الجمعة، 7 نوفمبر 2008

واحدة بس كل مرّه ...


* لا تعدل المشتاق في أشواقه حتى يكون حشاك في أحشائه
يعني إيه..؟! يعني دايما حُط نفسك مكان اللي إنت عمّال تنتقده وتألس عليه. سواء بتنتقد عمله أو شخصيته..
أول ما اتخرجت من الجامعة.. واشتغلت.. وعملت شوية تصميمات ( بالنسبة لى ولغيري دلوقت تـُعتبر ركيكة) كُنت متفاخر بها جدا.. وكنت أمشي أبص على العمارات والفيلات وأنقد .. وهاتك يا نقد أنا وأصحابي . وشوف عمل دي كده وكان لازم يعملها كده.. وهكذا.. وبعدين جالي مشروع كبير .. له اعتبارات كتيره ومشاكل كبيرة.. لقيت نفسي غصب عني واقع في حاجات لازم أعملها وكنت بأنتقدها زمان..وبيت الشعر اللي انت قريتوه فوق بيقول كده ..
ما تقعدش تقول أصل ده مجنون بيحبها قوي وبيجيب لها هدايا كتير وواقع في غرامها وكده كتير.. وإلا ربنا يبعتلك واحده وتحبها وتقع في غرامها .. وتعمل زيه ( والـمصيبه لو ماحبتكش انت وبقيت عامل زي المجنون) ساعتها غيرك حيقول عليك اللي إنت كنت بتقوله على الآخَر..
كمان انت لا تعرف الظروف اللي واقع فيها اللي قدامك .. جايز اشتغل في غير تخصصه عشان مش لاقي شغل.. وجايز يحصلك كده.. أو مثلا باع عربيته وراكب الترام ( لأنه اضطر يبيعها عشان عملية أبوه).... ولا قبلت بعريس معين وهي اللي كــانت زي القمر( لأن ماحدش غيره اتقدم) ..
أعذر الناس.. وحُط نفسك مكانهم.. لإنك مش عــارف بـكره فيه إيه..

هناك 11 تعليقًا:

من غير عنـــوان يقول...

للأسف وغصب عني... عملت البوست وبعد 2تعليق ...اتمسح...
المهم اني خسرت تعليقين جميلين من
*الألإعلاميه المبدعة ( بريهان)
* والأخت الفاضلة norahaty

أعذروني

شمس النهار يقول...

كلنا لها اهو حصل القايمه المسكينه بتاعتي
البوست جميل
وشكرا انك استجبت للنداء وخليته موضوع واحد
بس الموضوع عايز رواقه عشان ارد
فهرجع تاني بس مش دلوقتي اعلق علي الموضوع القيم ده

من غير عنـــوان يقول...

شمس النهار
صدقتي .... كلنا لها...
كان نفسي تقري تعليق بريهان وهي الإعلامية المبدعةوكاتبه ومصورة

عموما ممكن تزوريها على:
http://www.parehan.com/

مستني تعليقك

رؤية يقول...

صدقا قولك وقول الشاعر

وكثيرا ما يحدث بننا ذلك


تحياتى لك.

من غير عنـــوان يقول...

شكرا على رؤيتك

Inji Amer يقول...

السلام عليكم يا أستاذنا الغالى
قيل : إن
أعقل الناس أعذرهم للناس وهذا من المروءة وحسن الخلق وكمال الحس الإنسانى وهناك من يمتلك لسانا لا يرحم حال حتى ولو كان عم أو خال وهذا مريض النفس ومعرض لإختبارات الله ليذيقه من نفس الكأس ولكن أستاذنا الفاضل هناك ولا شك نقدا بناء بشرط أن يصاغ بأسلوب راقِ وصيغة مهذبة إن كان يرجى من ورائه فائدة أو منفعة عامة وكان خالصا لوجه الله تعالى وأما نقد المبتدئين لأعمال السابقين فهذا والله مما وقع لناجميعا ويقع للشباب دائما بسبب حداثة العهد وقلة الخبره فى تجارب الحياة ولكن أحيانا يكون علامة صحية تبشر بمولد أحد النوابغ والمبدعين الذين يجود بهم الدهر فى بعض الأحايين !! فعسى أن يجد هؤلاء من ينتبه اليهم ويرعى شأنهم قبل أن تمتد اليهم أيدى الغير ولكن هناك نقدا من نوع آخر خطير أبتلينا به هذه الأيام عسى أن تكتب لنا عنه أستاذنا العزيز لما له من أثر بالغ على مجتمعاتنا وهو نقد أرباع المتفيقهين ممن قرأ كتابا واحدا أو إستمع لكام محاضرة فى الدين فحسب أنه أصبح من العلماء والمتفقهين وهات يا نقد فى عباد الله المؤمنين حتى ليضعهم فى سله واحدة مع الكفار والملاحده ...دا موضوع كبير قوى يستاهل الكلام ولتوجيه. لك أستاذنا الغالى أطيب تمنياتى بدوام الصحة والسعادة والكتابة والإفادة وربنا يجازيك عنا ألف خير

