الاثنين، 10 نوفمبر 2008

اكتب كلمة واحدة في التعليق... عشان أعرف انك لسه متابع


* السـُمعه.. هي الشئ الوحيد اللي حيفضل من أي عمل .. سواء في الدنيا أو بعد مانموت..أي عمل كويس حيفضل منه سمعته.. وأي بني آدم كويس ولا وحش .. حيفضل منه عمله الكويس.. وسمعة عمله الكويس.. والسنين حتمـُر .. وتفوت.. وما تفتكرش غير إن انت كان معاك ولد مؤدب وشاطر في المدرسة.. وأهو دلوقت بسم الله ماشاء الله بقى سفير ولا مهندس شاطر.. إنما لما تيجي سيرة الواد الصايع اللي كان بيزوغ من المدرسة ولسانه طويل ..و....و.... حتقول : (بلا قرف) ..هاتولنا سيرة كويس..
كمان البنت اللي وهي لسه سبعتاشر سنه.. ومشيت مع ده وصاحبت ده.. حتكبر وتتجوز.. وتتكسف تروح النادي.. عشان كل ماحد يشوفها .. يتغامز ويتلامز (يعني برضه يتغامز) عليها .. آه مش دي اللي كانت ماشية مع طوب الأرض..

طب ليه؟ مانخلينا حلوين وسيرتنا حلوه .. عشان السيرة والسمعه بتعيش العمر معاك..

قصدي انك تعمل حساب بكره .. وتــُقدم عمل وسمعه وسيرة لا تندم عليها .. لادنيا ولا آخره..

خليكي البنت الحلوة الأمورة اللي كل ما سيرتها تيجي يقولوا ياسلام على البنت دي .. زي النسمة.. مؤدبة ومحبوبة.. اجتماعية وملتزمة..مرحة بس بتعرف توقف كل واحد عند حده ..
لإن البدايات هي أساس النهايات.. واللي بيبتدي حلو وعلى أساس.. وبيزرع ويراعي زراعته.. عمره ما حيندم.. واللي سُمعته حلوه وهو صغير حتفضل معاه العمر كله.. أما العكس .. فصعب لمّا يكبر انه يغير السيرة أو السمعه..

هناك 28 تعليقًا:

nor يقول...

جميل اوي
فعلا السمعه هي اللي بتفضل في حياه الانسان و بعد مماته
بس للاسف في قيم كتير ضاعت وسط الزحام و المدينه الحديثه
لكن يبقي دائما الخير
تحياتي

شمس النهار يقول...

البوست حلو جدا
وناديت علي البنات شافوه معايا عشان في كلام كتير انت كاتبه كنت بقوله لهم
هكتبه بعدين عشان عمالين يقولولي بلاش ياماما
بلاش

Miss. Sosa يقول...

يقول رسول الله(ص) قال:"إن الله لا ينظر إلى صوركم وألوانكم، ولكن ينظرإلى قلوبكم وأعمالكم"

اهم شيء العمل الصالح وهو اللي بيدي السمعة الطيبة وه ده اللي بنطلع بيه من الدنيا وهو اللي بيبقالنا


تحياتي لكلماتك الطيبة

من غير عنـــوان يقول...

*نور
شكرا على كلاماتك
تحياتي

من غير عنـــوان يقول...

**شمس النهار والليل ...
تعليقك يسعدني ... بيخليني أحس إني مش بأذن في مالطه

ولي الشرف انك تنادي البنات عشان يقروا معاكي...
وفي انتظار كتاباتك وتعليقاتك

امنياتي وتحياتي

من غير عنـــوان يقول...

* سوسه
أروع الكلام هو من القرآن والسنه...
شكرا على إضافتك

كل التحية

رئـــــيسـة حزب الأحلام يقول...

فعلا وتبقى السيرة الحسنه
بجد كلامك جميل وفكرتنا بكلام اكيد كلنا عارفينه بس ممكن نسهو عنه
تحياتى

Dr. Ibrahim يقول...

بارك الله فيك

و قال نبينا وحبيبنا صلى الله عليه وسلم: "إذا مات ابن آدم انقطع عمله إلا من ثلاث: صدقة جاريةأو علم ينتفع به أوولد صالح يدعو له" رواه بن ماجه

صدقت يا حبيبى يارسول الله

د/هيما

غريب يبحث يقول...

مش عارف اقول إيه بعد ما قيل، ولا اكتب ايه وسط كوكبة من الكتاب والنقاد وذو المعرفه، بس قولت اكون ايجابي برضه،... ساعات كتير بنبقى عارفين الكلام بس ناسيينه ومحتاجين حد يفكرنا بيه، واجمل حاجه انه بلغتنا مش بس بالعربي دا كمان بلغة الوصول من إللي بيوصل علطول ...
في انتظار العدد القادم...

الجواز و سنينه يقول...

