الأحد، 14 سبتمبر، 2008

الأوله ..... تلاته








* الحب سر مهم جدا من اسرار النجاح .. أول مره عرفت الـموضوع ده ، كان وانا باصور تصوير فوتوغرافي.. لقيت ان الصوره اللي باحبها سواء لشخص أو لـمـكان.. بتطلع حلوه .. لـما أكون باحب اللي باصوره.. أما اللي باصورها مجرد اداء واجب بتطلع عاديه جدا أو وحشه كمان..وماكُنتش عارف ليه ..وبعدين قعدت أقلّب واسأل واقرا.. وعرفت ان السر هو الحب .. وجربت ده كتير في شغلي وفي معاملاتي مع الناس .. وعايزين نتفق على حاجه مهمة.. كلمة الحب أو باحبك ومشتقاتها .. مش لازم تكون للحبيب إياه ( بمعنى ست لراجل أو العكس عشان يتجوزوا) ... اطلاقا.. ممكن تحب مدرستك والبحر..البواب والدكتوره .. أو شغلك والأفلام.. وهكذا .. أي حاجة ممكن تحبها، ولازم تحبها.. بمعنى الناس مش حتحبك.. إلا لو انت حبيتها.. وشغلك مش حيديلك إلا لو انت حبيته.. وواحد من الفلاسفه ( سقراط أو افلاطون غالبا ) قال لتلميذه : قوللي بتحب تعمل ايه ، وانا اضمنلك انك ماتروحش الشغل بقية حياتك .. بمعنى انك حتكون نازل للشغل وانت فرحان عشان بتحبه.. وراجع بيتك مبسوط عشان بتحبه هو واللي فيه، وكمان مردود الحب حلو ، لما تلاقي الناس بتسأل عليك،، والجواز حلو بالحب.. والأكل اللي بتحبه حلو.. وهكذا .....،، بس ماتحبش قوي عشان ماتتجرحش قوي..وأحلى حب في الدنيا.. هو حب الخالق.. (ربنا).. جرب تحبه.. ماتخافش.. أصل ربنا بيحبك .. وخلقك في شكل حلو عشان بيحبك.. حِبه أكتر حب حبيته في الدنيا.. حتعيش سعيد.. بالمناسبه اكتشفوا الحكاية دي في أمريكا .. حب الله هو سر السعاده الوحيد..وبعدين حب العمل.. وبعدين أي حاجة تانيه..



* الكذبة الكبيره في الدنيا دي... هي :( لـما أخد أو أجيب اللي انا عايزه .. حاكون سعيد ..)The biggest lie on the planet: "When I get what I want I will be happy".لأنك زمان وانت صغير.. كنت بتقول لـما تجيب اللعبه الفلانيه حتفرح بيها وهي دي أملك.. وجبت اللعبه بس طلبت اللي بعدها..وبعدين جبت العجله أو الكاسيت أو .. أو .. وبرضه لسه عايز عربيه ولو جبت العربيه حتعوز تتجوز .. ودي سُنة الحياة،، بس لازم تخلي بالك ان الموضوع مالوش نهاية.. life is a Journey .. not a destinationأصل نهاية الرحله الموت.. يبقى اتعلم تعيش سعيد ..والنقطه كلها انك لازم ترضى وتفرح باللي عندك و ( تستمتع به) يعني العملية مش اقتناء والسلام.. لأ .. دي استعمال واستمتاع ومحافظه على اللي عندك..عارف .. بُص على واحد عنده عربيه صغيره قديمة ومحافظ عليها وبيلمعها ويوضبها على قدر امكانياته ،، وواحد تاني عنده عربية آخر موديل ومع ذلك مش محافظ عليها ومبهدلها .. غالبا تلاقي الأولاني سعيد وفرحان والتاني بيقول .. يــووووه بأه.. عايز عربيه جديده مع ان عربيته جديده جدا.. هو ده الفرق.. وهو ده اللي أنا عايزك تفهمه.. استمتع..استمتع باللي عندك.. ماتبصش لحاجات تانية سواء عند غيرك أو في خيالك..والأشياء القابلة للإقتناء كثيرة.. والوقت قليل.. عشان كده استمتع بأي حاجة معاك .. لإن فيه ناس كتير جريوا ورا حاجات كتير .. للإقتناء.. وفضلوا يجروا .. يجروا.. وماتوا من غير ما يستمتعوا...



