الأربعاء، 17 يونيو، 2009

الحياة الحلوة

* لا تـُـفسد الجلسه باشياء سخيفة..أو تذكَر الأشياء الجميله في الأماكن الجميلة..أو ماتعكننش يومك.. أو بلاش وانت مبسوط تفتكر حاجة تعكر مزاجك.. أو أجل المواضيع السخيفة لوقت تاني غير وقت الفرح .. أو ماتبقاش بايخ ورذيل وتفسد الحفلة على الناس مثلا وتقول انك لسه جاي من عند صاحبك العيان اللي هما مايعرفهوش وان حالته وحشه..أو تروح تحكي ازاي فلان مات في حادثة بشعة وانت بتبارك لصاحبك اللي لسه مراته مخلفه بيبي .. أو تكون دكتور وتقعد تحكي لخطيبنك عن العمليات الجراحية والتشريح..طبعا ممكن تشاركك.. بس اختار الوقت المناسب.. وكمان راعي شعور غيرك.. بالذات لو قُريب منك.. مالوش لازمة تعمل حفلة عيد ميلاد سيادتك وجاركم عيان أو عندهم ميت.. وبلاش تعزمي زميلتك اللي بتلبس فستان واحد طول السنة ، على ديفيليه ، ده ما يمنعش انك تصاحبيها .. بس بلاش تجيبي معاكي ساندوتش سيمون فيميه في المدرسة وتعزمي عليها..وكمان طريقة مشيك وطريقة صوتك.. المشي له أصول ... والوقفه لها أصول ..والقعده كمان.. الأكل واشرب له أصول..وكمان الصوت العالي وحش..وبيفكرنا بصوت الحمار..بس بلاش تتكلم بطريقة الوشوشه كمان.. الإعتدال حلو.. أنا مش حاشرح هنا طرق المشي والكلام.. دور عليها إنت.. اتعلم تتدور.. بس عايز أقولك .. ان الإصول دي بتنفع.. من أول المدرسه .. لغاية يوم ما تروح تخطب.. أو يجيلك عريس .. قولي إن شاء الله.. وما تتحرجوش من انكم مش عارفين تتكلموا ولا تقعدوا.. أو خطيبك يسيبك عشان صوتك عالي.. أو خطيبتك تسيبك عشان بتشحتف في المشي

هناك 25 تعليقًا:

عاشقة الأحزان يقول...

السلام عليكم


احجز اول تعليق وارجع تانى

عاشقة الأحزان يقول...

السلام عليكم

استاذ محمد

بسم الله ما شاء الله بجد موضوع جميل قووى

قال رسول الله صلى الله عليه وآله وسلم:

* أحبّ للنّاسِ ما تُحِبّ لِنَفسِكَ*

صدق رسولنا الكريم

من المؤلم

من في هذا الزمن الذي كله شجع

ومصلحة وحب التملك

يمتلك تلك الصفة من رسولنا الكريم

زمن الصالحين انتهى اخى الفاضل

لم يبقى سوا زمن لا يمكن تسميه

ربنا يهدى الجميع ويحسوا ولو بجزء بسيط من كلامك



شكرا على الطرح

ومنتظرين الجديد

تحياتي


إيناس

شمس النهار يقول...

يانهار ابيض علي البوست

انا عشان اعلق عايزه بوست لوحدي

حضرتك متكلم علي حاجات بديهيه في الحياة راحت خلاص وراحت ايامها

اللي بينادي بيها دلوقتي بيعتبروه من الاثار

مره كنا بنبارك لبنت صديقه علي الزواج وقاعدين في بيت العروسه
دخلت حماتها وقعدت تحكي علي العريس والعروسه اللي ماتوا مخنوقين بالغاز
وتشرح وتطول

لحد ما صديقتي ماقالت لها ماتصلي علي النبي ياحاجه:)

الناس نسيت الاصول
زي ماحاجات كتير اتنست في الزمن ده

ياريت نتمعن في وصايا الحكيم لقمان

Sweet Violet يقول...

مراعاة شعور الاخرين بقت عملة نادرة

و الاصول ماحدش دلوقتى بيحب يعرف عنها حاجة ..اصلها بقت موضة قديمة

ماما أمولة يقول...

