الثلاثاء، 16 ديسمبر 2008

آلـــو ...

* التليفون ....المحادثات التليفونية لها أصول.. سواء من القواعد العامه للإتيكيت أو من الإسلام ... يعني لـما تتكلم في التليفــون... ما تقــولش ( مين معايا ) .. لأن المفروض انك تقول تحية الأول .. وبعدين تسأل.. أو تعرّف نفسك وبعدين تسأل عن الشخص.. ولـما انت اللي ترد على التليفون ما تقولش تحية.. يدوب آلو عشان تعرّف اللي على الخط انه حد رد عليه.. دي إصول.. طبعا لو بتشتغل في شركة أحسن انك تقول اسم الشركة بعد آلو مباشرة لأن دي حاجة عامة مش خاصه.. ومن غير حساسية... بلاش تبتدي إنت لو حد طالبك تقول : السلام عليكم ورحمة الله وبركاته... ليه؟؟؟ لإن تحية الإسلام لها أصول... القادم على الحاضر... والراكب على الـمترجل والواقف على الجالس وهكذا... والقادم هنا هو الطالب... فعليه أن يبدأ بالسلام ( بل ويترك جزء ،أي يقول : السلام عليكم فقط)... حتى يتيح للمطلوب أن يرد التحية بمثلها أو أحسن منها... يمكن الموضوع بسيط إنما هو إتباع لسنه الجبيب المصطفى.. لإن العكس ( وإن ظهر إنه أصح ... إنما هو ضد حديث السلام وحديث الطرقات)... هذا والله أعلم...كمان طول الـمكالمة مهم ..بالذات بعد موضوع المحمول...وكمان الزّن بعشره missed calls وكمان الـمطلوب ممكن يكون مشغول.. تقوم سيادتك تطلبه عشر مرات وهو مش بيرد عشان في إجتماع.. يا أخي إديله فرصه...وحيرد عليك بعدين.. كمان إذا كنت مسئول.. ما ينفعش لـما مديرك أو عميلك يطلبك.. يلاقي المحمول خارج الخدمه ..أو ماتردش خالص.. وردك يكون كل مره أصل الشحن خلص.. أو أنا نسيته في البيت...أصل أنا عمله silent ... قفلته إمبارح ونسيت أفتحه النهارده ؟؟!!ده شغل ومسئوليه مش صحوبيه، وبعدين ممكن تراجع على تليفونك كل شوية يمكن ما أخدتش بالك وتليفون مهم جالك... وكمان صوت الرنات ... ولا بلاش لحسن تزعلوا.. مش حاجة لذيذه إنك تحط رنه مدلعة أثناء الشغل.. حطها بس على بروفيل تاني.. وممكن تكون إنت في إجتماع وإديها عشرة بلدي ... أكيد أكيد حتسيب أثر مش كويس...والـمصيبه لو كنت رايح إنترفيو ونسيت تقفل المحمول..... ولا مثلا تحطي call tone اسمه مابنامش الليل من حبك ومديرك يطلبك ..لو مزنوقين يا جماعة هاتوا خط تاني خاص...معلهش أنا مطول شوية.. بس تلاقي واحد بيطلبك وتقوله أيوه يافندم ( مين؟؟) يقوم يرد بكل شجاعة ( وإنت كل الحكاية إنك كلمته قبل كده مره ) يرد يقولك : مصطفى... محمد..حاجة كده من الأسماء ( الغير منتشره). يا سلام... أنا أعرف ألف مصطفى... مفروض عليـّه أعرف سيادتك من صوته ولا إيه؟ ورساله في العيد من مجهول الهويه... مفروض أنـّجم ولا إيه... والناصح يوقـّع ( مثلا شيرين) أنا أعرف 13 بنت إسمهم شيرين و3 شباب بنفس الإسم... عرّفوا نفسكم كويس بإسم العيله...وبعدين إنت وصحابك متفقين لو مش حترد وعشان تعرّفه إنك حتكلمه بعدين تقوم تقفل الخط.. أو مثلا إنك خلاص جاي أو أي إتفاق.. الكلام ده ماشي مع صحابك... إنما مديرك تقفل السكه في وشه ؟؟؟!! ولما تشوفه بعد ما رجعت من المأموريه اللي مكلفك بيها : يابني مايصحش... يقوم يرد بمنتهى الذكاء.. ما أنا مارضتش أغرم سيادتك... لإني كان فاضل لي ربع ساعة وأوصل الشركة وأحكيلك... يا سلام... مش كان ممكن عايزك في حاجة تانيه... وفي أي الأحوال إذا كان ممكن ترد ... رد.. التليفون ده عايز 10 صفحات مش واحده ولا إتنين...
_____________
ملحوظه مجموعة النصائح في آخر البوست السابق منقوله ..

