الأحد، 28 ديسمبر 2008

مساحة

* كل مـنـّـا يريد مساحة خاصة we need a space والـمساحة هنا بمعنى وقت أو بُعد أوحرية .. المهم تتعلم ان تاخد مساحتك.. وتدي الآخر مساحته.. سيب لصاحبك وقت .. ماتكبسش على نـَـفسه عمـّـال على بطال.. وسيب لأبوك مكانه في غرفة المعيشه يتفرج على اللي عايزه في التليفزيون .. لأنه مش بيلحق.. وسيادتك فاتحه على طول .. ماتسأليش جوزك في الـموبيل انت فين دلوقت إلا لو هو قال .. أو كنت عايزاه ضروري..لـما صاحبة أختك الـمقربة تيجي تزورها سلّمي وامشي ( بينهم أسرار).. عيب تفتح شنطة مراتك.. وعيب كمان انك تفتشي في جيوبه وأعيب لـما تليفونه يرن تبصي مين؟؟!!ده أبسط مساحات الحرية..ويا سلام لو كل زوج وزوجه أخدوا مساحة بعيد عن بعض كل شوية.. حترجع مشتاقه ليك وإنتِ كمان لو سيبتيه ياخد نص يوم مثلا يعمل اللي على مزاجه هو.. حيرجعلك وإنت واحشاه ...بلاش تسأل صاحبك في التليفون انت بتعمل ايه ومع مين وازاي وبكام إلا لو هو قال .. ولو عايز تخرج معاه اسأله .. فاضي دلوقت؟.. لو كلمت حد في شغل اتكلم في وقت الشغل.. وماتكلمش أي حد في أي وقت.. ولو ماردش عليك في التليفون سيبه.. حيتكلم.. ولما تخلص مناقشه مع مديرك .. قول له طيب بعد إذنك وإمشي..وكمان لو جاله تليفون خاص أثناء الـمناقشه إمشي..سيب للناس مساحات..عشان هما كمان يدولك مساحة.. وتأكد إن ده شئ جميل.. ويابخت من زار وخفف..ومهم جدا إنك تقعد مع نفسك 10 دقايق كل يوم.. وأحسن لو استرخيت فيهم وغمضت عنيك.. من غير ما تفكر في حاجه... أو بالليل حاسب نفسك... ولو عملت ده حتعرف تدي لغيرك مساحته زي إنت ما أخدت...

هناك 12 تعليقًا:

لحظة تأمل يقول...

الله عليك بجد
مساحة .. فعلا ولو حتى مساحة بسيطة من الحرية او الخصوصية او انك تكون فيها مع نفسك

نفتقد الان احترام الاخرين لحريات بعضهم
ممكن البعض يعتقد انها اسرار برغم انها حق لكل شخص انه يبقى ليه اسراره

بس اهم من الاسرار واحترامها .. المساحة الخاصة بالشخص انه يكون ليه متنفس او على الاقل يقعد مع نفسه
بيتهيالى المبدعين او العلماء او شخص متميز فى مجال كان فاهم معنى الكلمة ديه كويس وانها من حقه ومن حق الاخرين ايضا

تحياتى وتقديرى

أحــوال الهـوي يقول...

بروتوكول جميل ان نفذناه ارتحنا و ارحنا
و لكنها ياسيدي آداب غير متوفرة في سلوكيات و بديهيات المجتمع ثقافات رديئه احتلتنا و سيطرت علينا

يا سلام لو ارحنا انفسنا من هذه الخصلة المقيته ...خصلة الفضول و الحشرية

للاسف عندك حق

تحياتي

Unknown يقول...

بجد فعلا عندك حق وأكبر حق في كلامك ده أحيانا بحس بالخطأ مش بالعمد إني كبست على نفس حد واتخنق مني بنسحب بس بعد لما يكون تعب يعني مش دايما ده بيحصل معانا كلنا في مواقف متعرفش تتصرف فيها يعني زي ما قلت لو عند المدير وجاله تلفون لو انسحبت افرض طلبك بعد ما خلص وقالك هو أنا أذنتلك تمشي وشخط كالعاد هتعمل ايه
بس فعلا المساحات مطلوبة وأكتر كمان بين الزوج والزوج والأصدقاء
مودتي وشكرا ع الكلمتين المهمين الي غافلين عنهم ناس كتير
مودتي لك

Unknown يقول...

