مساحة

* كل مـنـّـا يريد مساحة خاصة we need a space والـمساحة هنا بمعنى وقت أو بُعد أوحرية .. المهم تتعلم ان تاخد مساحتك.. وتدي الآخر مساحته.. سيب لصاحبك وقت .. ماتكبسش على نـَـفسه عمـّـال على بطال.. وسيب لأبوك مكانه في غرفة المعيشه يتفرج على اللي عايزه في التليفزيون .. لأنه مش بيلحق.. وسيادتك فاتحه على طول .. ماتسأليش جوزك في الـموبيل انت فين دلوقت إلا لو هو قال .. أو كنت عايزاه ضروري..لـما صاحبة أختك الـمقربة تيجي تزورها سلّمي وامشي ( بينهم أسرار).. عيب تفتح شنطة مراتك.. وعيب كمان انك تفتشي في جيوبه وأعيب لـما تليفونه يرن تبصي مين؟؟!!ده أبسط مساحات الحرية..ويا سلام لو كل زوج وزوجه أخدوا مساحة بعيد عن بعض كل شوية.. حترجع مشتاقه ليك وإنتِ كمان لو سيبتيه ياخد نص يوم مثلا يعمل اللي على مزاجه هو.. حيرجعلك وإنت واحشاه ...بلاش تسأل صاحبك في التليفون انت بتعمل ايه ومع مين وازاي وبكام إلا لو هو قال .. ولو عايز تخرج معاه اسأله .. فاضي دلوقت؟.. لو كلمت حد في شغل اتكلم في وقت الشغل.. وماتكلمش أي حد في أي وقت.. ولو ماردش عليك في التليفون سيبه.. حيتكلم.. ولما تخلص مناقشه مع مديرك .. قول له طيب بعد إذنك وإمشي..وكمان لو جاله تليفون خاص أثناء الـمناقشه إمشي..سيب للناس مساحات..عشان هما كمان يدولك مساحة.. وتأكد إن ده شئ جميل.. ويابخت من زار وخفف..ومهم جدا إنك تقعد مع نفسك 10 دقايق كل يوم.. وأحسن لو استرخيت فيهم وغمضت عنيك.. من غير ما تفكر في حاجه... أو بالليل حاسب نفسك... ولو عملت ده حتعرف تدي لغيرك مساحته زي إنت ما أخدت...

اسمع دي ونفذها وادعيلي

* التوفير حلو و مفيد .. حوّش .. ولو جنية واحد يوميا.. لو ماطلعتش بحاجه من الكتاب ده كله إلا الحته دي .. كفايه.. هات علبه قديمة عندكم.. إقفلها .. برشمها بكل أنواع اللصق اللي قدامك.. افتح فتحه فوق على قد انك تدخل جنية مطبق.. اكتب جنبها.. الهدف ..( موبايل جديد) مثلا .. أو أي حاجة انت عايزها.. وحط جنية أو أكتر كل يوم.. كل واحد وقدرته ..ولو نـَـفسك أو الشيطان أو صحابك .. أو اخواتك .. لو حد وزك انك تفتح (بس تشوف حوشت كام وتقفل تاني).. ماتصدقهوش.. كمل لغاية ماتعرفش تحط ولا جنية تاني.. وافتح ... وادعيلي J ...ممكن تجيب علبه صغيره قوي .. أو كبيرة شوية .. انت وشطارتك .. طبعا بحسبه بسيطه .. لو حوشت جنيه في اليوم لمده سنتين.. عارف كام حيبقى معاك.. 730 جنية تقدر تروّش نفسك بيهم على كيفك.. حينفعوا .. صدقني.. وكمان ممكن تحطهم في دفتر التوفير.. ولو لك في حسابات الفائده الـمتركمه أضرب عشره في الميه لمده عشرين سنه وشوف الجنيه كل يوم حيطلع كام.. عارف كام؟؟؟؟؟ حوالي 23000 أيوه ثلاثه وعشرون ألف جنيه مصري لا غير ...وإحسبها إنت على مهلك..وعشرين سنه مش كتير وجنيه مش كتير... ولو معاكك أكتر وماله... على فكره ده تحويش جانبي... غير إن يجيلك مكافأه أو عيديه أو أي رزق آخر..أنا بأتكلم عن أضعف الإيمان...وما فيش بلد متقدم في العالم إلا وناسه بيحوشوا... وفي كمان إنك تعمل كذا صندوق ... كل واحد وشطارته... وفي ناس بتحوش من وهيه 10 سنين كل يوم دولار عشان لما يطلع معاش مثلا يلف العالم.. كده الناس تفكر ... كده الناس تعيش وتسمتع... ملحوظه : ماتقولش لحد إنك بتحوش...

