الثلاثاء، 25 نوفمبر، 2008

أجــــازة

* اتعلم تاخد أجازة.. وياريت تكون طويلة.. وممكن تكون قصيرة جدا جدا.. لدرجة إنها تكون ربع ساعة؟؟ تغمض فيها عنيك وتروح الحتة اللي إنت عايزها.. تغيير .. مجرد راحة .. والراحة يعني أجازة.. وفي الأجازة لازم تعمل اللي إنت عايزه لوحدك ودي تبقى أجازة شخصية..يا إما تعمل اللي عايزه مع الأصدقاء أو العائلة ودي تبقى أجازة عائلية.. دي مهمة .. والتانية مطلوبة.. يعني تعمل الإتنين.. ومش لازم الأجازة تكون مكلفة.. ويفضل إنك تغير فيها الأماكن .. وتتنوع دائما..
وأبسطها وأحلاها .. فسحة في الخلاء.. حيث الهواء الطلق..وإذا كنت بتحب تنام في الأجازة .. نـــام.. بس دي مش أجازة .. دي نومه ومطلوبه.. وفي الأجازة ما تضيعش فرص لفرجة أو لمعرفة.. يعني ماتروحش أسوان ولاّ الأقصر وتنام؟! ساعتها نام في بيتكم أو في فندق في نفس بلدتك..ولو معاك فلوس كفاية في الأجازة .. يبقى تعمل كل اللي تقدر عليه وتروح كل حتة.. ومش تروح تشتري وتعمل شوبينج.. لأن برضه دي مش أجازة ..
والأجازة كمان مش للأكل.. ولازم كمان تعمل اتزان بين عملك وأجازتك .. يعني ممكن تشتغل اسبوع وأجازة يوم.. شهر وأجازة يومين ورا بعض.. سنه وأجازة اسبوع متصل.. حتى خلال اليوم ممكن 6 ساعات شغل وربع ساعة ترتاح.. وهكذا.. والصحبه مهمة في الأجازة.. وإنك تسيب كل واحد على حريته ..وانك ما تطلعش أفكار سلبية على مراتك وتفكرها باللي انت متضايق منه .. لأ .. أجازة يعني تنبسط على الآخر.. ماتعكننش نفسك ولا حد يعكننك.. وترجع تشتغل بحماس.. وعزيمة..

هناك 21 تعليقًا:

Dr Ibrahim samaha يقول...

فعلا الأأجازة مطلوبة بعد العناء لأخذ الراحة وللتنشيط للعمل الجديد

شكرا لك

د إبراهيم

عمرو يقول...

صباح الخير
الأجازه الأسبوعيخ بره شىء مقدس بيحافظوا عليها حفاظهم على الحياه نفسها .. و ماعندهمش سبب مهما كان قوى أنهم يتنازلوا عن اليوم و نص اجازه بتاعهم اللى هو السبت بالليل و الأحد طول اليوم
تعالى هنا بص على الأجازه بتاعتنا بتبقى عامله أزاى : يوم الجمعه الصبح نقوم نستحمى و بعدين الفطار المتين نبقى بقينا الضهر نخلص صلاة الجمعه و أحنا راجعين ناخد فى أيدنا غدوة السمك المشوى و شوية الفاكهه و نروح نلاقى لسه المدام قالبه الشقه تنفيض و كنس و مسح .. فنقعد نتفرج على التليفزيون لحد ما تخلص تبقى الساعه 4 و لا 5 نتغدى و نريح شويه بعد الغدا عملا بالمثل اللى بيقول أتغدا و أتمدا نقوم من التقييله نشرب كوباية الشاى و نتناكف شويه و يبقى عدا اليوم بالتبات و النبات و شكرا ..
مش دى الأجازه الأسبوعيه بتاعتنا ؟ فين بقى الطبيعه و الهواء الطلق و الفرجه على حاجه جديده ؟
مافيش
يبقى البطاريات ما أتشحنتش اٍستعدادا لأسبوع جديد من الشغل .. و هكذا .......

من غير عنـــوان يقول...

** دكتور إبراهيم
والأجازة مفيدة صحيا برضه

تحياتي

وفي إنتظار بوست جديد عندك

من غير عنـــوان يقول...