السلام عليكم ورحمة
الله تعالى وبركاته
تعلم الاسترخاء ونسيان او
عدم التفكير فى شىء محدد فن
لابد من نمارسه كلنا حتى نستطيع
الاستمرار فيما نحن فيه من ضوضاء
وضجيج على مدى اليوم بطوله!

فشكووول يقول...

من غير عنوان .. السلام عليكم
تصدق يا أخى انت بتجيب حاجات عجيبه .. ما حدش واخد باله منها خالص .. انت بتجيب الحاجات دى منين .. والله فعلا الواحد عامل زى البقدونس والملح اللى بيتحطوا على كل حاجه ودافس مناخيره فى كل حاجه .. ولا كان واخد باله من الحاجات دى اللى اللحظه الحاليه لما قريت البوست بتاعك .. فعلا .. انا مقتنع بكلامك .. بس انا حشرى .. اعالج الحكايه دى ازاى ..
انامبسوط لتعليق حضرتك ولو عايز مزيد ممكن تقى البوستات القديمه اللى انا عملتها فى التاريخ المصري القديم وهى
انا كتبت قبل كدا بوست عن نشأة الحضاره الفرعونيه فى 3 نوفمبر
وكمان كتبت بوست فى 4 نوفمبر عن اصل الجنس المصرى
وكمان كتبت فى 11 نوفمبر عن مينا موحد القطرين
وكمان فى 23 نوفمبر عن امحوتب المهندس والطبيب والحكيم
وهذا احدث بوست عن التاريخ المصرى وكلها كتابات انتقائيه يعنى مش التاريخ من اوله لكن انتقاء احداث من التاريخ بالتسلسل الزمنى الطبيعى .. يعنى مش موضوع قبل موضوع .. من اول الخط وانت ماشي
ولو بتعرف تجيب البوستات القديمه حتلاقيها .. تحياتى وكل عام وانت بخير

hasona يقول...

نصائح غالية

غير معرف يقول...

السلام عليكم,
بجد بجد الله ينور عليك يا باشمهندس من أحلى ما كتبت ,والله ماأحوجنا الى هذه المساحة التى باتت أشبه بالخيال العلمى وللاسف ممكن الواحد ياخذ هذه المساحة من الأغراب أما المقربين فالمسألة صعبة جداياأما تأخذهم الكرامة ويزعلوا منك يأما يحشروا نفسهم فى كل حاجة, المفروض نبدأ بالأباء انهم يعلموا أولادهم الخصوصية ومايتدخلوش فى كل صغيرة وكبيرة فى حياتهم وبالتالى نغرس القيمة دى فيهم ونعلمهم ما يتحشروش فى اللى مالهمش فيه,وكذلك الأزواج شوية هوا يعنى عشان النفس.
وكل عام وحضراتكم بخير بمناسبة العام الهجرى الجديد

شمس النهار يقول...

اناقريته الصبح وماعرفتش اعلق
وجيت دلوقت قلت ماانا لازم اعلق
طب اقول ايه بعد ده كله
الموضوع باين بسيط وهو مش كده عشان كل ده يقع تحت بندالتجسس والبحث والتنقيب وراء الاخرين حتي لو الزوج او الابناء او الاصدقاء او الجيران او اي بني ادم
بصراحه مش عارفه اعلق
بس الموضوع جميل جدا
عايز يتكتب ويتوزع مع الجرايد علي البيوت

من غير عنـــوان يقول...

** شمس النهار
تعليقاتك مهمة
كنت عايز أزود " من حسن إسلام المرء تركه ما لا يعنيه"

تحياتي

شمس النهار يقول...

جميله فعلا الكلمه دي
طيب اعمل لها تحديث
فكرتني
بياريت الانسان يشبل العصايا اللي في عينه قبل مايشيل القشه اللي في عين جاره
مش كده

الجواز و سنينه يقول...

و الله حضرتك بتبهرنى بكلماتك
ياريت بجد ناس كتير اوى يستفيدوا منك
و الاهم هو التطبيق
اسجل اعجابى بأخلاقك الرفيعه و سلوكياتك الرائعه

Unknown يقول...

السلام عليكم ورحمة
الله تعالى وبركاته
صبيحة عام جديد
ارجو من الله أن يكون سعيد
اقولك اللهم نصرك على الاعداء
اللهم نصرك اللهم نصرك اللهم نصرك
وصباح الخير والخيرات
باشمهندس محمد
ياراجل ياطيب