الجمعة، 31 أكتوبر 2008

مع بيتين شعر حول ارضاء الناس


* مين يبتدي.. يعني لو انت جاي تسلم على واحد .. هو كمان لازم يمد إيده .. والعمليه شويه من عندي وشويه من عندك.. حاطّلع ايدي من جيبي.. تتطلعها إنت كمان.. حافردها تفردها.. حابتسم .. تبتسم إنت كمان.. حأمد إيدي.. مد إيدك.. حاسلم سلم.. شوف كام مرحله.. لو إنا لقيت اللي قدامي متكاسل في أي مرحله من دول .. حأتوقف أنا ومش حنسلم على بعض.. وبكده ومرّه ورا مرّه ..حتتقطع الصله اللي بيننا.. وحنعدي في وش بعض وحتى مش حنرفع إيدنا ونقول ( هاي) ..
المثل اللي فات ده تقدر تعمله في كل حاجة .. وتطبقه على كل علاقة.. مراتك مش بتصبّح عليك.. صبّح إنت.. صحابك مش بيسألوا عليك .. اسأل انت .. بس لحدود .. لو صبّحت عليها اسبوع والتاني وهي برضه مش عايزه تبتدي.. خلاص .. حافظ على كرامتك .. لو صاحبك انت سألت عليه مرتين وتلاته.. وهو مطنش.. خلاص ذنبه على جنبه.. كل واحد بيحط نفسه في مكانه بالنسبه للآخر .. ومش قصدي خصام .. بس الوّد هنا بيتقطـّع.. ولو حب يكلمك تاني.. أهلا وسهلا.. بس حافظ على كرامتك.. وخليك كريم انت الأول وابدأ.. وخيركم من يبدأ بالسلام.. السلام والكلام ..الحب والكراهيه .. الوصل والود..كل دول فعل ورد فعل.. حتى النجاح في العمل.. ياترى اشتغل الأول عشان مديري يزود المرتب.. ولا لما يزود المرتب أبقى اشتغل.. ان شاء الله لا هو حيزود المرتب ولا انت حتشتغل .. مهم قوي ان اللي عايز حاجة يبتدي هو الأول.. ولو مازودلكش المرتب .. استقيل وروح للي يقدّرك..


* ابغض حبيبك بعضا ما.. عسى أن يكون عدوك .. يومًا ما ، وأحبب عدوك بعضا مـــا.. عسى أن يكون حبيبك ..يومًا ما ...دي حكمة مهمة قوي.. في علاقاتك مع الناس..ماتحبش قوي ولا تكره قوي.. أترك شعرة معاوية.. ( يعني دايما الباب موارب).. لا تخاصم أحد لدرجة القطيعة.. ولا تحب لدرجة العشق.. ولا تـُعطي لدرجة العبط.. ولا تكره لدرجة القتل.. لا تصدق كل ما يقال.. ولا تكون مخلص لدرجة الهبل.. لإنك لا تعرف من الذي أمامك.. وما هو تصرفه وما هي حساباته..لإن النفس البشرية معقده.. بس على فكرة .. قيل زمان.. أن من تحبه يحبك ومن يكرهك تكرهه.. ويظهر هذا في نظرة العين .. التي كثيرا ما تفضح صاحبها.. بس برضه خليك وسط في علاقاتك مع الناس.. واسأل اللي حواليك .. حتلاقي الكلام ده صح..وده بيأكد كلامنا عن الوسطية.. المبالغات وحشه.. ودايما المبالغات بتيجي مع الشباب.. عشان كده لازم تفرمل نفسك .. بالبلدي ما تتدلقش.. ما تتسرعش.. فكر.. تريث.. ودايما خلي الموضوع رايح جاي.. هات وخد.. ثواب وعقاب.. لإنها لما بتبقى من ناحية واحدة.. عادة بتتعب.. الدنيا عامله زي لعبة تنس الطاوله.. بنج.. بونج.. اسمع كده..تك .. تك.. عمرك ما تلعب لوحدك في علاقاتك مع الآخرين.. لازم يردوا الكوره لك.. بس خليك انت اللعيب الشاطر.. باصي للي جنبك وفي نفس فريقك وما تبقاش أناني.. وشوط جامد في الفريق اللي قدامك.. من غير ما تعـّور نفسك ومن غير ما تقع.. وتقبّل تصرفات الآخرين وخلي رد فعلك على قد فعلهم..