** عمرو
عنك حق في كل اللي قولته
بس الشاطر اللي يكسر القوانين
ويصحي مراته بدري وياخدها يفطرها فول على الكورنيش


لو يقدر


أمنياتي

fashkool يقول...

ازيك يا من غير عنوان والله يا اخى الواحد مقصر فى حقك كتير .. اعتذر
بس يا أخى انت بتقول الاجازه مش تاكل فيها يعنى تمشيها وخلاص .. لا لا لا الاكل دا شئ مهم حتى لو الواحد ما خدش اجازه وقعد ياكل فى البيت احنا عايشين عشان ناكل مش بناكل عشان نعيش .. اصل اخوك اكول وبيحب الاكل .. انا فى الاجازه بعمل كل صيف اجازتين مهمين .. الاولى اروح اسكندريه ولو ان ما عادش فيها بحر ولا يحزنون لكن اهى عاده واتعودت عليها واصبحت اسكندريه ادمان وخصوصا فى الشتاء والاجازه التانيه اروح البلد عندى فى الغيط فى عز الصيف القائظ وافرش غبيط ولا حته شويه حشيش وارقد تحت الشجره وعينك ما تشوف الا النور .. الهواء اللى جاى من بحرى والنوم اللى ياخد الواحد من طريق تلاته وتلت ويا سلام ايام الدره اخر النهار يجيب العامل الدره الاخضر ويولع الراكيه ويقعد بقى يشوى وانا اكل وخصوصا الدره اللى بعرقه .. يعنى اللى يتحط على النار بغلافه ويتحرق وبعدين تقشره تلاقى كوز الدره جوه القشر ابييض يا ورد والواحد ياكل بقى ويتهنى .. ممكن اعزمك فى الصيف عندى فى الغيط بتاعى واهيصك دره ومش ولو عايز لحمه الامر لله ما فيش مانع .. تحياتى

من غير عنـــوان يقول...

** إزيك يا راجل يا طيب اللي مشهور بإنه
fashcool
underline COOOOL
عشان نبقى كول

المهم أنا أصلا فلاح عشان كده حاقبل العزومة على دره وبتاو وفطير وجبنه وعسل وقشده... أكمل ولا حتجوع...

وقصاد كده لك أكلة سمك في إسكندرية من اللي قلبك يحبها

تحياتي

mohamed ghalia يقول...

ياريت فعلا ندى لنفسنا أجازة
زى ما بيقولوا فترة إستجمام
موضوع رائع
دمت بكل الود

غريب يبحث يقول...

مرحبا بالجميع في مكان نحب جميعا الالتقاء فيه والتحدث من القلب للقلب.

بلا شك الاجازة..كلام كتير عنها بس افعال قليله فيها..وزي ما قالو الاجانب ما يضيعوا اجازة اللي هيا يوم و نص ابدا..

انا وبعض من اصدقائي بنحاول نعمل كده برضه كل واحد بره اسكندريه حاولنا نجمع اجازتنا 3 او 4 ايام في وقت واحد وكلنا نزلنا اسكندرية..المكان حيث النسيمو الهواء العليل اللي يرد الروح... بس الجديد اللي الواحد اتعلمه النهارده هيا اجازة النص او الربع ساعه..هيا فعلا مهمه الواحد يحاول فيها يطلع بره مشاكل وهم الشغل ويريح اعصابه ويستجم ويطلق العنان لفكره ربع ساعة مش قصة.. بس الاهم والاحلى الاثر الرجعي من الربع ساعة دي...اكيد كبير

وعلى فكرةرقدة الشجرة في الفلاحين دى بجد وهمية انا جربتها قبل كدا بجد فعلا ويا سلام بعدها فعلا كدا على عشوة فطير مشلتت ومش بدوده و عسل ...لا تعليق.

دائما بالجديد والجديد تطل علينا نتمني لكم التوفيق دائما...

مفكر يقول...

السلام عليكم::


نصيحة فعلاً مهمة،،،وانا بقول مهمة عن تجربة

انا قريب بعد كل اسبوع دراسي في الكلية،،،باخد يوم أجازة أروح ألعب فيه كورة سلة مع اصدقاء لية وبعدين بنقضي اليوم مع بعض تسالي لذيذة،،،ويوم آخر مع نفسي على الكمبيوتر وبس علشان أعمل شوية حاجات بستمتع بيها،،،

شكراً على الموضوع

مفكر

norahaty يقول...

