الخميس، 19 مارس 2009

الزواج

* الزواج سكن وموده ورحمه... لا هو حب بس... ولاهو خلفة أولاد ... طيب مين اللي قال كده؟؟؟ الخالق... ربنا سبحانه وتعالى... ولله الـمثل الأعلى.. كان ممكن الآيه تذكر الحب.. في الزواج... أو تذكر الأولاد...( طبعا أقصد آية الزواج).. نرجع نقرأ الآيه بتمعن لو سمحتم... ونرجع ندور على أماكن ذكر الحب في القرآن.. اللي هو دستور حياتنا...(( والحب هو ما بين الحب الإلهي الذي نتمناه ( والذين آمنوا أشد حبا لله ) ، وبين حب الشهوات من النساء والأموال والبنين وغيرها من شهوات الدنيا))... وآية الزواج لم يذكر بها ( الحب )..( ومره كمان لا يمكن - استغفر الله - أن تسقط الكلمة من محكم الآيات).. والـموده غير الحب..والرحمه جميله..والسكن هو أشمل وصف.. ولذلك قيل ( لتسكنوا )..إنما الـموده والرحمه هي ما بيننا..والحب هو حاله من حرمان المحب للمحبوب.. تنتهى بالبقاء بجواره.(ولذا فالحب الإلهي صافي وراقي ودائم).. إنما أن تسكن إلى شريك يكون بجوارك وتطمئن إليه... هذا هو هدف في حد ذاته...أما الذريه فقد حثنا حبيبنا المصطفى عليها ( عليه الصلاه والسلام)... إنما ليس معنى هذا أن من لم يرزق بالذرية أن تكون حياته تعيسه..بالعكس..ولابد من وضوح الهدف من الزواج.. الذي ذكر في القرآن وهو ( لتسكنوا).. لم يقل لتحبوا .. أو لتنجبوا.. عايزين نركز في الكلمه وندور على معناها..ونستشعر قيمتها..والـموده والرحمه .. هما أكسير الحياة الزوجيه.. يزيلوا المشاكل.. يزيدوا الشوق... يغسلوا الهموم...وهذا كله بملاحظة تقوى الله في الطرف الآخر..وتربية الأولاد.. والإستمتاع سويا بهذ الرحله ..والأطمئنان والثقه في الطرف الآخر .. مع شوية بهارات من الغيره المحببه غير المبالغ فيها...

هناك 19 تعليقًا:

mohamed ghalia يقول...

معاك حق استاذى
الزواج ده حاجات كتير جدا

سمكه واحده يقول...

جزاك الله كل خير
كلام مظبوط جدااااااااا

طالبه الفردوس يقول...

جزاك الله خيرا
بوست متميز

gogo!sf يقول...

الله على الكلام الجميل
حقيقى بوست رائع بجد

بس الرحمة والموده عمرهم ما هيتوجدو الا لو فى حب

والدليل ان ناس كتير جدا بينفصلو بسبب عدم الحب اللى بيمنع وجود رحمة وموده بينهم
وكمان لو قولنا رحمة وموده بس مش هتستمر الحياه صدقنى

الحب ده نعمة ربنا انعم علينا بيه
ولازم يكون الحب موجود
والمقصود هو حب العشرة بين الزوجين
فبالتالى بيكون موجود بينهم رحمة وموده

يا عزيزى احنا حاليا فى زمن عجيب
زى ما الفلوس بتعمل كل حاجة
الحب كمان بيؤدى الى استمرار الحياه

ارجو الا اكون ضيفة كلمها ممل وتقيل
تقبل مرورى

من غير عنـــوان يقول...

** جوجو
ما هو لازم ترجعي لتعريف الحب
وعشان كده الموده أدوم

تحياتي

mahasen saber يقول...

كلام صح بس القله اليى بيعوا الكلام ده
ليس الا

ربنا يبارك فى عمر حضرتك كتاباتك دايما ليها عنوان وهو الابداع والرقى

leeno يقول...

صدق الله العظيم

أمل حمدي يقول...

أنا معاك الزواج حاجات كتير قوي أهمها التسامح والرحمة

جزاك الله كل الخير اللهم امين

ميرام يقول...

أكيد
كلام منطقي ..
يمكن في ناس كتير بتخلط بين المعاني والمفاهيم
مدونة جميلة
تحيــــــاتي

فشكووول يقول...

محمد بك البنا
بارك الله فيك
دائما هناك اشياء واضحه لا نحس بها الا اذا لفت احدنا الانتباه لها
الزواج هو السكن .. صح .. يسلم قلمك
تحياتى

فشكووول يقول...

العزيز محمد بك

تحياتى

اشكرك على تعليقك وعلى اطرائك لى

دمت بكل الود

شمس النهار يقول...

