الأحد، 23 أغسطس 2009

أتنين بواحد

* الـمقابلة .. لـما تقابل حد.أولا يفضل انك تعرّف نفسك..لأنه جايز مش فاكرك..( إلا لو معرفة قوية أو صديق)وإنت كده بتفيده وبتفيد نفسك وتزيل الحرج.. وطبعا الصغير في السن أو الوظيفة هو اللي يبدأ بتعريف نفسه وهو كمان اللي يبدأ بمد إيده.. ولو انت راجل ما تمدش ايدك بالسلام لواحده ست..لأن بعض الستات بتتضايق من السلام باليد.. عشان ما يكونش فيه احراج.. إنما لو هي مدت إيدها عشان تسلم.. خلاص سلم ... إنما مش لازم تحرجها.. وترجع إيدك وراك وتقول أصلي ماباسلمش.. لإنه ثابت عن حبيب الله وحبيبنا صلى الله عليه وسلم أنه نهى عن تصفير الوجوه ...( أي إحراج الناس) ...يبقى سلم طالما هي مدت إيدها ... كمان السلام لازم يكون قوي وبه حميميه.. مش مد إيد ميته بدون روح... وتشد على إيده بالمعقول لو راجل.. ولو ست وبتسلم يبقى تاخد إيدها بأدب وترفعا لفوق تقديرا لها... ندخل على المقابله تقعد في المكان المحدد .. لو حيعزموا بمشروب يبقى نشرب ولو مجامله.. مش لازم أطلب فيروز كمترى.. إنت مش في كافيتريا.. كمان لو المقابلة لأول مرة ماتطولش في القعده.. أو الزياره.. ولازم تعرف الأول ياترى الل بأزوره عنده وقت ولا وراه مشوار.. ماتبقاش تقيل.. واتعلم امتى تستأذن من المجلس.. ولو القعده حلوه وعند صحابك ماتخليش دمك تقيل وتروح قايم مره واحده... كمان ما ينفعش أروح لناس وأقعد أتفرج على الماتش أو تروحي تتفرجي على المسلسل... وتسيبي الدنيا... وفي مكان تاني من الكتاب حتلاقي الكلام عن المقابله الرسميه سواء للشغل أو للتقدم لعروسه.. ما تروحش تخطب وفي بؤك لبانه !! ومش لازم تلبسي شبشب بصباع أول مره حماتك حتشوفك..
* الجواب بيبان من عنوانه .. يعنى حافظ على مظهرك وكنّ مستعد دائما للقاء أي شخصية أو الذهاب في أي مكان..بدل ما تتحط في موقف ما تتحرج من لبسك أو انك مش عامل حسابك ومبهدل.. ولبسك مش لازم يكون غالي .. المهم متناسق ولايق عليك..نظيف ومغسول ومكوي.. كمان نظافة الحذاء مهمة وياريت تلمعه..ولما تشتري حاجة جديده اعمل حساب ازاي حتليق على القديم وما تعملش زي صاحبي اللي كان بيشتري كل طقم بس لايق على بعضه فلما القميص مايكونش مكوي ما يعرفش يلبسه على البنطلون التاني.. مهم كمان يكون معاك منديل قماش أو ورق مش مهم.. عشان ماتتكسفش .. لو عطست بشده وانت في مقابلة مهمه .. وماكنش معاك منديل..ساعتها تقول ياريت ..حاجات كلها ممكن تقول عليها هايفة ومش حتعرف قيمتها إلا لما تجربها،، وأحلى ألوان هي ألوان الطبيعه .. ازرق السما.... وبيج الرمال.. بني الجبال.. وأخضر الشجر ..والبس الألوان اللي بتحبها .. وبتليق عليك.. وبتديلك طاقة أو بالبلدي بتخليك منتعش وسعيد.. وياسلام لو القماش قطن طبيعي ، كتان ..أو صوف .. المهم بلاش الألياف الصناعية.. عشان مضرة جدا وبتتطلع ريحه وحشه وبتجيب حساسية وتخليك تهرش ومهما حطيت من مزيل عرق مافيش فايده بالعكس ده بيزود الريحة..وخلي لبسك متوازن مع بعضه.. يعني ماينفعش قميص غالي وبدلة حلوة وبعدين تلاقي الحزام متاكل ولونه رايح ..أو حاطط في القميص قلم جاف بلاستيك فرنساوي أو بيك ..وانت لابس بدله كريستيان ديور..هاتلك ساعة معقولة وقلم كويس عشان لو رايح تعمل مقابلة لازم تعرف ان ده بيفرق..