* النظام .. كلمه بايخه .. وثقيله.. ماتعرفش قيمتها إلا لو طلبوا منك عشان تتعين في وظيفه حلوه ومرتبها كبير ، بس قالوا لك: هات لنا شهادة كورس الإنجليزي اللي انت أخدته.. وانت تقعد تدّور وتدّور.. وتقول يـــــــــــــــاه لو كنت حاطيتها في دوسيه.. كنت لقيتها..
كمان لو رتبت دماغك ونظمته حتعرف تجيب اللي فيه.. ده مش كلام انشا.. ده كلام لناس ناجحه ومشهوره.. ناس نفسك تبقى زيهم .. بيل جيتس.. الوليد بن طلال وغيرهم..صحيح هما عندهم ناس ينظموا مواعيدهم وشغلهم .. بس كمان هما ما وصولوش لكده .. إلا عشان كانوا بينظموا كل حاجه وهما صغيرين..نظم يومك.. نظم وقتك .. اكتب ورقه صغيره كل يوم بإيه اللي بتعمله كل نصف ساعة .. وآخر اليوم راجع الورقه.. ممكن تلاقي ان فيه ساعتين تلاته ما عملتش فيهم حاجة .. ساقطين منك.. كمان مكتبك اللي انت قاعد عليه .. لازم تعملـّه يوم في الإسبوع ترتبه.. ده لو ماكنتش بترتبه كل يوم..وفيه طريقه لذيذه لترتيب المكتب.. عباره عن tray للي مفروض تعمله وواحد تاني للي خلصته..وبكده تنجز .. كمان لو جيت تتجوز ومراتك مُنظمه ( مش منظمة التحرير) ومُرتبه ( مش مَرتبه) وانت بترمي هدومك في كل مكان.. حيبقى شكلك بايخ جدا.. وبالنسبه لولادك مش حتبقى قدوة.. طبعا أنا عارف ان ده كلام بايخ.. بس حنعمل ايه.. عايز مصلحتك والله.. وحتعرف كده في يوم من الأيام .. وتقول ياريت.. فياللا ..نظم نفسك شويه... على قد ما تقدر..
ياللا قبل ما تندم..
____________________




ضحكت.. فقــالوا ألا تحتشم .. بكيت فقــــــــالوا ألا تبتسم
بسمت فقـــــــالوا يرائي بهـا .. عبست فقالوا بدا ما كـتـــم
صمت فقالوا كليل اللســــــان.. نطقت فقـــالوا كثير الكلــم
حلمت فقالوا صنيع الجبــان.. ولو كان مُقتــــدرا لأنتقـــم
بسلت فقـــــــالوا لـَطيشٌ به.. وماكــــان مجترئا لو حكـــم
يقــــــــــولون شذ إذا قلت لا.. وإمعــــة حين وافـقتــــــهم
فأيقنت أني ..مهمـــــــــا أرد.. رضا النـاس لابد من أن أذم

محمد ظافر البشري

هناك 19 تعليقًا:

غريب يبحث يقول...

وخيركم من يبدأ بالسلام، صدق رسول الله (ص).......

دايما بييجي الكلام في وقته، مش عارف ده مجرد صدفه او توفيق من عند ربنا، ولا حاجه مدروسه ولو إني اشك في الاخيره لدقة التوقيت فعلاززسبحان الله....

المهم انا مش فاهم بيت الشعر الخامس

بسلت فقالولطيش به..وما كان مجترئا لو حكم

ويعني ايه امعة، واخر بيت تحفة اما النص كله فاكثر من رائع...
في انتظار الاعداد القادمه....

من غير عنـــوان يقول...

بسلت فقالولطيش به..وما كان مجترئا لو حكم

أي:
لما جيت أعمل شهم ودخلت عالموضوع ببساله الناس قالت ده طايش... لإنه لو كان حكيم وعنه الحكم ما كان جريئا هكذا


.... والله أعلم

الأبيات كلها على محاولة إرضاء الناس... ده شي مستحيل... وما حدش بيعجبه حاجه...
والإمعه هو ذلك الشخص اللي بالبلدي ( معاهم معاهم ...عليه عليهم )... لك مني أطيب امنى

غير معرف يقول...