الحقيقه اعتقد ان كل حاجه في الحياه لاتتم الا بالحب وحضرتك كتبت ده في بوست سابق
فالما نتكلم علي تكوين الاسره يبقا من الاولي ان تبني علي الحب الناس بتبتدي بالحب وبعد كده بيجي كل حاجه وراه
لو مافيش حب بين الاتنين مش هيسقطوا لبعض فارغه مش هيستحملوا بعض في وقت الضيق والعصبيه
مش هيسكنوا لبعض ماهو الحب اللي بيحنن القلوب علي بعض
وكمان اي اتنين بيبتدوا حياتهم مابيكنش في تأكيد علي انجاب الابناء ولما بيطلع في واحد منهم مش هيقدر ينجب في ناس من شدة الحب بيستغنوا عن الانجاب عشان مابيقدروش يستغنوا عن بعض
يبقا الحب هنا هو الاساس وبكده انا مش بعترض علي الايات اللي حضرتك جبتها
بس الله محبه وربنا جعل حبه وحب الرسول هو محرك العقل والقلب في العباده
وحتي بين المؤمنين

عمرو يقول...

صديقى الحكيم كل سنه و أنت و الأسره بصحه و خير و نعمه ..
الحب و الموده صنوان لا يفترقان .. فلا أتصور أن الاٍنسان من الممكن أن يحب من لا يود أو أن يود من لا يحب و اٍلا كان فى رأيى يعانى من الاٍزدواجية و عندها يكون غير صالح للقياس المنطقى ..
و الرحمة تتوجهما و بأمر من الله و بتزكية منه و لنا فى سلوك النبى الهادى - صلى الله عليه وسلم - تجاه زوجه أم المؤمنين عائشة - رضى الله عنها- ما يبين لنا مدى حبه لها و فى هذا المقام تكثر الأحاديث الصحيحة ..
أزعم أن الحب بين الاٍثنين شرط أساسى لنجاح العلاقة الزوجية و اٍستمرارها كعلاقة اٍنسانية ناجحة تدوم و تزهر و تثمر بحيث لا يكون أحدهما مجبرا جبرا و مقسورا قسرا على مد أمدها بغير رغبة منه و لكن لأسباب قد تبدو للبعض معقولة و أراها حقيقة غير معقولة بالمرة بل عبثية لا طائل من ورائها غير ضياع أيام العمر و هدره هباءا ..
السكن كما ورد فى الآية فى الكريمة لا يتأتى بغير حب بين الطرفين و الحب قرين للمودة و اٍلا فكيف للاٍنسان أن يسكن لمن لا يحب ؟؟!! من يقدر على هذا الفعل اٍلا من كان قد تجرد من أبسط و فى نفس الوقت أعمق المشاعر الاٍنسانية ألا و هو عدم القدرة على أن يحب و أن يحب (بضم الياء) فى المقابل ؟؟!!
شكرا يا صديقى على هذا البوست الدسم و تقبل خالص تقديرى ..

من غير عنـــوان يقول...

الأعزاء شمس النهار ، عمرو

أنا لا أعترض على الحب... وأدعو إليه دائما، بس حب ما تعمل شئ وحب الأشخاص شئ... وأكيد لابد أن أود من أحب.. وليس باضرورة أن أحب من أود...

إنماحب الله ورسوله ... حب من نوع آخر... ويظل بعدنا ( جسدا) عن من نحب هو المحرك.. وندعو اللهم أرزقنا رؤية وجهك الكريم... وشفاعة نبيك عليه الصلاة والسلام...

إنما في أحوال الهوى والعشق والحب الإنساني... تتطرح هنا مسألة الوجود بجوار المحب أنها تعمل على فقدان الإشتياق...

وإذا قلنا أن حب الأم(كمثال)
هو من أسمى أشكال الحب... فلنرجع أن الله تعالى أوصانا باإحسان والطاعة إليهما... والرسول عليه الصلاة والسلام أوصانا أنها أحق الناس بحسن الصحبه...

أما حب الشهوات من الأموال والنساء والخيل.... إلخ... فهو حب زائل...

ولنرجع إلى زيجات اللآباء والأجداد... ونبحث عن كلمة حب... ؟؟؟ أكيد جدي لم يقف إلى جدتي في الشباك

وأشهر قصص الحب في الزمان.. لم تنته بزيجات... فلا روميو تزوج جوليت ولا قيس تزوج ليلى...

ولم يقص علينا أحد أن فلانا تعذب في متاهات حب المحبوبه وتزوجها وأكمل القصه بما حدث بعد الزواج... بل تنتي القصص بأنهم تزوجوا...

وأسعد الزيجات التي عرفتها شخصيا قامت على صداقات بين الرجل والمرأة...