هناك 18 تعليقًا:

شمس النهار يقول...

كل سنه وانت طيب
البوست قوي جدا عايز قعده بعد الفطار بقا

وردشان smilyrose يقول...

السلام عليكم

اخبارك رمضان كريم

البوست رائع فعلا

وبيناقش موضوع جميل

على فكرة انا دايما كنت ببقى فى الموقف

دا لانى مش من الشخصيات اللى بتهتم

بالمظهر وكدا وبرغم ان عملى بيفرض

عليا اهتمام غير عادى

لكنى لم اكن من هؤلاء

وبسبب موقف مفاجأ حصل كان لابد

ان اكون فى افضل وضع

حتى لا يتكرر مرة اخرى

الموضوع جميل وفيه حاجات كتير

fatima يقول...

السلام عليك و رمضان كريم لك و لجميع الشعب المصري الطيب
نعم كلامك صح في هذه الجملة " ولو انت راجل ما تمدش ايدك بالسلام لواحده ست"هذا الموقف كثيرا ما نقع فيه نحن النساء و مع ذلك يصعب علينا ان لا نسلم حتى لا نحرج من امامنا و لو كان السلام باليدالحل سيكون سهل و نستطيع التحكم فيه لكن المشكل عندما يبادرك رجل بالسلام بوجهه و كثيرا ما نقع في هذا المازق و على فكرة هي عادة استعمارية موجودة لحد الان عندنا ...
تحياتي للجميع و صح فطوركم و رمضانكم كريم مرة اخرى

mohamed ghalia يقول...

مل سنة وحضرتك بخير
دائما كلماتك رائعة

rovy يقول...

السلام عليكم
كل عام و انت بالف خير
البوست مهم و مفيد فعلا
جزاك الله كل الخير
رمضان كريم عليك و على كل اسرتك و احبابك

تحياتى

Unknown يقول...

كل سنة وحضرتك طيب

أحــوال الهـوي يقول...

لو قرات في كتاب للاتيكيت لن تري فيه هذا الكم من الملوحظات الدقيقة

احسنت كما انت دائما باسلوبك الممتع الذي يجذب القارئ الي منتهاه


رايت امثلة كثيرة مما قلت اثناء بعض اختبارات المندوبين الجدد و كم هو محزن اثناء التتقييم و الاختيار ان يكون الفيصل بعض هذه النقاط الصغيرة
حذاء مهترأ او رائحة كريهه الخ

ان معجب بكل ما تقدمه

تحياتي

Kiara يقول...

اشطططططه حلوه اوي الملحوظات دي

كل سنة وانت طيييييييب

رمضان كريم

شمس النهار يقول...

بجد مش عارفه اعلق اقول ايه حضرتك غطيت الموضوع بكل جوانبه
بس ليه تعليق صغير كده علي السلام باليد
الحقيقه المفروض ان الست ماتمدش ايدها اصلا للسلام الا لو الشخص ده تعرفه معرفه جيده وحابه تسلم عليه
وهو كمان مايزودهاش يسلم كده علي الماشي يعني

وفعلافي ناس لما تسلم عليك سواء ست او رجل تلاقي مش بس ايدهم ميته لا ونظرة عيونهم ميته تحس ان السلام هنا قلته احسن
ليه التمثيل
وفي ناس لما تمد ايدك تسلم عليهم تحس فعلا بالترحاب والود

اما موضوع الزيارات ده موضوع لوحده علشان كمان في موضه دلوقتي الزيارات المفاجأه وبجد مش بحبها تحت دعوي غريبه ان البيت بيتنا
وكمان اللي البيت بيتهم ده كمان بيبقا المسلسل من ضمن القعده بغض النظر ان اهل البيت مابيتفرجوش علي التليفزيون اصلا

بالنسبه للعريس اللي بيروح يخطب
اعرف رجل رفض عريس لبنته علشان راح يخطبها وهو لابس جينز:)

ماهو الموضه هي الديرتي لوك بالزمه ده حتي اسم ينفع اصلا!

