الخميس، 26 فبراير، 2009

الصداقة

*اللي قال ان مافيش أقوى من رابطة الدم ... غالبا ماكنش عنده صديق وفي.. أنا عندي أصحاب أقرب لي من الأقارب... وعندي تلاته هم أخوتي ( لأن أنا ماعنديش أشقاء رجال) ..حافظ على صحابك .. هما دول اللي تقدر تكلمهم بصراحه ومن غير خوف ومن غير التزامات .. وفي أي وقت وأي مكان ..وتقدر تفضفض لهم.. وهما اللي حيقفوا جنبك لما تعوزهم .. وصاحبك مرايتك.. وقل لي من تصاحب .. أقل لك من أنت.. والمرء على دين خليله... فلينظر أحكم من يخالل..إذا صحابك بيشربوا سجاير.. غالبا حتشرب.. وإذا بيقروا كتب.. غالبا حتقرا زيهم.. والصاحب حتلاقيه جنبك طول العمر..كمان الصديق يؤخذ كما هو.. مش عايز تغير فيه حاجه... لأنك إنت اللي اخترته.. وهو مش مفروض عليك.. وهناك درجات للصداقة .. مش كل صحابك زي بعض .. والزميل غير الصديق.. غير القريب وهكذا.. ولازم تتعلم تحافظ على صحابك..لا تتركهم سنين .. وبعدين ترجع تتدور عليهم.. مش حتلاقيهم.. وتحمل بعض همومهم.. وشاركهم أفراحهم وأحزانهم.. ولو صاحبتك اتجوزت واحد غلس.. تعالي على نفسك انت وجوزك مره كل تلات شهور وزوريها.. وقولي لجوزك معلهش.. اتحمل جوزها الغلس عشان انا مش حينفع أخسر صاحبتي.. والعكس بالعكس.. لازم انت كمان تتحملي زوجات أصدقائه.. كده حتلاقوا لما تكبروا ناس تخرجوا معاهم..ناس تتحاوروا معاهم.. كمان ذكرياتكم واحده .. أحلامكم متشاركه... وده بيدي عمر أطول وألذ للعلاقه.. أنا شخصيا بأحب أصدقائي جدا.. ولا يمكن أخسر واحد منهم...دول.... عشرة عمر... عندي منهم ناس صحاب من 40 سنه...

هناك 27 تعليقًا:

Sweet Violet يقول...

طبعا معاك حق فى كلامك كله

لكن للأسف الصداقه بقت عمله نادرة جدااا فى هذا الزمن

و كتير قوووى الواحد كان فاكر ان بعض الاشخاص اصدقاء لكن طلعوا عكس كده

ربنا يديم عليك نعمه الصداقه

حروف (دلو مرة ثانية وجرح ثاني سابقا) يقول...

كل الكلام دة صح بس فين الاصحاب انا رايء زي ضد بقت عملة نادرة
دمت بالف خير

بنت الغربة يقول...

تحياتى ليك على كلامك الجميييل ده
بس كل واحد وليه ظرووفه
انا صعب قوى احافظ على صداقه طول عمرى.....
دى مشكلتى الحقيقيه انى مش عارفه اكمل صداقه مع حد مده طويله..
وانا صغيرة اتنقلت كتيير فى مدارس فى السعوديه..
واصحابى اللى قعدت معاهم كتيير شويه هم ايام الكليه...
ودلوقتى بقالى كام سنه بره مصر ...ماعرفش عنهم حاجه..
واصحابى اللى عرفتهم بعد ماتجوزت ورحت السعوديه تانى مع الباشا ...برضه من ساعة ماجيت دبى ...بنتكلم على الميل بس..
وصدقنى ماعرفش اذا كنت هاكمل هنا فى دبى السنه الجايه ولا لأ؟؟؟؟
وبرضه مش عارفه لما هارجع مصر هلاقى اصحابى تانى ولا لأ؟؟؟؟؟
ولو رحت بلد تانيه هالاقى اصحاب هناك ولا لأ.....
فعلا حالتى تحزن....
تحياتى

شمس النهار يقول...

