كل عام وأنتم بخير

* إياك والعند .. فالحكمة منطق العقلاء.. والعند منطق الجهلاء.. والعند يورث الكفر والعياذ بالله.. خليك مرن.. وبعدين انت بتعاند مين.. بتعاند نفسك الأول.. صالح نفسك .. حتصالح الناس.. اتكلم بعقل وهدوء حتى تتمكن من توصيل وجهة نظرك للآخر.. يقوم ماحدش ينرفزك فماتعندش.. لو قلت آسف مره وحليت المشكله.. حتلاقي الموضوع سهل.. قول ورايا : آسف ... جرالك حاجه.. قوم اتأسف للي مزعله.. وغلطان في حقه وانت في قرارة نفسك عارف انك غلطان.. كمان ماتعنديش مع أبوكي اللي شايف ان العريس ده ماينفعش لسبب أو لآخر .. مش رفض والسلام.. وتقولي باحبه يابابا.. أبوكي عارف مصلحتك..لأنه سبق بخبرته .. وطبعا الأب كمان هنا مش لازم يعند هو كمان على مهر ولا غيره... إنما لما يرفض العريس عشان دين أو أخلاق لازم نسمع..ولازم تتعلم إن العند بيخلي اللي قدامك يعند هو كمان فلا تكن لينا فتعصر ولا صلبا فتكسر.. يعني ماتبقاش خيخه وكمان ما تبقاش صخرة... واسمع... اسمع الرأي الآخر وفكر فيه.. بالراحه... وفيه حاجات لما الأيام يتعدي بنقول لنفسنا ... يـــاه... طيب ده أنا خسرت كتير لما عندت مع والدتي لما كانت بتحب تخليني أفطر قبل المدرسه.. وأنا كنت رافض.. ثم أكتشف إن الفطار ده أهم وجبه في اليوم.. أو لما مدرسي يقول لي إنت محتاج شويه تركز.. أقول أنا ده أنا بأفهم كل حاجة من الإنترنت.. ومش طالبه تركيز... وأعند .. وبعدين أتفضح في إختبار تعيين أو غيره.. مش بأقول نسمع كلام الكبار وخلاص.. بأقول مانعندش.. حتى لو مع صاحبك.. يقولك الفيلم ده حلو ( هو شافه ) وإنت تقول لأ وإنت ما شفتش الفيلم؟؟ طب إزاي... ربنا يهدي سرك...

صحتين وعافيه

* ناكل إيه .. ناكل حاجات طبيعية.. فاكهة وخضار طازج.. اشرب مياه طبيعيه...بلاش مياه غازيه.. بلاش أكل مُصنع ومقرمشات..( عشان كل المقرمشات صناعي وجرب تولعه بعود كبريت.. حيولع عشان هو مش أكل أصلا) ..بلاش شوربه صناعيه مكعبات و رقائق ذُره مُصنعه عشان في الخارج بطلوهم ( بيجيبوا الـمرض الوحش).. ولو جعان في الشغل أو الكليه.. هات موز وخيار.. برتقال أو خس...عايز أقولك إن ربنا سبحانه وتعالى خلق لنا حاجات كتير طبيعيه جميله جدا.. واحنا سيبناها ومسكنا في الصناعي..ورحنا نحط مايونيز وكتشب وهوت صوص على الأكل. إنت عارف هما بيحطوا الإضافات دي على الأكل ليه.. عشان هو أصلا مش حلو...عمرك فكرت تزود شويه سكر على المانجه مثلا.. عايز أقولكم إنه في الخارج دلوقت مهم جدا إنك تدور على أكل طبيعي بدون مبيدات.. وياسلام لو طازه .. لسه قاطف نعناع من الجنينه.. جرب تزرعه في شاليه في البلكونه.. له طعم تاني.. المهم كمان الأكل الحراق جدا ضار جدا.. واسأل أي طبيب.. وكمان مواعيد أكلك مهمه و طريقة أكلك.. مهمة جدا ..لازم تفطر كويس جدا جدا.. وتتغدى كويس جدا .. وتتعشى أقل حاجه.. طبعا الآيه دلوقت معكوسه.. كل شاب روش فاهم انه شطاره انه مايفطرش.. ويدبها في العشا.. لعلمك بأه في الخارج..تقريبا مافيش أكل بعد الساعة 8 بالليل.. عشان جسمنا بيفرز ميلاتونين ليلابيقلل من القدره على الهضم.. وأدرنالين الصبح بيساعد على الهضم... وفيه رجيم مبني على الفكره دي.. بلاش الشباب ( على الرغم من الكرش وعيوبه ) .. خلينا مع البنات .. عشان ما تشتكيش بعد كده من انها طخينه.. انتم احرار.. أديني قولت .. واسألوا ورايا أي دكتور ...أو واحد خواجه حتى ...

