الخميس، 17 سبتمبر 2009

كل عام وأنتم بخير

* ماتبصش لجنينة غيرك إنها أحلى من جنينتك.. أو لطبق جارك في المطعم إنه أطعم وألذ من إختيارك..ولا لزوجة صاحبك إنها أشطر من مراتك.. لأن انت اللي زرعت جنينتك .. وانت اللي شاورت على طبقك في المطعم .. ومراتك من اختيارك.. فسيب جارك في حاله.. وماتبصش للراجل في أكلته.. وربنا يبارك لصاحبك في مراته.. وازرع جنينتك كويس.. وارضى ( إرض).. ارضى بمكتوبك.. واتعلم ازاي تتمتع بطبقك اللي بتحبه.. لإن كمان يمكن الراجل اللي جنبك في المطعم اختار طبق شكله حلو بس من بره.. وهو عباره عن لحمه بالبرتقال وانت عمرك ما حبيت هذا الطعم.. انما هو بيحبه .. وانت بتحب الملوخيه، ومراته يمكن شاطرة قدامك بس.. وفي البيت بتخليه يغسل الصحون..فماتاخدش بالمظهر... وخلي عندك رضا بقدرك... وده طبعا مع مراعاة إنه في شجاعة بجوار القناعة وحكمة بجوار الإتنين... وعموما أنت لن تستطيع الحصول على كل شئ... فأنا رأيي إنك تستمتع بما عندك.. وحاول تخلي دنيتك بهجه ودينك منفعة..و لا تحاول ان تتساوى مع شخص ما، الرضا مفتاح السعادة .. وحولك الكثير من الناس لا يملك نصف ما تملك، وكفاية الصحه والستر.. آه لو تعرف قد إيه مهمه الصحه والستر.. طبعا مش حادخلك في كلام فلسفي.. انما الرضا مهم.. لو حتى على شويه فول وطعميه.. المهم تاكلهم بنفس.. ويوم ما ترضى.. هو يوم سعدك.. ماتبصش لغيرك.. ما تتطلبش كتير.. ما تتوقعش كتير.. طبعا ده جنب العقل والطموح والإراده.. عشان ما يبقاش كلام انهزامي.. لإن الإنهزاميه هي أهم طرق الفشل.. انت ممكن تكون انهزامي بمجرد عدم استمتاعك بأي حاجه.. وده بيجر وراه .. كم من الشقاء..

هناك 24 تعليقًا:

(حلـم) يقول...

ل سنة وانت طيب واسرتك والاهل بالف خير


بمناسبة عيد الفطر السعيد

اعادة الله عليكم بالخير والبركة

عيد سعيد

mahasen saber يقول...

الله فعلا هو الرضا بما كتب علينا والمحاوله لتحسين ما وضعنا انفسنا فيه
يعنى ارضا بما كتبه الله بأنى احمده واشكره واسعى للمزيد طمعا فى كرمه ورحمته وحنيته

للاسف مفهوم الرضا عند ناس كتير اختفى وكتير بيبص لغيره فى كتله الله له حتى الغنى ساعات يحسد البواب على صحته اليى هيا اصلا راس ماله ومصدر رزقه الاساسى

والفقير ساعات كتير راضى وساعات حاقد وحاسد على الغنى فبتالى ممكن ينحرف ويسرق عشان يبقا زى البيه بالضبط غنى

وما بين الاتنيين بيفضل الرضا اختيار الانسان اليى بيريد الدنيا وبيطمع فى جنة الاخره

الموضوع بيخلينا نحمد ربنا كتير جامد على اليى ربنا وهبه لينا وانعم علينا بيه حتى لو مشاكل وازمات

mahasen saber يقول...

الايام المباركه خلاص هتودعنا بس جاى تلات ايام مباركه كمان

عيد سعيد على حضرتك وعلى اسرتك وعلى كل احبابك

ايام مباركه على الجميع ان شاء الله

طوبه فضه وطوبه دهب يقول...

كل عام وحضرتك بالف خير وصحه وسعاده وحقا القناعه كنز لا يفنى والطمع والنظر لما فى يد الغير يولد احساس بعدم الرضا يجعل الانسان يحيى حياته باكملها فى شقاء وعدم استمتاع باى شىء يملكه فيعيش محروم ويموت مظلوم سلمت اناملك

بلاش فضايح يقول...

كل سنة وانت طيب
عيد سعيد

مشكلة كبيرة اوى ان محدش راضى بحاله
محدش عاجبه نصيبه
كله باصص للى فى ايد غيره
على الرغم من ان الاحوال لو اتبدلت بردو مش هيرضوا

ربنا يعافينا جميعا

funckydoctor يقول...