السلام عليكم ورحمة
الله تعالى وبركاته
كلام جميل يابشمهندس
وخصوصاً الاجازة اللى
هى لحظات او حتى ساعة
اثناء اليوم .ما انسى
برنامج رحلات كنت بتفرج
عليه فى ال B.B.C.بس كان فعلا
حلو اوى المهم كنت بعدما اخلصه كأنى بالضبط سافرت او رحت للمكان ده يمكن من حلاوة الاعداد او من استغراقى فيه
وتحياتى لك ولموضوعاتك الجميلة .

الراجية عفو الله يقول...

السلام عليكم ورحمة الله وبركاته
لدي مشكلة عرضتها في مدونتي
http://la7zat200.blogspot.com/
ارجو اعاطئ رأيك

شكرا

kh يقول...

الاجازه البسيطه فكره رائعه بل ممتازه ويمكننا جميعا فعل تلك الاجازة
معلومه وتنبيه قيم شكرا لك

يمكن مراسلتى على مدونتى

http://successka.blogspot.com/

مـجـنـووون يقول...

عندك حق الواحد لازم ياخد أجازة علي فترات علشان يقدر يستعيد توازنه

والأجازة ممكن تخليه يبقي صافي الذهن ويقدر يأخد قرارات سليمه

تقبلي مروري سيدتي
مجنووون

amira elkasaby يقول...

السلام عليكم ورحمة الله,
الموضوع جميل جدا ومؤثر بالنسبة لى رغم انه يبدو انه موضوع طريف وذلك لاحتياجى الشديد الى اجازةوبصراحة مش عائلية لان فى الحالة دى كل العائلة بتاخذ اجازة الا انا, طبعا سعادتهم من سعادتى ولكن مش هى دى الاجازة بجد انا رايى ان الاجازة انك تخرج من روتينك واعبائك المطلوبة منك وبالنسبة لى هى الربع ساعة بس وكفاية بقى عشان مقلبش المواجع

من غير عنـــوان يقول...

* mohamed ghalia ،
* غريب يبحث،
* مفكر،
* norahaty ،
* الراجية عفو الله ،
* KH،
* مـجـنـووون،
* amira elkasaby ،


شكرا لكم جميعا
أعتذر للتأخير نظرا لسفؤي في مهمة عمل
ونستأنف الحوار

أمنياتي للجميع

hager za3bal يقول...

فعلا كل واحد فينا بيحتاج لاجازه
حتي لو يوم ينسي مشاكل ويبعد عن الزحمه ويستجم شويه

دمت بكل خير وود

تحياتي

مولان يقول...

انا باخد اجازاااااااااااااااااااات

بس فعلا بتفيدني جدااااا

norahaty يقول...

السلام عليكم ورحمة
الله تعالى وبركاته
ترجع بالسلامة إن
شاء الله ياباشمهندس
وكل سنة وحضرتك
والاسرة الكريمة
بألف خير

وفاء بركات يقول...

السلام عليكم ورحمة
الله وبركاته

من غير عنوان عجبني قوى البوست ده

في المحافظات المتخلفه الأجازات ترف نحاسب

عليه.. ولو خرجت يومين ورا بعض تجد من

يسألك خير كفي الله الشر هو فيه حاجه..

ولو بنوته خرجت كم مره ورا بعض

يتقال عنها حكايات

وإن عرفو إنك رحت مصيف تبقي رايق

إحنا شعب محتاج إعادة تثقيفه وإصلاح

مفاهيمه..

تحياتي

من غير عنـــوان يقول...

* وفاء بركات

أعرف ذلك حيث تنقلت وع والدي رحمه الله تعالى في عدة محافظات

ولكن من هو ذاك الذي يستطيع إرضاء الناس

أمنياتي

شمس النهار يقول...

حلو قوي الكلام ده
انت قلت ازاي نعمل الاجازه بس ماقلتش ازاي نقدر نقوم بيها
ازاي نقدر نتسلخ من كل المسؤليات اللي علينا ونقوم بأجازه كده لوجه الراحه