الثلاثاء، 16 سبتمبر 2008

اتنين



* اشتري اشياء قيّمة.. الـمثل بيقول ( أنا مش غني عشان أشتري حاجة رخيصة) يعني إيه؟ .. يعني انت محتاج انك تقيّم الحاجة اللي بتشتريها .. لازم قيمتها تكون على قدر الفلوس اللي حاتدفعها.. عشان تعيش معاك..بالذات لومعكش فلوس كتير ..عشان كده المثل بيقول ..لإنك لو حتشتري رخيص حتضطر تشتري غيرها بسرعة لأن عمرها الإفتراضي قليل.. فاشتري حاجة كويسه على قد قيمة الفلوس وماتشتريش حاجة رخيصه قوي لإن ساعتها حتكون رميت الفلوس في الأرض وكمان لازم تشتري حاجة لها لازمة.. محتاج لها.. مش مجرد صرف فلوس والسلام على أشياء قد تبدو جميلة ولكن الخامة وحشة.. أو الجوده سيئة..زي ست البيت اللي بتشتري طقم أطباق بلاستيك غير معلومة المصدر عشان رخيصه.. وكلها تتكسر لأ.. تجيب أربعة أطباق كويسه على قد العيله .. وطبعا عشان أشرح برضه .. محتاج اني أقوللك ما تجريش ولا الـماركات على الفاضي عشان بس تكون لابس قميص من ماركة معينه.. انت هنا بتشتري الإعلانات.. إزاي ؟؟ هي الماركة بقت ماركة من إيه.. من كُتر الإعلانات.. فطبعا بقت غالية عشان كده قصدي عشان التكاليف الإضافية.. وسيادتك رايح تشتري Basic T-Shirt لمجرد ان اسمها كذا ولاّ كذا..لا فكرت في خامة ولا قد ايه فيها قطن ولا نوع القطن .. هي (تي شيرت) ساده.. سودا .. بس لازقين الماركه عليها .. لا فيها design حلو ولا خامة غريبه.. ولا يحزنون.. خلي بالك من فلوسك، كمان لو بتشتري حاجة معمّرة (تليفون أو تليفزيون مثلا) ساعتها اشتري ماركة أثبتت كفاءتها في السوق على مر السنين .. واشتري "Options"على قدر احتياجاتك الفعلية .. مش Options زيادة عن احتياجاتك..ومش حتستعملها.. زي كل واحد ماسك موبايل ولا عُمره استخدم خدمة النت اللي فيه.. ولا حيستخدمها .. إنما عشان يقعد مع أصحابه ويقولك أصل الموبايل ده فيه NET.. والله كلها منظره على الفاضي ..ولا حد بيستعملها .. وأعرف ناس كتير في وظايف تحفه وموبايلتهم عاديه جدا.. لأنهم مش عايزين فيها إمكانيات كتير..هنا لازم تلاحظ إنهم ناس عمليه.. خليك عملي زيهم.. لإنهم وصلوا بكده.. وفي البيت كمان لو اشتريت غساله رخيصه حتبوظ بسرعة وتدفع فلوس كتير في تصليحها.. مش معنى كده اني اشتري ثلاجة 30 قدم عشان غاليه.. لأ اشتري 10 قدم نوع كويس أحسن من 12 قدم نوع سيئ .. وبدل ما اركب سيراميك سيئ لكل المطبخ.. اركب زي بره نوع كويس ولون كويس جنب الحوض بس وكفايه .. هما بره كده..