SMART

* خليك Smart ..والكلمة دي معناها لا يُترجم ..وهي أصلا في اللغة الإنجليزية معناها واسع .. المعنى الضيق لها انك تكون شيك ( يعني بتلبس كويس) أو منمق الملابس .. اما المعنى الأشمل هو انك تكون مُلم بحاجات كتير.. بتعرف تلبس .. وبتعرف تتصرف.. بتعرف تاكل وبتعرف تقرا .. بتسمع موسيقى وتذاكر.. بتتكلم كويس وتسوق العربية بحرص.. بتحضر درس ديني ( او تسمعه في التليفزيون) وكمان بتعرف تشتغل على الكومبيوتر..بتعرف اصول الكلام مع الناس وكمان تُلم باعلانات التليفزيون والجرايد عشان تبقى تعرف تشتري كويس.. هي مش نظرية ثقافة .. انما الأهم انك تكون مالي مركزك لما تقعد مع الناس أو تتقدم لوظيفة .. أو حتى عروسة.. يكون عندك خلفيات للحديث معاها.. وهي كمان لازم تكون سمارت.. مش همها على الموضه وبس .. وانت همك على النظريات العلمية وبس.. مصيبة.. الحوار اتقطع..لازم انتم الاتنين تعرفوا تتكلموا في حاجـــــــات كتيييير .. وده مش حيجي إلا بانك تفتح حواسك تستقبل بها ما يجعلك مُلم بما يحدث حولك..كمان لازم تملا مركزك ( زي ما بيقولوا ) ماتبقاش استاذ في الجامعة ومش واخد بالك من لبسك.. أو تكون تاجر شاطر بس ماتعرفش تسمع مزيكه حلوة.. أو تكوني دكتورة بس مش دريانه ان دينك بيقولك ان الإبتسامة صدقه .. أو مثلا ماتعرفش تشتري هديه لمراتك أو الزوجه مش عارفه تدلع جوزها، حاجات كتير لازم نعرفها ..ونعملها ..نتعلمها .. عشان تخلينا سمارت .. تخلينا مانتكسفش لو أكلنا بالشوكه والسكينه..أو حتى لو أكلنا جوز حمام في الحُسين .. ناكله بايدينا إزاي من غير ما نقرف اللي قدامنا .. وحاجات تانيه وتالته ورابعه.....

آلـــو ...