اتأخرت عليكم؟

* الـمرجعيه.. يعني إيه... ماهو مرجعك.. ماهو الشئ اللي زي الضمير كده بيكون مرجعيه لك.. يحكم تصرفاتك..يخليك بتحافظ على فعلك.. وتحب النجاح في عملك.. وتبغى السعاده.. ياترى الدين.. يا ترى الضمير... يا ترى الخوف... ياترى السمعه... وسمعة مين.. سمعتك ولا سمعه والدك.. ياترى بتتصرف عشان الناس تعجب بيك وخلاص.. ولا بتتصرف عشان ترضي ضميرك وغرورك .. وياترى هل مجرد إرضائك لضميرك مثلا كافي.. ولا لازم كمان تصرفك ده يرضي دينك... وياترى عشان حضرتك مبسوط من اللي بتعمله مش مهم باقي الناس... وياترى لو صاحبك الوحش أو البنت اللي عايز تخطبها مالهاش مرجعيه .. حتصاحبه لسه وحتخطب البنت... يعني ما هو لو عمل مصيبه أو الخطيبه عملت عمل لا يرضيك ... ساعتها .. حترجع لمين.. حترجع لمين تحكّمه.. تاخد رأيه.. ينصح الطرف اآخر أو ينصحك إنت لو إنت الغلطان... طيب وإيه أهميه ده.. أقول لك... لما تعرف مين أو إيه مرجعيه اللي انت بصدد التعامل معاه.. حيخلي الأمور أسهل .. وأوضح.. حتخليك عارف إن ممكن ضميره يرجعه لعقله.. أو دينه يخليه يتقى الله معاك في جوازكم.. أو أهلها حيفهموها الغلط من الصح.. بص.. الحكاية مربوطه بمواضيع كثيره.. عايزك تفكر في الموضوع ده.. وفكر لو إنت سلفت حد فلوس... ( وإنت مثلا شايف إنه محتاجها) قام مارجعش الفلوس دي.. حتقول عوضي على الله لإنك مش لاقي له كبير ترجعله.. طيب الفلوس ومقدور عليها... طيب لو سلمت حد حياتك... مصيبه لو ضيعها.. يبقى لازم ندور على أصل اللي بنتعامل معاه عشان إلى حد ما نلاقي حد يرجعه عن غلطه... لو غلط..ومافيش أحسن من إن يكون الدين الصالح هو المرجع.

كل عام وأنتم بخير

* ماتبصش لجنينة غيرك إنها أحلى من جنينتك.. أو لطبق جارك في المطعم إنه أطعم وألذ من إختيارك..ولا لزوجة صاحبك إنها أشطر من مراتك.. لأن انت اللي زرعت جنينتك .. وانت اللي شاورت على طبقك في المطعم .. ومراتك من اختيارك.. فسيب جارك في حاله.. وماتبصش للراجل في أكلته.. وربنا يبارك لصاحبك في مراته.. وازرع جنينتك كويس.. وارضى ( إرض).. ارضى بمكتوبك.. واتعلم ازاي تتمتع بطبقك اللي بتحبه.. لإن كمان يمكن الراجل اللي جنبك في المطعم اختار طبق شكله حلو بس من بره.. وهو عباره عن لحمه بالبرتقال وانت عمرك ما حبيت هذا الطعم.. انما هو بيحبه .. وانت بتحب الملوخيه، ومراته يمكن شاطرة قدامك بس.. وفي البيت بتخليه يغسل الصحون..فماتاخدش بالمظهر... وخلي عندك رضا بقدرك... وده طبعا مع مراعاة إنه في شجاعة بجوار القناعة وحكمة بجوار الإتنين... وعموما أنت لن تستطيع الحصول على كل شئ... فأنا رأيي إنك تستمتع بما عندك.. وحاول تخلي دنيتك بهجه ودينك منفعة..و لا تحاول ان تتساوى مع شخص ما، الرضا مفتاح السعادة .. وحولك الكثير من الناس لا يملك نصف ما تملك، وكفاية الصحه والستر.. آه لو تعرف قد إيه مهمه الصحه والستر.. طبعا مش حادخلك في كلام فلسفي.. انما الرضا مهم.. لو حتى على شويه فول وطعميه.. المهم تاكلهم بنفس.. ويوم ما ترضى.. هو يوم سعدك.. ماتبصش لغيرك.. ما تتطلبش كتير.. ما تتوقعش كتير.. طبعا ده جنب العقل والطموح والإراده.. عشان ما يبقاش كلام انهزامي.. لإن الإنهزاميه هي أهم طرق الفشل.. انت ممكن تكون انهزامي بمجرد عدم استمتاعك بأي حاجه.. وده بيجر وراه .. كم من الشقاء..

