الجمعة، 23 يناير 2009

المتنبي

* ذو العقل يشقى في النعيم بعقله..
وأخو الجهاله في الشقاوة ينعم

ده بيت شعر للمتنبي.. بيشرح إزاي تكون حواليك جنه ونعيم وأنت شقيان بعقلك لأنك تفكر وتفكر.. وصاحبنا الجاهل سعيد في ما هو أصلا شقاء.. ؟؟!! فكر ... حتلاقي الراجل عنده حق.. وكمان كأنه شايفنا الأيام دي.. من يوم ما قرأت هذا البيت من الشعر وهو في بالي.. ياترى انا ده ولا ده.. وإيه الفرق... طيب إزاي العاقل يشقى والجاهل ينعم.. الخواجات عندهم حكمة بتقول أن الجهل نعمة.. ساعات باحس بكده... بالذات الأيام دي في بلدنا... وساعات بأقول إن العقل هو الأمانه التي اختص بها ربنا سبحانه وتعالى البني أدم.. ولذلك لازم يستعملها في محلها.. بس ازاي يستعملها لوحده ... إذا كان الجهل هو السائد... وأصبح العاقل كالـمجنون..بيطالب بحاجات قديمة.. مش موضه.. ورسالته مش واصله... لو فهمت بيت الشعر ده.. يا إما حترتاح .. أو حتتعب. مش عارف .. ساعات باحس ان فعلا الحمد لله على نعمة العقل..وأد ايه العقل نعمة وزينة.. بس بيخليك تفكر في حاجات كتير وبتتعب من تصرفات من حولك من الجهلاء.. وساعات باقول يا بخت الجاهل .. مش دريان بيستمتع بحاجات لا يمكن أن تـُمتع العاقل..بس كمان هو جاهل.. طيب أنا قصدي إيه..قصدي ان ساعات لازم تكون عاقل.. وكمان ساعات لازم تكون جاهل..أو على الأقل تمثل ده .. أو تطنش..وتفوّت ..عشان العملية تعدي.. فليس كل مافي الحياة يؤخذ بالعقل.. وكمان الجهل لا يفيد..شوية فلسفة فارغة.. ماتحطش في بالك..
_______________________
أعتذر عن قله التواجد وندرة التعليق.. مسألة وقت.. دعواتكم

هناك 15 تعليقًا:

غير معرف يقول...

السلام عليكم ورحمه الله وبركاته

الشاعر يقصد على قد فهم واحد من العمال أن الشقاء فى الفكر ونقد ماحوله وعجزه عن الأصلاح والتوجيه والتأثير
والشاعر عموماً يمتلك تلك النظره الراصده الناقده التى تتمنى الأفضل دائماً وتعادى الجهل وقله الحيله
أما إذا كان الجهل حليفه فلن يتعب ولن يشقى فكرياً لأنه فى هذه الحاله
لن يطمح لا للتغيير للأفضل ولا للأسوأ
والجهل نعمه فقط للجاهلين
وقانا الله شر الجهل والجاهلين
ومتعنا بشقاء الفكر والعلم والتدبر

وتقبل تحياتى

Dr. Ibrahim يقول...

او كما يقولون المجانين فى نعيم :)

فعلا دى امانة وهنتحاسب عليها..

كان فيه استذا قالنا زمان بس مش عارف صح ولا خطا
ان الجاهل الذى لا يقرأ ولا يكتب عندما ينظر فقط فى المصحف ياخذ حسنات..فلا حجة لديه فى إمساك المصحف..

مابالك العالم الذى يقرأ عليه آمانة كبيرة..

تحياتى لك

شيماء زايد يقول...

دي مش فلسفة فارغه
دي حيرة كلنا بنعيشها
بس كتير جدا بحس اني العقل ازمتي كفرد
لدرجه اني اتمنيت كتير اكون تافهه وسطحيه وحاولت بس معرفتش
او يمكن الدنيا مسمحتليش اعيش علي الهامش شدتني تاني جوه المطحنه
شاكره زيارتك لمدونتي واعذرني علي تأخير الزياره
تحياتي

أمل حمدي يقول...

بيت رائع وواقعي

وساعات بتمنى اني ابقى غبية علشان

لااشقى بما حولي لان العقل الايام دي مع قلة الحيلة هو الشقاء بعينه

والله المستعان

ربنا معاك

دمت بكل الخير

غير معرف يقول...

السلام عليكم ورحمة الله,
كيف حالك يا باشمهندس, انا طبعا "قرأت" هذا البيت من زمان ومتهيالى ان العقل مفيد يعنى كان ممكن الحياة تبوظ اكتر لو العقل تعبان شوية وهو درجات طبعا بس زى ماحضرتك قلت ان ساعات المفروض الواحد يتغابى عشان الامور تمشى وده من العقل برضه, ربنا يديمه عليك ويجازيك به كل خير و"أعانك الله على مشغولياتك"

لحظة تأمل يقول...

من كام يوم كنت بفكر فى الموضوع ده ومشغولة بيه جدا
لان ساعات الواحد بيتمنى عقله يقف ولو ساعة ويبطل تفكير وتحليل لاى حاجة بتحصل
يمكن لانى واحدة من الناس اللى بتحاول تشوف اللى ورا كل شئ(موقف او كلمة او حدث) وده كتير بيكون مكتعب بالذات لما تحس انك فهمت زيادة عن اللزوم

بس فعلا عندك حق مش لازم كل اللى فى الحياة يتاخد بالعقل

ربنا يكفينا شر الجهل
ويكرمنا بالاستفادة من نعمة العقل

تحياتى لفلسفتك
واشكرك على كتاباتك

شمس النهار يقول...

