* اتعلم تقول أنا آسف ..وكمان اتعلم تسامح ..وتتقبل النقد.. وتعفو عن اللي غلط فيك طالما اعتذرلك.. لأنك يوما ما حتتمنى ان هو كمان يسامحك.. لأنك اعتذرت..عن خطأ بدر منك.. وكل ابن آدم بيخطأ...والإعتذار لربنا بالإستغفار... وللناس بالأسف... بس الأسف والاعتذار مهمين جدا طالما انك حسيت انك غلطان.. وكمان لازم يكون أسف بنفس.. مش سد خانه.. لازم تتأسف بحق.. وببشاشة.. زي ما إنت لازم تستغفر بصدق وتتوب بجد..واللي بيتأسف أقوى من العنيد الذي لا يعترف بخطئه..والعند يورث الكفر والعياذ بالله.. وإذا تأسفت حتخلي اللي قدامك يحبك وتأسره بقوتك في الإعتراف بالخطأ ..لوغلطت.. اتأسف.. بس من قلبك..وبص في عين اللي انت بتتأسف له.. عشان يعرف انك صادق في أسفك.. ولازم تعرف ان الإعتراف بالحق فضيلة.. يعني لازم تعترف بالخطأ وتتأسف.. طالما انت عرفت أين الحق والحقيقة..كمان إزاي تتسامح وتعفو... والعفو عند الـمقدره من شيم الكريم..ورحم الله رجلا سمحا إذا باع ... سمحا إذا أشترى بل وسمحا إذا اقتضى.. مش لازم نتعامل بعنف.. وغلظه... السماحة حلوة..وبالمره البشاشه حلوه..كمان لو حد جه قال نقد لشغلك أو للبسك .. اسمعه.. يمكن عنده حق..مش لازم ترد عليه إنه أنا كده ومش باتغير... ودي طريقتي... وأنا اللي صح وكلام من هذا القبيل... وياسلام لو اللي وجه إليك النقد ده ..بيحبك وخايف على مصلحتك... أكيد لازم نسمع له... لأنه خايف عليك وبيحبك.. ولما تسمع النقد... استوعبه إفهمه... ولو عجبك ... نفذه...وده بيؤكد الرأي والرأي الآخر.. بس المهم إزاي نسمع الرأي الآخر..ونتقبله ونفهمه...
هناك 19 تعليقًا:
يعني لازم تعترف بالخطأ وتتأسف.. طالما انت عرفت أين الحق والحقيقة
للاسف كتير لايعى الى هذه الثقافه ثقافه الاسف والسماح
مدونة رائعة تحمل في طياتها التسامح والثقة في النفس
فليس الاعتراف بالخطأ ضعف ابدا انما هو احترام للذات ونقاء للقلب وللضمير
احييك على تدوينتك
دمت بخير
ياريت نتعلم
يمكن معظمنا بيقول ويردد كلام دة بس لما يتحط ف الموقف مينفذش
يارب كلنا نتعلم
دمت بالف خير
وكل سنة وانت طيب
أصبحت معلمي الفاضل...فعلا ما أجمل ما تكتب..وما أروع اختياراتك في تسلسل المواضيع وتوقيت كتابتها...يا ريت كنا شايفينك قدامنا كان هيكون افضل علام مشاهدتك من بعيد...هعيد حساباتي كتير من النهارده ..نعترف بالخطأ ونقول اسف ..ونتقبل النقد ونسمع الرأي الأخر..ونحد من العنف والتطرف.......
كل كلمه كتبتها انا موافقه عليها
بس ان الانسان يتعلم انه يتأسف فاده لازم يكون من الصغر يعني الاب والام يعلموا اطفالهم ومش بس كده يشوفوا والديهم وهمه بيعملوا كده علي الاقل مع بعض
ولازم نعرف ان الاسف بيحنن القلوب علي بعض
نشوف كده
لو قلنا لحد انا اسف حقك عليه الرد الطبيعي لالامافيش حاجه هو في بينا الكلام ده ده انت حقك علي راسي
الكام كلمه دول كانوا تعبير من المغلوط في حقه بالأمتنان والسعاده ان صاحبه اعتذر له وكمان جاب الحق علي نفسه كمان
وبالنسبه للغلظه للأسف ان الناس دلوقتي فاهمه انه كل ماكان شديد ورخم بيكون كده شخصيه مش فاهمه جالهم الاعتقاد ده منين ولازم لازم يكون مكشر لزوم الالتزام والشخصيه القويه
وبالنسبه للنقد الناس فقدوا مصدقيتهم عند بعض فاكل واحد فاهم ان اللي بيوجه له النصيحه او النقد ياحاسد وحاقد يامتصيد اخطاء
والكل بقوا فوق النقد او التوجيه
مع ان الدين النصيحه
اما موضوع الاخر ده عايز بلوجر لوحده مش بوست بس عشان الغالبيه العظمي مش معترفين بالأخر ده اصلا عشان كمان يكون له رأي
كلامك صحيح تماما يا صديقى بارك الله فيك
سياسة الاٍعتذار و التأسف تفتح المجال للتسامح بين الناس بشرط أن تكون من القلب و أن يستفيد الاٍنسان من أخطائه فلا يعاودها و يضطر للأسف و هو من الأمور الثقيله على القلب
الاعتراف بالخطأ فضيلة
لكنها تنقص كثير منا
واعترف انى واحده منهم:(
** نورا
أحييك على الإعتراف...
