الثلاثاء، 10 فبراير، 2009

sleep on it


* استبيتوا أمركم.. Sleep On It .. الأولى حديث شريف من سيد الخلق.. والثانية مثل انجليزي.. والاتنين نفس المعنى..اللي هو عدم الإستعجال في القرارات الـمهمة.. والنوم قبل القرار.. لأخذ الوقت الكافي.. وده بيريح العقل.. يقوم يجي القرار صائبا نسبيا..زي كده ماناخد نَفَس الأول قبل ما نتكلم ونندم.. وننام ليله واحدة قبل ما ناخد قرار مهم..( هذا لا ينطبق على قرار دخول السينما مثلا).. كل حاجة ولها وزنها... يعني لو عايز تجيب عربية وشبطان في واحده سعرها أكبر من امكانياتك.. لو نمت حتحسبها.. وتصحى الصبح بتقول ما هو أنا مش حاعرف أدفع كل القيمة دي.. وموضوع السلف هم ودين.. يبقى خليني في اللي على قد امكانياتي.. لازم تتعلم ما تخدش قرار بسرعة .. استنى شويه ..خليها لبكره .. لا تنفذ الفكرة إلا لـما تنام وتصحى تاني يوم..تكون هضمت الفكرة وعرفت طريقة تنفيذها... طبعا لو صليت استخاره يبقى أحسن كتير.. لأن الإستخارة كمان هي استئذان رب العالمين فيما أنت مقدم عليه .. يقوم ربنا سبحانه وتعالى يقدم لك الخير.. بس ده مش معناه التردد.. معناه إنك تفكر مرتين في أي قرار.. معناه إنك تستشير كمان.. ما خاب من استشار ..وجمّع الآراء كلها ونام.. وانت نايم عقلك حيفكر.. وحتصحى الصبح متوكل على الله في قرار كويس ان شاء الله.. والإستشارة بتجمع فيها اراء ناس بتحبك وخايفة على مصلحتك.. وده بيساعدك على القرار.. وتاني بأقول ده مش معناه التردد.. أو التأجيل والتسويف.. كل حاجة ولها أهميتها.. وماتقلدش حد في قراراتك.. وما تاخدش قراراتك بعاطفية مبالغ فيها.. وما تحملش نفسك أكتر من طاقتك..واعمل اللي قلبك مرتاح له .. من غير ما تغضب ربنا..

هناك 16 تعليقًا:

ضد التيار يقول...

اشكرك على الموضوع المفيد ده (:

mohamed ghalia يقول...

تعرف لغاية دلوقتى محدش يغرف السبب العلمى للنوم
دمت بكل الود أخى

كيــــــــــــارا يقول...

موضوع بجد مفيد جداااااااااا

هيفدني جدااااااا

mahasen saber يقول...

انا كل زياره لمدونة حضرتك

بستفيد وبستمتع باليى بقرأه

جزاك الله كل خير

والهمك دائما ملكة حسن اختيار مواضيع المدونه

ماما أمولة يقول...

نصيحة رائعة ومجربة

جزاك الله كل الخير

بنت الغربة يقول...

سبحان الله ...انت كنت معايا ولا ايه ؟؟؟
ده بالضبط اللى انا عملته قبل ماخد قرار الاستقاله...
والحمد لله مش نادمانه عليه...
صحيح زعلانه شويه ...بس مش نادمانه ابدا ....
كلامك دايما فى الجون يافندم...
تحياتى

شمس النهار يقول...

صدقني حتي دخول السينما محتاج قرار سليم اختيار الموعد المناسب واختيارالفيلم المناسب والمود المناسب
اي حاجه في الدنيا محتاجه تفكير وقرار
المفروض الانسان مايعملش حاجه كده
لمجرد انه عايز حاجه يعملها او ياخدها يتصرف بدون تفكير وعقل
لأن في الحاله دي بيجد نتيجه عكس اللي حطها في دماغه
والمفروض اننا نعلم الاولاد الموضوع ده من الصغر انهم يفكروا في كل خطوه بهداوه
مع معرفةالفرق بين التريث والتفكير السليم والتردد اللي انا بعتبره مرض

انت تسال والكمبيوتر يجيب يقول...

دعوه
الأخ العزيز/
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق

صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

hager za3bal يقول...

علي فكره عندك حق
موضوعك جميل اوي

تحياتي

norahaty يقول...

السلام عليكم ورحمة
الله تعالى وبركاته
والله ياباشمهندس
انا معاك 50%
وضدك برضة50%
لان ساعات الدنيا فرص
ان لم تغتنمها فى التو
واللحظة ضاعت عليك وقد
يكون خيرها فى غيرها وقد
لا يكون هناك غيرها ابدا!!

norahaty يقول...

هذا فقط لتحيتك
والثناء على حكمتك

لحظة تأمل يقول...

عندك كل الحق
انا من الناس اللى بيحملوا نفسهم اكتر من طاقتهم لما يحبوا ياخدوا قرار مهم
بس فعلا بتفرق كتير لما بتفكر بتانى وبهدوء

تحياتى دوما

بنت الغربة يقول...

شرفنى بزيارتك
لانى عايزة رأيك العاقل فى البوست المجنون بتاعى
تحياتى

♥ ملكة الأحساس ♥ يقول...

السلام عليكم ورحمة رب الاكوان تنيركم..
"
"
موضوعاتك مفيدة عبقة أخي
تساومنا على التفكير والتمعن
"
"
تشبة دكتور عندى بالجامعة
"
دمتِ بهكذا الق
وثقافة

fashkool يقول...

طبعا فى التانى السلامه وفى العجله الندامه وما خاب من استشار ذلك لان الاستشاره تعطى خلاصة تجارب الاخرين
تحايتى

غير معرف يقول...

:)))
Aya M. Ali