الأربعاء، 5 أغسطس 2009

رجعنا

* اعمل ما عليك من واجبات قبل أن تتطالب بما لك من حقوق.. كلمه أو حكمة مأثوره كتبهالي أبويا زمان في الأوتوجراف.. ويومها زعلت منه ! لأن كل أصحابي أهاليهم كتبوا لهم كلام جميل..زي أتمنى لك مستقبلا باهرا وغيرها ، أما أبويا..كتبلي :اعمل ما عليك من واجبات قبل أن تتطالب بما لك من حقوق.. يمكن مافهمتش وقتها..بس لما مات (رحمه الله) فهمت ليه كتب لي كده..لإن ده انعكس على كل تصرفاتي في حياتي.. وانت لـما تعمل اللي عليك..حتاخد اللي لك..ماهو مش ممكن تاخد من غير ما تعمل.. والحكاية دي بترضيك ..وتخليك تعرف تنام.. لإنك خلصت الواجب اللي عليك.. صحيح متعبه لو الآخر ماعملش اللي عليه.. لكن انت رضيت ضميرك.. وبقيت محترم.. على الأقل قدام ربنا وقدام نفسك..ولا تنتظر شكرا من أحد..على الرغم من ان الشكر واجب.. وانت لازم تشكر الناس عشان تعرف تشكر ربنا..لكن لـما تعمل حاجة لحد ما تستناش شكر منه .. وساعتها حيكون نيتك وهدفك أحلى كتير من انك تستنى كلمة شكر.. طبعا ده مايمنعش انك تقول متشكر لكل حد عملك حاجة ولو صغيره.. لأن ده بيزود مكانتك .. وتخيل انك بشكرك لهذا الشخص اسرته.. وبعدم انتظار شكر من حد أحرجته .. وفي الحالتين انت الأقوى والأصح.. وكمان كده حتكون طبقت المثل المهم اللي بيقول : قدم السبت تلاقي الحد ..يعني لما تشكر الناس..حيشكروك..ولو خدمتهم حيخدموك..يعني لو عايز ان والدك يسمح لك بالخروج الأسبوع القادم .. حاول تقعد معاه الاسبوع ده تتفرجوا على التليفزيون سوا .. أو تساعد مامتك في البيت ( على فكره ده مش نفاق ولا مسح جوخ ) ، إنت بتعمل كده عشان بتحبهم...

هناك 26 تعليقًا:

Dr. Ibrahim يقول...

تمام يا فندم

كلمة والد حضرتك جميلة

فلا يجب أ ن تنتظر شكر من أحد

فيقول د عائض القرنى فى كتابه لا تحزن

فى مقال لا تنتظر شكرا من أحد:-

"اعمل الخير لِوجْهِ اللهِ ؛ لأنك الفائزُ على كل حالٍ ، ثمَّ لا يضرك غمْطُ من غمطك ، ولا جحودُ من جحدك ، واحمدِ الله لأنك المحسنُ ، واليدُ العليا خيرٌ من اليدِ السفلى

﴿ إِنَّمَا نُطْعِمُكُمْ لِوَجْهِ اللَّهِ لَا نُرِيدُ مِنكُمْ جَزَاء وَلَا شُكُوراً ﴾ "

أبو كريم يقول...

بجد ونعم الأب الواعى الذى لخص تجربته كلها لك فى سطر

تقبل مرورى

ماء تشرين يقول...

المفروض نكتبها فوق الهرم يمكن المصرين يشوفها يمكن تتغير حياتهم اما عن شكر الناس فده واجب طبيعى يعنى جميل انا بشكر التلميذ البيجبلى الكرسي الناس بتستغرب منى بس انا بحس انى لازم اشكره عشان اعلمه صحيح انا مدرسه بس انت قدمتلى خدمه مش واجب عليك بس ومتاكده انهم بيفهمو كده


تقبل مرورى

assafo anaroze يقول...

استاذ يسعد مساك
المقولة صحيحة مئة بالمئة
لكن عذرا ان كنت حاخرج عن الاطار اللي انت منحته للبوست
سيدي
نشوف الشعوب من المحيط للخليج هي شعوب لا تقدم شيئا لاوطانها
لاتعمل اي واجب اتجاه اوطانها
لا
على العكس الشعوب بتعمل الواجب و زيادة لكن للاسف لا تستفيد من ابسط حقوقها اللي هي العيش الكريم العيش في حرية عوض الاستبداد
العيش في ظل دول ديمقراطية لا تحكمها ديكتاتوريات
ده اللي انا شايفه ممكن اكون على خطا
مودتي

Unknown يقول...