عندى مقوله سمعتها من والدى
و الحمد لله بطبقها
( ما تعملش حاجه تندم عليها بعد 20 سنه )
موضوع جميل يارب الناس تستفيد منه
تحياتى

من غير عنـــوان يقول...

*رئيسة حزب الأحلام
شرفتي المدونة ، وعايزك تحلمي حلم إن كل الناس تقرا... بس تقرا....
ده حلم لشباب مصر... الأمل


أمنياتي الحقيقية
ده على وزن أحلام حقيقية

من غير عنـــوان يقول...

*د. هيما....
إضافة رائعة من كلام سيدنا النبي محمد عليه أفضل صلوات ربي

شرفت وأرجو المزيد

تحياتي

من غير عنـــوان يقول...

*خالد الشهير بغريب يبحث

كنت قلق عليك .. كام مرة انت ما كتبتش

يارب أشوفك في أحسن حال دائما

من غير عنـــوان يقول...

* الجواز وسنينه...
طبعا والدك عنده حق...

وإنت نورتي
متمنيا لك السعاده

شمس النهار يقول...

الموضوع مش سمعه وبس لا ده دين واخلاق ودين
كنت دايما اكلمهم عن فترة المراهقه وهي ايه عشان همه دايما يسمعوا الكلمه دي من غير شرح يعني ايه
كنت بقول لهم البنت زي الولد في الحساب عند الله واوريهم الايات الداله علي ذلك
لكن المجتمع بيدي حق غلط للولد المفروض مايخدوش
عيب ان البنت تعرف ولد لكن بينبسطوا قوي ان الولد مقطع السمكه وديلها
طب ماهو قطعها علي حساب بنات زي اخته وزي امه ليه نكيل بمكيالين
وعامتهم الكرامه
ماتكونيش نمره في اجندة ولد مستهتر
صوني نفسك للي يستهلك
وكلام كتير لو قعدت اكتبه مش هخلص
اخر القول ان الامهات لازم يكونوا اصدقاء لبناتهم ويتكلموا معاهم في كل حاجه المعلومه هتتعرف هتتعرف يبقه تعرفها منك احسن لها ولكي بدل ماتفوقي علي مصيبه
بشكرك علي الموضوع الجميل ده

من غير عنـــوان يقول...

** شمس..... اليوم

الامهات لازم يكونوا اصدقاء لبناتهم )

أكيد... موافق... مقر

وكمان الآباء...

بس ليّه شرط... في حدود الأدب والإحترام...
دول بيدخنوا قدام بابا وماما...ويقولك حرية...

يمكن أنا دقة قديمة ... بس والله أبدا...

ده أنا حتى كل أولاد أصحابي بيجوا لي عشان ياخدوا رأيي..


متعك الله بمباركته في بناتك وولادهم إن شاء الله

Unknown يقول...

السلام عليكم
ورحمة الله تعالى وبركاته
اليوم حدثنى صديقى عن اباه
الذى توفى منذ عام1964ومازالت
سيرته اينما جاءت على لسان اى احد
من افراد بلدته يذكرونه بكل الخير والحب بعد كل هذه السنوات !!.اقول لك يابشمهندس لا تتصور حجم الفخروالمباهاة
التى احسستها فى نبرة صديقى هذا فإن لم يترك له اباه (ارثآ ماديآ)فقد ترك له ماهو اجمل من هذا :السمعة الطيبة
تحياتى واعتزازى بكلامك وموضوعاتك.

من غير عنـــوان يقول...

* نورا

بعد موته بعشرون عاما كان قريبه( من بعيد ولا يحمل نفس اللقب) يحج ويجلس في مخيمات منى ( عقبالك) وسمع نفر يتحدثوت عن هذا الذي مات بالإسم... ويذكرونه في هذه الأرض المباركة.. يتحدثون عن ذكرياتهم معه منذ أربعون عاما مضت... ويذكرونه بالخير...أما هذا الحاج فكان ابن خالتي وأما هذا الرجل العظيم فكان والدي رحمة الله عليه..والذي دائما ما أفخر به...
وهذا مصداقا لما قلتيه..

رب اجعل سيرتنا حسنه وخير أعمالنا خواتيمها...

أمنياتي

عمرو يقول...

عارف يا محمد أهم حاجه تنغرس فى نفس الطفل أن فيه رقيب عليه طول الوقت و هو ربنا سبحانه و تعالى
الطفل يبتدى يتعلم من صغره أن اللى بيعمله فى الخفاء و بشكل مستتر هو أكيد فعل خاطىء و مع تقدم العمر و السنين بتبقى تركيبة الاٍنسان هى التعود على فعل الصح و بالتالى بتبقى سمعته حسنه طول العمر
غرس القيم الجيده فى الطفوله أهمممممم شىء
تحياتى و اٍن شاء الله متابعك

شمس النهار يقول...