هناك 19 تعليقًا:

alshared يقول...

مرور أول

أفادني كثيرا

كثيرا للغايه

أشكرك سيدي

فمشاركة الفكر شئ صعب فمابالك باعطاء خلاصة فكرك

دمت بكل الود

Dr. Ibrahim يقول...

فعلا

بس مين يتبع القواعد

من اول التحية

إلى إغلاق الطلاب للموبايل فى المحاضرات

وإنقطاع المحاضر عن التفكير بسبب رنة موبايل

تحياتى

عمرو يقول...

صباح الخير يا صديقى
و الله أنا بأستنى بوستاتك بفارغ الصبر لما فيها من قيمه نحن فى أشد و أمس الحاجه لها اليومين دول
موضوع الموبايل ده بالذات عامل لى تربنه فى نافوخى لكل الأسباب اللى أنت قلتها و أحكى لك حاجه : من كام شهر كده أستدعيت طبيب محترم الهيئه لكشف منزلى و ما أن بدأ الكشف حتى رن موبايله بنغمه رقيعه للغايه اللى هى بتاعت بوسته يا باااااشااااا
ذهلت و رفضت أنه يكمل مهمته و صرفته بعد ما أعطيته قيمة الكشف و هو مذهول
و قلت لهم اٍزاى أطمئن لضمير طبيب يكشف على عورات الناس بحكم مهنته و هو حاطط هذه النغمه الرقيعه ؟؟!!
أستعجبوا و حسبونى أتجننت
طيب بالذمه أنا غلطان ؟؟

من غير عنـــوان يقول...

* د. إبراهيم
* عمرو

الأعزاء

بعد ضياع القيم وإعتبار أن الأخلاقيات موضه قديمه، حدث تفكك غير طبيعي ..
وموقف عمرو من هذا الطبيب الذي لا يفرق بين استمتاعه برنته الخليعه، وبين هيئته كطبيب محترم.. هو موقف هـــام لو تم اتخاذه من كل شخص لتغيـّر الكثير.. واستطعنا أن نسترجع قليل من كثير ضائع

دمتم بكل الود..
وطول ما في ناس زيكم طول ما الأمل موجود....


تحياتي

لحظة تأمل يقول...

تحياتى لموضوعاتك القيمة
واشكرك حقا على موضوع انسان القيمة

اما بالنسبة للتليفون فاتفق معك فى ان لكل شئ اصول يجب اتباعها حتى الرد على التليفون
اعتقد انه اصبح لعبة او تباهى برنات التليفون الغريبة والنغمات
وكأنك فى مسابقة مين يضع اغرب نغمة
مع عدم التمييز بين الوضع فى العمل او مع الاصحاب

تقبل مرورى وتحياتى

أسامة وغيداء يقول...

فعلا قواعد وأصول جميلة تلك التي ذكرتها لكن للأسف أصبح البعض لا يتقيد لا بالأصول ولا بغيره , أعجبني البوست كثيرا والمدونة أكثر واسمح لي بضمها لقائمة المدونات التي نحرص على متابعتها

من غير عنـــوان يقول...
أزال المؤلف هذا التعليق.
من غير عنـــوان يقول...

* أسامه وغيداء

شرفتما

والشرف لي أن أكون في القائمة

تحياتي

صبرني يارب يقول...

شوف حضرتك

انت اتكلمت فى نقطتين بيغظوني اووووووووي

اولا حكاية الى يرفع السماعه ويقول سلام عليكم

طب انا اقول ايه انا طيب ؟؟؟

غتاته يعنى

وحقيقى كده المفروض الى طالب هو الى يقول
عارف بقى انا باعمل ايه
باعتبره ما قالش حاجه خاااااالص واقول انا الو .. سلام عليكم
هههههههههههههههههههه

المهم بالنسبه بقى للاخ الى بيرن عمال على بطال

تعالى خد منهم دسته يا فندم

يعنى حقيقى اتغاااااظ واقول لجوزي يعنى ايه يعنى الى معاه موبايل بلاش يروح الحمام ؟؟؟

يعنى واحد بيرن عليك وانا كنسلت عليه يعنى خلاص سمعتك ياعم

اعمل انا ايه يعنى
اعلق الموبايل فى رقابته وهو داخل الحمام ؟؟؟؟؟؟؟؟؟

حاجه تنقط يعنى

عموما عموما الناس افتقدت للعقل والذوق للاسف

اضف الى كلام حضرتك المواعيد الغير مناسبه

تلاقي واحد خفيف الظل متصل الساعه 2 مساءا ويقولك الله انتم نمتوا ؟؟؟!!!!

