الخميس، 13 نوفمبر، 2008

حــلوة يا بلــدي


حِب بلدك واتكلم لغتك.. وتأكد إن كده مش حتبقى دقه قديمه.. بالعكس.. وثق إن إحنا بنتعلم اللغات الأجنبية فقط عشان نقدر نتابع الناس في الخارج وصلوا لإيه.. مش عشان نتعايق بإن إحنا بنعرف إنجليزي.. لإن الخواجه الطلياني اللي زي الفل وناجح .. مابيتعوجش على صحابه ويتكلم فرنساوي قدامهم..وتأكد كمان إن أي رئيس دوله أو حتى رئيس شركة كبيرة.. مش بيغير لغته في الإجتماعات الرسميه.. ولما تحب بلدك وتحافظ عليها .. هي كمان حتبقى زي الفل.. وساعتها حتحب تعيش فيها.. لإن لما واحد بيشتم بلده.. ويقولك ده قرف ..لأ.. لا مؤاخذه القرف ده منه هو..ونفسي انك تسافر بره وتشوف تعصب الفرنسيين لفرنسا والألمان لألمانيا.. مش زينا.. يحطوا علم بلجيكا على العربيه وعلم أمريكا على لبسهم.. حاجة تكسف..والخواجة حيحترمك لما يلاقيك بتحب بلدك..
والأهم ان كلنا حنلاقي بلد جميله نعيش فيها.. ده مش كلام إنشا.. ده مستقبلك.. كمان اسمع أغاني بلدك ومزيكة بلدك.. هي دي اللي انت حاسسها.. ولك معاها ذكريات.. ومعانيها فاهمها.. خلي بالك أنا مش باقولك أقفل على نفسك .. بالعكس.. اقرا كتير بلغة أجنبية ..ادخل على النت وشوف بيعملوا إيه بره.. راسل ناس في كل العالم.. بس إوعى تنسى بلدك.. وأحمد زويل الناجح لا يسمع سوى أم كلثوم.. ونجيب محفوظ كذلك وبيحب كل شوارع مصر..وأهم أسباب نجاحه ووصوله إلى العالميه هي إغراقه في المحليه .. اعمل زيهم.. حتبقى زيهم..ناجح .. محترم .. عندك كرامة..اتكلم عربي وكفاية انها لغة القرآن..

هناك 23 تعليقًا:

عمرو يقول...

أوجزت فأحسنت و أصبت
الواد بيرجر الألمانى صاحبى كان حايتجنن لما شاف الشباب حاطين أعلام الدول الجنبيه علىلا السيارات و التيشرتات و قالى يا عمرو دا احنا فى المانيا ما بنطيقش حد يتكلم نص كلمه على هتلر رغم بغضنا له و لأفعاله الا انه رمز لألمانيا شئنا أم أبينا
و الألمان لا يمكن يردوا عليك الا بالالمانيه مهما كانوا يعرفوا من لغات

من غير عنـــوان يقول...

* عمرو... صباح الخير عليك وعلى شباب مصر الحلوين اللي زيك... ياريت أشوفهم كلهم معتزين بمصريتهم..

شكرا يا أخي الكريم على كلماتك الطيبه

أمنياتي

Dr- Hema يقول...

صح تمام

محدش عارف ان تعلم اللغات الاجنبية عشان نعرف العالم ماشى ازاى

وعشان نعرف عدونا بيقول ايه

انما أصبح التقليد الاعمى والناس فرحانة بانها بتتكلم أجنبى

على الرغم ان أى دولة معتزة بلغتها بتحاول انها تخلى لغتها هى الكل فى الكل

والدولة اللى بتنشر لغتها كمان بتنشر إقتصادها وسياستها عن طريق اللغة عن طريق نشر افكارها

إنما تقول ايه.....

واللى بيحب البلد ده اسمه إنتماء ويحافظ عليها عشان تبقى نظيفة جميلة

والمشكلة ان اى واحد فاكر انه مش المشكلة والمشكلة فى غيره بس.....

