الجمعة، 25 ديسمبر 2009

الرأي

* تعلم اسلوب الحوار.. الرأي والرأي الآخر.. مش لازم انت صح على طول ولا اللي قدامك غلط.. بس الأول أوزن اللي بيناقشك.. حكيم.. عيل.. أحمق..استاذ.. وزي ما بيقولوا : رأيي صواب يحتمل الخطأ ، ورأي غير خطأ يحتمل الصواب.. وتقبُلك لرأي الآخرين شئ جميل.. بيزيد مكانتك .. كمان بيعرفك حاجات جديده..ممكن لا توافق رأيك .. انما بتزود ادراكك.. و الإعتراف بالحق فضيلة..يعني مالوش لازمه تقاوح على الفاضي في باطل..طالما عرفت أين الحق.. اعترف بيه.. وقول للي بتناقشه.. عندك حق.. طالما انت اقتنعت.. بس طبعا لا تناقش الجهلاء.. وتحاور المتنطعين..ساعتها..السكوت من ذهب .وكلها وجهات النظر.. هو انت كويس عشان ده رأيك .. ولا انت كويس عشان ده رأي الناس.. يعني مش ممكن كل الناس دول بيقولوا عليك انك مش بتذاكر كفاية وانت شايف كده بالفهلوة انك عامل اللي عليك وبتفهمها وهي طايرة.. والعلم في الراس مش في الكراس.. كمان مش ممكن الناس تجمع على ان فلان ده كويس وانت بس اللي شايفه وحش أو العكس .. سواء في الأشخاص أو في المواضيع .. لازم تاخد الرأي وتكونه من عدة وجهات نظر.. وعشان توصل لكده لازم يكون عندك مخزون كويس من المعرفه اللي يؤهلك لأت تحكم على المواضيع.. وأهم ما في الموضوع انك ما تقولش على نفسك كويس ... سيب الناس هيه اللي تقول.. وعلى فكره الرأي بيتغير مع الزمن .. زي ما كل حاجه بتتغير.. عشان كده بتلاقي حكمك على الأشياء وإنت 17 غير وإنت 27 وهكذا .. حكمك على رأي والدك في مصروف البيت.. غير حكمك لما تتجوز إن شاء الله.. ودايما حط نفسك مكان اللي قدامك وفكر بمنطقه.. حتعذره...

هناك 16 تعليقًا:

موناليزا يقول...

متفقة معاك جدا
فمن اختلاف الاراء تنضج الافكار

لــــ زهــــــراء ــــولا يقول...

صح الكلام
تسلم الايادى
اسلوب شيق ولذيذ جدا جدا

فطيمة يقول...

كلامك قيم كالعادة و صحيح بدليل ان رسولنا الكريم عليه افضل الصلاة و السلام نهانا عن الجدال و المراء في حواراتنا و مناقشاتنا مع الناس حيث قال:" من ترك المراء وهو مبطل بني له بيت في ربض الجنة ومن تركه وهو محق بني له في وسطها ومن حسن خلقه بني له في أعلاها" و اذا جادلنا المتنطعين اكيد سوف نتعب و تتعب اعصابنا و لا ننال الا وجع الراس و افضل حل هو السكوت كما قلت انت... اما لو جادلنا من هم اكثر منا علما اكيد ستصغر قيمتنا خاصة لو كانوا على صواب و الخلاصة دائما لو كنا في نقاش ما علينا ان نختار ما نقوله و ان لا نكثر الكلام و لو لاحظنا ارتفاع الاصوات اثناء المناقشة و احمرار الوجوه و علامات الغضب و كل مصر على ان رايه هو الصحيح على الانسان ان ينسحب و يتوقف عن الجدال حتى لا يقع في خصام و كره من يناقشه .
في الختام اتمنى ان لا اكون قد خرجت عن الموضوع و دائما اكرر ان مواضيعك غنية و دسمة فلسفيا ان صح التعبير و كل سطر فيها يحتاج الى صفحات لمناقشته و انا اخترت الجزء الاول من موضوعك للتعليق عليه .
تقبل مني فائق الاحترام و عام سعيد لك و لجميع اسرتك و شعب مصر الطيب

شمس النهار يقول...