أما إلتهاب العواطف ... وأغاني فريد الأطرش الذي أحب موسيقاه جدددددددا... في منصبه تماما على الحرمان من المحبوب...

أعزائي...

إن من يبحث الآن من أبنائنا على زيجات ناجحة... ويعتقد أن الحب وحده يكفي... فأظن أنه مخطئ... أما من ينشد السكن والموده والرحمه فقد فاز...

ولا أعترض مطلقا على أن السكن قرين بالحب أو الموده بالرحمه... إنما أن تينى علاقة الزواج فقط على الحب.... آسف... فقد يحتاج الحب لماء يرويه.. وهذا الماء تواجد بالسكن والموده والرحمه...

أخوتي وأصدقائي...

كثر الكلام عن الحب قبل الزواج... وندر عن وجوده بعده...

ولم أسمع حديث إعلامي... أو تدويني يسعى إلى أتباع ما أشار الله تعالى إليه...أو ذكر هذه التعاليم للأبناء لذلك سعيت إلى كتابة ما كتبت

وتخيلت أن أنتما من سيعناني على توصيل ذلك للأبناء... حيث أنهما مش ناقصين حب ووله... إنما ناقصين دعوة إلى الموده والرحمه... وشرح وإستيعاب لمعنى السكن...

وكم من زيجات قيل لنا أهما بيموتوا في بعض... وفشلت... وكم من زيجات من الله تعالى عليهما بالسكينه... ولم يعرفا أصلا معنى للحب

بالمناسبة... أنا مش عايز أفجر قضية أن الحب ممكن أن يكون مفردا بلا وصول إلى زواج... حيث قالوا أن الحب بلا أمل هو أسمى معاني الغرام...

وتأمل... أنت تحب الله ... بلا أمل ... إلا أن ترى وجهه الكريم.... آمين

شمس النهار يقول...

انا مؤمنه ان الحب لوحده مايعمرش بيت ودايما اقول مش المهم اننا نحب المهم اننا نحب صح
ونحب صح يعني الحب يكون مقرون بالود والتفاهم والاحترام والتفاني والتضحيه وحاجات كتير اللي هي اصلا اكثير الحب اللي بتخليه يستمر
والمفروض اننا نفرق بين الاعجاب والحب اللي شببنا فيه دلوقتي اغلبه اعجاب بس مش حب
اللي هو لايصلح لبناء اسره
اول ماالولد تعجبه بنت يشبط فيها وزي اي حاجه بيشبط فيها ويعملوهاله بيجوزوه البنت اللي اعجب بيها بغض النظر عن اي شئ ولما بيتزوجوا بيكتشفوا انه ماكنش حب والا حاجه
لأن الحب الحقيقي بيزيد بعد الزواج مش بيقل في اعتقادي وبيتحول لشكل من اشكال الزوبان في الاخر والالفه لدرجة ان في مقوله انهم بالعشره بيتحولوا لشبه بعض عشان كده في زوجه بتضحي بحاجات كتير عشان ترضي زوجها اللي بتحبه والاخري لاتضحي عشان زوجها عشان هي اصلا مش حاسه بيه
اذا بما تفسر زوجه زوجهالاينجب وهي تنجب ومع هذا متمسكه بيه ولاتريد الطلاق لأنها ماتقدرش تعيش مع حد غيره
هل هنا نقول ان الحب انتهي بعد الزواج مش كل الحب بينتهي بعد الزواج ومش كل حب بيستمر بعد الزواج
المشاعر الانسانيه لايمكن ان نضع لها قاعده ثابته
وسبحان مقلب القلوب
وعلي الشاب والفتاه ان يختاروا الشريك بناء علي الحب المدعوم بالتفاهم والود والاحترام والميول والاتجاهات المشتركه
وان كان الحب وحده بس من غير ده كله يبقا فعلا الجواز هنا محكوم عليه بالفشل لعدم وجود لغه مشتركه بينهم هو هيبقا في ناحيه وهي في ناحيه
وعايزه اقول لحضرتك ان والدي احب والدتي منذ الصغر ولم ترضي هي عنه بديل برغم انهم من عائله كبيره لايتزوج بناتها الا من نفس العائله
وصمد هذا الحب وعندما تتكلم امي عن ابي الراحل اليوم تري النور والحزن معا في وجهها ويشهد عمرو علي ذلك عندما تكلم معها وهي في المستشفي وحكتله عن حب عمرها وكان ينصت لها وهو مزهول(امي دايما تحكي عن بابا بتحب كده)
لقد تزوج ابي امي سنة52 وتوفي سنة 2001 ولم ينقص حبهم لبعض يوم وانا شاهده علي هذا الحب الجميل
وانا مش حاسه اني هدمت كلام حضرتك بالعكس انا شرحته من وجهة نظري النسائيه مش اكتر
واعتقد ان الشباب اللي حضرتك بتخاطبه استفاد من هذه المناقشه
اللي حاصله بينا اكتر مننا لأن اكيد في سننا ده عارفين نفرق بين الحب الحقيقي ونعرفه ونتمسك بيه عن الاعجاب فقط
انا بشكرك انك اتحت الفرصه لي ان اناقش افكارك
واسفه علي التطويل المهم ماتكنش زعلان
انا لم اقصد هدم كلامك بس كنت اقصد اوصله
وانا شايفه ان كلام عمرو كمان منطقي وكذلك كلام جوجو
كده بقا الحب اصبح مطلب تدويني
وبم ان البلوجر دوله مستقله يبقا خلاص
يحيا الحب