مع انا عارف انكم بتسهروا

طيب ياعم افرض ان انا سهرانه وقاعده تحت البطانيه باتفرج على فيلم ممل ارد انا ليه عليك الساعه 2

مش عايزه اقولكم انا بقيت ارد على الناس دي ازااااااااي

برخاااااااامه مفرطه

تحياتي واسفه على الاطاله

aMr saYed يقول...

تعلموا هنا اصول الاتيكت من غير عنوان ولا حتى كلام و مفيييييييييييييش سلام


تقبل مروري

من غير عنـــوان يقول...

* صبرني يا رب

(:
(:
(:

وفي الآخر يستغربوا احنا متغاظين ليه


أمنياتي

من غير عنـــوان يقول...

* mr. FOX


ده انت قلت سلام وكلام

شكرا وتحياتي

بنت الغربة يقول...

استاذ محمد انا اول مرة ازور حضرتك وبعد اذنك ضفتك عندى
اكتر حاجه بتضايقنى موضوع الموبيل ده
انا باعمله سيلنت دايما قبل جوزى ماينام لانى عارفه انه مش بيحب ازعاج
قبل النوم
لكن هو ممكن يرد على موبيله فى اى وقت حتى واحنا بنتغدى او بنتعشى
والى بيكلمه ارخم منهم مافيش مره انا رديت وقلتله ده فى الحمام قالى طب انا هاستناه لما يخرج.............
شفت ارخم من كده؟؟؟
تحياتى ليك

صفــــاء يقول...

.
أثرت نقطه مهمه فى أداب الرد

أوقات لما بدخل على ناس او حتى لما اتصل ممكن مش بقول السلام عليكم
اوقات بقول صباح الخير او مساء الخير
والمفروض ولأنى ست ولأنه من الذوق ان الرد يكون من جنس التحيه نفسها
لكن انى اقول مساء الخير يقوم يقولى وعليكم السلام
هى طبعا تحيه أفضل ومن صلب الدين
لكن الاسلوب خطأ ومش من أى ذوق أصلا
لأن رامى السلام ممكن يكون على غير الدين واحنا مش هنربى الناس
طولت عليك ... بس بجد موضوع فيه كتير نقاط هامه ..... تحياتى
.

رؤية يقول...

بوست دمه خفيف وخصوصا ان كل دا بيحصل كتيير

اشكرك على النصائح

تحياتى لك

غير معرف يقول...

السلام عليكم ياباشمهندس
شفت حضرتك ان فيه ناس كتير اهتمت بالموضوع لانه فعلا الناس فصلت معانى الذوق والادب عن الموبايل كأن ده حاجة وده حاجة واول مرة حد يثير النقطة دى ان فعلا للموبايل اصول وقواعد زى ديننا ما بيقول مثلا عن اداب الاستئذان ودخول منزل احد وطرق الباب 3 مرات فقط المفروض برضه يكون الموبايل ويارب الكلام يجيب نتيجة

Unknown يقول...

السلام عليكم ورحمة
الله تعالى وبركاته
من الواضح ان فيه
حد مضايقك بالمسد
كوووول
دى :)
تعالى اقعد عندنا
فى العيادة واسمع رناااات
الدنيا والاخرة وياويلك لو قلت
لحداقفل الموبايل يبص لك كده بأستغراب
ويقلك ايه؟هو انا عملت حاجة؟

شمس النهار يقول...

بجد بجد موضوع مهم جدا والغريب انك لما تلفت نظر حد للكلام ده يبص لك علي انك مجنون
هحاول اقرا كل اللي كتبته وانا غايبه

من غير عنـــوان يقول...

** شمس النهار
مجنون ونص.. الناس شايفه إنها مثلا ممكن تكلمك الساعة 1 بالليل.. الله إنتو نمتوا..

أمنياتي