فعلا الصداقه دي شئ غالي جدا
انا عشان كنت بنت واحده
كنت دايما ادور علي اخت بين البنات
والحمد لله انا عندي اصدقاء نص الشعب المصري
بس ليه اتنين فقط المقربيين جدا جدا
واختيار الصديق ده لما نكون كبار نقدر علي الاختيار لكن الصداقه المبكره اللي بتكون من الطفوله بتكون احسن الصدقات عشان الفطره هنا اللي بتختار الصديق الطفل بيختار الصديق اللي بيرتاح له فقط وبيكون اختيار سليم
وبتدوم الصداقه دي العمر كله
ولما الانسان بيكبر بيقابل ناس علي طول الحياه بنختار اصدقاء بنتغش في ناس كتير ومابيدمش غير الصداقه الحقيقيه اللي هي حب في الله

عاشقه وغلبانه يقول...

انا ماعنديش ولا صديق بدرجه القرب دي
يمكن عندي الدرجه اللي اقل شويه
يمكن علشان سري بقي جوايا مش بيخرج لحد مهما كان

ربنا يديم فضله عليك

mohamed ghalia يقول...

الصداقة دى فعلا حاجة روعة
معاك حق
دمت بكل الود

من غير عنـــوان يقول...

****** شكرا للجميع

يارب تديم صدقاتكم..

أمنياتي

عاشقه الرومانسيه يقول...

الله
البوست جاى على هوايا قوى
دى اول زياره
وانا بحب اصدقائى جدا ولى اصدقاء من سنى واعرفهم عمرى كله
والجواب بيبان من عنوانه
حضرتك
برج القوس
اسكندرانى
يعنى الحال من بعضه

عمرو يقول...

من أكثر الأمور فى الحياة فزعا أن يكتشف الاٍنسان فجأه أنه وصل لمرحلة عمريه متقدمه و ليس فى حياته صديق و لو صديق واحد
أوافقك يا صديقى الحكيم فيما قلت و لكن بجد الصداقه فى هذا الزمن صارت شديدة الندره و تحفها الكثير و الكثير من المحاذير
و لا أجمل فى رأيى المتواضع من الصداقه المنزهه عن كل غرض و اللى لا يدخل فيها عنصر التعامل المادى بأى شكل من الأشكال
أشكرك يا صديقى على كلماتك و أفكارك القيمه و دامت صداقتك الراقيه للجميع

norahaty يقول...

فيما أعتقد ياباشمهندس
من يعرفك يحاول
الا يخسرك ابدا
وأكيد اكيد
اصدقائك
مثلك

كيــــــــــــارا يقول...

الصداقه عمله نادره بصراحه ربنا اهداني اصدقاء فعلا كنوز

واولهم اغلي انسانه في الدنيا :)

أحــوال الهـوي يقول...

رب اخ لم تلده امك

تحياتي

من غير عنـــوان يقول...

** نورا

أنتم الأحسن

fashkool يقول...

العزيز من غير عنوان .. تحياتى
الصداقه شيئ جميل والاجمل منه ان تجد الصديق الصدوق

لا نستطيع ان نستغنى عن اصدقائنا وهم مكملين لنا ونحن نكملهم ونأخد منهم ما ينفعنا ونعطيهم ما ينفعهم.

ومصاحبة الصاحب على حاله امر جيد آخذ منه ما يتوافق معى واعطيه ما يتوافق معه والدنيا تمشى وتبقى زى الفل

ممكن تبقى صاحبى بس انا منوفى

MR.PRESIDENT يقول...

