الثلاثاء، 30 يونيو 2009

قراءة وكتابة

* القراءة الحرة مش زي اللي بتاخده في الـمدرسة.. دي انت قاريها بمزاجك .. ماحدش غصبك.. يعني لازم تستفيد منها .. لازم تحس إن قراءاتك الحره غيرتك .. أضافت إليك أشياء ..لسه قاري في الأهرام ان المواطن العربي بيقرا ربع صفحة في السنه.. والأمريكاني عشر كتب والأوروبي خمستاشر كتاب.. حاجة تكسف.. انصحك تخليها كتاب في السنه ( رضا ).. وأحلى القراءات هي كتب السيره الذاتيه وقصص نجاح الأشخاص لانها بتديلك حافز.. شوف انت بتحب مين.. لاعب كرة.. مهندس .. فيلسوف.. ممثل.. أي حد .. دور على سيرة حياته الذاتيه واقراها.. يعني انا استمتعت ب كتاب( تجربتي) للمهندس عثمان أحمد عثمان ) ، قصة كفاح جامدة جدا.. ازاي عمل نفسه.. ازاي وصل بمجهوده الرائع.. ازاي حارب وسهر وذاكر وجاع وشبع.. ازاي بيتصرف في المواقف و اكتب.. واكتب أي حاجة.. سواء فضفضة على الورق ..حتريحك..سواء عبارات وحِكم.. سواء أحلامك وطموحاتك عايز تحققها.. فيلسوف قال: إن الكتابة هي بديل أو تعويض عن الإنتحار عشان بتفضفض فيها ..اكتب اللي انت شايفه وحاسه .. خلي معاك نوته صغيره.. كل ما تفتكر حاجة وحشه أو حلوه اكتبها.. كل ما تشوف حاجه ارسمها ( حتى لو مش بتعرف ترسم )..كل ما تسمع حاجه سجلها ..يعني زي يوميات..اللي كان بيعمل كده ليوناردودافنشي .. لو ماتعرفش مين ده .. اسأل..أو عليه العوض.. مش لازم تكتب في اجنده وكل يوم.. لأ.. زي ما تيجي.. بعد فوات السنين .. ممكن ترجع لكتاباتك .. ويا إما تضحك عليها.. أو تفكرك بنمرة زميل لك.. أو تلاقي فكره كانت سريعه بس ممكن تنفعك.. لأن الواحد مش بيفتكر .. المهم انك تكتب .. يا أخي اكتب واقرا أي حاجة ..

هناك 31 تعليقًا:

candy يقول...

WoW
1st comment !!!!!!!!!
Iam proud!

candy يقول...

على فركة يابشمهندس القراية دى سر من أسرار الكون فعلا...
وكذلك الكتابة...
وكتابة اليوميات والخواطر دى غيرت حياتى من غير مبالغة
خلتنى اخد بالى من تصرفاتى
وافتكر لناس حاجات حلوة لو ضايقونى
وبشوف عظمة ربنا فيا وانا بكبر وبتغير ومشاكل بتتحل وناس بتموت وبفاقنى وبفضل فعندى فى مذكراتى..
والقراية طبعا لو اتكلمت عنها مش هاخلص فيها كلام
بس انا متخيلش يوم من حياتى يعدى من غير ما اقرا وبنهم لحد ما اشبع
السير الذاتية فعلا بتضيف حياة لحياة وخبرة صاحب السيرة للقارئ
دا طبعا غير المتعة الأدبية
بحيى حضرتك جداااااااااااا على الموضوع الغنى ده

SHAPE YOUR LIFE (ABOALI) يقول...

اقرء
كانت عنوان الرسالة


من قرء عرف
ومن عرف تعلم
ومن تعلم نما
ومن نما كبر
ومن كبر ارتقى
ومن ارتقى اقترب
ومن اقترب نال
ومن نال احب
ومن احب عشق
ومن عشق تمنى
ومن تمنى ايقن
ومن ايقن خشع
ومن خشع علم
انه العبد
الذى ارداه الله ان يكون له خليفة


القراءة نور
لمن اراد ان يسعى فى النور


تحية على الموضوع المميز والدعوة الكريمة
لكى نرتقى

خالص شكرى

من غير عنـــوان يقول...

Candy
ABOALI

لكم يفرحني أن أجد شباب مثلكما


حاجه تفرح

وشكرا على إضافتك الجميله يا أبوعلي

mahasen saber يقول...