وخطوة واحده للأمام تستدعي دائما أن نتمرن على أن الإعتراف بالحق لا ينقصنا... بل يزيدنا...
أمنياتي
مش عارفه ااقولك ايه...؟؟؟
انا فعلا بارتاااح جدا لما باقرا مدونتك ...ياريتك كنت اخويا الكبيير بجد او ابويا ...مع انى مش عايزة اكبرك...بس لأن بابا (الله يرحمه )مات بدرى ..انا بيبقى نفسى اتكلم مع حد عنده عقل وخبرة زيه...وباحس فى كلامك انه هو اللى بيتكلم...كان دايما يقولى بلاش الصوت العالى مع جوزك ..ودايما سامحيه لو اعتذر ..مهما عمل لأن الراجل صعب جدا انه يعتذر...
قد ايه انا مفتقداااه ...وبالاقيه لما ااقرا مدونتك...
ماتزعلش انى كبرتك فى السن ...بس انت كلامك كله رااائع فعلا...
ودايما بيمس القلب...
تحخياتى لحضرتك..
كل سنه وحضرتك والأسره الكريمه بخير..
الإعتراف بالخطأ فضيله وزمان قالو
من قر بذنبه غفر له ربه
اللهم أغفر لنا ما فات وإعصمنا من الأت..
تقبل تحياتي
حقيقى كلام حضرتك مظبوط جدا
الاسف شئ مطلوب فى حياتنا و كمان بيخفف الحزن او الالم اللى بيكون فى نفس الناس مننا
و قبول الرأى الاخر بس بنظرة صح
بيغيرنا للاحسن
دمت بود يا استاذى
بنت الغربه...
إنت ماكبرتنيش لإني كبرت خلاص
(:
بس يمكن لسه قلبي شباب...
عشان لسه باحب الناس
المهم
الرجاله ممكن تعتذر...
مش يمكن مش بيعتذروا كتير لستاتهم... عشان العلاقه إياها....الجواز
(:
أمنياتي
وتحت أمرك في أي حكاوي أو استشارات..
أسف
لو سمحت
شكرا
الماجيك وورد زي ما بيقولوا اخوانا الخواجات
هيا للأسف موش موجودة في منظومة التربية بتاعتنا
لكن هنعمل إيه
تحياتي وتقديري لجهدك الرائع
أبهرتنى بكل مافى مدونتك
تقل مرورى
ملكة بحجابى
كلماتك في منتهي الصحه
احيانا يقابل الانسان صعوبه في الاعتذار
لكن فعلا لو قدر انه سيحتاج للمغفره من غيره لفكر بجديه اكثر
وكذلك تقبل راي الاخر قد يكون صعب
لكن اظن المحاوله والتفكير ان هذا الراي قد يكون مفيد هو الطرق للتقبل والتقدم ايضا
تحياتي وخالص ودي
ياه
جميل اوى اننا نتأسف و الاجمل ان الناس تتأسفلنا
بس ده مع الاسف مش بيحصل
كله فاكر انه هو و بس اللى صح
و كمان كرامتى ازاى اتأسف؟
ربنا يهدينا
*********
هو ليه حضرتك لغيت كام بوست كده؟
** الجولز وسنينه
شكرا على التعليق
أنا ما لغيتش غير صوره بوستر فرح سلمى بنتي وكمان لوحه خط عربي عن الحب.. دول خارج موضوع البلوج
بس كده
أمنياتي
رائع
موضوع رائع ومدونة اروع
عل فكره انا دخلت المدونة التانية كمان وعجبني جدا الموضوع اللي هناك
عجبني طريقة التدوين في مدونة حضرتك
طريقة جديده مش رتيبة ومش مملة
تحياتي
إرسال تعليق