طبعا لازم الواحد يتوقع من استاذى الجليل كل شىء جديد والا ميكونش big boss.
المقال جميل جدا بجد وبيخش القلب على طول ودى احلى حاجه فيه انه خالى من اى تكلف
وانا برضه مقتنعة بنظرية فى حياتى قليلا ما تخيب وهى ان دائما الشعور متبادل يعنى لو حاسس ان فيه واحد بتستظرفه يبقى هو كمان بيستظرفك والعكس واحد انت حاسس انه دمه تقيل يبقى هو كمان مستتقلك وكده فى كل حاجهولا ايه رايك. وده طبعا ما يمنعش ان الواحد يبدا بالخير احسن لان ده فعلا بينشر الحب والخير يسن الناس وياريت كل الناس تبفى كده فعلا.

من غير عنـــوان يقول...

أميرة
مبسوط انك هنا
فعـّاله طول عمرك

على فكره ده كلام سيدنا على بن أبي طالب كرم الله وحهه.. في موضوع تقبل الآخر

غير معرف يقول...

مش عارفه ليه مش بحب أفكر في أي معنى لإحساس
يعني مش علشان هو مش بيمد ايديه أنا مش هامدها حتى لو بعد 100 سنه
لو بتحب حقيقي يبقا مفيش كرامه
لأن الحب لوحده هو اللي بيحافظ على الكرامه مش بيهينها
ومش الحب بين رجل وبنت بس
أقصد أي نوع علاقات
هازعل واخالف قلبي وأقول مادام مش بيكلمنى يبقا وأنا كمان
لأ
ذنب القلب ايه يشيل أكتر من اللي فيه
مش كفايه شايل حياتنا وأيامنا بين نبضه
هانزيد عليه الحمل ليه

مش عارفه ليه قلت كده أو حتى بعدت عن معنى الكلام
بس حبيت أكتب اللى جوايا
من غير مافكر بكتب ايه

مبدأي ومش بحب اتخلى عنه

حقيقي كلامك جميل

تحياتـي ...

من غير عنـــوان يقول...

مدينه من النساء...
أولا شكرا على الرد والتعليق
.....
وأيّ كان رأيك فهو يحترم
في ناس بتقول الحب بالكرامه أو من غير..
هذا لا يغير من معنى الحب

ونمد إيدينا لبعضينا بكل الحب

صباح جميل

من غير عنـــوان يقول...

هذه رساله وصلتني عن طريف الفيس بوك واستأذنت صاحبنها في نشرها:

تقول انجي:::::


حمدلله على السلامة يا أستاذنا الغالى :)
وصباحك جميل إن شاء الله وكلامك أجمل
وكأنه بستان مليء بالورد والريحان وشقائق
:) النعمان
_______________________________________________________

هو صحيح الدنيا مش حتخلص بس الوقت معدش فيه بركه وتحققت فينا نبوءة الرسول صلى الله عليه وسلم بتقارب الزمن حتى أصبحت السنة كالشهر والأسبوع بيعدى وكأن عفريت سرق منه أيامنا ومع ذلك يا أستاذنا الفاضل فيه ناس على قلبها مراوح ونايمه فى العسل , نسأل الله العفو و العافية والبركه فى الوقت والعقل آميييييييييين
______________________________________________________

أما الفقرة اللى عنوانها
( ماتقولش كلمة (أصل) ولا ( بس) ولا (لكن) كتير )
أتمنى إن ناس كتيييييييييييييييير قوى تقرأها وتراجع نفسها وخصوصا الناس اللى دايما يعلّقوا أخطاؤهم على شمعات الغير وكأنهم مخلوقين من طينه تانيه لا بتغلط ولا بتقصر وأعذارهم دايما جاهزه فى جيوبهم وعجبى
_______________________________________________________

وطبعا أحلى حاجه فى الدنيا مشاركة الأحباب فى كل ما لذّ و طاب, فى فسحة حلوه , فى سنيما فى قراءة كتاب أو حتى فى عتاب وسؤال وجواب المهم تفضل بيناّ المودّه ومهما كانت الأسباب نحاول نتواصل ومايطولش بينّا الغياب
_____________________________________________________

لطيفه قوى أبيات محمد ظافر البشري ومعبره عن واقع التعامل مع الناس إذا ما حاول المرء إرضاء الجميع فهذا ما لم يدركه أحد من الخلق حتى الآن ,احببت أن أرد عليها ببيتن من عندى :) عللها تتم الفكرة


