الخميس، 18 ديسمبر 2008

SMART

* خليك Smart ..والكلمة دي معناها لا يُترجم ..وهي أصلا في اللغة الإنجليزية معناها واسع .. المعنى الضيق لها انك تكون شيك ( يعني بتلبس كويس) أو منمق الملابس .. اما المعنى الأشمل هو انك تكون مُلم بحاجات كتير.. بتعرف تلبس .. وبتعرف تتصرف.. بتعرف تاكل وبتعرف تقرا .. بتسمع موسيقى وتذاكر.. بتتكلم كويس وتسوق العربية بحرص.. بتحضر درس ديني ( او تسمعه في التليفزيون) وكمان بتعرف تشتغل على الكومبيوتر..بتعرف اصول الكلام مع الناس وكمان تُلم باعلانات التليفزيون والجرايد عشان تبقى تعرف تشتري كويس.. هي مش نظرية ثقافة .. انما الأهم انك تكون مالي مركزك لما تقعد مع الناس أو تتقدم لوظيفة .. أو حتى عروسة.. يكون عندك خلفيات للحديث معاها.. وهي كمان لازم تكون سمارت.. مش همها على الموضه وبس .. وانت همك على النظريات العلمية وبس.. مصيبة.. الحوار اتقطع..لازم انتم الاتنين تعرفوا تتكلموا في حاجـــــــات كتيييير .. وده مش حيجي إلا بانك تفتح حواسك تستقبل بها ما يجعلك مُلم بما يحدث حولك..كمان لازم تملا مركزك ( زي ما بيقولوا ) ماتبقاش استاذ في الجامعة ومش واخد بالك من لبسك.. أو تكون تاجر شاطر بس ماتعرفش تسمع مزيكه حلوة.. أو تكوني دكتورة بس مش دريانه ان دينك بيقولك ان الإبتسامة صدقه .. أو مثلا ماتعرفش تشتري هديه لمراتك أو الزوجه مش عارفه تدلع جوزها، حاجات كتير لازم نعرفها ..ونعملها ..نتعلمها .. عشان تخلينا سمارت .. تخلينا مانتكسفش لو أكلنا بالشوكه والسكينه..أو حتى لو أكلنا جوز حمام في الحُسين .. ناكله بايدينا إزاي من غير ما نقرف اللي قدامنا .. وحاجات تانيه وتالته ورابعه.....

هناك 20 تعليقًا:

Desert cat يقول...

من 4 سنين كدا قبل ما يرخصوا سعر دقيقة الموبايل
كان خطى فودافون SMART
كنت بدفع اشتراك كل شهر ثابت 120 جنيه والدقيقة بـ 30 قرش ولما نزل سوبر دردشة لاغيت النظام ده
تفتكر ده له علاقة بالشياكه
:)
تحياتى

من غير عنـــوان يقول...

** DESERT CAT

من 40سنه كده... كان ممكن أعرف الرد


تحياتي

Dr. Ibrahim يقول...

دعوة الى الإلمام بشئون دنيانا لتسير الحياة

تحياتى

Kiara يقول...

اممممممممممم طيب ماهو لازم فعلا نكون كدا

لازم نكون اجتماعيا وعلميا وعمليا برفكت

غير معرف يقول...

فعلا عندك حق
لازم نكون سمارت
يعني مينفعش ابقي دكتوره وحماره في باقي العلوم
ولا ينفع حد يبقي ملم بحاجه اوي وباقي الحاجات لايفقه فيها شئ
لازم الواحد لما يقعد في مكان يكون مالي مركزه زي مانت قلت..

تحياتي

فارس القمر يقول...

كلامك جميل قوى وصح لازم نبقى واخدين بالنا من كل حاجه
تفتكرى لما الواحد يبقى ماشى على نظام ثابت فى اليوم حسب شغلوا يكون احسن
ولا التغيرات اللى بتحصل لينا لازم كل يوم يبقى على شكل تانى يوم ياخد بالوا من نفسوا واليوم التانى مش مشكله
لكن ان شايف ان التخصصات اليومين واكله الجو بمعنى ان كل واح متخصص فى حاجه بيديها كل وقتى وتقريبا بيسمع عن الحاجات التانيه
نقول ايه للشحصيه دى ....!!!!

kmt يقول...

السلام عليكم ورحمة الله وبركاته

يشرفني مرورك علي مدونتي

واستفدت من القراءة شكرا لك

تحياتي
الي اللقاء

غير معرف يقول...

العزبز م/ محمد البنا

شرفت بزيارتكم

لمدونتى العماليه المتواضعه
التى أتمنى أن تكون مفيده
ولقد سعدت وأستمتعت بزياره مدونتكم
التى وضعتم فيها عصاره خبرتكم الحياتيه
مدونه رائعه بالفعل ومفيده وأستأزنكم فى النقل عنكم مع ذكر المصدر
وسأعود لأيتكمال جولتى بأرجائها

وتقبل تحياتى وشكرى

من غير عنـــوان يقول...

* واحد من العمال
شرُفت بزيارتك
وعلى الرحب والسعة

تحياتي

فشكووول يقول...