من غير عنـــوان يقول...

*** شمس النهار
العزيزة التي لا ترضى إلا بالإقتناع

وده شئ مهم
مش بنفوت أو نجامل
ولا نرضى وخلاص

المهم بعد شكري لك على وقتك ولعمرو أيضا

أتخيل أنه هنا إتفاق في المضمون
وإختلاف طفيف في المنطوق

وأنا متأكد إنك لا حضرتك ولا عمرو ولا جوجو هدمتم شئ بل بالعكس بنيتم مناقشه صحيه زي ما إنت قلت... مفيده للشباب

سيدتي...

حب والدتك لوالدك... هو المطلوب.. وحب التعلق والشبطه هو المفروض... هو مش لعب

والحب الناضج الصافي بيعيش ويكبر كمان

ما كنت أقصده هو هذا..

وتفاهم كل من الطرفين لمفهوم الحب.. بيخلي الحب يزيد...

إنما لو كان مجرد .. إني أرجع أقول لزوجتي... بأحبك ومانمتش بالليل من بعدك... ده اللي قصدي إنه مش حب

التصرفات بتفرق... وده برضه من وجهه نظر رجالي

بالمناسبه... مازلت أتوق شوقا لسماع ست الكل بتغني... إنت نعرف معنى الحب إيه...

وأخلي شباب اليومين دول يعرفوا معنى ... رق الحبيب...

ولا ليلي ونهاري.. ولا الأطلال التي كتبها ناجي

ولا ذكريات رامي عن الست التي أحبها عمرا ولم يتزوجها...

يظهر إني فتحت باب على نفسي... هو باب حلو... بس بيقلب ذكريات...

وأضم صوتي لك وأقول يحيا الحب

بس مش أي حب....

بالمناسبه..
بما إن القلوب بين يدي الرحمن يقلبها... ويا مثبت القلوب ثبت قلوبنا على الإيمان... في هذه المناسبه أقول...

بما إن القلوب متقلبه... نخلي بالنا على أن يقوم الزواج على جانب من العقل ... لا يقل عن جانب العاطفه

دمتي بكل الود...

وتحياتي لهذا القلب المحب...
قلب والدتك... ادام الله عليها الصحة والعافية.. ومتعها بلقاء حبيبهافي جنة الخلد بإذن الله تعالى ..ومتعها برؤيه وجه الله تعالى وبشفاعة نبينا عليه الصلاه والسلام


أمنياتي

شمس النهار يقول...

(والحب الناضج الصافي بيعيش ويكبر كمان)
بهذا الاعتراف الكامل منك ان الحب بيدوم بعد الزواج لو كان مبني علي الود والتفاهم واشياء اخري تم شرحها
نكون كده طلعنا بالنتيجه المرجوه
واتفق معك ان العاطفه لازم يدخل العقل فيها شويه وهذا التحالف بين القلب و قليل من العقل بيوصل الانسان الي حب عاقل متوازن في كل شئ
وهنسمع ام كلثوم:)

Soul.o0o.Whisper يقول...

صح يا أستاذى والله

معاك كل الحق
الحب شعور جميل جدا

بيخلينا نخاف على بعض اوى و نخاف نجرح الطرف التانى باى شئ
لكن ...
بيكون الغلط من الطرف التانى او اساءته عواقبة وخيمة
و بتأذى الطرف المتأذى أيما أذى ..


عشان كدا لما العلاقة بتبتدى بالسكن ..و المودة و الرحمة ، تجد الغدير يجرى رقراقا

إلا أن يصل إلى المصب - لحظة التفاهم و الفهم التام لشخصية كلا من الطرفين - تجد الماء ينهمر شلالا - الحب الصافى ..

دام لنا قلمك المبدع
و دمت بود

من غير عنـــوان يقول...

** Soul.o0o.Whisper

أعجبني ردك
وفهمك لما كتبته

ربنا يسعدك