تحياتى

د/هيما

Dr- Hema يقول...
أزال المؤلف هذا التعليق.
شمس النهار يقول...

ماهو الشباب اغلبه فقد الهويه ومعاها الانتماء
ماده اللي خلاني اكتب بوستات يعني ايه كلمة وطن لو سمعت الشباب قال ايه علي البلد لما كنت معاهم مش ممكن
كله عايز يطلع من جلده

fashkool يقول...

من غير عنوان .. السلام عليكم.. اول مره امر وازورك .. تحياتى
والله يا أخى بلدنا التى نكرهها جدا ونغرم بها جدا لا نطيقها ولا نستطيع البعاد عنها نسبها ونمدحها .. والله يا اخى بلدنا محيرانا معاها .. نكرهها ام نحبها .. والمشكله اننا بنحبها مصر التى فى خاطرى وفى دمى .. بس مصر بتتعب ولادها كتير .. ما علينا وبعدين
من قال ان انت من غير عنوان
دا كدا عنوانك نار على علم وان شاء الله تعجبك البوسترات الجايه

من غير عنـــوان يقول...

**الأصدقاء الأعزاء الكبار مقاما:
* Dr- Hema
* شمس النهار
* fashkool

وفشلت مهمتي.....

نعم... فشلت ...

كنت أعتقد أن هذا الكتاب الذي أمضيت فيه عاما كاملا- والذي أنشره هنا على حلقات- سيكون موجه للشباب.. وللأسف ... القول ضايع..

لقيت إنتم اللي بتردوا عليه صدى صوتي- طبعا أنتم شباب أكيد- ويظهر إني بأدن في مالطه زي ما واحد قاللي... أو التاني اللي قال ( ربنا معاك) مش معنى ده إني فقدت الأمل.. أبدا وراهم وراهم..

وكي لا أخرج بره الرد الموضوعي:

أولا: شاكر لكم تعليقكم ووقتكم وتشريفك لي يا fashkool وإطرائك إني بعنوان ولست: من غير عنوان

ثانيا: طبعا اللغه في بلد زي ألمانيا مثلا لو لقيت حد يرد عليك بالأنجليزي حتى مش بالعربي طبعا تبقى معجزة

ثالثا : موضوع يعني إيه كلمة وطن للعزيزة المحترمة شمس النهار موضوع شيق وحقيقي.. وأضيف أن القرآن قال : ألم تكن أرض الله واسعة فتهاجروا فيها...
وسيدنا النبي عليه أفضل صلوات الله وتسليماته حين هاجر للمدبنه من مكه قال إن مكه هي أقرب بقاع الأرض لقلبه ولكن فيما معناه إنه اضطر لذلك.. يعني اللي عايز يهاجر يهاجر.. بس الحبل السـُري مربوط بالأم...وبرضه يتحدث لغه القرآن على الأقل في بيته.. زي كتير من المهاجرين حاليا .. في منهم لسه محتفظ بمصريته... ومنهم اللي لسانه بيتعوج بعد اسبوع من الهجرة... خواجه سيادته

رابعا: يمكن الأغنيه التي تقول:..باحبك وحشتيني...باحبك وانت نور عيني... ده وانتي مطلعه عيني بحب موت ... تعبر عن كثير من كلام fashkool في مصر اللي بنكرهها ونغرم بها في ذات الوقت...

خامسا : أثرتم فيّ الكثير بكلامكم.. وعرفت إن الدنيا بخير طول مافي زيكم.. ونفسي ومتهيألي نفسكم إن الردود كانت تزيد من الشباب...

الشباب اللي عامل جروب اسمه (الموكوسين) عالفيس بوك( الذي تم استصداره خصيصا لإهدار وقت شباب مصر) .. المهم.. ولمـّا حد منهم قال إحنا مش لاقيين اللي يكلمنا.. واحد من الأصدقاء دلهم على جروب هناك لمن يريد تطوير نفسه.. راحوا عاملين جروب تاني اسمه لذيذ قوي :
بكره لينا وحنغيره بأيدينا..
تقوم انت تفرح... أبدا ؟؟؟؟ ليه لأني كتبت لهم اسم البلوج بتاعي عشان أنا بأظن انه مفبد لهم... راحوا ماسحين التعليق..؟؟؟؟؟؟؟؟
رحت داخل شايف هما بيتكلموا قي إيه: وإليكم العينه:
إزيك يا توته... ترد توته: وحشتيني يا مضروبه... الله ده شنكوتي دخل.. هو انت كنت بتغش في الإمتحانات... يعني شويه ... بس عشان أجيب مجموع...