* ألا ليت الشباب يعود يوما فأخبره بما فعل بي المشيبَ ..دي جملة أو بيت شعر ، قالتها جـِده لحفيدتها وهي بتمسح لها على شعرها وشايفه شبابها فيها، ونِفسها الحفيدة تسمع كلامها عشان تجنبها مخاطر الحياة ، والحقيقه ان ده شبه مستحيل!! لأنه كل الأطفال اتلسعوا بالنار على الرغم من تحذير أهاليهم.. بس الشطاره ان النار ما تسببش لك حرق جامد أو جرح عميق .. جرب كل حاجه بس بالراحة ، ودايما يكون في بالك تحذيرات اللي أكبر منك لأنهم ماقالوش كده من الهوا .. أكيد قالوها عشان مصلحتك ..والشاطر اللي يتعلم من تجارب غيره .. لأنها أرخص .. مش حيدفع فيها حاجة.. لازم كمان تقتنع ان نوع التجربة ومكانة الشخص اللي جرب قبلك مهمين.. يعني أنا مش بقولك خد تجربة واحد فاشل واسمعها.. لأ طبعا ... شوف بتحب مين ومين مثلك الأعلى وشوف تجربته واستفيد منها.. والمشكلة دايما إن العمر بيجري.. والزمن مابيستناش حد ..وفجأة حتحس إنك اتسرقت.. أو كما قال الجميع .. سُرق عمري مني.. وساعتها حتقعد تقول ليت الشباب يعود يوما.. طبعا هو مش حيعود.. فاعمل كل حاجة كويسه دلوقت.. عشان لما تكبر تنفعك.. إمشي .. اقرا.. سافر.. صلي.. تصدق.. كل ده حتبقى تقول لو مرضت بعد الشر.. ياريتني.. ولو معرفتش تتطلع السلم.. حتقول ياليتني .. وهكذا.. طيب .. ياريت بأه تسمع الكلام من دلوقت .. بدل ماتقعد تندب حظك لما تكبر.. يعني من الآخر اللي تقدر تعمله من اللي قريته في الكتاب اللي في إيدك .. اعمله .. صدقني..

هناك 3 تعليقات:

Two in One يقول...

اول زيارة ومش هتكون الاخيرة ان شاء الله


ماشاء الله مدونة حضرتك عقلانية بسيطة وقيمة

لكن لو التعليم بالسماع ماكنش حد اخطأ لازم نجرب ونقع علشان نكتسب الخبرات ونكون شخصيتنا

متفقة مع حضرتك جدا على اد ما تعامل الدنيا بحب علي اد ما تديك واللي بيكرهها هي كمان بتكرهه وتقلب عليه

---

لما اخد واجيب الا انا عايزة هاكون سعيد
اتفق معاك جدا .. لا اطلاقا لان اختياجتنا ومطالبنا لا تنتهي .. والسعادة ببساطة في الرضا والاستمتاع بما في ايدينا زي ما حضرتك قولت
---
الا ليت الشباب يعود يوما فاخبره بما فعل المشيب
مش ده بيت الشعر بتاع ايليا ابو ماضي ؟!
والله انا بقوله كتير بس للمزاح :))

تحيـــاتى

من غير عنـــوان يقول...

شكرا على كلامك..
وسعيد بصدى ما كتبت..
وإحنا لسه أمامنا 100 حدوته تقريبا..
منهم ما كتبت حول التجربة ونفعها...

من غير عنـــوان يقول...

