الثلاثاء، 23 ديسمبر 2008

اسمع دي ونفذها وادعيلي

* التوفير حلو و مفيد .. حوّش .. ولو جنية واحد يوميا.. لو ماطلعتش بحاجه من الكتاب ده كله إلا الحته دي .. كفايه.. هات علبه قديمة عندكم.. إقفلها .. برشمها بكل أنواع اللصق اللي قدامك.. افتح فتحه فوق على قد انك تدخل جنية مطبق.. اكتب جنبها.. الهدف ..( موبايل جديد) مثلا .. أو أي حاجة انت عايزها.. وحط جنية أو أكتر كل يوم.. كل واحد وقدرته ..ولو نـَـفسك أو الشيطان أو صحابك .. أو اخواتك .. لو حد وزك انك تفتح (بس تشوف حوشت كام وتقفل تاني).. ماتصدقهوش.. كمل لغاية ماتعرفش تحط ولا جنية تاني.. وافتح ... وادعيلي J ...ممكن تجيب علبه صغيره قوي .. أو كبيرة شوية .. انت وشطارتك .. طبعا بحسبه بسيطه .. لو حوشت جنيه في اليوم لمده سنتين.. عارف كام حيبقى معاك.. 730 جنية تقدر تروّش نفسك بيهم على كيفك.. حينفعوا .. صدقني.. وكمان ممكن تحطهم في دفتر التوفير.. ولو لك في حسابات الفائده الـمتركمه أضرب عشره في الميه لمده عشرين سنه وشوف الجنيه كل يوم حيطلع كام.. عارف كام؟؟؟؟؟ حوالي 23000 أيوه ثلاثه وعشرون ألف جنيه مصري لا غير ...وإحسبها إنت على مهلك..وعشرين سنه مش كتير وجنيه مش كتير... ولو معاكك أكتر وماله... على فكره ده تحويش جانبي... غير إن يجيلك مكافأه أو عيديه أو أي رزق آخر..أنا بأتكلم عن أضعف الإيمان...وما فيش بلد متقدم في العالم إلا وناسه بيحوشوا... وفي كمان إنك تعمل كذا صندوق ... كل واحد وشطارته... وفي ناس بتحوش من وهيه 10 سنين كل يوم دولار عشان لما يطلع معاش مثلا يلف العالم.. كده الناس تفكر ... كده الناس تعيش وتسمتع... ملحوظه : ماتقولش لحد إنك بتحوش...

هناك 17 تعليقًا:

Unknown يقول...

عملتها كتير بس كنت بتقفش وفلوسي بياخدوها مني وآخر مرة اديتهالهم لنفسي ليه كان فيه ظروف صعبة جدا عمري ما حوشت وجيبت حاجة عدله أبدا
مودتي
بس فكرة حلوة لو تتنفذ صح

Engy يقول...

والله دى فكرة هايلة... وعجبتنى أوى فكرة الهدف.. ده يخللى الواحد يبقى متحمس أكتر وعنده صبـر.
أنا إن شاء الله حجربها و حعملها لإبنى.
شكراً جزيلاً على الأفكار الجميلة والمفيدة يا باش مهندس. :)
ربنا يبارك فيك :)

أحــوال الهـوي يقول...

سوف ارسل مقالك و فكرتك لعيالي و ياريت حد منهم يعمل بكلامك بعد ما بح صوتي لانهم قناة صرف فقط لا توجد بها اي احساس بالزمان او المكان فقط مهارة فائقة بالتخلص من اي اموال بسرعة مثل الفارين من الطاعون

تحياتي

شمس النهار يقول...

حاضر هنحوش
بس علي فكره الست المصريه احسن وزير ماليه في التاريخ
ازيك وكل سنه وانت طيب

عمرو يقول...

فكره رائعه و مفيده
عندى كمان فكره تانيه لو تسمحى أعرضها و هى فكرة الجمعيات
ناس كتير بيبصوا للجمعيات على اٍنها حاجه مش لطيفه و أيه الفايده منها مادام مافيهاش مكسب و كمان اٍلتزام على الواحد أول كل شهر أنه يدفعها و كده
الحقيقه أن الجمعيات لأن فيها اٍلتزام فده بيخللى الواحد يحوش غصب عنه و كل كام شهر يلاقى معاه مبلغ متجمع حلو كده يقدر يجيب حاجه كوبسه أو يصرفها فى مكانها المناسب
أنا عن نفسى بأحب الجمعيات

dalia يقول...

شكرا على النصائح المفيدة اللى في مدونتك من وحهة نظرى الانسان المدخر هو انسان حكيم بس قولى اعمل ايه في اخويا ،هو طالب في الثانوية العامة لا يمكن تلاقى في محفظته مليم احمر فبعد ما بياخذ المصروف الاسبوعى او العيدية بيقوم يفرتكها كلها ويخلصها في ايام قلائل نصحته مش عايز يسمع، في موقف كل ما افتكره بضحك اخويا لما كان صغير يعنى عنده 10 سنوات كان بيضايق لما بيلاقى معاه فلوس مصرفهاش على الحاجات الحلوه لدرجه انه كان بيبكى ويقول مثلا معايا 5 جنيه اعمل بيها ايييييييييييييه عااااااااا

dr_samarmar يقول...