مفيش طبعا احلي من الصداقة .. بس طبعا الجواز احلي .. واحلي واحد تصاحبه هيا زوجتك .. بس لما تكوني انتوا الاثنين واحد .. بعد زوجتك صحبك اللي ما تفترقش معاه ابدا مع بعض علي طول .. بعدهم ما تصحبش حد ومتأمنش سر لحد .. وعلي فكرة السر اللي يطلع لحد ميباقش سر

من غير عنـــوان يقول...

فشكول المنوفي

احنا صحاب من زمـــان

صفـــــاء يقول...

.
ربنا يديم عليك نعمه الصداقه

انا فعلا مبحسش انى قويه وقادرة اعدى اى مشكله غير بيهم ومعاهم

والحمد لله ربنا رزقنى بأصدقاء اقل ما يقال عنهم انهم احسن اصدقاء فى الدنيا
.

Soul.o0o.Whisper يقول...

حضرتك كلامك صح جدااااااااا

و صدقنى فعلا أحلى أصحاب لقيتهم فعلا
هما أصحاب الخير و الحق

فعلا حب صافى
صحبة صالحة
مش يخافوا يواجهوك بغلطك
و أنت حاسس بالامان معاهم
و عارف انك لو غلطت هيقولولك انت غلطت فى كذا و لاززم تصلحه
مش يقفوا معاك صح و غلط

دايما ياخدوا بإيدك
تفضفض لهم من غير اى خوف
و تسمع منهم بكل ثقة



بجد أنا عندى صحباتى دول بالدنيا
دول لو طلبوا نفسى أعطيهالهم بنفس راضية



ربنا ما يحرمنى منهم يارب
و لا يحرم حضرتك من أصحابك أبدا





دمت بود

mahasen saber يقول...

الدنيا لسه بخيريا ضد

والصداقه الحقيقيه هيا بلسم لمصاعب ومشاق الحياه

بوست رائع كمان من ابداع حضرتك

وفاء بركات يقول...

السلام عليكم
ما أجمل الصداقه وماأصعب ان تجد الصديق الصدوق في هذا الزمن
كل ما أتمناه إن ربنا يديم المعروف بينك وبين أصدقائك ويبعد عنكم شر
عيون الناس وشر الفتن ..
دمت بصحه وسعاده

واحد من العمال يقول...

السلام عليكم ورحمته وبركاته

فعلاً الصداقه شىء مفيش أجمل منه
بس ألا ترى أنها عمله صعبه
أنا لى زملاء كثيرين
لكن أصدقائى الحقيقيين
أتفرقت بهم سبل الحياه ونادراً ما نلتقى
حكمل بعدين أحسن الفجر على وشك
يمكن أكمل كلامى لما أرجع أو فى وقت أخر

ودمت فى حفظ الله وأمنه

صبرني يارب يقول...

انا ما قريتش البوست عشان مش شايفه قدامي عايزه انام

بس شوفت الخبر الحلو عن استاذ عمرو قلت لازم اجي ابارك

الف مبرووووووك لسلمى وربنا يتم لها على خير
وهو الى يخلف البنات كده يعجزوه بدري على راي بابا

وان شاء الله السنه الجايه زي النهارده تغنيلك اغنية جدو يا جدو يااحسن جد

تحياتي وربنا يبارك لهم وعليهم ويجمع بينهم بكل خير

من غير عنـــوان يقول...

** صبرني يا رب

متشكر وعقبال عندكم...

أمنياتي

Sweet Violet يقول...

مبروووووووووووك لسلمى وربنا يتمم لها على خير و يجعل كل أيامها سعاده وفرح ويرزقها بالذريه الصالحه يارب (:

وفاء بركات يقول...

الف مبروك لسلمي وربنا يهدى سرها
وتعيش حياه زوجيه سعيده وتفرح بأولادها
تحياتي

الصداقة يقول...

الصداقة الحقيقة التي هي بمعنى
الصداقة كنزن لا يفناء

غير معرف يقول...

الصداقة الحقيقة التي هي بمعنى
الصداقة كنزن لا يفناء