الانسان يقرا ويقرا يعلا من جواه اكتر وبرقى بمخه اكتر واكتر ومن ثم تسمو روحه فوق مل الحروف اليى قراها

اما لو ارتبط بالقلم وكتب وعبر فبكل حرف لبخطه بيأكد انه لسه حى ولسه السمو فى دمائه بتجرى

بوست رائع ومفيد كالعاده

mahasen saber يقول...

الانسان يقرا ويقرا يعلا من جواه اكتر وبرقى بمخه اكتر واكتر ومن ثم تسمو روحه فوق مل الحروف اليى قراها

اما لو ارتبط بالقلم وكتب وعبر فبكل حرف لبخطه بيأكد انه لسه حى ولسه السمو فى دمائه بتجرى

بوست رائع ومفيد كالعاده

mahasen saber يقول...

اتشرفت جدا جدا بمعرفت حضرتك

ورؤيتك عن قرب

mohamed ghalia يقول...

متفق مع حضرتك تماما
إنى القراءة الحرة بتفرق كتير معانا
جميلة الدعوة الى حضرتك بتدعيها

Israa El-sakka يقول...

فعلا الواحد بيستفيد اكتر من القراءات اللي بيعلملها مختارا يعني ممكن قعد فكراها بالسنين أما الدراسية اللي ببقى مجبرة عليها فللاسف بتتلاشى في الهواء اول ما اسلم ورقة الإجابة
يمكن الموضوع هو احساس الإنسان بالحرية مش عارفة
سلااام

بنت الغربة يقول...

الله ينور عليك ...
فعلا حضرتك معاك حق فعلا...
الواحد الحياه شاغلاه عن حاجات كتيرة قوى ..مش فاكره امتى قريت كتاب لحد معين ..من ساعة مادخلت عالم النت وانا باحاول ادور على مواضيع خاصه بالشغل ..او بادور على شغل مناسب ...
ومش فاكره امتى اخر مرة اشتريت فيها كتاب ..فعلا انا فاتنى كتييير...
بس هاحاول استفيد من الاجازة دى انى
ابدأ اقرأ تانى ..
واحاول اسجل يومياتى ...
تحياتى لحضرتك جدا ...وشكرا على تعليقك الدائم عندى..

yoyo يقول...

استاذى العزيز
اتفق مع حضرتك و سعيدة بدعوة الكريمة للقراءة
لا انكر انى تعلمت و مازالت اتعلم من ما قرأت
القراءة هى غذاء العقل و القلب
وهى فى اول الامر تاتى كتجربة ثم تصبح عادة يصعب ان تنسى او حتى تهمل
من نشا و تربى على القراءة و الكتابة كبر جسده و نما معه عقله و فكره

اتذكر كيف كنت انا و اخى الصغير نقتصد من مصروفنا الشخصى لشراء الكتب و الروايات الموجودة عندنا حتى الان رغم اننا كنا وقتها اطفال صغير فى المرحلة الابتدائية القراءة ساعدتنا فى حاجات كتير اوى
الفضل يرجع لبابا و ماما بعدر ربنا سبجانه و تعاله فى غرس حب القراءة فى انفسنا

التربية ممكن يكون لها عامل كبير فى محاولة نشر حب القراءة اللى من خلالها هنقدر نكتب و نعبر عن انفسنا

دمت لنا بالف خير و صحة
تحياتى
يويو

أحــوال الهـوي يقول...

نصيحة غالية و فكر مستنير بس المشكلة كام واحد ممكن يقراها علشان يستفيد بيها
في اوربا الكتاب صديق الطريق و في اي قطار تجد الكل منشغل بكتابه و قلما تجد احادث دائرة بين اثنين

و عندنا لا يمر الوقت الا اذا كان الصخب و التندر و ازعاج الاخرين
المشكله في القطار عندنا و عندهم
هو الفرق بين علبة السردين و السيمون فيميه

تسلم يا باشمهندس
تحياتي

(حلـم) يقول...

يسعد مساك ياهندسة جيت ارد الزيارة وقد تصفحت بعض مواضيع مدونتك الواقعية احيك علي هذا الاسلوب واضم راي لرايك في بوستك الاخير قراءة وكتابة اني دوام التواصل ياطيب اخوك الصغير..حلم..

Abd Al-Rahman يقول...