* التليفون ....المحادثات التليفونية لها أصول.. سواء من القواعد العامه للإتيكيت أو من الإسلام ... يعني لـما تتكلم في التليفــون... ما تقــولش ( مين معايا ) .. لأن المفروض انك تقول تحية الأول .. وبعدين تسأل.. أو تعرّف نفسك وبعدين تسأل عن الشخص.. ولـما انت اللي ترد على التليفون ما تقولش تحية.. يدوب آلو عشان تعرّف اللي على الخط انه حد رد عليه.. دي إصول.. طبعا لو بتشتغل في شركة أحسن انك تقول اسم الشركة بعد آلو مباشرة لأن دي حاجة عامة مش خاصه.. ومن غير حساسية... بلاش تبتدي إنت لو حد طالبك تقول : السلام عليكم ورحمة الله وبركاته... ليه؟؟؟ لإن تحية الإسلام لها أصول... القادم على الحاضر... والراكب على الـمترجل والواقف على الجالس وهكذا... والقادم هنا هو الطالب... فعليه أن يبدأ بالسلام ( بل ويترك جزء ،أي يقول : السلام عليكم فقط)... حتى يتيح للمطلوب أن يرد التحية بمثلها أو أحسن منها... يمكن الموضوع بسيط إنما هو إتباع لسنه الجبيب المصطفى.. لإن العكس ( وإن ظهر إنه أصح ... إنما هو ضد حديث السلام وحديث الطرقات)... هذا والله أعلم...كمان طول الـمكالمة مهم ..بالذات بعد موضوع المحمول...وكمان الزّن بعشره missed calls وكمان الـمطلوب ممكن يكون مشغول.. تقوم سيادتك تطلبه عشر مرات وهو مش بيرد عشان في إجتماع.. يا أخي إديله فرصه...وحيرد عليك بعدين.. كمان إذا كنت مسئول.. ما ينفعش لـما مديرك أو عميلك يطلبك.. يلاقي المحمول خارج الخدمه ..أو ماتردش خالص.. وردك يكون كل مره أصل الشحن خلص.. أو أنا نسيته في البيت...أصل أنا عمله silent ... قفلته إمبارح ونسيت أفتحه النهارده ؟؟!!ده شغل ومسئوليه مش صحوبيه، وبعدين ممكن تراجع على تليفونك كل شوية يمكن ما أخدتش بالك وتليفون مهم جالك... وكمان صوت الرنات ... ولا بلاش لحسن تزعلوا.. مش حاجة لذيذه إنك تحط رنه مدلعة أثناء الشغل.. حطها بس على بروفيل تاني.. وممكن تكون إنت في إجتماع وإديها عشرة بلدي ... أكيد أكيد حتسيب أثر مش كويس...والـمصيبه لو كنت رايح إنترفيو ونسيت تقفل المحمول..... ولا مثلا تحطي call tone اسمه مابنامش الليل من حبك ومديرك يطلبك ..لو مزنوقين يا جماعة هاتوا خط تاني خاص...معلهش أنا مطول شوية.. بس تلاقي واحد بيطلبك وتقوله أيوه يافندم ( مين؟؟) يقوم يرد بكل شجاعة ( وإنت كل الحكاية إنك كلمته قبل كده مره ) يرد يقولك : مصطفى... محمد..حاجة كده من الأسماء ( الغير منتشره). يا سلام... أنا أعرف ألف مصطفى... مفروض عليـّه أعرف سيادتك من صوته ولا إيه؟ ورساله في العيد من مجهول الهويه... مفروض أنـّجم ولا إيه... والناصح يوقـّع ( مثلا شيرين) أنا أعرف 13 بنت إسمهم شيرين و3 شباب بنفس الإسم... عرّفوا نفسكم كويس بإسم العيله...وبعدين إنت وصحابك متفقين لو مش حترد وعشان تعرّفه إنك حتكلمه بعدين تقوم تقفل الخط.. أو مثلا إنك خلاص جاي أو أي إتفاق.. الكلام ده ماشي مع صحابك... إنما مديرك تقفل السكه في وشه ؟؟؟!! ولما تشوفه بعد ما رجعت من المأموريه اللي مكلفك بيها : يابني مايصحش... يقوم يرد بمنتهى الذكاء.. ما أنا مارضتش أغرم سيادتك... لإني كان فاضل لي ربع ساعة وأوصل الشركة وأحكيلك... يا سلام... مش كان ممكن عايزك في حاجة تانيه... وفي أي الأحوال إذا كان ممكن ترد ... رد.. التليفون ده عايز 10 صفحات مش واحده ولا إتنين...
_____________
ملحوظه مجموعة النصائح في آخر البوست السابق منقوله ..