من غير عنـــوان يقول...

العزيزة ست البنات

أولا الشكر لك على إضافتك الحميده

وطبعا مغك الحق كل الحق فيما قلتِ..

ولنا في الحديث الشريف - كلكم راع وكل مسئول عن رعيته- لنا في هذا الحديث الأسوة الحسنة في ان نبدأ برعاية ( ونصيحة ( ولا أقول نقد)انفسنا ثم المقربين... ثم إذا منّ الله تعالى علينا يمكن أن نشير لللآخرين من باب النصيحة العامة... دونما الخوض في الأشخاص

ولنا مقال حول هذه بناءً على طلبك الكريم

تحياتي وأمنياتي لك ولمن تُحبين

شمس النهار يقول...

اخيرا هعلق علي الموضوع الجميل ده
اصل انت جيت علي الجرح جامد قوي
عشان دي مهمتي في الحياه
طول ماانا ماشيه اقول لكل اللي حواليه الكلمتين دول
لاتعيب علي اخيك فيعافيه الله ويبتليك
ماتعيبوش ياقوم الاعلي الصلاه والصوم
لأن الظاهره دي تفشت جدا في مجتمعنا بشكل مزهل
عارف ليه
عشان الانانيه انتشرت
كل واحد فاكر نفسه سلطان وهو الصح والباقي غلط ولغينا من القاموس الاجتماعي اختلاف البشر في الاحساس والعقل ورد الفعل والاحتياج
تصدق مش عارفه اكتب ايه والاايه
المشكله ان فعلا ربنا وراني ناس كانت بتعيب علي ناس في فعل معين ونمت عليهم لما شبعوا
تصدق ان ربنا حطهم في نفس الموقف
لو كل واحد يتلهي بعيبه ومايصيبه عن الاخرين كان كله بقه تمام
لكن اصبحنا نري القشه اللي في عين اللي قصدنا ومابنشوفش العصايه اللي في عينا احنا
اشكرك علي الموضوع الجميل ده
وكل ماهفتكر حاجه في الموضوع هدخل اكتبها ماتزهقش مني بس

من غير عنـــوان يقول...

ماحدش بيزهق من الشمس

وكلامك مظبوط
بالبلدي اللي بيته من إزاز ما يحدفش الناس بالطوب...

وإيجاد الأعذار للناس واجب...
متعرفش ايه لله عندهم...

مستنس إشراقاتك

م/ الحسيني لزومي يقول...

شارك في الحملة الشعبية للقيد بالجداول الانتخابية وادعو غيرك
ضع بنر الحملة علي مدونتك
البنر موجود علي مدونتي

Unknown يقول...

السلام عليكم
ورحمة الله تعالى وبركاته
ولا يهمك يابشمهندس
نحن لها! نحن لها! نحن لها !!
صورة من الكومنتات تأتى
الى بريدى اولا باأول
ولا امحو بريدى الا اخرآ اخرآ
فهل يمكن ان اضع التعليق المحذوف مرة اخرى هنا وبعد أذنك .....ممكن؟
..........................
السلام عليكم
ورحمة الله تعالى وبركاته
التمس لأخيك العذر
فى كل شىء
واى شىء
الا فى حدود الله
لابد من القصاص فيها
...........................
وهذا هو رد حضرتك:
norahaty

وعليك السلام والرحمة والبركات

كلامك صحيح...إلا حدود الله

صبحّك الله بالخير .
............................
وتقبل شكرى لحضرتك