الأربعاء، 3 ديسمبر 2008

كل عام وأنتم بخير ( wall paper as a gift 4 u)


* كُـل الضفدعة .. يعني إيه كُل الضفدعة .. هي الضفدعة بتتاكل ؟؟ ( ومش عايز حد يقولي ( بياكلوها في فرنسا)... ده تعبير عند الجماعة الناجحين واللي بيدرسوا تنمية بشرية...ومعناه إن إحنا نبتدي بالحاجات البايخة الأول وبعدين اللي بنحبه ..يعني وراك مذاكرة..ووراك سينما.. ذاكر.. وبعدين روح السينما... وراك شغل..وعندك رحلة.. اشتغل الأول.. خلص الأول الحاجات التقيله على قلبك وحلـّي باللي بتحبه.. زي ما تاخد دوا ووراه عصير مانجه.. وده سر من اسرار نجاح كتير من العباقرة ورجال الأعمال الشاطرين زي ما قالوافي مذكراتهم .. لأنك لو ابتديت بالحلو حتكسل تعمل الوحش أو التقيل على قلبك..وده بيزيح من اللي وراك وماتحسش غير إن كل اللي وراك تعمله إنت بتحبه.. ودي حاجه حلوة..ولو انت طالب وبتعمل الواجبات الثقيله.. حتجيب أحسن نمرة..ولو انت موظف، مديرك حيحبك ويمكن يرقيك.. وده حيجرنا لـ ( لا تؤجل عمل اليوم الي الغد ).. يعني: أي عمل تخلصه .. وبالذات لو انت اللي مُكلف بيه.. مش تطوعي.. خلصه النهارده أحسن من بكرة.. قومي اطبخي بدل ما والدتك تكلمك في التليفون ساعتين وماتلحقيش.. قومي اغسلي عشان تعرفي تتفرجي على التلفزيون.. روح لدكتور الأسنان.. قبل ما ضرسك يوجعك نص الليل..وتروح برضه للدكتور ..وحاجات تانيه كتير.. طبعا ده لا يتعارض مع الأولوليات... لإن فيه حاجات مهم تتعمل الأول سواء بتحبها أو مش بتحبها...وكمان لازم ندي كل حاجة وقتها ونتقنها ونعملها في ميعادها دون تأخير... يمكن كلام بايخ وتقيل.. بس هي دي سكة النجاح ... للي عايز...ياللا قوم إعمل اللي وراك ومتأجل...

هناك 21 تعليقًا:

فشكووول يقول...

اول تعليق .. والله هى فكره .. تصدق كل الواحد ما يعيش يفضل يتعلم..يعنى الواحد يعمل الصعب الاول وبعدين يعمل الحلو .. يعنى ياكل ويملا بطنه وبعدين يحلى .. والله صح اعمل الشغل وبعدين روح اتفسح او خش السيما او اى حاجه انت بتحبها .. الدنيا فيها حكم كتير والواحد يفضل يتعلم لحد ما يموت .. كل عام وانت بخير

من غير عنـــوان يقول...

* fashcoooool
أخجلتم تواضعنا يا أستاذي

Kiara يقول...

كل سنه وانت طيب

عيد سعيد

وفعلا فكره انا بعملها ايام الدراسه

وفي حياتي

اصل لما بعمل اللي بحبه بكسل عن اللي مش بحبه

عمرو يقول...

الحمد لله على السلامه
بوست جميل جدا جدا
عن نفسى أنا بأعمل بيه من طفولتى و تلقائيا بدون توعيه من الكبار
شكرا يا صديقنا

mohamed ghalia يقول...

هى فكرة كويسه قوى
إنى الواحد يعمل الحاجة الى تقيله على قلبه الأول وبعدين يشوف الحاجة الى تسعدة
تحياتى
دمت بكل الود

Dr. Ibrahim يقول...

كل عام وحضرتك بخير

فعلا نظرية بتفكرنى كمان بنظرية كرات الجولف والرمل وأحكيلك الحكاية عشان أثرى الموضوع ولقد قرأته منذ مدة قريبة وها هو:

وقف بروفيسور أمام تلاميذه..