طبعا في حدود الادب والاحترام
انا ربيتهم زي ماانا اتربيت بالظبط وبالاقناع ربنا بيعاقب اللي بيغلط واده الحق ده للوالدين يعقبوا اولادهم لما يغلطوا
كمان اللي ساعدني ان السن بينا مش كبير وكمان انا بحب الاطفال جدا
اصحابهم كمان بيحبوني جدا
البيت عندي عامل زي مستعمره للبنات
مش 3 بصحابهم

من غير عنـــوان يقول...

عمرو
كلماتك هادئة
وقيمة

حلمي كله إن ولادنا وولاد ولادنا إن شاء الله يكون عندهم هذه القبم

تحياتي لك ولأحبابك

من غير عنـــوان يقول...

** شمس النهار
أنا متخيل طبعا ان انت صاحبتهم من طريقة كتابتك

ومتأكد أنهم زي الفل..

البنات حاجه حلوه...

أنا كمان عندي 3 بنات
25/24/21.وصحابهم معاهم من حضانة لدلوقتي ،وأنا معاهم

دعائي الخالص لك ولهن ولجميع أحبابك

شمس النهار يقول...

ماشاء الله
دول في سن بناتي
بس الصغيره عندي عندها18سنه
عقبال ماتجوزهم وتفرح بيهم دي فرحه جامده قوي
بس اللي اهم من اجواز ان الرجله دول يكونوا يستهلوهم ويكونوا بيصلوا
اهم حاجه في زوج البنت انه يكون متعود علي الصلاه
ده شئ مهم جدا

من غير عنـــوان يقول...

** شمس النهار

يارب عقبال كل البنات
سلمى الكبيرة مخطوبة لياسر شاب ممتاز...

عارفه ... بعد تقوى الله مافيش حاجة...

لأن الشباب حياخدوا بنات وبغير انه يتقى ربنا فيها... لا شئ يساوي...

أصل دلوقت ... التربية باظت... وبنات كتير بيدوروا على جاه وفلوس... وده مش مهم...

أبويا الله يرحمه كان يقول الراجل غشان يكون راجل لازم يكون راجل...
كنت مش فاهم.. ودلوقت فهمت...أصله كلمة راجل مالهاش تعريف تاني...

ربنا يهدي ويهدينا...

غير معرف يقول...

السلا عليكم ورحمه الله
انا متأخرة شوية فى التعليق بس انا قرات المقال اول ما نزل لاتى متابعة كل المقالات بس احب اعلق على رواقة.
موضوع السمعة ده جميل جدا ومرتبط بحسن الخاتمة كمان وديننا هو دين الخواتيم مثلا ليلة القدر فى العشر الاواخر من رمضان ومصير الانسان متعلق بخاتمته فيارب ارزقنا جميعا حسن الخاتمةوالسمعة الطيبة. واكيد السمعة الطيبة دى محتاجة مجهود فخسارة ان المجهود ده يروح ع الفاضى لازم يحافظ عليه طول عمره.
الموضوع ده فعلا مهم اوى للبنات ياريت كلهم يشوفوه لان كتير من الشباب مش بيحب النصايح ياريت يدركوا مدى قيمة واهمية هذا الكلام لحياتهم ومستقبلهم.وانا مع "غريب يبحث" ان الواحد مش بيبقى عارف يقول ايه بعد الكلام الجميل ده كله بس فعلا الواحد عايز يبقى ايجابى .
بصراحة كل المقالات رائعة وزى ما قلت قبل كده احلى حاجة فيها انها بتخش على القلب على طول.الله يبارك لك ياباشمهندس ولا تحرمنا من مقالاتك.
وللحديث بقية ان كان فى العمر بقية

من غير عنـــوان يقول...

أميرة القصبي.. تلميذتي النجيبة العزيزة...

أحلى حاجة في البلوج دهإنه بيسمعني صوتك وصوت ناس كتير أعزاء

..... أمنياتي

وفاء بركات يقول...

السلام عليكم
السمعه إتربينا علي انها رأس مالنا

بجد انا معجبه جدا بمواضيع مدونتك
ربنا يبارك فيك ويكتر من أمثالك البلد محناجه حد يحبها ويحسن من شكلها سوى إذا كان ده متمثل في السلوك الشخصي في التعامل مع الأخريين أو عند التعامل مع منافع عامه مثل القطارات والحدائق...الخ
ولا يغير الله مافي قوم حتي يغيرو ما بأنفسهم

وفاء بركات يقول...

السلام عليكم

جميل إن حضرتك ..تقدم عصارة خبرتك وتجاربك بهذه الصوره المبسطه لشباب
هذا الجيل من الجنسين ..
لإن كتير من إفعالهم ربطينه بالموضه
والتقدم وتقليد اعمي للغرب دون حساب
للدين ولاعادات وتقاليد
ربنا يعطي حضرتك الصحه والعافيه
ويجعل هذا العمل في ميزان حسناتك
تحياتي