الاثنين، 9 نوفمبر، 2009

صحتين وعافيه

* ناكل إيه .. ناكل حاجات طبيعية.. فاكهة وخضار طازج.. اشرب مياه طبيعيه...بلاش مياه غازيه.. بلاش أكل مُصنع ومقرمشات..( عشان كل المقرمشات صناعي وجرب تولعه بعود كبريت.. حيولع عشان هو مش أكل أصلا) ..بلاش شوربه صناعيه مكعبات و رقائق ذُره مُصنعه عشان في الخارج بطلوهم ( بيجيبوا الـمرض الوحش).. ولو جعان في الشغل أو الكليه.. هات موز وخيار.. برتقال أو خس...عايز أقولك إن ربنا سبحانه وتعالى خلق لنا حاجات كتير طبيعيه جميله جدا.. واحنا سيبناها ومسكنا في الصناعي..ورحنا نحط مايونيز وكتشب وهوت صوص على الأكل. إنت عارف هما بيحطوا الإضافات دي على الأكل ليه.. عشان هو أصلا مش حلو...عمرك فكرت تزود شويه سكر على المانجه مثلا.. عايز أقولكم إنه في الخارج دلوقت مهم جدا إنك تدور على أكل طبيعي بدون مبيدات.. وياسلام لو طازه .. لسه قاطف نعناع من الجنينه.. جرب تزرعه في شاليه في البلكونه.. له طعم تاني.. المهم كمان الأكل الحراق جدا ضار جدا.. واسأل أي طبيب.. وكمان مواعيد أكلك مهمه و طريقة أكلك.. مهمة جدا ..لازم تفطر كويس جدا جدا.. وتتغدى كويس جدا .. وتتعشى أقل حاجه.. طبعا الآيه دلوقت معكوسه.. كل شاب روش فاهم انه شطاره انه مايفطرش.. ويدبها في العشا.. لعلمك بأه في الخارج..تقريبا مافيش أكل بعد الساعة 8 بالليل.. عشان جسمنا بيفرز ميلاتونين ليلابيقلل من القدره على الهضم.. وأدرنالين الصبح بيساعد على الهضم... وفيه رجيم مبني على الفكره دي.. بلاش الشباب ( على الرغم من الكرش وعيوبه ) .. خلينا مع البنات .. عشان ما تشتكيش بعد كده من انها طخينه.. انتم احرار.. أديني قولت .. واسألوا ورايا أي دكتور ...أو واحد خواجه حتى ...

هناك 11 تعليقًا:

ماما أمولة يقول...

معلومات جيدة ومفيدة

جزاك الله خيرا

موناليزا يقول...

نحتاج من آن لاخر للتذكرة فعلا
مشكووور جدا على هذا الموضوع

صبرني يارب يقول...

تمام الله ينور عليك

بنقول ونعيد يا استاذنا بس الى يفهم

والعيال والله على رايك عاملنها شطاره وروشنه

candy يقول...

كمان احب اضيف حاجة لسة قرياها مؤخرا ليها علاقة بالموضوع
أن الأكل كمان بيأثر على الحالة النفسية أكتر ماحنا نتوقع
الأكل الطبيعى والصحى واللى فى مواعيده ليه تأثير رائع على الحالة النفسية
فى حالات خطيرة من الأكتئاب حلها بس فى تنظيم مواعيد الأكل وكميته ونوعه
ميرسى على الموضوع

فطيمة يقول...

السلام عليكم : كلامك صحيح و مفيد و هو النظام المتبع عندنا في البيت العشاء يكون خفيف... مع التركيز على الخضر و الفواكه في وجبات الاكل اليومية ايضا بالنسبة للحوم فالدجاج و السمك افضل من لحم الخروف اما كلامك عن النعناع فاذكر اني كنت امر في الماضي بايام صعبة اثناء الدراسة مرض والدي و امور اخرى فقرات ان رؤية النبات الاخضر تذهب الحزن فتعمدت اني كل ما احضر شاي اجلس مطولا في الحديقة و بالفعل كنت ساعتها اشعر بالراحة .فكل شيء من الطبيعة مفيد و صحي مثل ما قلت .
مع تحياتي لك و لجميع شعب مصر الطيب

أحــوال الهـوي يقول...

انت و احشني جدا
بنصايحك الجميله و رؤيتك للمشاكل و القضايا بوجهة نظرك الناضجه الواعيه

و كل اللي قلته مش محتاج حد يسال بعده لانك مرجع ليس بعده سؤال
المشكله ان الفاست فودز اصبح من ثقافة التمدين اللعينه لدي الشباب
مما ادي للسمنه و البدانه

تحياتي

واحد من العمال يقول...

صحتين وعافيه فعلاً يا باش مهندس
والغريب أن مستثمرينا متأخرين جداً عن زملائهم فى الخارج
ومفيش عندهم غير الصناعات الغذائبه المضاف عليها طبعاً المواد الحافظه
وبدل مايعملوا لنا مصانع استراتيجيه هامه تضيف للبلد ككل
وكفايه عليهم مصانع الشيبسى والمقرمشات وكل ماهو ضار
ومصلحتهم فوق الجميع وفوق المصلحه العامه
بكده يبقى دينهم هو الربح وربهم للأسف هو الدولار
فعلاً العوده الى كل ما هو طبيعى أفضل
ويسقط مستثمرى الهيافه والشيبشى والمقرمشات

ودمت بخير حال

Dr Ibrahim يقول...

كلامك تمام و100% يا باش مهندس ولسه بالأمس كاتب حول نفس الموضوع وفيه وجهة نظرى ووجهة نظر طب المجتمع والصحة العامة من هنا

تحياتى لك..

mohamed ghalia يقول...

ربنا يجازيك كل خير يا استاذى على معلوماتك القيمة

اقصوصه يقول...

ما في احلى من التغذيه السليمه

شكرا ع الافاده :)

mahasen saber يقول...

من غير ما نسأل اكيد كلام حضرتك عين العقل

كله تمام جدا بس المايونيز انا من عشاق سلطة الجزر بالمايونيز
هو مضر غير انه بيتخن وانا اعرف كدا كويس

بس مضر معقول