ازيك
بوست جامد كالعاده مثير للنقاش والجدل


ياريت نسمع بعض كويس ونتحاور ونتشاور

ونصبر علي بعض

ياااااريت

انا مش هناقش المره دي

علشان دي اول زياره بعد العوده للبلوجر

سلام

صبرني يارب يقول...

حط نفسك قدام الى بتكلمه وانت تعذره

اعتقد نص مشاكل ا لناس تتحل لو طبقواالمبدأ ده

ما حدش ابدا بيحاول يعذر الى قدامه ويفكر فى موقفه


بس هو فى نقطه بس انا معترضه عليها

هى انى اعتبر الراي العام هو الصح
الحقيقه يمكن ده كان زمان
انما دلوقتي معلش انا جربت المبدأ ده حسيت انى كنت هاتجنن وهاخسر دماغي وهاخسر حاجات كتير اوي

وطبعا الراي بيتغير والفكر بيتغير مع السن والخبرات بس المهم اننا نغيره للاحسن
نطوره مش نغيره نسيب الاشتراكيه ونمسك فى الاخوان على سبيل المثال يعنى

تحياتي لحضرتك على الموضوع الجميل كالعاده

من غير عنـــوان يقول...

صبرني يارب ..
يارب تصبرني

شكرا على التعليق..
مش قصدي إني أسمع الرأي العام وأخد به وخلاص.. قصدي لما يكون فيه مشكله وسألت 5 ممن أثق فيهم... أربعه قالوا حل رقم 1 .. وواحد بس مع صوتي هو اللي قال حل رقم 2... يبقى أكيد حل رقم 1 أصح... أو على أضعف تقدير أعيد نظر في التقييم..

إنما لو مش حاخد برأي حد... يبقى خلاص.. كل واحد يعمل اللي عايزه... ويريحه.. ومش مهم الناس .. ولا الأسره.. ولا المحتمع... وده الحل اللي ماشي دلوقت...

أمنياتي

mohamed ghalia يقول...

ياريت فعلا يابشمهندس نتعلم الحوار
ياه اد ايه بجد احنا لسه قدمنا كتير على منوصل للتحضر ده

Dr. Ibrahim يقول...

يجب أن نأخذ كلام المحاور باهتمام كنوع من ادب الحوار ثم نوزنه بعد ذلك ولا يجب ان نهمل الاستماع للمحاور كونه كذا أو كذا لا يجب أن ننصت ونهتم بالكلام ثم نفكر فيه بجدية وبعقلانية وقد نستفاد من الحوار والرأى فنحن ليست عقولة تملك كل شىء نزلت من السماء...
بارك الله فيك

gogo!sf يقول...

كل سنه وانت طيب

عام سعيد عليك وعلينا وعلى الجميع ان شاء الله

مي ثابت يقول...

لازم يكون عندك مخزون كويس من المعرفه اللي يؤهلك لأن تحكم على المواضيع
------------------------------

هو ده الأساس .. المعرفة الجيدة للحكم على الموضوع .

و بكده نقدر نجمع بين ما ذكرته حضرتك و ما قالته "صبرنى يارب" .

بمعنى أن يكون الرأى العام جزء فقط من معرفتى التى أبنى عليها رأيي .


على سبيل المثال :

ما يحدث الآن من الحكومة المصرية تجاه أهلنا المحاصرين فى غزة من غلق المعبر و بناء الحاجز الفولاذى .. إذا إستمعت لوجهات نظر الناس لوجدت ميلاً واضحاً لإسطوانة الأمن القومى !!!