اول مره اقرا عندك بوست وماافهمش حاجه
بس عايزه اقول ان العقل زينه يهبها الله لمن يشاء وبيكون مسؤليه علي عاتق صاحبه
والعاقل اللي يوزن اموره كويس ويتصرف بحكمه
لكن تحت اي ظرف المفروض اني مااسمحش لأي حد يدفعني لابالتظاهر بالغباء والا اني اركن عقلي شويه
ازاي اتخلي عن نعمه ربنا وهبها لي واختصني بها دون الاخرين
وربنا لما بيختص حد بالعقل السليم ربنا ادري بعباده بيهيئهم لأستعماله
صح
العاقل الصح عمره مابيتخلا عن عقله تحت اي ظرف
وياسيدي مين قالك ان الجاهل حاسس بجهله اصلا
ده الجاهل اكتر واحد حاسس انه يعرف كل حاجه في كل حاجه وهو مش عارف حاجه
يعني تعبان برضه من كتر مابيوهم نفسه وهو مش فاهم حاجه
فهمت حاجه

أحــوال الهـوي يقول...

اول مرة احتار في الرد علي ما تكتب
ليس عن جهل طبعا

و لكن الله تعالي عظم دور العلم و العلماء
اذا هو العلم


و من ناحيتي ارجح العلم و المعرفه

تحياتي

Unknown يقول...

السلام عليكم ورحمة
الله تعالى وبركاته
المعرفة بتزيد الالم
هذا رايى من زمان!
وكل الانسان ما يرقى
بعلمه وبأحساسه يزيد عذابه
وبنفس الوقت نحن مكلفون
بالتعلم وبالمعرفة!

عمرو يقول...

صديقى الحكيم
مالك ؟
حاسس فى البوست ده أنك محتار و عندك أسئله مش لاقيلها اٍجابات !!
على حسب فهمى المتواضع لموضع البوست عاوز أقول لك أن الجاهل سعيد و فرحان بجهله و شايف نفسه حكيم الحكماء و أذكى الأذكياء و لهذا حيفضل جاهل طول عمره و لا سبيل لترقيه
و العاقل الذكى بيظل عنده اٍحساس عنده لم يتعلم فى الحياه سوى النذر اليسير و لهذا فتبقى عنده رغبه و شبق للتعلم و الاٍستفاده
أرجو أن يكون ردى موافق لموضوع البوست العامض نوعا ما
لك خالص تحياتى يا صديقى محمد

غير معرف يقول...

هي مش فلسفه فارغه
بس
ساعات الواحد من كتر ما بيحب يبص للامور بعمق.. بيتعب..

بوست جميل اوي

بحييك عليه

تحياتي

بنت الغربة يقول...

لاول مرة انا مش معاك يافندم
العقل نعمه من عند ربنا ..صحيح متعبه لكن احسن من الجهل اللى مابيوصلش الا لمزيد من الجهل..
ومش دايما عدم المعرفه بيكون نعمه..
لان المعرفه بتنور القلب ..حتى لو معرفة الحاجات اللى توجعه..
تحياتى

الوردة البيضا يقول...

السلام عليكم يا باشمهندس
قرأت البوست وأعجبني جدا لأنه يثير أزمة تشتعل بداخل كل المثقفين والقارئين الذين تؤلمهم معرفتهم ويشقيهم علمهم، وبصراحة من بين كل الأراء الجميلة التي ذكرها الأصدقاء هنا أعجبني بصفة خاصة تعليق الصديقة بنت الغربة وأتفق معها تماما في أن نحمد الله على نعمة العقل والتفكر حتى وإن كانت تؤلمنا في كثير من الأحيان، فهي خير من الجهل والسطحية والحياة على الهامش
تحياتي

من غير عنـــوان يقول...

أصدقائي الأعزاء جميعا...
هذا البوست من أقل البوستات الذي حظى بتعليقات...
وكل الفاضل أصحاب العقول.. ردوا بإنهم مش معايا... لم أقصد أبدا أنني ضد العقل.. أكيد... وأعلم تماما بأنه نعمه... يجوز الاسلوب قد خانني.. ولكن ما كنت أقصده هو إنتشار الجهل .. ةمدى النعيم الذي يعيش فيه الجاهل... وعايزكم تلاحظوا أنكم جميعا مفكرين... ومفيش حد تاني....

أمنياتي

وفاء بركات يقول...

السلام عليكم
في مثل بيقول إتوزعت العقول كل واحد عجبه عقله ,إتوزعت الأرزاق ولا واحد عجبه رزقه.
برضه برجع وأقول الرضا بالمقسوم والواحد يعمل اللي عليه ويسيب الباقي علي ربنا. أصل لو معملناش غير كده حنطق
اما صاحبنا اللي ماشي كده ومريح دماغه مسير ه يوم حيقع عليها ويفوق
أصل لوبصينا فوق حنتعب ولو بصينا تحت حنصدم في حيطه والله إحنا غلابه
المهم حمد الله علي سلامة حضرتك...