الاثنين، 8 ديسمبر 2008

التغيير


* مافيش حاجة اسمها أنا كائن ليلي.. أنا ملول.. أنا أصلي بني آدم وحدوي.. أنا ماليش في العلم.. أنا جسمي من الأجسام اللي بتحب تاكل كتير.. كل الكلام الفارغ ده.. ماهو حاجة من الاتنين.. يا مريض مرض لازم تروح بيه لدكتور .. حتى لو طبيب نفسي..وده مش عيب... يا إما بتدلّع وكسلان ولازم تقاوم نفسك ويكون عندك إرادة كويسه.. علماء النفس أثبتوا إن كل عاده ممكن تغييرها إذا أراد صاحبها ذلك .. أما إذا تكاسلت وتواكلت.. وأصل ربنا مش عايز .. والكلام الخيبان إياه..فطبعا مش حتغير حاجة.. عارف ..انت لو بتشرب الشاي بتلات أربع معالق سكر.( وده كتير وخطر). ابتدي خليهم أقل نص معلقة.. لمدة 6 شهور .. بعد كده حيبقى سهل إنك تقلل كمان نص.. الخلاصة .. لو عرفت وأيقنت إن العادة دي مضرة.. وعايز تغيرها..حتغيرها... صدقني.. المهم تبتدي.. وحتوصل.. أكيد حتوصل..وكمان لازم تعرف إن ربنا سبحانه وتعالى قال في كتابه الكريم إن النهار للعمل والمعيشه والليل للنوم.. وإحنا البلد الوحيد اللي قلب الموضوع ده وخلا نهاره ليل وليله نهار .. ابتدي نام بدري نص ساعة وإشرب أي مهدئ طبيعي زي الكاموميل قبل النوم.. حتصحى بدري نص ساعة وهكذا ... وأنا شخصيا جربت ده وده والفرق كبير جدا بين الشغل اللي بتنجزه الصبح عند الشروق... غير الليل خالص... كلّك نشاط وحيوية...ولو ليله مزنوق في سهره ما يجراش حاجه ونرجع تاني للصح.. على فكره المعنى مش بس في النوم ولاّ غيره... ده في كل حاجة وحشه أو عاده سيئة إنت بتعملها... حتى لو كانت التليفونات الطويله أو المصروف السايب... كله ممكن يتغير... بس الـمهم النيه..إنوي إنت بس...

هناك 28 تعليقًا:

أسامة وغيداء يقول...

كل عام وإنت بخير
وتدوينة جميلة جدا
وأمنياتي لك بالتوفيق

عمرو يقول...

كل سمه و أنت طيب الأول :)
كان ليلى نهار و نهارى ليل
طوال فترة الجامعه و بعد التخرج و الجواز .. و كان بيتهيألى أنى لا يمكن حأقدر أغير النظام ده اللى ضد الطبيعه لحد ما بدأت المشاكل فى البيت و العمل و الحياه بصفه عامه
و زى ما أنت قلت تدريجيا و واحده واحده بدأت فى التغيير لأن كانت عندى الرغبه فى كده
عارف دلوقتى لو ورايا أيه أسيب كل حاجه و عند منتصف الليل بالثانيه أدخل السرير حتى لو ما عنديش رغبه فى النوم و لكن بأفصل الكوبس و أقفل الموبايل و يومى بيخلص على كده
سبحان الله اللى جعل النهار معاشا و الليل لباسا

غير معرف يقول...

كل عيد وأنت وكل من تعز بخير وفي أحسن صحة وأسعد بال.

وفاء بركات يقول...

السلام عليكم
كل عام وحضرنك بخير..
ودائما مدونتكم متألقه وبها الجديد
مع خالص التحيه

mohamed ghalia يقول...

تمام يافندم
لا بد من التغيير والتطوير
حقيقى موضوع هايل
فى حفظ الله
كل سنة وانت طيب

م/ الحسيني لزومي يقول...

تقبل الله منا ومنكم
وكل عام وانتم بخير

Kiara يقول...

والله معاك حق بجد

كل سنه وانت طيييييييييييب

أحــوال الهـوي يقول...