ضحكت.. فقــالوا ألا تحتشم .. بكيت فقــــــــالوا ألا تبتسم
بسمت فقـــــــالوا يرائي بهـا .. عبست فقالوا بدا ما كـتـــم
صمت فقالوا كليل اللســــــان.. نطقت فقـــالوا كثير الكلــم
حلمت فقالوا صنيع الجبــان.. ولو كان مُقتــــدرا لأنتقـــم
بسلت فقـــــــالوا لـَطيشٌ به.. وماكــــان مجترئا لو حكـــم
يقــــــــــولون شذ إذا قلت لا.. وإمعــــة حين وافـقتــــــهم
فأيقنت أني ..مهمـــــــــا أرد.. رضا النـاس لابد من أن أذم
...............................
فقلت.. سأمضى ولن أهتم .. فإنى أروم بلــــــــــوغ القمم
فإن كان فعلى رضــا خالقى .. فليس هنـــــــاك حَزَنْ أو ندم
__________________________________________________

* ابغض حبيبك بعضا ما.. عسى أن يكون عدوك .. يومًا ما
، وأحبب عدوك بعضا مـــا.. عسى أن يكون حبيبك ..يومًا ما
هذه حكمة رائعــــــــــــــة حقا , لا يلقّاها إلا ذو حظ عظيم
نسأل الله أن يحبب فينا عباده وعبيده وخلقه أجمعين
وأن يجعل لنا ودا بين أهل السماوات والأرض آمييييييييين
_______________________________________________

أما موضوع مين يبتدى فالبادى بالخير هو الأكرم ولكن أستاذى الفاضل كما جاء فى الحكمة القديمة إن أنت أكرمت الكريم ملكته وإنت أنت أكرمت اللئيم تمرد فالبعض إذا ما داومت على بدئه بالمعروف أصبح عنده حقا مكتسبا والويل إذاأغفلته يوما عمدا أو سهوا فلن يبدء أبدا لا بسلام ولا كلام بل وقد ويزيد الطين بله بالتبرم وإبداء الغضب وكأنه السيد المبجل فى عالم من العبيد !! فعلينا التبصر مع الناس فمنهم من تأسره مجرد إبتسامة ودودة فكأنما أهديته جبلا من ذهب ومنهم من إن حملت له الدنيا على جناحك فجعلتها بين يديه ما غنمت منه بإمتنان ولا عرفان ولله فى خلقه شؤون
سلامى يا أستاذنا الغالى وأدام لنا صاحب هذا القلم البديع
أشكرك من قلبى :)

______________

وطبعا كل الشكر لها على الرد القيم الرقيق

الجواز و سنينه يقول...

اضاء الناس غايه مستحيله
علشان كده المفروض الواحد يعمل الصح و الى مفروض و اللى هو عايزه
و اللى يبعد يبعد و اللى يقرب يقرب
انا مش هاتعب نفسى مع حد
لان الدنيا اصلا مش مستاهله و لا زعل و لا عتاب
مافيش غير المعامله الطيبه و بس
اما بخصوص انى اعامل الحبيب بحذر لانه قد يصبح عدو
فأنا ما اقدرش اعمل كده عن نفسى
لانى لو اتعاملت معه كده مش هاعتبره حبيب
حبيب يعنى قلبى و عقلى و روحى
و المفروض انى انا كمان كده
و إلا لا يكون حبيب

Unknown يقول...

السلام عليكم
ورحمة الله تعالى وبركاته
التدوينة كلها احلى من بعضها
ياباشمهندس لكن وقت صلاة الفجر قرب
فأسمح لىّ اختار (حتة)صغيرة اعلق عليها
وهى فقرة(ابغض حبيبك بعضا ما.. عسى أن يكون عدوك .. يومًا ما ، وأحبب عدوك بعضا مـــا.. عسى أن يكون حبيبك ..يومًا ما )كانت معايا عاملة وماتؤخذنى غير متعلمة التعليم الاكاديمى بتاعنا لكن متعلمة فى مدرسة احسن من الف من مدارسنا :ا ل ح ي ا ة
كانت دايمآ تقولى مثل ما انساه ابدآ
"حب ودارى وأكره ووارى"بمعنى الا تظهر مشاعرك علانية فربما تغيرت تلك المشاعر والاحاسيس يوما ما.من يدرى؟؟ .
حضرتك مش محتاج اقولك ابيات الشعر الاخيرة كم هى جميلة بل هى رائعة.

من غير عنـــوان يقول...