ومعه بعض الوسائل التعليمية..
وعندما بدأ الدرس ودون أن يتكلم..
أخرج عبوه زجاجيه كبيره فارغة..
وأخذ يملأها (بكرات الجولف )
ثم سأل التلاميذ ..
هل الزجاجة التي في يده مليئة أم فارغة ؟
فاتفق التلاميذ على أنها مليئة ..
فأخذ صندوقاً صغيرا من الحصى ..
وسكبه داخل الزجاجة ....
ثم رجها بشده حتى تخلخل الحصى ..
في المساحات الفارغة بين كرات الجولف..
ثم سألهم ....؟
إن كانت الزجاجة مليئة ؟
فأتفق التلاميذ مجدداً على أنها كذلك ..
فأخذ بعد ذلك صندوقاً ..
صغيراً من الرمل ..
و سكبه فوق المحتويات في الزجاجة..
وبالطبع فقد ملأ الرمل باقي الفراغات فيها..
و سأل طلابه مره أخرى..
إن كانت الزجاجة مليئة ؟
فردوا بصوت واحد ..
بأنها كذلك .....
أخرج البروفيسور بعدها فنجاناً من القهوة..
و سكب كامل محتواه داخل الزجاجة..
فضحك التلاميذ من فعلته ..
وبعد أن هدأ الضحك ..
شرع البروفيسور في الحديث قائلاً :
الآن أريدكم أن تعرفوا ما هي القصة ..
إن هذه الزجاجة تمثل حياة كل واحد منكم..
وكرات الجولف .. تمثل الأشياء الضرورية في حياتك :
دينك ، قيمك , أخلاقك ، عائلتك , أطفالك ,
صحتك , أصدقائك .
بحيث لو انك فقدت (( كل شيء ))
وبقيت هذه الأشياء فستبقى حياتك ..
مليئة و ثابتة ..
أما الحصى فيمثل الأشياء المهمة في حياتك :
وظيفتك , بيتك , سيارتك ..
وأما الرمل فيمثل بقية الأشياء ...

أو لنقول : الأمور البسيطة و الهامشية..
فلو كنت وضعت الرمل في الزجاجة أولاً ..
فلن يتبقى مكان للحصى أو لكرات الجولف ..

وهذا يسري على حياتك الواقعية كلها ..
فلو صرفت كل وقتك و جهدك على توافه الأمور..
فلن يتبقى مكان للأمور التي تهمك..
لذا فعليك أن تنتبه جيدا و قبل كل شيء للأشياء
الضرورية ..
لحياتك و استقرارك..
وأحرص على الانتباه لعلاقتك بدينك ..
وتمسكك بقيمك و مبادئك و أخلاقك ..
أمرح مع عائلتك ، والديك ، أخوتك ، وأطفالك ..
قدم هديه لشريك حياتك وعبر له عن حبك..
وزر صديقك دائماً وأسأل عنه..
أستقطع بعض الوقت لفحوصاتك الطبية الدورية..
وثق دائما بأنه سيكون هناك وقت كافي للأشياء
الأخرى .......
ودائماً ..
أهتم بكرات الجولف أولاً ..
فهي الأشياء التي تستحق حقاً الاهتمام ...
حدد أولوياتك ..
فالبقية مجرد>>> رمل..
وحين انتهى البروفيسور من حديثه.. رفع أحد التلاميذ يده قائلاً:
أنك لم تبين لنا ما تمثله القهوة ؟
(( فابتسم )) البروفيسور وقال :
أنا سعيد لأنك سألت ..
أضفت القهوة فقط لأوضح لكم..
بأنه مهما كانت حياتك مليئة ........
فسيبقى هناك دائماً مساحه..
لفنجان من القهوة !!

تحياتى لك

د إبراهيم

وفاء بركات يقول...

أنا قلت أعمل بنصيحتك وما أجلش التعليق لبكره..
لو أكل الضفدعه سيكون سبب في نجاحنا
ده إحنا ناكل أبوها وأمها...
درس يستحق التطبيق ...عجبني جدا الهدف من المدونه تقديم النصح بطريقه بسيطه
ومريحه تجد لها قبول في نفس المتلقي ..
أدعو لك أخي بالتوفيق .وجزاك الله خير

من غير عنـــوان يقول...

