه في الدور... بس عشانك ح.ودهم دلوقتي
رينا يوفقك يا بطل وكل سنة وانت طيب
إرسال تعليق