الثلاثاء، 30 يونيو، 2009

قراءة وكتابة

* القراءة الحرة مش زي اللي بتاخده في الـمدرسة.. دي انت قاريها بمزاجك .. ماحدش غصبك.. يعني لازم تستفيد منها .. لازم تحس إن قراءاتك الحره غيرتك .. أضافت إليك أشياء ..لسه قاري في الأهرام ان المواطن العربي بيقرا ربع صفحة في السنه.. والأمريكاني عشر كتب والأوروبي خمستاشر كتاب.. حاجة تكسف.. انصحك تخليها كتاب في السنه ( رضا ).. وأحلى القراءات هي كتب السيره الذاتيه وقصص نجاح الأشخاص لانها بتديلك حافز.. شوف انت بتحب مين.. لاعب كرة.. مهندس .. فيلسوف.. ممثل.. أي حد .. دور على سيرة حياته الذاتيه واقراها.. يعني انا استمتعت ب كتاب( تجربتي) للمهندس عثمان أحمد عثمان ) ، قصة كفاح جامدة جدا.. ازاي عمل نفسه.. ازاي وصل بمجهوده الرائع.. ازاي حارب وسهر وذاكر وجاع وشبع.. ازاي بيتصرف في المواقف و اكتب.. واكتب أي حاجة.. سواء فضفضة على الورق ..حتريحك..سواء عبارات وحِكم.. سواء أحلامك وطموحاتك عايز تحققها.. فيلسوف قال: إن الكتابة هي بديل أو تعويض عن الإنتحار عشان بتفضفض فيها ..اكتب اللي انت شايفه وحاسه .. خلي معاك نوته صغيره.. كل ما تفتكر حاجة وحشه أو حلوه اكتبها.. كل ما تشوف حاجه ارسمها ( حتى لو مش بتعرف ترسم )..كل ما تسمع حاجه سجلها ..يعني زي يوميات..اللي كان بيعمل كده ليوناردودافنشي .. لو ماتعرفش مين ده .. اسأل..أو عليه العوض.. مش لازم تكتب في اجنده وكل يوم.. لأ.. زي ما تيجي.. بعد فوات السنين .. ممكن ترجع لكتاباتك .. ويا إما تضحك عليها.. أو تفكرك بنمرة زميل لك.. أو تلاقي فكره كانت سريعه بس ممكن تنفعك.. لأن الواحد مش بيفتكر .. المهم انك تكتب .. يا أخي اكتب واقرا أي حاجة ..

الأربعاء، 17 يونيو، 2009

الحياة الحلوة

* لا تـُـفسد الجلسه باشياء سخيفة..أو تذكَر الأشياء الجميله في الأماكن الجميلة..أو ماتعكننش يومك.. أو بلاش وانت مبسوط تفتكر حاجة تعكر مزاجك.. أو أجل المواضيع السخيفة لوقت تاني غير وقت الفرح .. أو ماتبقاش بايخ ورذيل وتفسد الحفلة على الناس مثلا وتقول انك لسه جاي من عند صاحبك العيان اللي هما مايعرفهوش وان حالته وحشه..أو تروح تحكي ازاي فلان مات في حادثة بشعة وانت بتبارك لصاحبك اللي لسه مراته مخلفه بيبي .. أو تكون دكتور وتقعد تحكي لخطيبنك عن العمليات الجراحية والتشريح..طبعا ممكن تشاركك.. بس اختار الوقت المناسب.. وكمان راعي شعور غيرك.. بالذات لو قُريب منك.. مالوش لازمة تعمل حفلة عيد ميلاد سيادتك وجاركم عيان أو عندهم ميت.. وبلاش تعزمي زميلتك اللي بتلبس فستان واحد طول السنة ، على ديفيليه ، ده ما يمنعش انك تصاحبيها .. بس بلاش تجيبي معاكي ساندوتش سيمون فيميه في المدرسة وتعزمي عليها..وكمان طريقة مشيك وطريقة صوتك.. المشي له أصول ... والوقفه لها أصول ..والقعده كمان.. الأكل واشرب له أصول..وكمان الصوت العالي وحش..وبيفكرنا بصوت الحمار..بس بلاش تتكلم بطريقة الوشوشه كمان.. الإعتدال حلو.. أنا مش حاشرح هنا طرق المشي والكلام.. دور عليها إنت.. اتعلم تتدور.. بس عايز أقولك .. ان الإصول دي بتنفع.. من أول المدرسه .. لغاية يوم ما تروح تخطب.. أو يجيلك عريس .. قولي إن شاء الله.. وما تتحرجوش من انكم مش عارفين تتكلموا ولا تقعدوا.. أو خطيبك يسيبك عشان صوتك عالي.. أو خطيبتك تسيبك عشان بتشحتف في المشي

الجمعة، 5 يونيو، 2009

لوحدك

* اجلس لوحدك كل يوم ولو عشر دقـائق.. بلا عمل ولا تليفون وبلا لعب ولا حتى تفكير...فقط صمت ..................صمت ..................صمت............
هسسسسسسسسسسسسسسس...................................
وساعتها كمان حاول تتنفس نفس عميق من الهواء النقي.. وحتشوف الفرق.. ويا سلام لو سمعت مع السكون قطعة موسيقى هـادية . . ولو هـــادية جدا يبقى احسن .. على فكرة فيه موسيقى مخصوص للتأمل ..وممكن تظبط منبه الموبايل على كده.. ميعاد يومي عشان تغمض فيه عينيك .. وتخليها عادة يومية.. تأمل...... بص على اللي حواليك بالراحة وبتأمل.. السحاب مثلا .. كتير وانا صغير لعبت معاه وجريت وراه ، النخله ليه طويله كده .. البحر ده آخره فين.. التأمل ده بيديك أبعاد تانيه.. وبيخلى فكرك يرتقي ..و شـغـّل حواسك .. عندك حواس.. استعملها .. بتشوف .. يبقى لازم تتأمل وتبص حواليك وترصد مناظر جميلة .. كمان لازم تقرا .. أو تحوش جوه ذاكرتك الفوتوغرافية مناظر بعينها تسترجعها لما تعوزها.. سواء في شغل أو في لعب.. بتتكلم .. يبقى لازم تتكلم كلام حلو مع اللي حواليك .. والكلام الحلو حييجي من السمع الحلو.. يعني لازم تسمع وتسمع كتير .. عشان عندك ودنين وفم واحد.. بتشم.. يبقى شغل الحاسه دي في انك تشم روايح حلوه أو تشم الخطر !.. بتتذوق .. يبقى متاكلش أو تشرب أي حاجه خليك ذواقه..كمان اللمس.. حاول أن تلمس كل ما هو حولك .. سواء بيدك أو بمشاعرك.. وفيه حاجه كمان اسمها الحاسة السادسة.. ودي مختلفه من شخص لآخر ومش موجوده عند كل الناس.. لو عندك استعملها..