* العزيز الدكتور إبراهيم... أفادكم الله .. لقد أثريت هذا البوست...

جزاكم الله خيرا

أمنياتي

أحــوال الهـوي يقول...

كل سنة و انت طيب يا دكتور

موضوع عميق و خطير و باسلوب قريب من لغة الشباب

احسنتم و لكم كل الشكر
تحياتي

صفــــاء يقول...

.
أكل الضفدعه؟

يعنى اعمل المهم والتقيل وبعدين أبقى أدور على الخفيف والسهل ؟

الواجبات أولويات .

يعنى بالعربى مش بس باكل الضفدعه
وبحلى بيها كمان

تحياتى يا باشمهندس
.

Desert cat يقول...

كلامك كله صح
انا مثلا لما بيكون عندى شغل كتير وعايزة فى نفس الوقت انزل اشترى حاجه .. اقول لاء انا هخلى الحاجة دى مكافأة لنفسى لإنجازى فى شغلى
الواحد بيحس بالحاجه الحلوة بعد الحاجه الصعبة ..

Unknown يقول...

السلام عليكم ورحمة
الله تعالى وبركاته
مضبوط الكلام يافندم
وننفذه فى(شغل البيت)فى
اكثر الاحوال ما اكره اعمله
اولا ثم ما احبه ياتى فيما بعد
واسمح لى ابدى اعجابى بالمثل الذى ضربه
دكتورابراهيم (حقيقة اول مرة اسمع)
تحياتى لك ولضيوفك ياباشمندس.

من غير عنـــوان يقول...

** نورا
دايما منورانا

أمنياتي

غير معرف يقول...

انا جايه اقولك كوووووووووووول سنه وانت طيب

ويارب يكون عيد سعيد عليك يارب
:)

غير معرف يقول...

♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒
▒♥▒▒♥kol Sana w antom Tayebeeeeeen♥▒▒♥▒▒♥▒▒♥▒▒
♥▒▒♥▒▒♥عـــــيــــد سـعـــيــــد ♥▒▒♥▒▒♥▒▒♥▒▒♥▒▒♥
▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒▒♥▒

Unknown يقول...

السلام عليكم ورحمة
الله تعالى وبركاته
وكل سنة وحضرتك
والاسرة بالف خير
وباين عليك يابشمهندس
اخدت الاجازة بدرى شوية؟
امال ليه حارمنا من جديدك؟

صفــــاء يقول...

.
كل سنه وانتو طيبين وبالفرحه منورين

وعلى البلوج اسبوت دايما موجودين
.

nor يقول...

ربنا يكرمك
هي فعلا فكره تحفه
الحمد لله انا في الغالب بنفذها
كل سنه و حضرتك بخير
تحياتي لكتاباتك

mahasen saber يقول...

كل عيد وحضرتك بالف خير وسلام
واسرتك وكل من تحب
بكل صحه وستر

وده بخلاف اكل الضفدعه اليى اول مره بصراحه اسمع التعبير ده واعرفه بيتقال ليه
فشكرا جزيلا لحضرتك على المعلومه

انت تسال والكمبيوتر يجيب يقول...

الأخ العزيز
هل لديك مانع لو اذعنا فى برنامجنا الأذاعى مقتطفات من مدونتك باسمك وباسم المدونه؟
رجاء الأتصال بنا
netonradio@yahoo.com
دعوه

تحيه طيبه
ندعوك للمشاركه فى برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام وهو يذاع يوميا التاسعه وعشر دقائق صباحا عدا الجمعه وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا
المدونه
http://netonradio.blogspot.com
الموقع
http://dear.to/cairo

شمس النهار يقول...

اول مره اعرف موضوع الضفضعه ده
طيب
كان الضفضعه بتاعتي زمان العربي
فاكنت اعمل اللي ورايا فيه الاول وبعدين اكل الجاتوه وده الرياضه