إنسان القيمة

* ان تكون إنسان ذو قيمة (Value ) .. أحسن ألف مره من إنك تكون ناجح وبس..لإن فيه كتير نجاح عبارة عن فلوس وبس.. انما القيمة أحسن.. والقيمه في العلم.. والإحسان.. والفكر.. والعمل .. ورفيق الحريري بعت أربعة وتلاتين ألف لبناني يعلمهم على حسابه في الخارج .. الرقم صحيح .. أربعة وتلاتين ألف مره كمان .. يعني لو كل واحد بيتكلف تعليمه في المتوسط خمسين ألف دولار.. فرفيق الحريري دفع مليار ونصف مليار دولار عشان يعلم أهل بلده .. يا سلام.. الراجل إختار بنفسه انه يكون له هدف وقيمة في حياته وبعد مماته.. اختار العلم..مع انه كان ممكن يعلم عشرة الاف بس.. والباقي يشتري بيه جزيرة في هاواي..وهو كده كده ناجح.. عنده فلوس كتير.. بس هو اختار القيمة..عشان كده لسه الناس بتبكيه.. عشان بيحبوه بجد..بيحبوه من قلبهم.. والمقصود إنك تدور على ثقافة تنفعك من أول القراءة إلى الموسيقى.. تقرا في كل حاجة مع إلمام مهم بنواحي دينك... تسمع موسيقى كتير مع معرفة موسيقى بلدك... تتعرف على معالم بلدنا الجميله... وبعد كده ممكن تهاجر... ما تقعدش في مجتمع زي قلتك.. أنا آسف ... بس بشوف ناس كتير مش فاهمة حاجة في أي حاجة ويقولك أصله عنده عمل ناجح... منين ناجح... ؟؟!! مرة قابلت فنان تشكيلي... هو موهوب... بس أكتر من لوحته مايعرفش... لا شاف شغل ناس مشهورين ولا عرف الفرق بين التجريدية و التكعيبية ... وماعرفش ينطق كلمتين انجليزي مع خواجه كان بيسأله.. اتعلم واتفوق ومتنساش تطوير نفسك.. تطوير معرفتك.. تطوير عقلك.. قلبك... وده سهل عن طريق الإستفاده مما تسمع وترى.....

تمنى ما شئت لكن اتخذ سبباً
أكتب ما شئت لكن لا تستفز أحداً
إقرأ ما شئت لكن لا تنسى النقد أبداً
إنتقد كما شئت لكن لا تطعن أحداً
شاهد ما شئت لكن كن مهذباً
إسمع ما شئت لكن لا تزعج أحداً
قل ما شئت لكن إياك أن تغتاب أحدا
إفعل ما شئت لكن لا تعذب أحداً
تميز بما شئت لكن لا تتكبر أبداً
خاصم من شئت لكن لا تشتم أبداً
إغضب كما شئت لكن لا تلعن أحداً
إمزح كما شئت لكن لا تكذب أبداً
إبتسم كما شئت لكن لا تقهقه أبداً
كن حرا كما شئت لكن لا تستعبد أحداً
إفرح كما شئت لكن لا تغضب أحداً
صاحب من شئت لكن لا تجامل أبداً
إمدح من شئت لكن لا تبالغ أبداً
ارفض ما شئت لكن لا تكن معقداً
احب من تحب لكن لايضعفك حبك
تاجر كما شئت لكن لا تكن غشاشا أبداً
إصبر كما شئت لكن لا ترضخ أبداً
قاوم كما شئت لكن لا تستسلم أبداً
صم الدهر كله لكن لا تخبر أحداً
ادع إلى الخير كما شئت لكن لا تتردد
أذكر ربك كما شئت لكن لا تنقطع أبداً
إمشِ كما شئت لكن لا تكن مختالا أبداً
نم كما شئت لكن لا تنسى القيام أبداً
صلي صلاتك حيث كنت و لا تتهاون أبداً
أملك ما شئت لكن لا تحتقر أحداً
أحكم كما شئت لكن لا تظلم أحداً
كُل ما شئت و لا تنس أن تحمد الله دوما
هاجر كما شئت و لا تفسد في الأرض أبداً
اصرخ.. لكن تذكر أن الصمت اسلم