أتنين بواحد

* الـمقابلة .. لـما تقابل حد.أولا يفضل انك تعرّف نفسك..لأنه جايز مش فاكرك..( إلا لو معرفة قوية أو صديق)وإنت كده بتفيده وبتفيد نفسك وتزيل الحرج.. وطبعا الصغير في السن أو الوظيفة هو اللي يبدأ بتعريف نفسه وهو كمان اللي يبدأ بمد إيده.. ولو انت راجل ما تمدش ايدك بالسلام لواحده ست..لأن بعض الستات بتتضايق من السلام باليد.. عشان ما يكونش فيه احراج.. إنما لو هي مدت إيدها عشان تسلم.. خلاص سلم ... إنما مش لازم تحرجها.. وترجع إيدك وراك وتقول أصلي ماباسلمش.. لإنه ثابت عن حبيب الله وحبيبنا صلى الله عليه وسلم أنه نهى عن تصفير الوجوه ...( أي إحراج الناس) ...يبقى سلم طالما هي مدت إيدها ... كمان السلام لازم يكون قوي وبه حميميه.. مش مد إيد ميته بدون روح... وتشد على إيده بالمعقول لو راجل.. ولو ست وبتسلم يبقى تاخد إيدها بأدب وترفعا لفوق تقديرا لها... ندخل على المقابله تقعد في المكان المحدد .. لو حيعزموا بمشروب يبقى نشرب ولو مجامله.. مش لازم أطلب فيروز كمترى.. إنت مش في كافيتريا.. كمان لو المقابلة لأول مرة ماتطولش في القعده.. أو الزياره.. ولازم تعرف الأول ياترى الل بأزوره عنده وقت ولا وراه مشوار.. ماتبقاش تقيل.. واتعلم امتى تستأذن من المجلس.. ولو القعده حلوه وعند صحابك ماتخليش دمك تقيل وتروح قايم مره واحده... كمان ما ينفعش أروح لناس وأقعد أتفرج على الماتش أو تروحي تتفرجي على المسلسل... وتسيبي الدنيا... وفي مكان تاني من الكتاب حتلاقي الكلام عن المقابله الرسميه سواء للشغل أو للتقدم لعروسه.. ما تروحش تخطب وفي بؤك لبانه !! ومش لازم تلبسي شبشب بصباع أول مره حماتك حتشوفك..
* الجواب بيبان من عنوانه .. يعنى حافظ على مظهرك وكنّ مستعد دائما للقاء أي شخصية أو الذهاب في أي مكان..بدل ما تتحط في موقف ما تتحرج من لبسك أو انك مش عامل حسابك ومبهدل.. ولبسك مش لازم يكون غالي .. المهم متناسق ولايق عليك..نظيف ومغسول ومكوي.. كمان نظافة الحذاء مهمة وياريت تلمعه..ولما تشتري حاجة جديده اعمل حساب ازاي حتليق على القديم وما تعملش زي صاحبي اللي كان بيشتري كل طقم بس لايق على بعضه فلما القميص مايكونش مكوي ما يعرفش يلبسه على البنطلون التاني.. مهم كمان يكون معاك منديل قماش أو ورق مش مهم.. عشان ماتتكسفش .. لو عطست بشده وانت في مقابلة مهمه .. وماكنش معاك منديل..ساعتها تقول ياريت ..حاجات كلها ممكن تقول عليها هايفة ومش حتعرف قيمتها إلا لما تجربها،، وأحلى ألوان هي ألوان الطبيعه .. ازرق السما.... وبيج الرمال.. بني الجبال.. وأخضر الشجر ..والبس الألوان اللي بتحبها .. وبتليق عليك.. وبتديلك طاقة أو بالبلدي بتخليك منتعش وسعيد.. وياسلام لو القماش قطن طبيعي ، كتان ..أو صوف .. المهم بلاش الألياف الصناعية.. عشان مضرة جدا وبتتطلع ريحه وحشه وبتجيب حساسية وتخليك تهرش ومهما حطيت من مزيل عرق مافيش فايده بالعكس ده بيزود الريحة..وخلي لبسك متوازن مع بعضه.. يعني ماينفعش قميص غالي وبدلة حلوة وبعدين تلاقي الحزام متاكل ولونه رايح ..أو حاطط في القميص قلم جاف بلاستيك فرنساوي أو بيك ..وانت لابس بدله كريستيان ديور..هاتلك ساعة معقولة وقلم كويس عشان لو رايح تعمل مقابلة لازم تعرف ان ده بيفرق..