فعلا كلام حضرتك مظبوط
بضايق جدا لما اسال حد ايه هوايتك يقولى " القراءة"
القراءة مش هواية ، دى منهج حياة ، يعنى ماينفعش اعملها وانا فاضى واسيبها وانا مشغول
وماينفعش أعملها أو معملهاش ، دى حاجة عاملة زى الأكل ...
بجد اتمنى ان فكرنا عن القراءة كعرب يتغير شوية ...
شكرا لموضوعك

صبرني يارب يقول...

الله ينور عليك يا استاذنا

احنا امة اقرأ

اول كلمه في القرآن اقرأ

افتكر كانت فى واحده باقولها مره تعالى اقري الموضوع ده كويس
قالتلى انتى قرتيه

قلتلها ايوه

قالتلى طب احكهولي اصل ما بيجليش روح

ثقافة المساطب
نحكي ونلوك لوك بس

نقرا لا تعب علينا


وعندك حق فى موضع الكتابه ده

انا كتير باقول لو ما كنتش باكتب فى مدوناتي كان زماني اتجننت من زماااااان

تسلم اديك يا استاذنا

أمل حمدي يقول...

جزاك الله خيرا أخي

بوست هادف لترتقي العقول

تقديري

شمس النهار يقول...

ايه ده انا علقت امبارح هنا تعليق بعد رد حضرتك علي كاندي وابو علي
التعليق راح فين
اعمل ايه انا بقا

Foxology يقول...

عندك حق يا باشمهندس المفروض ان الواحد يقرأ ويكتب اى حاجة تيجى ف باله المهم انه ينمى جوه ملكة الكتابة لأنها بتريح كتير :)

تحياتى على الموضوع الجميل :)

من غير عنـــوان يقول...

أصدقائي وإخواتي وابنائي
الشكر كل الشكر لكم جميعا على تعليقاتكم البناءة

** Abd Al-Rahman
أنا كمان مش باعتبر إن القراءه هوايه.. متفق معاك... أمنياتي

** شمس النهار
انت كده برضه ماكتبتيش التعليق وبكده يكون بوست القرءاه ده مضروب.. ومش نافع... الشعب يطال بتعليق الشمس هنا.. مش كفاية مسافرة
...تروحي وترجعي بالسلامه

تحياتي

Kiara يقول...

بجد بجد اتشرفت بمقابله حضرتك في كوستا كنت سعيده جدا بحوار حضرتك :)

*********

القراءه فن بجد اللي مش بيتزوقه يبقي خسر كتير

شمس النهار يقول...

انا بجد كتبت تعليق ومااعرفش راح فين

التعليق مره اخري

موضوع القراءه ده موضوع كبير جدا وعلي فكره هو بيبتدي من الصغر حسب التعود
تصدق ان في ناس عمرها ماقرت ولو مجله
الاحصائيه دي غلط ده اكيد والا تمن ورقه

وفي ناس بتقرا المجلات الفنيه الهابطه يعني حتي مابيقروش المجلات الهادف اللي بتنقد العمل بجديه وتناقش قضايا الفن بكل انواعه

اما الكتابه فهي نوع من انواع العلاج النفسي فعلا
الانسان لو كتب المشكله اللي مضيقاه
وقراها تاني بتفرق معاه
حتي لو ماوصلش لحل بيرتاح نفسيا

ويمكن الكتابه اسهل من الرسم عشان هو محتاج موهبه ولو حد حاول يرسم وهو ماعندوش الموهبه دي ممكن يحبط

لكن الكتابه اهو بيطله اللي جواه وبيعبر بيه كلام
حتي لو مبوظ اللغه العربيه زي حلاتي كده
مش مهم:) المهم اننا نكتب ونتواصل مع نفسنا

جلال كمال الجربانى يقول...

السلام عليكم

القراءه شغف ورغبه فى أن أعلم ولوشىء عن كل شىء ويتطور الأمر حتى تكون القراءه بأهميه البنزين للسياره
أما الكتابه فهى فعلاً علاج وتفريغ مايشغلنا ويهمنا على الورق أو على بلوجر حتى لا نجن
يعنى بتعمل لنا شويه توازن

ودائماً متفرد
ببساطه مفرطه وجميله

ودمت ياعمنا بحير

من غير عنـــوان يقول...