التغيير

* مافيش حاجة اسمها أنا كائن ليلي.. أنا ملول.. أنا أصلي بني آدم وحدوي.. أنا ماليش في العلم.. أنا جسمي من الأجسام اللي بتحب تاكل كتير.. كل الكلام الفارغ ده.. ماهو حاجة من الاتنين.. يا مريض مرض لازم تروح بيه لدكتور .. حتى لو طبيب نفسي..وده مش عيب... يا إما بتدلّع وكسلان ولازم تقاوم نفسك ويكون عندك إرادة كويسه.. علماء النفس أثبتوا إن كل عاده ممكن تغييرها إذا أراد صاحبها ذلك .. أما إذا تكاسلت وتواكلت.. وأصل ربنا مش عايز .. والكلام الخيبان إياه..فطبعا مش حتغير حاجة.. عارف ..انت لو بتشرب الشاي بتلات أربع معالق سكر.( وده كتير وخطر). ابتدي خليهم أقل نص معلقة.. لمدة 6 شهور .. بعد كده حيبقى سهل إنك تقلل كمان نص.. الخلاصة .. لو عرفت وأيقنت إن العادة دي مضرة.. وعايز تغيرها..حتغيرها... صدقني.. المهم تبتدي.. وحتوصل.. أكيد حتوصل..وكمان لازم تعرف إن ربنا سبحانه وتعالى قال في كتابه الكريم إن النهار للعمل والمعيشه والليل للنوم.. وإحنا البلد الوحيد اللي قلب الموضوع ده وخلا نهاره ليل وليله نهار .. ابتدي نام بدري نص ساعة وإشرب أي مهدئ طبيعي زي الكاموميل قبل النوم.. حتصحى بدري نص ساعة وهكذا ... وأنا شخصيا جربت ده وده والفرق كبير جدا بين الشغل اللي بتنجزه الصبح عند الشروق... غير الليل خالص... كلّك نشاط وحيوية...ولو ليله مزنوق في سهره ما يجراش حاجه ونرجع تاني للصح.. على فكره المعنى مش بس في النوم ولاّ غيره... ده في كل حاجة وحشه أو عاده سيئة إنت بتعملها... حتى لو كانت التليفونات الطويله أو المصروف السايب... كله ممكن يتغير... بس الـمهم النيه..إنوي إنت بس...

كل عام وأنتم بخير ( wall paper as a gift 4 u)

* كُـل الضفدعة .. يعني إيه كُل الضفدعة .. هي الضفدعة بتتاكل ؟؟ ( ومش عايز حد يقولي ( بياكلوها في فرنسا)... ده تعبير عند الجماعة الناجحين واللي بيدرسوا تنمية بشرية...ومعناه إن إحنا نبتدي بالحاجات البايخة الأول وبعدين اللي بنحبه ..يعني وراك مذاكرة..ووراك سينما.. ذاكر.. وبعدين روح السينما... وراك شغل..وعندك رحلة.. اشتغل الأول.. خلص الأول الحاجات التقيله على قلبك وحلـّي باللي بتحبه.. زي ما تاخد دوا ووراه عصير مانجه.. وده سر من اسرار نجاح كتير من العباقرة ورجال الأعمال الشاطرين زي ما قالوافي مذكراتهم .. لأنك لو ابتديت بالحلو حتكسل تعمل الوحش أو التقيل على قلبك..وده بيزيح من اللي وراك وماتحسش غير إن كل اللي وراك تعمله إنت بتحبه.. ودي حاجه حلوة..ولو انت طالب وبتعمل الواجبات الثقيله.. حتجيب أحسن نمرة..ولو انت موظف، مديرك حيحبك ويمكن يرقيك.. وده حيجرنا لـ ( لا تؤجل عمل اليوم الي الغد ).. يعني: أي عمل تخلصه .. وبالذات لو انت اللي مُكلف بيه.. مش تطوعي.. خلصه النهارده أحسن من بكرة.. قومي اطبخي بدل ما والدتك تكلمك في التليفون ساعتين وماتلحقيش.. قومي اغسلي عشان تعرفي تتفرجي على التلفزيون.. روح لدكتور الأسنان.. قبل ما ضرسك يوجعك نص الليل..وتروح برضه للدكتور ..وحاجات تانيه كتير.. طبعا ده لا يتعارض مع الأولوليات... لإن فيه حاجات مهم تتعمل الأول سواء بتحبها أو مش بتحبها...وكمان لازم ندي كل حاجة وقتها ونتقنها ونعملها في ميعادها دون تأخير... يمكن كلام بايخ وتقيل.. بس هي دي سكة النجاح ... للي عايز...ياللا قوم إعمل اللي وراك ومتأجل...