كلام سعادتك رائع و اذا اذنت لي ممكن اضيف
قال تعالى (وجعلنا الليل لباساً وجعلنا النهار معاشاً)
هذه الاية تلخص الكثير ان النوم ليلا و النهار للعمل و السعي
و لان الخالق قد برمج جسم الانسان علي افراز الهورمونات اللازمة للجسم في مواعيد معينه مثل النشاط اليومي نهارا له محفزاته و افرازاته
و في الليل ايضا فرصة لتجديد الخلاياو افراز هورمون مثل السراتونين المهدئ و المساعد علي النوم

وهناك مئات الدلائل و البراهين و لكن لن يسعها التعقيب

احسنت باختيار هذا الموضوع الحيوي

تحياتي

اقصوصه يقول...

مررت من هنا

لالقي تهنئة العيد

كل عام وانتم بخير:)

غير معرف يقول...

كل عام وحضرتك بخير وصحة وعافية الله ينور على الكلام حلو جدا وحضرتك قلت حاجة مهمة جدا فعلا هى ان الواحد لو "عايز" يغير عادة من عادته يعنى لازم يكون فى ارادة اولا وتكون صادقة وقوية فى الحالة دى بس ممكن يتغير
لكن فى ناس كتير مش عايزة تغير نفسها او عايزة بس مش عايزة تبذل مجهود واهى ايام بتعدى من غير ما نحس ونفضل فاكرين ان لسه قدامنا وقت نتغير فيه والوقت كالسيف ان لم تقطعه قطعك ودائما هناك فرصة بس نبتدى بجد انا باقول الكلام ده لنفسى على فكرة-اما عن العمل بالنهار والنومبالليل فاكيد لا يصح الا الصحيح وده كلام ربنا والبركة فى الصبح زى ما بيقولوا
مع اجمل امنياتى بالتوفيق دائما
على فكرة شكرا على هديه العيد جميلة جدا مثل زميلاتها..

Desert cat يقول...

كلامك صح جداً
العادات السيئة كما تأتى بالتعود من الممكن ان تمحى بالتوعد
كل سنة وحضرتك بخير

رؤية يقول...

ممتاز
انا مؤمنة بالكلام دا جدا
موضوع العزيمة والارادة والرغبة الحقيقية فى التغيير قد يفرد لها صفحات كثيرة للتحدث عنها
اشكرك على هذه الاشارة
وكل عام وحضرتك بخير


تحياتى لك

Hannoda يقول...

كل عام و انت بخير و صحة ياااارب

كلامك سريع و حازم

لكن بيوصل لمعنى حقيقي و بشكل واضح

وبيتكلم عن سلوك من سلوكياتنا السلبية بشكل فعلا واضح

عدم التغيير و الاستسلام للوضع الخطأ و التسليم بيه كواقع

عجبنيالبوست و انا من اللي بيشربوا الشاي باربع معالق

وماما طول عمرها بتقنعني و انا مقتنعة ان مستحيييل حاعرف

بس حابدأ من بكرة

:)

تحياتي

من غير عنـــوان يقول...

* amira elkasaby ...

كل عيد وأنتم بخير وصحة وسعادة وهنا

مبسوط من الرد بتاعك


تحياتي

Unknown يقول...

كل سنة وانت طيب
تمنياتي بالتوفيق

Unknown يقول...

نفسي اوي اغير موضوع المصروف السايب :)
انا باخد مرتبي و اصرف تلته تقريبا على محلات القهوة و الكافيهات .. :)
بحب القهوة اوي .. :)
هحاول اقلل من استهلاك القهوة ..
لأنها مضرة اصلا :)
مبسوطة اني جيت هنا :)

من غير عنـــوان يقول...

** قهو بالفانيليا
ولو إني بأحب التركي أولا ثم الأميريكان باللبن
(:

وما نيل المطالب بالتمني... ولكن تؤخذ الدنيا غلابا...

أنا بأموت في القهوة

بس بصراحة الأسعار في الكافيهات بقت فلكيه...

بعد ما كنت بأروح تقريبا يوميا... بقيت دلوقت مرة كل أسبوع

فرقت جـــــامد

ياللا عقبالك

أمنياتي

صفــــاء يقول...

.
اى عادة أى كانت سهل تغييرها او الاقلال منها بس الموضوع محتاج أرادة
زى ما حضرتك بتقول
مافى شئ صعب على الانسان عمله او يستحيل عليه التخلص منه
لكن هى مسئله أستسهال
وفى بيحب يعمل لنفسه منهج ما يسير عليه ويقول انه غير قادر عن الاستغناء عنه هى مسئله أستعداد نفسى وأرادة

تحياتى

الوردة البيضا يقول...