*******************



* لابد من أن تبدأ السلم من أوله.. لأن ده هو البناء الصحيح لأي شئ.. والصعود له أصوله.. ومش ممكن توصل للدور التاني من غير ما تعدي على الأولاني... مره دُعيت لإلقاء محاضرة لطلبة السنه الرابعة حول تجربتي في العمل الحر.. وذلك بالتعاون مع جهة حكومية تعطي قروض للشباب .. والتطبيق العملي هو كلام العبد لله اللي هو أنا.. فتـَفضّل المسئول بشرح كيفية التقدم للحصول على القرض.. وما هي الـمشاريع الـمتاحة والجاهزة للطلبة فور تخرجهم.. وكيف أن في أوروبا والدول المتقدمة الشباب بيعمل مشاريع ناجحة .. وتناسى سيادته إن الطالب في هذه البلاد بيشتغل ويدرس ويصرف على نفسه وبالتالي لما يتخرج حيكون مر بتجارب عملية كثيرة..المهم الراجل خلص كلامه وأنا اتكلمت في موضوع تاني هو ازاي تدير المشروع وازاي تسوق الفكرة .. وإن كل ده مش حيجي لوحده ... لازم تشوف وتعيش ده في عمل ناجح قائم .. تتدرب فيه وتعرف يعني ايه شغل ويعني ايه قرض .. ويعني ايه حسابات وإدارة وتسويق... الخ.. وبعدين بعد سنتين تلاته .. عشرة ... تبقى تاخد القرض .. اللي ماكنش الطلبة متخيلين إن هما حيردوه بشروط مجحفة لهم وهما لسه عضمهم طري في السوق واي خبطه حتوجعهم.. انا مع الشباب انه يجرب.. ويعمل مشاريع .. بس لازم يدوق الأول .. وياخد مناعة .. ويطلع السلم من أوله.. مش يحط شقا عمره في مشروع بدون دراسة..وفي يوم من الأيام.. حتوصل إنك تكون صاحب مؤسسة كبيرة.. ( لو كانت امكانياتك العقلية وغيرها بتوفرلك ده) وحتوصل .. بس لازم تكون طلعت السلم من أوله عشان تكون اتأسست كويس.. وماحدش يضحك عليك .. أو تخسر خسارة كبيرة.. كمان .. حتكون عرفت خبايا المطبخ .. يعني إيه خبايا المطبخ.. يعني الموظفين بيقولوا ايه على المدير..ايه هي خبايا تليفونات الموظفين.. وبوفيه الشركة.. يعني إزاي تتعامل بدبلوماسية مع الناس حتى لو كرهتهم عشان حتحتاجهم بكره وهكذا.. الشباب مندفع شويه.. فممكن لو ابتدا بدري يكون صاحب عمل حر وهو لسه ورور ( ده لفظ فلاحي معناه طري ) باقول لو لسه طري.. حياخد مقالب كتيره .. اتمنى انه ينشف الأول ويعرف أصول المعاملات قبل ما يدخل في مشاريع كان ممكن تنجح أكتر لو ابتداها من أول السلم.. وأظن فيه خمسميت فيلم وضح ده ومن أحبهم إلى قلبي .. ( النمر الأسود) بطولة أحمد زكي..عن قصة حقيقية لمواطن مصري وصل في المانيا بعد قصة كفاح.. وغيرها وغيرها من قصص النجاح.. بلاش تستعجل.. كله حيوصل .. إنما توصل وانت متين ومتأسس .. أحسن ما تتكعبل ميت مرة وما توصلش ؟؟

هناك 5 تعليقات:

ka2en Makboot يقول...

السلام عليكم

اولا اشكرك علي المتابعه عندي وعلي الصورة بس انا قصدت اني ماحطتش صورة علشان اوصل اد ايه صورتهم مش حلوة والناس مشمئزة منهم

-----

أنا مش غني عشان أشتري حاجة رخيصة
انا اول مرة اسمع المثل ده بس هو صح جدا واتفق مع حضرتك لازم نحط فلوسنا في حاجة جودتها عالية ومش مجرد اسم وماركة

وبرضو النقطة التانية اننا ناخد السلم من اوله صح جدا بس للاسف احنا اسلوب تربيتنا غلط اصلا
لما واحد يقضي 21 سنه تعليم معطل كل نشاطاته لحد مايخلص يخرج للسوق خام ماعندوش اي خبرات

لكن لو طلع للمجتمع بدري شوية 16 سنة كدت زي الغرب وابتدي يعتمد علي نفسه شوية في منفقاته ده هيخلق جواه شخصية ايجابية بناءة وده هيصقل شخصيته ويطورها وينميها ويكسبه خبرات تساعده قي المستقبل

تحياتي

من غير عنـــوان يقول...

أنا اللي شكرا على المتابعة..
ومبسوط من رأيك..
إنتظري المزيد..
أو...

تابعونـــا (:

غريب يبحث يقول...
أزال المؤلف هذا التعليق.
غريب يبحث يقول...

على فكرة المثل دا انا سمعتو قبل كدا من والدي.. بس هوا قالوا بطريقة تانية... وقالي كمان انه تقريبا مثل انجليزي بيقول "انا لست غنيا كي اشتري سيارة قديمة"(am not rich to buy an old car) .... طبعا هوا معناه واضح(بمعنى ان السيارة القدسمة بتحتاج ان الواحد يصرف عليها كتير) ومش لازم نطبقه بس على السيارات..
و حضرتك كدا وضحتو اكتر....

وعلى فكرة في شباب كتير عندهم مشاريع بس اعتقد القروض دي وهمية او مش كل المشاريع ممكن تتمول بقروض...

كمان فكرة السن ده صح تماما وان معاها ...

واخيران صحيح ان لكل انسان رزق محدد ومحدش بياخد اكتر من رزقه.. بس انا شايف ان ساعات المواهب او بمعنى تاني الشباب اللي ممكن يشتغل ومجتهد مش بيظهر بدري بدري، بس هما بيبقو محتاجين زقه في الاول،
بالظبط زي لمل بتعطل العربية بنزقها وبتمشي بعد كده كويس، بس بنلاحظ ان الزقه دي احيانا بياخدها ناس متستحقهاش....

في حاجه اخيره احب اعلق عليها، هى ان الناس بتهتم اكتر بالحاجات اللي الناس بتشوفها (حب منظره)..
الدليل عله كدا حضرتك قولتو لما قولت مثال بره المطبخ بيركبو فيه احسن انواع البلط او السيراميك، ...هنا العكس اجود الانواع بتركب في الصالة عشان الناس تشوفها و المطبخ بيركب فية اسوء او اردء و نادرا جيدة المستوى....

من غير عنـــوان يقول...

إلى غريب يبحث
شكرا على التعليق..

كلامك معقول حول الشباب ومشروعاته...