** كيارا
ده إنت اللي بنوته جميله بتشعي سعاده

** شمس الشموس
طبعا يافندم كده البوست كمل بتعليقك... طبعا مش حاكتب بوستات لغليه ما ترجعي من بلاد العم سام... يا إما تعلقي من هناك

تروحي وترجعي لنا بألف سلامه

أمنياتي وتحياتي

** واحد من العمال
ما تتخيلش قد إيه كلامك جميل وموزون وفي الجون وكله إنتاج
دايما منورني

صوت من مصر يقول...

للاسف مش عارف اقولك ايه
انا عجبنى البوست بس على ما اظن ان الاهرام غلطان لاننا بنقرا بس مش تفاهات للاسف
اعرف ناس كتير بتقرا
بس فى ناس اجبرتهم الحياه على التدنى معها
اظن انى بسمع كويس وودنى شغاله ومش عيب انى اكون فى وقت من الاوقات مش مستحمل اسمع حد هيفدنى
اظن انى غلطان اه
بس غلطى قليل جدا
استا محمد البنا
او بشمهندس محمد
استمتعت جدا بلقائك واظن انك مضايق منى
بس بجد
معنديش رد لا اسف ولا غرور

الازهرى يقول...

القراءة هى اساس العلم

وبالطبع اساس التقدم

اما بخصوص عثمان احمد عثمان فمدونة قبل الطوفان كان فيها سلسلة عنه اعتقد انها بتخالفك الرأى
مع الحفاظ على الود طبعا

تحياتى دوما

من غير عنـــوان يقول...

**الأزهري

أنا اللي شوفته في تجربة عثمان أحمد عثمان هو قصة النجاح... لأني مش في موقع محاسبة الناس ...

في القراءة يا أزهري... استفيد مما تقرأ..
لأنك لو أصبحت حكم... وقاضي..
غالبا حتسيب القراءه .. ومش حتستفيد...

وحينما تقرأ كثيرا جدا ... وتستوعب.. وتهضم ما قرأت... ساعتها نبقى نقدر نحاسب

أمنياتي

♥نبع الغرام♥♪≈ يقول...

السلام عليكم

معلهش متأخره شويه كنت مسافره وكده

وقلت اجى ازور الناس الجميله يارب تكون بخير وبصحه كويسه
جميل قووى البوست بجد
انا عن نفسى بعشق القرايه قووى والكتابه
ودى اجمل هواياتى

دمت بكل ود وخير
تحياتى
انوسه

عمرو يقول...

دعوه رائعه للقراءه و الكتابه يا صديقنا الحكيم و جت فى وقتها فعلا وسط خضم الهزليات اللى بتحيط بينا من كل ناحيه :)
تشرفن بمقابلتك و بمعرفتك و أرجو أن تدوم الصداقه المنزهه بيننا للأبد اٍن شاء الله ..
تقبل تحياتى و تقديرى ..

Unknown يقول...

القراءة متعة فقدت وافتقدت جزءاً
كبيراً منها لاسباب كثيرة:النت حالياً
هو السبب الاوضح والظاهر لكن هناك
اسباب اكثر منها ممكن:الزهق الملل
مشاكل الحياة.أما الكتابة فهى متعة اخرى فقدتها ايضا دوامت على كتابتها لسنوات طويلة اسجل فيها ما احس به
وما يمر بى فأضحك تارة وابكى تارة على ما مضى وما كنت بمتذكرة لكل هذه الاحداث لو ما كنت سجلتها وكتبتها

Unknown يقول...

مادة الفسيولوجى عندنا :كمنهج ودراسة وامتحان :آجارك الله ياباشمهندس اما كقراءة ومعرفة وثقافة :الله ما فى بعد كده جمال .هذا هو الفرق بين القراءة للدراسة والقراءة للمتعة والمعرفة.

من غير عنـــوان يقول...

norahaty

نورا

شكرا على التعليق الجميل
روحت عندك قريت بوست ممتاز... عن اللآباء والأبناء
وبغض النظر عن غنه لذيذ ومضحك..
إلا إنه هادف لما نلاقي إختلافات الأجيال.. اللي محتاجه إن الكبار يقربوا شويه...للصغار.. والصغار يحاولوا يقدروا اهتمام الكبار بيهم

وعايز افكركم بجمله... هو اللي اتقال عليه:

فلان ده ماشاء الله عليه...

ياترى فلان ده كما بنجاح ولا فشل...


أمنياتي