الف حمد لله على السلامة

Unknown يقول...

رحم الله الوالد ونعم
تعاليمه كانت .
كنا بأول سنوات الكلية
ولفت نظرى زميلتان لا تدعان
كلمتان تقولهما كلا منهما للاخرى
الاولى هى كلمة شكراً مهما كان العمل صغيراً او الخدمة بسيطة بينهما والثانية كلمة لو سمحتى بالرغم
من معرفة كلاً منهما للاخرى
من سنوات طويلة.
بصراحة اتخذتهما
قدوة :)

candy يقول...

حمد الله على السلامة....
قد إيه كلمة الشكر
وابتسامة العرفان
وشدة الأيد بالأمتنان
بقوا عزاز جدا
وبقت الثقافة السايدة انك على قد ما أنت فهلوى وشاطر تاااااااااااخد
الغلبان بس ومالوش حد يحوش هو اللى يعمل واجبه! وبيبقى مضروب على قلبه وهو بيعمله كمان!!!
بفرح جدا بأى كامة الشكر ....لأنى مش مستنية حاجة من حد ، فأقل حاجة بتبقى بالنسبة لى هدية رائعة

لحظة تأمل يقول...

حمدلله على السلامة

رجعت بأحلى كلام كالعادة

اصبح من النادر ان يقوم من حولك بما عليهم
نحتاج احيانا بعض الوقت او وقفة صحيحة مع النفس لنسأل أنفسنا اولا ما يجب علينا ان نفعله وواجبنا نحو الاخرين وهذا يحتاج الى الكثير ن الشعور بالمسئولية تجاه انفسنا قبل اى شئ

تحياتى دوما

عمرو يقول...

الحمد لله على السلامه يا صديقنا الحكيم .. عودا محمودا اٍن شاء الله ..
طبعا سياسة الشكر من أفيد السياسات لكسب القلوب و كمان كلمة العفو اللى دلوقتى بقت ماشى :))
رحم الله الوالد الحكيم و قد لخص لك تجربه ثريه فى كلمات قليله بها معانى عميقه جدا ..
أشكرك لتعليقاتك و نورت البلوجر ..
لك تحياتى و خالص تقديرى ..

Foxology يقول...

حمد الله ع السلامة يا استاذنا

والله كلامك جميل جدا وعندك حق جدا جدا خصوصا جزئية ان الواحد يشكر الناس ومينتظرش منهم شكر على الأقل علشان يعرف يشكر ربنا فعلا

تحياتى :)

أمل حمدي يقول...

الف حمد الله على السلامة

رحم الله والدك

وافادك الله على البوست المفيد

دمت بكل الخير

موناليزا يقول...

جملة فى الصميم بجد

الجواز و سنينه يقول...

حمدلله على السلامه
و بجد افتقدنا حضرتك كتير
هو بوست الرجوع هايل كعادتك
بس عارف حضرتك هاقولك على حاجه شخصيه
انا من النوع اللى بيدى اوى
و بيشكر اوى
تعرف ده تعبنى انا اوى
ههههههههههههههههه
لازم الواحد كمان يتعلم ياخد و يسنى كمان شكر علشان فيه ناس بتسوق فيها
تحياتى مره تانيه

وردشان smilyrose يقول...

السلام عليكم

هو فعلا درس جميل من كل اب

لاولاده لو كل واحد فينا عمل شئ

واستنى اى اثناء عليه او شكر

محدش هيعمل حاجة

لكن الاجمل اننا بنعمل العمل ونحس

بقيمته بنظات اللى حوالينه

بدون اى شكر

أحــوال الهـوي يقول...

غفر الله لوالدك و اسكنه فسيح جناته فلقد زرع بذور العطاء في شخص مثلك و هذ انعكس علي كل ما تكتب من درر و لا عجب

اليوم اعتاد الابناء علي الاخذ فقط بدون مشقه و لا كلل ويعتبرونه واجب لابد من عمله

تحياتي

صبرني يارب يقول...

والله يا استاذنا لسه سأله عليك من كام يوم

سألت استاذ عمرو بدر وقلتله هو مختفي فين مش بيكتب

انا صحيح الايام دي انا الى مختفيه انما بين الفينه والاخرى بابص على البلوج كده على السريع

البوست بتاعك جميل كالعاده وفي الصميم

وانا دايما لما على سبيل المثال واحده تشتكى ان جوزها ما بيقولهاش كلمه حلوه

اقولها قولي انتى الاول

اكيد لما تقوليله وحشتنى مش هايقولك غوري يا بت من قدامي
هههههههههههههه

فعلا عامل الناس كما تحب ان يعاملوك

mohamed ghalia يقول...