القناعة دائما كنز لا يفنى
ولا يضاد هذا الطموح أبا
تحياتى

شمس النهار يقول...

اولا كل سنه وحضرتك طيب

ثانيا صورة القطه جميله جدا والاضائه مبتكره

ثالثا

موضوع الرضا ده اعتقد ماحدش له يد فيه كله من عند الله
يخلق الانسان راضي وتتدخل التربيه والظروف ودور الاهل فا يا يكمل حياته راضي
او ينقلب غير راضي علي طول الخط

والانسان الغير راضي بيكون عنده سوء ظن بالله
فابيظل طول عمره غير راضي

اذا احسن الانسان الظن بالله وكان لديه
الايمان بأن قضاء الله فيه عدل
وبذلك يكون حامد الله علي القضاء
فيبدله الله نعمه باحسن منها

يعني الرضا من حسن الظن بالله والايمان بالله وقضائه

بين البوست والبوست شهر؟؟؟؟؟؟

ماء تشرين يقول...

وحضرتك طيب

هى المشكله كلها انو ابن آدم مش بيرضى لو رضى مره هيحس انو دخل الجنه على الأرض


تقبل مرورى

------ يقول...

اولا كل سنة وحضرتك طيب

سعيدة جدا بزيارتك

ثانيا الموضوع جميل جدا وماشاء الله عليك عملته بأسلوب جميل يدخل القلب على طول

اكيد الرضا دا شىء مهم جدا
بس للاسف الناس بقت ساخطة على العيشة متكلمش حد الا لما يسب ويلعن
دا كله لاننا مترسخش فى ذهننا ايه هو معنى الرضا

دا لو الانسان سابها لربنا هيعيش الدنيا صح وهيكون سعيد

------ يقول...

اذا احسن الانسان الظن بالله وكان لديه
الايمان بأن قضاء الله فيه عدل
وبذلك يكون حامد الله علي القضاء
فيبدله الله نعمه باحسن منها

الازهرى يقول...

إرض بما قسمه الله لك تكن أغنى الناس
أعتقد أنها تلخص الكثير

كل سنة وانت طيب وبالف خير

كل سنة وانت اجمل والى الله اقرب

عيد سعيد على كل المسلمين يارب

Soul.o0o.Whisper يقول...

كل سنة و حضرتك طيب
و عيد سعيد عليك و على العائلة كلها

و فعلا زى ما حضرتك قلت الصحة و الستر دول نعمة ما بعدها نعمة بجد

و ياه لو ربنا اكرم علينا بالرضا معاهم بجد والله الواحد يعيش أمير


و لو كل واحد فعلا بص للامور من كل جوانبها هيلاقى انه واخد حقه 24 قيراط


دمت بكل الخير

شمس النهار يقول...

كل سنه وحضرتك طيب

وعيد سعيد ان شاء الله

وياريت بعد العيد تنزل بوستات كده ورا بعضها نعوض الكسل

mohamed ghalia يقول...

كل سنة وانت طيب يا أستاذى ربنا يسعدك دايما

assafo anaroze يقول...

يسعد الله مساك
احل علينا و عليكم العيد يا رب يتقبل منا و منك شهر الصيام من صلاة و ركوع و قيام و سائر العبادات و المعاملات
عيد سعيد على الجميع و يا رب تكون بالف خير

صبرني يارب يقول...

كل سنه وانت طيب يا استاذنا

يارب بالخير عليك وعلى عيلتك واهلك كلهم


انا عندي رضا طبعا احسن رضا فى الدنيا

هههههههههههه

أمل حمدي يقول...

كل عام وانت بكل خير يارب

TWEETY يقول...

كل سنة وانت طيب ياعمو

مبسوطة اوى بزيارتى لمدونتك

غير معرف يقول...

كل سنة وإنت طيب

أسما عواد يقول...

كلام جميل
كل كلامك له معنى وفايدة
كل سنة وانت طيب

TWEETY يقول...

ازيك ياعمو

انا مبسوطة انى هنا

ماما كانت دايما تقول
قولى الحمد لله دايما

اوعى تزعلى لما يكون عند حد حاجة مش عندك

ادعى ربنا

انا كتبت حاجة جديدة ابقى شوفها

أسما عواد يقول...

مررت لألقي التحية
تحياتي

Dr. Ibrahim يقول...

لو تساوى الناس فى الارزاق لعم الفساد فى الارض هذه نقطة

اما النقطة الاخرى فلكل شخص وجه نظر من حيث موضوع معين بحيث يرى انسان ان هذا الطبق لذيذ والاخر يراه غير ذلك

تحياتى لك

riko يقول...

جامدة جدا يا بشمهندس تسلم اديك


م / محمد الركايبى