أنا جربت مرة بس سمعت كلام نفسى و الشيطان و صحابى و فتحتها بدرى أوى :(

بس هى الفكرة جميلة .. و احنا بنضيع فلوس كتير أوى على حاجات تافهة و مالهاش معنى

أكيد لو نحوش هيكون أحسن كتير :)

بس حلوة حكاية ماتقولش لحد انك بتحوش دى .. على أساس دارى على شمعتك تقيد يعنى :)

Inji Amer يقول...

أستاذنا الغالى : كل سنه وحضرتك وأسرتك الكريمة طيبين وكل سنه واحنا مستمتعين بإطلالتك الرائعة علينا وبأفكارك الجميلة ونصائحك القيمة وأسلوبك اللطيف والخفيف الظل :)
طبعا فكرة الحصالة دى فكرة تربويه رائعة بدون شك بس ياريت كل مرة نفتح فيها الحصالة بعد ما تتملى نجعل جزء منا ولو بسيط صدقة للمحتاجين عشان ربنا يبارك لنا فيها وياريت يكون حد نعرفه ونعرف حاجته ونقدمها له فى صورة هديه ويا بخت من أدخل السرور على قلب أخيه :)
أطيب أمنياتى القلبية لحضرتك بعام سعيد هجرى وميلادى وتحياتى للجميلات سالمه وإيمان ورضوى :)

Inji Amer يقول...
أزال المؤلف هذا التعليق.
صفــــاء يقول...

.
أخر مرة حوشت وكان فى علبه صفيح عملهالى واحد نجار جارنا وحطلى عليها قفل صغير وقعدت احوش فيها بتاع يمكن 5 سنين وكان كل مصروفى فيها كنت عيله بقى وبحوش اى حاجه تجيلى
وصحيت من النوم لقيت علبتى مكسورة وما بها مسروق
اخدو تحويشه الطفوله عشان يشترو كراسى جديدة للسفرة
يعنى أساهم غصب عنى ولو بالعافيه
ومن يومها مشيلتش مليم تانى
ماهو مش انا اعمل كوهين البخيل وشقى عمرى يتاخد كدة ومن غير ما يقولولى كمان
.

مدينـة من النسـاء يقول...

ملحوظه : ماتقولش لحد إنك بتحوش...

***

هىىىىىىىىىىىىىىىىىى دي

والله نصيحه حلوه
تسلم عليها

من غير عنـــوان يقول...

** شمس الحجاج( شمس التهار).. حمدا لله على السلامه..تقبل الله..
وطبعا من الطبيعي إن الشمس بتنور المكان كله وبشده كمان...

نــــــــــــورتي

أمنياتي وتحياتي

بنت الغربة يقول...

انا عملتها كتير ايام الجامعه
وماكنتش باقول لحد خالص
لغاية مكان معايا 500 جنيه وبعدين
ماما لقتهم معايا وعملتلى مشكله
لانها مش مصدقه انى حوشتهم
وكانت خناقه لغاية ماحلفتلها انى باحوش من سنتين -من مصروفى وكمان
بعت كتبى القديمه بتاعت السنه الى قبلها للطلبه الجداد بنص السعر
فيها ايه ؟؟؟
طبعا زعلت منى وافتكرت انها مقصره معايا فى الفلوس
و....زودت مصروفى ...شفت ام اعسل من كده.....
اما لما اشتغلت ف.....انسى
تحياتى ليك

موناليزا يقول...

فكرة جميلة

من غير عنـــوان يقول...

** ست البنات
inji amer
تسلمي على فكرة الصدفة من التحويش
والقلب الطيب بيداري الصدقة في صورة هدية

ما شاء الله عليك

أمنياتي

Unknown يقول...

السلام عليكم ورحمة
الله تعالى وبركاته
عملناها واحنا صغار كتير فى الحصالة الصفيح او الفخار اللى ماتتفتحش الا لما نكسرها(تفتكرها حضرتك؟) وكنا بنحط فيها جزء من المصروف اليومى او العيدية او النفحات الغير متوقعة من الاقارب(المتريشين)وكنا بنجيب بها فعلا حاجات(نروش بيها نفسنا)بطلت العادة دى شوية لكن!! وخلى لى بالك من لكن دى كويس رجعنا لها والحمد لله من سنتين تقريبا والخميرة(كما يسميها صديق لى )بقت كويسة:):):)
وزى كل مرة لازم اشكرك على الكلام الجميل ده.

وفاء بركات يقول...

موضوع مفيد جدا ونفسي حد من ولادى
يطلع مدخر مش مصرف .. عموما انا مليش حظ مع الفلوس ...مع إن في يوم ولدتي رحمة الله عليها خلتني أحط صفيحه ميه فاضيه تحت حنفيه بتنقط وتاني يوم الصبح لقيت الصفيحه علي اخرها قالت لي اهو القرش علي القرش مع مرور الأيام يبقي فلوس متشاله ...
وعلي كل حال انا بدعيلك من غير حاجه علشان الماده اللي حضرتك بتقدمها مفيده برغم بساطت الأسلوب لكن دسمه في محتواها
تحياتي