السلام عليكم
جئت للاطمئنان على حضرتك يا بشمهندس لأنك انقطعت عن زيارتي منذ فترة
بوست جميل ويارب تكون قضيت عيد سعيد

فشكووول يقول...

يا مهندس محمد .. انت راجل كويس وخبره ومتهيأ لى ان انا برضه خبره .. اما كويس دى بالنسبه لى فعلى الله .. انا اما جيت لك قريت المدونه التانيه .. وكانت متأخره شويه .. لأ كتير وبعدين جيت عندك ولقيت مدونه تانيه وطازه وقريت البوست بتاع العادات وازاى تغير عاداتك .. انا مدخن ومتنيل على عينى فى التدخين .. بس اما قريت عندك لقيت حل حلو وكويس .. ازاى ابطل تدخين اقلل كل يوم مثلا سيجاره زى ما اقلل السكر فى الشاى والله حل حلو المهم ابتدى ومن الان انا مش حادخن سيجاره لحد الصبح وربنا بقى يفرجها .. المهم عيد سعيد عليك وعلى اسرتك وكل عام وانت بخير .. تصدق اسلوبنا واحد فى الكتابه .. وانا من كتر ما بكتب بالعاميه قربت انسى العربيه ..مش عارف ايه اللى علمنى الخصله دى .. المهم الواحد يكتب وخلاص ويقول حاجه مفيده .. تحياتى مره اخرى وكل عام وانت بخير

من غير عنـــوان يقول...

* Fashcooool

ألذ حاجه في المدونات دي إن الواحد بيكسب صداقات زي الورد ...

وأنت عزيز عليّ


أمنياتي

Dr. Ibrahim يقول...

فكن أنت التغيير الذى يريده العالم

وتغيير النفس شىء مهم جدا

ولا يغير الله مابقوم حتى يغيروا ما بأنفسهم

وتغيير النفس للأفضل شىء مهم للحياة

تحياتى

د إبراهيم

أسما عواد يقول...

عندك حق المهم انوي انت بس
مدونتك متميزة وبها ما يثري الحياة
شكرا لتواجدك

EmO يقول...

Big Banna....
حلوة اوي المدونة دي .. أنا في يوم قلت فعلا لازم اقلل عدد ملاعق السكر في الشاي و فعلا من يومها و انااتعودت علي العدد الصغير للملاعق و في بعض الاحيان بحاول اشربه ساده بس بيبقي مُر جداً، بس اهم حاجة زي ما حضرتك قلت ، ان يكون فيه نيه و النيه دي يكوون لا رجعة فيها ، طبعا الشاي مثال صغير علي النية الصادقة، لسبب بسيط ان الانسان اللي عنده نية للتغيير بيكوون شاف الوحِش و عاش فيه ، او شاف الخطر و عاش فيه ، و لما بيلاقي ان الحياة ممكن تكمل من غير الوحش و الخطر اللي زانق نفسه بيهم بينوي نية صادقة و خالصة انو يبعد عنهم...طولت معلش

من غير عنـــوان يقول...

* عمر
أو
ُُEmO

منــّور

من غير عنـــوان يقول...

* شكرا يا أسما

شمس النهار يقول...

انا موافقه علي كل ده
وموضوع السكر ده انا جربته طبعا زمان كان البنت اللي تشرب شاي وقهوه عيب فاشربت الشاي ده علي كبر(عملت مع بناتي كده برضه ماحدش بيشرب شاي والاقهوه لحد دلوقتي)المهم لاقيته طعمه غريب حطيت سكر كتير مشي الحال وبعد كده عرفت ان السكر كتير مضر بعد الثلاثين فاعملت خطه للتقليل من السكر ودلوقتي بقالي سنين بشرب الشاي والشاي بلبن والنسكافيه بمعلقه صغيره جدا سكر
الاراده هي المحرك لكل مطلب
بس برضه لليل سحره مع كتاب وجرايد في الهدوء كده بعد يوم مزعبب برضه حلو علي الاقل للي في سننا

من غير عنـــوان يقول...

العزيزة شمس
لم أكن أتخيل أن تعلقي على كل ما فاتك
شكرا لا تكفي

أمنياتي