آدي بكره لينا وحنغيره بإيدينا

ولا حول ولا قوة إلا بالله العلي العظيم

طــــــــولت عليكم بس انتم السبب...

شكرا لا تكفيكم...
ولو انكم فتحتوا جرح كبير عندي....


أمنياتي مازالت مستمرة والأمل في الله إني الاقي شاب واحد يسمع كلام الكبار ..
أنا لقيت على فكره ... وده كفايه عليه... وعقبال ما يزيدوا

أمنياتي الطيبه لكم

t3ban يقول...

كفاية انها لغة القرآن

شمس النهار يقول...

ليه كده مااحنا شباب برضه
والا ايه
وبعدين ده مخطط اكبر مني ومنك
خطة الاندلس ياعزيزي

من غير عنـــوان يقول...

* شمس النهار

أصلا أصلا الشمس أصل الشباب ونبع الحياة

بجد يا شمس ... انا مستغرب على الشباب ده اللي قاعد طول النهار على الفاضية قيل المليان...صعبانين عليّه

متعك الله بشبابك اللي هو أصلا شباب أكتر من الشباب العيره

أمنياتي

norahaty يقول...

السلام عليكم
ورحمة الله تعالى وبركاته
فعلا اكتر حاجة بلاحظها فينا احنا ياعرب فى الغربة ان الجيل الاول ما بيحاول يعلم الاجيال التالية اللغة العربية ولا بيحاول يصر على تعليمها لهم بعكس الايطالى او اليونانى هناك دائمآ يعلمون ابنائهم لغتهم الام واعتقد واسفة فى اعطائى هذا مثلا اليهود ولغتهم العبرية !!!!!
شفت المر يابشمهندس لما رحت فرنسا وانا مابعرفش الا انجليزى!!!!

كـــيــــــــارا يقول...

اللله بوست في وقته والله بجد

ميه ميه :)

كـــيــــــــارا يقول...

اه نسيت بجد مدونتك جميله اوي وان شاء الله اتابعها :)

غريب يبحث يقول...

لأ طبعاحضرتك يا بشمهندس غلطان و مفشلتش وانا واثق من كده، ومش هتفشل وزي ما في شباب إللي حضرتك بتقول عليهم دول في برضه غيرهم كتير كويسين بس مش باينين عشان مش فاضيين يتكلمو مع توته و شنكوتي، منهم إللي شغال في اليوم شغلنتين ومنهم اللي شغال شغلانه واحده بس بوقت اكتر ومنهم اللي بيدرس وبياخد كورسات عشان يحسن من نفسه ومستواه التعليمي ويقدر ينافس في سوق العمل...
وبعدين دايما بكره أحلى وطول ما كل يوم الشمس بتشرق من جديد يبقي اكيد في امل واكيد بكره أحلى، انا في حاجات كتير اتعلمتها وبعملهامن الكلام اللي اتنشر قبل كدا اهمها دش النعنشه او الفرفشه بتاع كل يوم قبل الشغل، ده حاجه من الحاجات اللي قرأتها وعجبتني، وفي غيرها كتير..
وكمان اديت لصحابي في الشغل اللينك عشان يدخلو يقروا وفعلا بعد ايام بدأت اسمع التعليقات بس صحيح هما مكتبوش هنا حاجه بس كلهم متابعين وبيقرو اول باول... ممكن يكون الكلام اثر فيه اكتر من لما يرد..او في ناس بطبعها مش اجتماعية اوي هو ميعرفش مين الكاتب ولا مين الناس الللي بترد..وعجبي..