اما الجزء التاني من البوست
ومش عارفه حضرتك عملت ليه كده عايز تخلص مننا والا ايه

فامش هقول اكتر من ان النظافه من الايمان
وكل شئ يخدم النظافه دي
من ان لازم المظهر والجوهر يكونوا كده
كل شئ يؤدي ان الانسان يكون نظيف علي طول سواء في البيت او خارج البيت

البوست دسم جدا
والواحد محتار يقول ايه والا ايه
بس كفايه كده علشان مايكونش احتلال تدويني
رمضان كريم

المسلم الصغير يقول...

السلام عليكم كل عام وأنت بخير..انا مسلم ..نعم اسمي مسلم..أنا سعيد والحمد الله بميلادي مع شهر رمان المبارك وساكون أسعد اكثر بزيارتكم
رمضان كريم وأعاده الله عليكي وعلى الأمه الأسلامية بالخير واليمن والبركات والمغفرة
تقبل الله منا ومنكم الصيام

gogo!sf يقول...

كل سنه وانت طيب وبخير دايما

Maha Shahen يقول...

ما شاء الله هى دى الارشادات والا فلا
طيب شوية نظره متواضعه للمرأه بقى وشوية ارشادات اخويه الله يكرمك
بس بجد عجبنى الموضوع واضحكتنى بعض النقاط
ووقفت شوية عند السلام بين الرجال والنساء ومش عايزه اتكلم من الناحيه الدينيه لأنها يفتى فيها أهلها
لكنى بتكلم عن الشد علي الايدين دا فى ناس بتفعص الايد تحس انها بتخنق ايدك مش بتسلم
تحياتى ليك ومشكور علي طرح الموضوع

Unknown يقول...

منكم نتعلم الذوق
والاتيكيت والادب
واضيف لما قلت
ياباشمهندس
الديادرنت اصبح
شىءاساسى فى الحياة
(وأنا لا تكلم عن عطر)
ولكن اتكلم عن مزيل للعرق
ايضاً من الاشياء المهمة وبكل
صراحة نظافة الفم قولا وفعلا:
اى كلاماً فلا يجب ان نعيب فى الاخرين
عند الاصدقاء كوا واننا يجب الاهتمام
برائحة الفم (فالرائحة الكريهة تنفر
من حولك تماماً)
وعفواً للأطــــــالة:)

------ يقول...

كل سنة وحضرتك طيب

بوست جميل ياستاذ محمد

ربنا يكرمك

سعيدة بزيارتى واتمنى ان حضرتك تنورنا

mahasen saber يقول...

ازيك يا باشمهندس ...
رمضان كريم على حضرتك وعلى اسرتك وعلى كل من تحب

ايام مباركه على حضرتك دايما ان شاء الله

جلال كمال الجربانى يقول...

لأ دى مش حاجات هايفه
دى كلها مهمه
وفى الصميم

وكل عام وأنت بخير وبصحه

Unknown يقول...

السلام عليكم ورحمة
الله تعالى وبركاته
ارجو ان تكون بخير
وكل سنة وانت بألف خير

amira elkasaby يقول...

السلام عليكم يا باشمهندس, وربنا يعيد الايام عليك بالحب والرخاء والسلام مع كل افراد الاسرةادام عليكم الصحة.. البوست يجنن يجنن هو بسيط لكن فيه معانى كتير اوى او بالاصح منهج حياة يعنى الواحد المفروض يعود ولاده عليه عشان حياتهم تبقى احسن ..كمان اعتقد ان غالبا الانطباعات الاولى تدوم..والحاجات دى ممكن تطفش بجد..شكرا على الكلام الجميل