أجــــازة

* اتعلم تاخد أجازة.. وياريت تكون طويلة.. وممكن تكون قصيرة جدا جدا.. لدرجة إنها تكون ربع ساعة؟؟ تغمض فيها عنيك وتروح الحتة اللي إنت عايزها.. تغيير .. مجرد راحة .. والراحة يعني أجازة.. وفي الأجازة لازم تعمل اللي إنت عايزه لوحدك ودي تبقى أجازة شخصية..يا إما تعمل اللي عايزه مع الأصدقاء أو العائلة ودي تبقى أجازة عائلية.. دي مهمة .. والتانية مطلوبة.. يعني تعمل الإتنين.. ومش لازم الأجازة تكون مكلفة.. ويفضل إنك تغير فيها الأماكن .. وتتنوع دائما..
وأبسطها وأحلاها .. فسحة في الخلاء.. حيث الهواء الطلق..وإذا كنت بتحب تنام في الأجازة .. نـــام.. بس دي مش أجازة .. دي نومه ومطلوبه.. وفي الأجازة ما تضيعش فرص لفرجة أو لمعرفة.. يعني ماتروحش أسوان ولاّ الأقصر وتنام؟! ساعتها نام في بيتكم أو في فندق في نفس بلدتك..ولو معاك فلوس كفاية في الأجازة .. يبقى تعمل كل اللي تقدر عليه وتروح كل حتة.. ومش تروح تشتري وتعمل شوبينج.. لأن برضه دي مش أجازة ..
والأجازة كمان مش للأكل.. ولازم كمان تعمل اتزان بين عملك وأجازتك .. يعني ممكن تشتغل اسبوع وأجازة يوم.. شهر وأجازة يومين ورا بعض.. سنه وأجازة اسبوع متصل.. حتى خلال اليوم ممكن 6 ساعات شغل وربع ساعة ترتاح.. وهكذا.. والصحبه مهمة في الأجازة.. وإنك تسيب كل واحد على حريته ..وانك ما تطلعش أفكار سلبية على مراتك وتفكرها باللي انت متضايق منه .. لأ .. أجازة يعني تنبسط على الآخر.. ماتعكننش نفسك ولا حد يعكننك.. وترجع تشتغل بحماس.. وعزيمة..

team work

*اتعلم عمل الفريقTeam Work

.. NON of us is as SMART as all of us
عايزك تتخيل انك اشتركت في فريق لعمل برنامج كومبيوتر.. أولا لازم يكون فيه قائد للفريق.. القائد ده مش لازم يكون أشطر واحد ولا أهم واحد.. هو بس عنده معرفة بالإداره .. ( مثلا خريج إدارة أعمال) ..وواحد مُبرمج (هندسة حاسبات).. والتاني فنون جرافيكس..وده حيعمل رسومات البرنامج.. والأخير حيسوّقه للشركات.. (وده طبعا خريج (Marketing) .. انتم كده متكاملين .. ممكن مسئول التسويق يقول لمسئول الفنون.. بلاش اللون ده.. عشان الناس لا تـُقبل عليه.. انما ماينفعش إنه ينسى يعمل الخطه التسويقيه.. وييجي تاني يوم معاه تصور بألوان ورسومات البرنامج.. هو كده ساب شغله.. ونط على شغل زميله .. عمله بطريقه أقل.. إثباتا إنه بيعرف في الفوتوشوب.. لأ .. عايزك تتعلم تقوم بدور الترس في الماكينة.. خليك في مجالك.. ممكن تقول رأيك لو حد طلبه..أو تقدمه إقتراح.. لكن لو نطيت على شغل غيرك.. أو ظنيت إنك ممكن تعمله أحسن.. الدنيا حتتلخبط.. ومش حنعرف نحدد المسئوليات ..اتقن الجزء بتاعك .. وغيرك يتقن هو كمان الجزء بتاعه.. كده تطلعوا شغل كويس.. والناس بره بيعملوا كده..
كمان الـ team work محتاج عدم التنصل من المسئولية أو القائها على الآخرين.. مش لما المدير يسأل ازاي الدوسيه مايروحش المكان الفلاني.. ماتردش ( مش أنا ) .. ده اسمه تنصل..المفروض يا إما كنت وديت الدوسيه .. أو على الأقل تاخده توديه فورا ..طبعا موضوع زي ده عايز كلام كتير.. لكن مش حأطول عليك..المهم يوصل...