اما مصريتي فانا مصري وبحبها ومش زي كل الشباب عايز اطلع واسيبها بالعكس دا انا نفسي احسن فيها كتير واخليها احلى وطن في الدنيا...
انا عشت فترة من طفولتي بره مصر كنت صغير شويا بس لما كنت بنزل من الطياره في مصر كنت بحس حاجه غريبه كدا كل مره شعور غريب..تجيلي رعشه كدا ولطشة هوا سخن وانا صغير كنت بسئل يقولو تغيير جو،. بس بعد كدا عرفت وحسيت لما كبرت شويا ان ده دفئ الحنين للوطن،،

المهم يا بشمهندس :
كل يوم الشمس بتشرق من تاني ومعاها امل جديد واكيد بكره احلى...وعجبي..

من غير عنـــوان يقول...

* نورا
موافق على كلامك وجربته في الغربه..
لآ وكمان أي أجنبي بيبصلنا في مصر واحنا بنرد عليه بلغته إن احنا شطّار..
وبيدينا العذر في بعض الكلمات الكلمات اللي مش عارفينها...
أما المعاويج فممكن يصلحوا لي حرف انجليزي نظقته بلكنه انجليزية وليست أمريكية؟؟؟!!!!

ربنا معانا

أمنياتي

من غير عنـــوان يقول...

* كيارا

نورتيني ( على رأي شمس)
فعلا مبسوط انك هنا


تحياتي

من غير عنـــوان يقول...

* خالد ( غريب يبحث)

طبعا انت عارف معزتك...
وللجميع أنا أعرف خالد معرفة شخصيه.. مجتهد وشاطر ومن الأوائل في التخرج
ومستقبل باهر إن شاء الله

أما الجزء اللي انت كاتب فيه:

"اما مصريتي فانا مصري وبحبها ومش زي كل الشباب عايز اطلع واسيبها بالعكس دا انا نفسي احسن فيها كتير واخليها احلى وطن في الدنيا...
انا عشت فترة من طفولتي بره مصر كنت صغير شويا بس لما كنت بنزل من الطياره في مصر كنت بحس حاجه غريبه كدا كل مره شعور غريب..تجيلي رعشه كدا ولطشة هوا سخن وانا صغير كنت بسئل يقولو تغيير جو،. بس بعد كدا عرفت وحسيت لما كبرت شويا ان ده دفئ الحنين للوطن،،

فده كلام من القلب .... وصلني

ربنا يوفقك... دايما بتديني دفعة إني أكمل

nor يقول...

طيب و اللي بدأ ما يقدرش يحب بلده يعمل ايه
لما يلاقي الظلم حواليه
لما يلاقي حقه بيضيع حتي في انه يتنفس هواء نظيف..لما تتحول احلامه لمستحيل
مش ده حال اغلب الشباب
تحياتي لكتابتك المتميزة

من غير عنـــوان يقول...

** nor
ماحدش ما بيحبش بلده..
أولا عايزك تقري ردي المطول للأصدقاء أعلاه..
ثانيا :
قال سيدنا على بن أبي طالب كرم الله وجهه:
رب إعطني الشجاعة على تغيير ما أستطيع تغييره.. والقتاعة على تقبل ما لا أستطيع تغييره... والحكمة على معرفة الفرق بين الأثنين...

عايزك تقريها مرات ومرات وتهضميها...

هاجري
إشتغلي في حته تانيه
إعملي حاجة تبسطك لنفسك..
كافئ نفسك...
كتري أصحابك..
زوري قرايبك
غعطفي على الفقير

حاجات كتير توريكي بلد إنت بتحبيها بس مزعلاكي..

ومش عيب إني بأحب بلدي بس عايز أهاجر
ده ربنا سبحانه وتعالى قال كده..

كلامك مأثر فيّه خالص..

ده انتم الشباب ... انتم بكره

مش كلام إنشا

بس حبّي

أي حب
لأي حد

حتفرق

برضه مش عايز أطوّل عليكي

أمنياتي لك

وفاء بركات يقول...