الجواز وسنينه...
شكرا على مرورك وتعليقك..
الموضوع مش انك تكرهي الحبيب..طبعا أكيد ... لأن هو حبيب...إنماالقصد عموما على الناس ما تحبش قوي وما تطرهش قوي عشان ما تتجرحش قوي.. الإعتدال حلو...
أصل التوقعات دائمل يا مخيبه يا محيره.. ربنا يسعدك

ياريت تقرأي رد norahaty

من غير عنـــوان يقول...

من بعد صلاة الفجر ... أشكرك على التعليق الموزون... ودائما أبسط الناس كلامهم من القلب مباشرة ...
سعيد يزياراتك ،، أشكرك وأتمنى لك يوم جميل

Unknown يقول...

السلام عليكم
ورحمة الله تعالى وبركاته
بعداذن حضرتك ياباشمهندس
انا وضعت ابيات القصيدة فى تدوينة
خاصة فى مدونتى الثانية مع
الاشارة الى انى قرأتها
عندك فى مدونتك
ياراجل ياطيب

من غير عنـــوان يقول...

وعليكم كما قلتم وزياده

طبعا على الرحب والسعه...
ولو اني شاكك في موضوع
ياراجل يا طيب ده (:

هل عشان أوافق بسرعة زي ما بناتي بيعملوا معايا...

ولا عشان أنا راجل عجوز وبركه

(((((((:

just kidding

أمسيات جميله لك يا مجتهده يا فعاله

سعيد بإن الأبيات عجبتك

شمس النهار يقول...

دي تاني زياره ليه
الزياره الاولي تركت تعليق بس مش عارفه مالقيتوش النهارده
مش عارفه ايه اللي حصل
طبعا البوست جميل جدا
بس كان المفروض نزل علي كذا مره عشان نقدر نستوعبه ونرد عليه
هو عامل زي دراسه لكلام بنعديه كده كل يوم
مقال عامل زي المنبه الاصلي
بيقول انتبهوا فكان نفسي ينزل علي اكتر من مره
بالنسبه للشعر فكرني
بجحا وابنه والحمار
كان جحا ماشي ومركب ابنه علي الحمار الناس قالت الولد راكب وسايب ابوه ماشي القيامه قامت
راح جحا نزل ابنه وركب هوه
الناس قالت شوف جحا المفتري راكب الحمار ومشي ابنه ده اناني
راح جحا راكب هو وابنه
الناس قالت جحا وابنه مفتريين راكبين همه الاتنين علي الحمار الغلبان
راح جحا نزل هو وابنه من علي الحمار ومشيوا جنبه
الناس ضحكت عليهم وقالوا دول مجانين ماشيين علي رجليهم وسايبين الحمار
**يعني مهما عملنا مش هنرضي الناس لكل واحد رأي في الحياه احسن حاجه نرضي ربنا ونفعل دور الضمير والاخلاق
ربنا يرضي علينا ان شاء

من غير عنـــوان يقول...

صباح الخير يا شمس النهار...

شكرا على زيارتك .. أظن ان موضوع التعليق حه مش من عندي لأن دي أول مره أتشرف بزيارتك...
المهم طبعا كلامك معقول في موضوع على كذا مرة.. بس المشكله غن يمكن الناس مش بتعدي كتير على البلوج أن كل مره بأكتب في 3 مواضيع مثلا... ممكن نخليه 2 بس...
شكرا مرة أخرى ومرات...

أما جحا فقد كان حكيما ... يروي الحكمة في طرفه ولذلك بقيت عظاته....

ورضا الله سبحانه وتعالى هو أسمى ما يطمع فيه الإنسان بالطبع

أمنياتي وتحياتي

اقصوصه يقول...

اكيد اللي دور ع الاجر هو اللي يبتدي

النظام بايخ جد احيانا صح

بس بدون نظام حتبئى سلطه:)

تقبل مروري

شمس النهار يقول...

الموضوعات اللي حضرتك بتكتبها دسمه جدا
ماتنفعش حتي 2في المره الواحده
عشان نعرف نتناقش كويس
واكيد اللي هيجي مره مش ممكن مش هيجي تانيلو هو من المهتمين
بمثل هذه الموضوعات الجاده
شكرا

من غير عنـــوان يقول...

أرجو ألاّ تغربي عن هذه المدونة يا شمس النهار بتعليقاتك المهمة المنيرة

حـــــــــــاضر مقال واحد كل مرة

من غير عنـــوان يقول...

المهندس الحسيني
واقصوصه
شكرا لكما