رجعنا

* اعمل ما عليك من واجبات قبل أن تتطالب بما لك من حقوق.. كلمه أو حكمة مأثوره كتبهالي أبويا زمان في الأوتوجراف.. ويومها زعلت منه ! لأن كل أصحابي أهاليهم كتبوا لهم كلام جميل..زي أتمنى لك مستقبلا باهرا وغيرها ، أما أبويا..كتبلي :اعمل ما عليك من واجبات قبل أن تتطالب بما لك من حقوق.. يمكن مافهمتش وقتها..بس لما مات (رحمه الله) فهمت ليه كتب لي كده..لإن ده انعكس على كل تصرفاتي في حياتي.. وانت لـما تعمل اللي عليك..حتاخد اللي لك..ماهو مش ممكن تاخد من غير ما تعمل.. والحكاية دي بترضيك ..وتخليك تعرف تنام.. لإنك خلصت الواجب اللي عليك.. صحيح متعبه لو الآخر ماعملش اللي عليه.. لكن انت رضيت ضميرك.. وبقيت محترم.. على الأقل قدام ربنا وقدام نفسك..ولا تنتظر شكرا من أحد..على الرغم من ان الشكر واجب.. وانت لازم تشكر الناس عشان تعرف تشكر ربنا..لكن لـما تعمل حاجة لحد ما تستناش شكر منه .. وساعتها حيكون نيتك وهدفك أحلى كتير من انك تستنى كلمة شكر.. طبعا ده مايمنعش انك تقول متشكر لكل حد عملك حاجة ولو صغيره.. لأن ده بيزود مكانتك .. وتخيل انك بشكرك لهذا الشخص اسرته.. وبعدم انتظار شكر من حد أحرجته .. وفي الحالتين انت الأقوى والأصح.. وكمان كده حتكون طبقت المثل المهم اللي بيقول : قدم السبت تلاقي الحد ..يعني لما تشكر الناس..حيشكروك..ولو خدمتهم حيخدموك..يعني لو عايز ان والدك يسمح لك بالخروج الأسبوع القادم .. حاول تقعد معاه الاسبوع ده تتفرجوا على التليفزيون سوا .. أو تساعد مامتك في البيت ( على فكره ده مش نفاق ولا مسح جوخ ) ، إنت بتعمل كده عشان بتحبهم...

لأني بأحبه أو بأحبها

سؤال

هل تعتقد إنه اللي بيحب شخص لازم يكون اختاره وأحبه من بين بقيه ال 80 مليون...
* نعم *لا

هل صح إن الواحد يعتقد إنه هو ده الوحيد اللي كان ممكن أحبه...
وماينفعش حد تاني خــــــالص...
* نعم *لا

أو بمعنى تالت: إحنا اتخلقنا لبعضنا...وإن ده توأم روحي ومش حيجي غيره
* نعم *لا

أو رابع: لو طلع إن اللي حبيته ده مثلا مرتبط ياترى أكمل؟؟
* نعم *لا

مش من نفس المستوى التعليمي أو الثقافي أو العلمي
* نعم *لا

بدون أصل أو مش متربي...( مش قصدي فقير ولا أهل بسيطه )

* نعم *لا

أو على غير ديني..
* نعم *لا


أو أخلاقه مرفوضه عموما.. أو متزمت جدا...
متزمت دي مش راجعه على الدين قصدي مبالغ في الفعل
* نعم *لا


هل مفروض أقول إنه خلاص هو ده وبس ومش حيجي غيره... لأني بأحبه أو بأحبها ؟؟؟؟
* نعم *لا

هل لرأي الأسره أهميه في إختيارك أم لا
* نعم *لا وطبعا لأي مدى
____________________
الكلام ده سواء لولد أو بنت

ولو سمحتم عايز رد صريح مقنع بعد تفكير وشكرا على وقتكم وأسيبكم شويه أجازه

أمنياتي