السلام عليكم
هو ده الإنتماء اللي مصر محتاجاه انتماء دائم مش لحظي نستني زلزال أو كاس لبطوله ما علشان نحط علم مصر فوق الراس ونهتف لها بحماس
من غير عنوان التعليقات وردك عليها
لايقلو أهميه عن الموضوع نفسه ربنا يجعل بكره احسن من النهارده
شكرا علي المرور
لك تحياتي

أحــوال الهـوي يقول...

المشكلة ان اللغه الاجنبية تمصر و تصبح لغه دارجة و مفرد من مفردات اللغه العربية و بعد حين تذوب وننسي اصلها و معها هويتنا

شكرا لاثارة هذا الموضوع

تحياتي

طرئعة دماغ يقول...

السلام عليكم ..اولا بحيك علي المدونة بتاعة حضرتك ...عجبتني اووووووووووووووووي
ثانيا بئي ..حكايةالتقليد الاعمي للشباب للغرب ..حكاية انتشرت اوي ورحتها فاحت ..
المشكلة ان الشباب المفروض يكون عنده وعي اكتر ..ويحافظ علي بلده ولغته وتاريخه ..ده انت لو وقفت شاب في الطريق وسالته مين اللي بني ابو الهول ولا القلعة ...يقولك معرفش ..اه والله ..اما بره بئي تلقيهم ما يصدقوا يلاقوا تاريخ ليهم ويعظموه ويكبروا فيه ...اما بعض الشباب في مصر تلاقيهم بدل ما يعظموا في تاريخهم ولغتهم ويحبوا بلادهم يمشوا عكس التيارويستوردواكل حاجة من بره بس ياريت كل شيء كويس لا دول بينئقوا الوحش والسلبي ويستعرضوا بيه ..ويقولوا البلد باظت احنا لازم نهاجر ونسيبها طيب ما ده كله مننا لاننا بدأنا نستعر منها ..اه في مشاكل والدنيا خربانة بس مش معني كده اننا نمشي ونسيبها .ومنرجعش ليها تاني .وندور علي وطن لينا تاني ..بالعكس ده احنا لازم نقعد ونحافظ عليها وكل واحد يقوم بدوره ويعرف حقوقه ومش معني اننا بنتعلم لغات تانية اننا ننسي لغاتنا وانتمائنا لبلادنا بالعكس ده بيخلينا نفهم العالم اللي حوالينا بيفكروا ازاي ونستفيد من فكرهم وثقافتهم في بلادنا لو حصل كل ده ..نلقيها رجعت زي الاول واحسن
معلش طرئعت دماغك من الكلام .هههههههههههه
تحياتي ليك ولمدونتك

Nour يقول...

السلام عليكم ..
موضوع قيم وسلسل جداً..

أعتقد اننا اصحبنا نعاصر عصر من الاحلال فى كل شىء" من وجهه نظر مدعون الحداثة"

فإن تعلم اللغات الأجنبيه أصبح هدفها الآن " الإحلال"
فقد قيل: إذا اردت أن تعرف عدوك فتعلم لغته.
فالبعض يسير على ذلك النهج ولكنه ليس من باب العداء وإانما من باب ان نصبح كوكتيل غربى عربى ليس له اى هدف لا تعلم ولا علم بالاحوال، وإن دل ذلك فلا يدل إلا على شخصية هشه التكوين..
فقد قيل العلم احسن من كل شىء فخذوا من كل شيئاً أحسنه..

فحين نتعلم، نتعلم للاستزاده والمعرفة لا لاحلال ما تعلمناه من لغات اوغيرها وفى مخيلتنا أننا فى المقدمة فإن التقدم لأ يأتى بأن نتخلى عن لغتنا او ما يشكل عروبتنا.فذلك عين الجهل.. والواقع خير دليل بين تشبث من نحاول التشبه بهم وبين أفراط من يحاولون الاحلال فى كل شىء لنجد هوه يسقط فيها العديد من الاجيال... وفى الاخير يتم اتهام الارض انها لا تطاق فالارض لا ذنب لها ولا وز عليها فنتحمل نحن من نسكنها افعالنا عليها..