هههههههههههههههههه

بجد بتحصل كتير الحاجات دي

أنا أعرف واحدة في كل مناسبة فرح لازم تبكي وتنكد على الناس

فعلا كل حاجة لها أصول بس فين الناس اللي بتراعيها

تقديري لحضرتك

yoyo يقول...

صباحك سكر

بجد يا أستاذ محمد
البوست رغم بساطته الا انه فيها اصول واساليب حياة اغلبها الناس نسيته ومش بتحاول حتى انها تنفذه
سبحان الله وكان الاصول واداب التعالم بقت موضة قديمة
ولا يعنى لازم نقول الاتيكيت وقواعده عشان الناس كلها تحاول تقلده
ربنا يهدى الحال بقى
لو كل واحد بدا بنفسه هيكون هناك وضع تانى

تسلم يا استاذى العزيز على تلك النصائح الغالية
تحياتى
يويو

عمرو يقول...

أيوه يا صديقنا الحكيم يا طول عذاب جيلنا فى هذا الزمان :)
طيب فاكر حضرتك لما كانوا بيعلمونا نقوم نقف و اٍحنا بنسلم على سيده ؟؟ و نفتح لها الباب و نخليها تعدى الأول ؟؟
طيب فاكر يا باشمهندس لما كانوا بيعلمونا نحترم الأكبر سنا ؟؟
حنفتكر أيه و لا أيه بقى أهو زمان و راح لحاله ..
تقبل تحياتى و تقديرى ..

من غير عنـــوان يقول...

عموووووور

لأ ده إحنا كنا نركب ترام اسكندرية ( ده لو ركبنا درجه أولى عشان التانيه من غير كراسي جلد ولا رفوف للمتعلقات ) المهم ما كانتش المشكله إننا نقوم لواحده ست ولا رجل كبير السن .. إنما لازم تاخد متعلقات الكبار وتحطها إنت فوق الرف .. مايصحش كده يا واد با محمد..ده أبويا اللي بيقول. ....عشان كده يمكن إحنا تربيتنا بتحسسنا بزمن جميل..

مره كده نجتمع سويا لما أكون في القاهره.. بإذن الله تعالى.. ونقعد نفكر لشباب هذا الجيل اللي بيتأخر كل يوم لورااااااا.. أصل هما مش عايزين يتطوروا... وبعدين يقولك إنت مش cool

hager za3bal يقول...

حاجات كتير من كدا فعلا بتحصل والواحد مبيبقاش واخد باله منها..

بجد بوست جميل اوي وواقعي..

تسلم ايديك

mohamed ghalia يقول...

فعلا استاذى درس مهم
أحيانا كلمات بسيطة سخيفة تغطى على كل الأشياء الرائعة
دمت بكل الود

قلب ارهقته الاحلام يقول...

فعلا حاجات مهمة جدا بتغيب عن عقول اغلبنا في معظم الاوقات

ده يمكن بيرجع لحاله التبلد ال الناس بقت عيشاها وعدم إحساسنا ببعض

كل فرد بقت دايرة اهتماماته منحصرة في نقطة بداية مركزها اكيد هو

بجد دايما حضرتك بتجيب التايهة:)

دمت بألف خيرررر

تحياتي ,,,

ماء تشرين يقول...

اوك ياعنى معاك انو الاتكيت والزوق مهم بس ياعنى لو سبنى عشان صوتى عالى ياعنى مش سبب تافه شويه هو شئ ممكن التغلب عليه ياعنى لو ملقاش فايده بقه يبقه ربنا يسهلو

بوست جميل

تقبل مرورى

الجواز و سنينه يقول...

موضوع هايل
و اجمل ما فيه و عجبنى اوى
ان حضرتك الزمت اللى عايز يتعلم الاصول انه يدور عليها
لانه لما يتعب علشان يتعلمها اكيد هايطبقها
لكن اللى مش مهتم اكيد مش هايدور و ساعتها يبقى الكلام خساره فيه
عجبنى كمان ان حضرتك ما اتكلمتش فى حاجات صعبه
يعنى دى بديهيات بس الناس ماباقتش تاخد بالها او مش عايزه تاخد بالها
و الله هو مش كله و فيه ناس مش قاصدها بس فعلا لازم نتعلم او حتى نتأكد من تصرفتنا إذا كانت هيه دى الاصول و لا لاء
رغيت بس ارتحت

صبرني يارب يقول...