تلك الإسطوانة الناشئة عن بث إعلامى ممجوج و غير عقلانى .. و الحال أوضح أيام حرب الجزائر الكروية .. حيث الرأى العام الذى صنعه إعلام حكومى إعتمد على إثارة النعارات الطائفية.


و لنا أيضاً فى موقف الإمام أحمد بن حنبل من قضية خلق القرآن , و تمسكه برأيه "المخالف تماماً لكل من عاصره, حيث لم يوافقه سوى الإمام يحي بن معين" لكن رأيه كان مبنياً على علم و معرفة بالأمر الذى يتكلم فيه.


إذاً : فالرأى العام ليس بالضرورة صحيحاً .. و علينا أن نكون منفتحين على آراء الآخرين و تبنيها إذا ثبت لنا صحتها حتى لو إختلفنا معها فى البداية... و هذا بالضرورة يستلزم كما ذكرت حضرتك المعرفة.

بنت الغربة يقول...

وحشنى كلامك جدا ..وارائك الجميله دايما ..المشكله مين اللى يقدر يغير فهمه ونظرته للامور..انا دايما مقتنعه ان تغيير الرأى ده قوة مش ضعف..وان المتمسك برأيه دون التفكير فى الرأى الاخر هو نوع من التخلف والعنجهيه الفارغه..وسوء تقدير لتفكير الاخرين..
كل سنه وانت طيب..
تحياتى

Atef Shahin يقول...

اتفق في احترام الاختلاف
ويا ليتها ثقافة تدوم

تحياتي

جلال كمال الجربانى يقول...

السلام عليكم

فعلاً المعرفه
والرغبه فيها
والتمتع بها أيضاً
تجعلنا قادرين على الحكم وتجعلنا أيضاً أصحاب رأى يقترب من الصواب
بس مفيش مانع لبعض الشطحات
حتى نعرف بعدها إننا كنا على خطأ
حنتعلم من غير خطأ أزاى
رائع كالعاده

ودمت بخير حال

صاحب رأى يقول...

موضوع خطير جدا
باب المناقشة اصبح مهزلة فى العصر دا
امبارح بالصدفة قولت رأيى فى موضوع ما على الفيس بوك
قوم ايه بقى
الاقى ناس بتبعتلى فى رسايل خاصة وتشتم فيا وفى مصر وفى المصريين
انا قولت ايه ياعم لدا كله
دا رأى مش اكتر

المهم يعنى اسلوب الحوار انتهى
ومرحبا بزمن المسخ

أسما عواد يقول...

تعجبني طاقتك على العطاء
بوست جميل
لعلهم يسمعون ويدركون
تحياتي

أمل حمدي يقول...

من غير عنـــوان يقول...
الأخت العزيزه مام أموله

ما ندمت على شئ في حياتي قط، قدر ندمي على عدم إتقاني للعربيه وقواعد النحو، ولذا أرجوا من سيدتكم أن تُصلحي لي ما أفسدته( بدون عمد) في كتاياتي
حيث أنني بصدد إن شاء الله طبع ما كتبته في المدونه بينتفع به شبابنا...

وأكون شاكرا إذا أرسلتي لس هذه التصليحات سواء على البوست ذاته.. أو على الإيميل


banna2020@gmail.com

,وإذا شاء رب العالمين وتمت طباعه الكتاب فمن الطبيعي أن يذكر في أوله:

تصحيح لغوي : ماما أموله
أو أسمكم

أما إذا كان هذا الطلب مرهقا لكم ، فسأتفهم هذا بسهوله

دمت بكل الود

١٣ أبريل، ٢٠٠٩ ٤:٤٣ م


================

خي الفاضل

لم أر تلك المشاركة منك في مدونة لغتي هويتي إلا الآن
سبحان الله لقد انتقل عنوان المدونة الى عنوان آخر ولم أتنبه للردود في المدونة السابقة

اعتذر لك أخي لخطأ غيرغير مقصود
ويسعدني تقديم أي مساعدة لك

اتمنى أن تكون بكل خير

تقديري