اعمل ما عليك من واجبات قبل أن تتطالب بما لك من حقوق..
والله يا استاذى لو عملنا كده فعلا
خلاص كل مشاكلنا اتحلت
واقتصادنا اتقدم
والدنيا بقت أخر حلاوة

شمس النهار يقول...

حمد الله علي السلامه
بجد كلمة الشكر دي انا بعتبرها المفتاح السحري بين الناس
لو اتعودوا عليها هتفتح الباب لباقي الكلام الجميل اللي اختفي من حياتنا
زي ممنون نهارك سعيد ربنا يبارك فيك وغيره
مادخلتش حته هنا في امريكا الا واتقلي منهم عامله ايه يوم عامل ايه وانا ماسيه اتمني لك يوم او ليله سعيد
بجد
سواء محل بشتري او مطعم(اسلامي)

اما موضوع الواجب اللي عليه
انا من انصار اعمله واريح ضميري مدام هو واجب عليه علشان ارتاح ولما اقابل ربنا اكون راضيه عن اني عملت اللي عليه
والواجب غير التضحيه
ليه
اللي بيعمل الواجب المفروض مايستناش المقابل عشان ده واجبه
والله اخد مقابل اهلا وسهلا مااخدش مايزعلش

لكن التضحيه حاجه تانيه خالص
دي استعداد نفسي ربنا بيخص بيه بعض عباده الطيبين
وفي اللي قدامهم بيقدر وفي اللي مابيقدرش
والشخص المضحي برضه درجات
في مابيهموش اخد مااخدش اهو ماشي في طريقه بيضحي وخلاص
وفي لا اوقات بيقف مع نفسه ويحس ان اللي قدامه مايستاهلش
بيعيد حساباته من جديد
ايه ده التعليق بقا بوست كده مش هلحق ازور ناس تانيه كتير

وردة يقول...

اولا ربنا يرحم والدك ويسكنه فسيح جناته
انت فعلا زرع طيب وخلف صالح وزريه ان شاء الله تكون سبب في دخزله الجنة
وكل ما حنعمل خير بسبب الجملة ديه وبسبب تربيتك الصالحة يه
والك حيترفع في جنته ان شاء الله درجات
ربنا يباركلك
وتكون دايما خير خلف لخير سلف
سلام

Kiara يقول...

صححححححححححح جدا وربنا

خاصه اخر نقطه بطبقها بحذافيرها مع ماما وبابا وبتنجح ههههههههههههه

جد بقي

بجد فعلا عامل الناس كماتحب ان تعامل

ماهو مش معقول هتدي وتزرع وتحصد شر حتي لو اتاذيت من الناس فربنا هو الاهم هو اللي بيحسسك بالراحه والطمأنينه

كل سنه وحضرتك طيب

رمضان كريم

Unknown يقول...

"رجعنا"
هل رجعت
لتغيب تانى
ياباشمهنــدس؟

وردة يقول...

كل سنة وحضرتك طيب
ورمضان كريم
سلام

شيماء زايد يقول...

كل عام وانتم إلي الله أقرب رمضان كريم
همسة ود غير مكتوبه
كارت رمضان من تصميمي
اتمني يعجبكم http://hmasat-elqlm.blogspot.com/

شيماء زايد يقول...

كل عام وانتم إلي الله أقرب رمضان كريم
همسة ود غير مكتوبه
كارت رمضان من تصميمي
اتمني يعجبكم http://hmasat-elqlm.blogspot.com/

assafo anaroze يقول...

رمضان كريم و كل عام و انت بالف خير
ربنا يدخل عليك و علينا باليمن و السعادة و الخير و البركات
ربنا يدخل عليك و علينا و احنا في صحة جيدة و عافية
مودتي

(حلـم) يقول...

اقسم بالله انك تحفة


وكلامك في الصميم


جدا سعد جدا جدا بهذة الوصايا


واكتر بهذا الاسلوب



البسيط


الطيب



الؤدب


بجد اسجل هنا مفخرتي بك ايها الصديق الباسل

ان بهذة الكلمات توجة جيل وباقصر وامتع الطرق اريد ان ابقى تحت هذا السكب..


استمر
استودعك ع امل العودة دوما