الخميس، 26 فبراير، 2009

الصداقة

*اللي قال ان مافيش أقوى من رابطة الدم ... غالبا ماكنش عنده صديق وفي.. أنا عندي أصحاب أقرب لي من الأقارب... وعندي تلاته هم أخوتي ( لأن أنا ماعنديش أشقاء رجال) ..حافظ على صحابك .. هما دول اللي تقدر تكلمهم بصراحه ومن غير خوف ومن غير التزامات .. وفي أي وقت وأي مكان ..وتقدر تفضفض لهم.. وهما اللي حيقفوا جنبك لما تعوزهم .. وصاحبك مرايتك.. وقل لي من تصاحب .. أقل لك من أنت.. والمرء على دين خليله... فلينظر أحكم من يخالل..إذا صحابك بيشربوا سجاير.. غالبا حتشرب.. وإذا بيقروا كتب.. غالبا حتقرا زيهم.. والصاحب حتلاقيه جنبك طول العمر..كمان الصديق يؤخذ كما هو.. مش عايز تغير فيه حاجه... لأنك إنت اللي اخترته.. وهو مش مفروض عليك.. وهناك درجات للصداقة .. مش كل صحابك زي بعض .. والزميل غير الصديق.. غير القريب وهكذا.. ولازم تتعلم تحافظ على صحابك..لا تتركهم سنين .. وبعدين ترجع تتدور عليهم.. مش حتلاقيهم.. وتحمل بعض همومهم.. وشاركهم أفراحهم وأحزانهم.. ولو صاحبتك اتجوزت واحد غلس.. تعالي على نفسك انت وجوزك مره كل تلات شهور وزوريها.. وقولي لجوزك معلهش.. اتحمل جوزها الغلس عشان انا مش حينفع أخسر صاحبتي.. والعكس بالعكس.. لازم انت كمان تتحملي زوجات أصدقائه.. كده حتلاقوا لما تكبروا ناس تخرجوا معاهم..ناس تتحاوروا معاهم.. كمان ذكرياتكم واحده .. أحلامكم متشاركه... وده بيدي عمر أطول وألذ للعلاقه.. أنا شخصيا بأحب أصدقائي جدا.. ولا يمكن أخسر واحد منهم...دول.... عشرة عمر... عندي منهم ناس صحاب من 40 سنه...

الخميس، 19 فبراير، 2009

معرفش

* مفيش حاجة اسمها انك تشتغل حاجه أو تعملها من غير ما تقرا عنها..أو تسأل حد خبير فيها ..
نفترض انك دكتور ( طبيب يعني) وقررت تزرع جنينه بيتكم ، أو مهندس واضطريت تطبخ ، أو خريجة علوم واشتغلتي في خدمة العملاء ،، وهكذا ..حتعمل إيه؟؟؟؟ لازم يا تقرا عن الموضوع يا تسأل خبير...ماينفعش نبتدي من الصفر.. ونجرب ونغلط .. وندفع ..وتطلع نتيجه وحشه... طبعا وقبل أي حاجة.. فيه حاجات لها مختصين وما ينفعش نقرب منها.. زي إن إحنا نسلح أساسات مبنى أو نعالج مريض.. وفيه حاجات ممكن نتعلمها سواء لتطوير العمل أو تحسين مهارات الكومبيوتر مثلا... أو أي هوايه جديده...تخيلوا إيه الفرق بين واحد قرر ياخدها عافيه وبالدراع.. وبين اللي دور عن أصول الأشياء وخدها سواء من كتاب أو كورس ،، أو من حد عنده خبرة سابقة وناجح ، يعني على الرغم من انك طبيب بس قررت تزرع يبقى يا تسأل جنايني .. يا تجيب كتاب عن الزراعة.. وهكذا.. أما إنك تروح مقرر فجأه إنك استاذ في الجرافيكس.. وهات يا فوتوشوب.. وتروح تقول لخالك أنا حأعمل لحضرتك لوجو الشركه الجديد.. وتودي الـملف الـمطبعه .. ويطلع غلط خالص.. وشركة قريبك يبقى منظرها مش منظر محترفين.. ويضطر يعيد الكلام ده عند ناس محترفه...شكلك وحش خالص ساعتها... إنما ممكن تجرب في كارت عيد ميلاد لصاحبك ... وهكذا... أنا لقيت ناس كتير عملوا كده أو حاجات زي كده... واحده عملت مهندسه ديكور عشان هي عندها ذوق في الألوان... والحمام نشع على الباركيه اللي بالشئ الفلاني..وخسرت صاحبتها كمان... الخلاصه ماتقولش أعرف وانت متعرفش...

الثلاثاء، 10 فبراير، 2009

sleep on it


* استبيتوا أمركم.. Sleep On It .. الأولى حديث شريف من سيد الخلق.. والثانية مثل انجليزي.. والاتنين نفس المعنى..اللي هو عدم الإستعجال في القرارات الـمهمة.. والنوم قبل القرار.. لأخذ الوقت الكافي.. وده بيريح العقل.. يقوم يجي القرار صائبا نسبيا..زي كده ماناخد نَفَس الأول قبل ما نتكلم ونندم.. وننام ليله واحدة قبل ما ناخد قرار مهم..( هذا لا ينطبق على قرار دخول السينما مثلا).. كل حاجة ولها وزنها... يعني لو عايز تجيب عربية وشبطان في واحده سعرها أكبر من امكانياتك.. لو نمت حتحسبها.. وتصحى الصبح بتقول ما هو أنا مش حاعرف أدفع كل القيمة دي.. وموضوع السلف هم ودين.. يبقى خليني في اللي على قد امكانياتي.. لازم تتعلم ما تخدش قرار بسرعة .. استنى شويه ..خليها لبكره .. لا تنفذ الفكرة إلا لـما تنام وتصحى تاني يوم..تكون هضمت الفكرة وعرفت طريقة تنفيذها... طبعا لو صليت استخاره يبقى أحسن كتير.. لأن الإستخارة كمان هي استئذان رب العالمين فيما أنت مقدم عليه .. يقوم ربنا سبحانه وتعالى يقدم لك الخير.. بس ده مش معناه التردد.. معناه إنك تفكر مرتين في أي قرار.. معناه إنك تستشير كمان.. ما خاب من استشار ..وجمّع الآراء كلها ونام.. وانت نايم عقلك حيفكر.. وحتصحى الصبح متوكل على الله في قرار كويس ان شاء الله.. والإستشارة بتجمع فيها اراء ناس بتحبك وخايفة على مصلحتك.. وده بيساعدك على القرار.. وتاني بأقول ده مش معناه التردد.. أو التأجيل والتسويف.. كل حاجة ولها أهميتها.. وماتقلدش حد في قراراتك.. وما تاخدش قراراتك بعاطفية مبالغ فيها.. وما تحملش نفسك أكتر من طاقتك..واعمل اللي قلبك مرتاح له .. من غير ما تغضب ربنا..