العزيز من غير عنوان:

هو كله ممكن .. بس حكايه اكل الحمام بالشوكه والسكينه .. صعب دى شويه ..
العزيز من غير عنوان:
يظهر والله اعلم انا السبب فى ارتفاع الضغط عندك وخليت اعصابك تشد ودماغك تفور .. علىالعموم انا مش هنا - انا هربت ورحت حته تانيه .. احسن تعرف طريقى وانا ما اضمنش تعمل فى ايه .. يا فكيك ..

Mona Shereif يقول...

ماشاء الله ولا قوة الا بالله
بجد المدونة جميله اوى اوى اوى
وعاجبنى لفظ خابرت الحياة جدا
اعهم حاجه نتعلم من اللى فات من عمرنا
يارب نقدر نعمل كده
بجد جزاك الله خيرا لان اتعلمت حاجات كتير اوى من خلال قرأتى لموضوعات حضرتك

فاكر لما شبهت علاقة الزوجين بالبينج بونج
انا شبهتها بمركب بمجدافين لازم الاتنين يجدفوا علشان تمشى انما لو لواحد بس هى اللى جدف واتحرك هيفضلوا يلفوا حوالين بعض والمركب مش هتسير
ربنا يستر بقى

بجد تحياتى

من غير عنـــوان يقول...

* الفشكول الكبير

أصل انت بتتكلم في مواضيع جامده عليه يا عم فشكول

عموما ما تمشيش.. لا حته تانية ولا تالته

بس اكتب حتجات عن الجو... الطقس... الويذر...
أو عن الهوى والقمر

حبيت أضـّحك معاك في هذا الصباح

إنت راجل قلبك جميل وفلاح زي حالاتي

تحيات وسلامات

من غير عنـــوان يقول...

*sometimes

أهلا وسهلا

غريب يبحث يقول...

كنت بحاول أكون smartبس واضح إني فشلت وبقيت عكس smart تماماليه مش عارف...بس جميل إن الواحد يلاقي حد أو كلام يفوقه حتى لو أحيانا الكلم ممكن يكون بيوجع بس هادف ليه نتيجه في الأخر...الواحد عايز يستعيد النشاط من تاني زي ايام الكلية مش عارف ليه الواحد وكل صحابه من يوا ما خلصنا وأشتغلنا حسينا إننا كبرنا وكمان عجزنا من البيت للشغل ومن الشغل للبيت..طبعا العيب عندنا و فينا محتاجين نفوق شويا..عشان نكون smart..

Unknown يقول...

السلام عليكم ورحمة
الله تعالى وبركاته
بداية حبى للكلمات المتقاطعة وحلها كلها هو حبى للمعرفة بشتى انواعها.
ولما أتعلمت القيادة للسيارة بقيت
اوقف عند كل خناقة اعرف الناس بتتصرف ازاى ,بتقول ايه وبترد بأيه؟ وقس على هذا قراءة الجرايد وبريد الجمعة بالاهرام ومشاكله وخاصة ايام الاستاذ /عبد الوهاب مطاوع الله يرحمه
حتى النشرة الجوية استفدت منها فى بدء الحديث مع اشخاص قد لا اكون على معرفة وثيقة بهم وبتوجهاتهم .الخلاصة مافى شىء ياباشمهندس تقراءه او تمارسه الا وله نفع ومنفعة بس المهم تعرف كيف ومتى تستفيد به .
تحياتى لحضرتك وللمحاتكِ العميقة.

أحــوال الهـوي يقول...

دائما تصل الي العمق بطريقة فريدة
تذهب بنا الي الشرق و خلاصة الموضوع في منطقة اخري تشير اليها بعد ان يقتلنا الشوق الي المعرفة

و عرفت السبب في اسم مدونتك من غير عنوان لانك فقط تملك وصف العنوان
انا اوافقك الراي بما تفضلت و كتبت

تحياتي

Unknown يقول...

being smart should be a way of living.
ahmed esmat

عمرو يقول...

أوافقك الرأى تماما يا صديقى و جزاك الله عنا خير و الله لأجل مواضيعك المفيده اللى بتتحفنا بيها
تقبل خالص تحياتى

شمس النهار يقول...

يعني نلخص الموضوع ونقول خليك بني ادم سوي
ماهي دي الف باء البني ادمين
دايما تكتب في مواضيع تبان بسيطه وهي كبيره قد كده

وفاء بركات يقول...

ضرورى إن الإنسان يكون ملم بأشياء بعيده عن إختصاصه لزوم العلاقات الإجتماعيه ...مع إن أحيانا بيجمعني وناس مكان تلاقيهم شاربين نشا والقطه كلت لسانهم ولما أسأل ملهم دول يقولو ملكيش دعوه بيهم اصل الجماعه دول ملهمش في الحوار ده . حوار آيه أحنا بنتكلم عن إرتفاع الأسعار عن مشكلة العنوسه يعني مشاكل مجتمع ... يعني المفروض قعدة الدكاتره تبقي عن البنج والحقن .. والمهندسين عن الحديد والزلط
والخ...
ياريت ناس كتير يقرو البوست ده ويفكرو في حكاية إسمارت ده وكويس إن حضرتك ترجمت الكلمه علشان اللي زى حلاتي يفتكر انه حاجه بتتباع في السوبر ماركت ..
تحياتي