شويه عليـّه وشوية عليك

* حِل المشاكل بالـ Compromising يعني تعالى شوية على نفسك واللي قدامك يتنازل هو كمان شوية ، لغاية ما تعرفوا توصلوا لحل يُرضي جميع الأطراف .. لأن زي مانت عارف مفيش أبيض أبيض ولا اسود أسود .. ورأيك ممكن صح وممكن غلط.. والناس لم تجتمع على شكل عبادة واحدة .. وأيضا لم يتفقوا حول الله وهو الخالق فكيف يتم الإتفاق على شخص أو مشكله..والإختلاف في الرأي لا يـُفسد للود قضية..وساعات بيبقى ممكن تنفيذ حلين شكلهم مختلف .. بس هما زي بعض.. و ممكن كلمة تغير الشكل المختلف ده.. فخلي بالك .. وحط نفسك كمان مكان اللي قدامك اسمع مره كلامه وهو مره يسمع كلامك.. ولازم كمان نحترم رأي من هو أكبر مننا وأكثر خبره.. وكمان مدى تخصصه.. يعني أنا مش حاحكّم رأيي على محامي شاطر في قضية أمام المحكمة..ومش حأصر على اني أمّشي كلامي على كلام أبويا.. ساعتها ممكن أعرف بعدين إن رأيه هو اللي صح.. لما أكبر شوية..ومش لازم التوازن ده في خناقة .. ممكن كمان في فسحة مع صحابك أو خطيبتك .. انت عايز مطعم معين والآخر عايز مطعم تاني .. ممكن تروحوا مطعم معين المره دي والتاني المرة الجاية.. ده مش فوز ولا هزيمه .. ده تفاهم ..أو تختاروا مطعم جديد عليكوا انتم الأتنين.. وساعتها يبقى لذيذ .. وفي نفس الوقت ماحدش جه على نفسه.. التفاهم حلو.. اطبخيله اللي عايزه النهارده وبعدين بكره ابقي اعملي بكره اللي انت عايزاه.. حيجيلك بعدين يقولك ما تعملي اللي انت بتحبيه وخلي اللي باحبه الأسبوع الجاي..لأنه حس إنك فضلتيه على نفسك .. وهنا حيعملك اللي انت عايزاه.. بس انت ابتدي وشوفي..

حــلوة يا بلــدي

حِب بلدك واتكلم لغتك.. وتأكد إن كده مش حتبقى دقه قديمه.. بالعكس.. وثق إن إحنا بنتعلم اللغات الأجنبية فقط عشان نقدر نتابع الناس في الخارج وصلوا لإيه.. مش عشان نتعايق بإن إحنا بنعرف إنجليزي.. لإن الخواجه الطلياني اللي زي الفل وناجح .. مابيتعوجش على صحابه ويتكلم فرنساوي قدامهم..وتأكد كمان إن أي رئيس دوله أو حتى رئيس شركة كبيرة.. مش بيغير لغته في الإجتماعات الرسميه.. ولما تحب بلدك وتحافظ عليها .. هي كمان حتبقى زي الفل.. وساعتها حتحب تعيش فيها.. لإن لما واحد بيشتم بلده.. ويقولك ده قرف ..لأ.. لا مؤاخذه القرف ده منه هو..ونفسي انك تسافر بره وتشوف تعصب الفرنسيين لفرنسا والألمان لألمانيا.. مش زينا.. يحطوا علم بلجيكا على العربيه وعلم أمريكا على لبسهم.. حاجة تكسف..والخواجة حيحترمك لما يلاقيك بتحب بلدك..
والأهم ان كلنا حنلاقي بلد جميله نعيش فيها.. ده مش كلام إنشا.. ده مستقبلك.. كمان اسمع أغاني بلدك ومزيكة بلدك.. هي دي اللي انت حاسسها.. ولك معاها ذكريات.. ومعانيها فاهمها.. خلي بالك أنا مش باقولك أقفل على نفسك .. بالعكس.. اقرا كتير بلغة أجنبية ..ادخل على النت وشوف بيعملوا إيه بره.. راسل ناس في كل العالم.. بس إوعى تنسى بلدك.. وأحمد زويل الناجح لا يسمع سوى أم كلثوم.. ونجيب محفوظ كذلك وبيحب كل شوارع مصر..وأهم أسباب نجاحه ووصوله إلى العالميه هي إغراقه في المحليه .. اعمل زيهم.. حتبقى زيهم..ناجح .. محترم .. عندك كرامة..اتكلم عربي وكفاية انها لغة القرآن..