دي رسائل من البلوج القديم
:



"الأوله ..... تلاته"



norahaty يقول...
السلام عليكم ورحمة الله وبركاته
كتاباتك:
مثلما قلت انت هى خواطر من غير ترتيب
ولكنك إن بدأت القراءة فيها لا تتركها
حتى تنهيها .
هذا رايىّ

11 أكتوبر, 2008 04:20 م


أسما عواد يقول...
عندك حق في كل ما قلت
عندي شيء بخصوص هذا الموضوع
لو حضرتك ارسلت لي اميلك ارسلها لك
شكرا لمرورك على مدونتي وشكرا لهذا البوست الجميل

12 أكتوبر, 2008 12:17 ص


من غير عنـــوان يقول...
norahaty
thanks for your kind words

18 أكتوبر, 2008 11:43 ص


من غير عنـــوان يقول...
أسماعواد
شكرا

my email is banna2020@gmail.com

18 أكتوبر, 2008 11:44 ص


نونو يقول...
خواطر حضرتك حلوة اوى
دوووووووومت مبدعااااااا

17 نوفمبر, 2008 04:18 م


Arabic ID يقول...
البساطة والمنطقية مع عمق الرومانسية

الموضوع كده شكله يخوف تكونش انت أنا بعد عشرين سنة

---------
تحياتى ليك

19 نوفمبر, 2008 10:15 ص


fashkool يقول...
عزيزى من غير عنوان .. بالحب نفعل المعجزات والله .. اسألنى انا بقى وما تسألش حد غيرى .. اما الشباب يا عزيزى ..انا فاكر ايام العمليات فى حرب اكتوبر واحنا فى الجيش .. كأنها الشهر اللى قبل اللى فات بالكتير وفاكر تفاصيل كتيره كأنها الاسبوع اللى فات .. الا ليت الشباب يعود يوما فاخبره بما فعل المشيب
اما بخصوص تعليقك عندى والله انت عندك حق .. بس تعمل ايه يموت الزمار وصوابعه بتلعب

19 نوفمبر, 2008 01:50 م


Mahdi Mahdi يقول...
يلزمنى رايك فكن ناصحا ولا ملامة، فهدفى افهام المرضى والموتورين ممن يتطاول او يخادع بدس السم فى العسل تحت دعوى الدفاع عن الاسلام ، ان العين بالعين والسن بالسن والبادى اظلم

20 نوفمبر, 2008 12:39 ص


Mahdi Mahdi يقول...
صدقت ايها الكريم وكما قالوا بصله المحب خروف
احسنت وخالص تحياتى

28 نوفمبر, 2008 11:51 ص


mahasen saber يقول...
التلات بوستات ابرع واعمق من بعض
يعنى الحب فعلا بيفعل المعجزات حتى لو الانسان فى مشكله ما وبيدافع عن حقه واختار يدافع عن حقه بحب حتلاقى ربنا بيهون فى عنيه كل المشاكل

وثانيا الانسان لو وصل لكل ما يتمنى ومفيش قناعه ورضا عمر ما هتتحقق السعاده

اما الاخيره المشيب دى فاعتقد انى مش هوصل للمرحله دى بس طبعا اتمنى اوصلها عشان اشوف اولاد ابنى ان شاء الله

01 ديسمبر, 2008 07:54 م


fashkool يقول...
جيت اسلم واعيد .. كل عام وانت بخير وبألف صحه ويعيدها الله عليكم بالخير واليمن والبركات

11 ديسمبر, 2008 06:49 م


امرأة الميزان يقول...
اذا سألموني عن الحب فالجواب جاهزا
احب الله وانبيائهوانتم ..وهو ..وساعي البريد ..والفراشات والغزلان وحصي الينابيع ورائحة التراب بعد المطر والغيومالورديه والالوان الليلكية..

12 ديسمبر, 2008 10:54 م


حروف (دلو مرة ثانية وجرح ثاني سابقا) يقول...
حلو اوي البوست دةبجدكل مقرا بوست عندك بلاقية رائع
دمت بالف خير

07 يناير, 2009 10:33 م


WhItE HeArT يقول...
مش مصدق ان انا ادخل مدونة واقعد اقرى فيها لحد مااتعب مش ازهق

بجد كتاباتك اكتر من روعه ياباشمهندس

life is a Journey .. not a destination

بجد مدونة تدل على على صاحبها

تحياتي

22 مارس, 2009 12:21 ص


ملكة بحجابى يقول...
من غير عنوان
يبقى دوما بداخلنا تلك الحروف المتناثرة
التى شكلها قدرنا بأنامله
يتضح ذلك بوضوح فى خربشاتك الأبجدية
أبهرتنى وكفى

03 أبريل, 2009 04:15 م