لا لا يدوروا ايه

حضرتك مش واخد بالك

احنا حاليا بنعاني مرض الدروس الخصوصيه فى كل حاجه فى حياتنا

اتعودنا نتعلم كده

نجيب حد يدوب لنا شوية علم فى كوبايه ونشربهم ونروح نكبهم على الورقه فى الامتحان
ونطلع زي ما دخلنا


الكلام الى حضرتك قلته تمام اوي

تيته كانت دايما تقول جمله لذيذه اوي

تقول صحب العقل يميز

اهو احنا عايزين نميز




بس والنبى مش كل الصوت العالي زي الحمار

والنبى فى صوت عالي بس حلو
صوت عالي بس بيميز يعنى
ههههههههههههههههههههه

أحــوال الهـوي يقول...

استاذنا الفاضل
سعجت بزيارتك بعج طول غياب و سعدت اكثر بمفرداتك الرائعه في اصول الاتيكيت و الذوق

و لو فكر البعض به لتعلم اصول اللياقة و التعامل
تحياتي

لحظة تأمل يقول...

اوقات بحس ان الحاجات ديه فن
بس فن جميل وسهل نحب كل الناس تعاملنا بيه

بس هى المشكلة زى ما حضرتك قلت فى تعليقك ان كان زمان الحاجات ديه بتتغرس فينا واحنا صغيرين عشان الزرعة تكبر وهى جواها كل الحاجات الحلوة

اتمنى ناس كتير ترجع تدور تانى وتحب تعملها قبل ما تتعلمها

تحياتى دوما

norahaty يقول...

الذوق نعمة !
من عند الله !
تسعدك وتسعد
من حولك.

Manal يقول...

يسعد صباحك على هالبوست

ابصراحة انا بقرأ اللي مكتوب وابتسم ..:)

بوست بسيط ولكنه جميل

عمرو يقول...

أيوه يا ريت و الله نجتمع فى أقرب فرصه ..
حنوضب للموضوع و حنبلغ بعض بيه ..
أيوه بيقولوا علينا مش كووول :))

candy يقول...

ياه
اكتر حاجة مفرحانى فى البوست ده
انى سمعت فيه لغة كنت حاسة أنها بقت من اللغات الميتة
يامين يسمع ويشتاق.....
حتى يشتاق لو مش قادر يعيش.....
بس يحاول....

dina يقول...

اه و الله....اهم حاجة ان الناس تمشى بالاصول.....القواعد و التقاليد اللى فى مجتمعنا(اغلبها)مهم جدا و لازم نلتزم بيه....و فى كلمة كانوا بيقولوها زمان....عيب و مايصحش....لازم نرجع نفكر كدا و نحافظ على اللى باقى فينا من المواريث الجميلة دى...دا ميمنعش بردو ان فى عادات لازم تتفجر على طريقة(انسف حمامك القديم)

عمرو وجيه يقول...

صدقت حقا

كلامك سليم

فعلا فيه ناس نكدية كده بتحب تخليس القعدة غم

و فيه ناس دايما تبص علي نص الكباية الفاضي

معندهمش تفاؤل

و علي فكرة فيه كتير كده

mahasen saber يقول...

دايما مواضبع حضرتك راقيه وتدعو للرقى وده لبعكس نبل شخصيتك

mira يقول...

بوست حلو بجد ودمه خفيف
وانت عندك حق طبعا وما حدش يقدر يعترض على اى كلمه
بس اعتقد ان الناس اللى بتعمل عكس مانت بتقول بتتصرف كدة بتلقائيه ومش ممكن يكون حد قاصد يتكلم فى حادثه او وفاه فى فرح مثلا
اعتقد انها عادات ممكن تكون وحشه وبتضايق الاخرين بس تلقائيه اكتر
تحياتى

حلـم،، يقول...

كلام موزون ياهندسة بجد اسلوب فش فية تكليف بحس اني قاعد بحكي مع صاحبي او اخي دمت بود..حلم..