اكتب كلمة واحدة في التعليق... عشان أعرف انك لسه متابع

* السـُمعه.. هي الشئ الوحيد اللي حيفضل من أي عمل .. سواء في الدنيا أو بعد مانموت..أي عمل كويس حيفضل منه سمعته.. وأي بني آدم كويس ولا وحش .. حيفضل منه عمله الكويس.. وسمعة عمله الكويس.. والسنين حتمـُر .. وتفوت.. وما تفتكرش غير إن انت كان معاك ولد مؤدب وشاطر في المدرسة.. وأهو دلوقت بسم الله ماشاء الله بقى سفير ولا مهندس شاطر.. إنما لما تيجي سيرة الواد الصايع اللي كان بيزوغ من المدرسة ولسانه طويل ..و....و.... حتقول : (بلا قرف) ..هاتولنا سيرة كويس..
كمان البنت اللي وهي لسه سبعتاشر سنه.. ومشيت مع ده وصاحبت ده.. حتكبر وتتجوز.. وتتكسف تروح النادي.. عشان كل ماحد يشوفها .. يتغامز ويتلامز (يعني برضه يتغامز) عليها .. آه مش دي اللي كانت ماشية مع طوب الأرض..

طب ليه؟ مانخلينا حلوين وسيرتنا حلوه .. عشان السيرة والسمعه بتعيش العمر معاك..

قصدي انك تعمل حساب بكره .. وتــُقدم عمل وسمعه وسيرة لا تندم عليها .. لادنيا ولا آخره..

خليكي البنت الحلوة الأمورة اللي كل ما سيرتها تيجي يقولوا ياسلام على البنت دي .. زي النسمة.. مؤدبة ومحبوبة.. اجتماعية وملتزمة..مرحة بس بتعرف توقف كل واحد عند حده ..
لإن البدايات هي أساس النهايات.. واللي بيبتدي حلو وعلى أساس.. وبيزرع ويراعي زراعته.. عمره ما حيندم.. واللي سُمعته حلوه وهو صغير حتفضل معاه العمر كله.. أما العكس .. فصعب لمّا يكبر انه يغير السيرة أو السمعه..

واحدة بس كل مرّه ...

* لا تعدل المشتاق في أشواقه حتى يكون حشاك في أحشائه
يعني إيه..؟! يعني دايما حُط نفسك مكان اللي إنت عمّال تنتقده وتألس عليه. سواء بتنتقد عمله أو شخصيته..
أول ما اتخرجت من الجامعة.. واشتغلت.. وعملت شوية تصميمات ( بالنسبة لى ولغيري دلوقت تـُعتبر ركيكة) كُنت متفاخر بها جدا.. وكنت أمشي أبص على العمارات والفيلات وأنقد .. وهاتك يا نقد أنا وأصحابي . وشوف عمل دي كده وكان لازم يعملها كده.. وهكذا.. وبعدين جالي مشروع كبير .. له اعتبارات كتيره ومشاكل كبيرة.. لقيت نفسي غصب عني واقع في حاجات لازم أعملها وكنت بأنتقدها زمان..وبيت الشعر اللي انت قريتوه فوق بيقول كده ..
ما تقعدش تقول أصل ده مجنون بيحبها قوي وبيجيب لها هدايا كتير وواقع في غرامها وكده كتير.. وإلا ربنا يبعتلك واحده وتحبها وتقع في غرامها .. وتعمل زيه ( والـمصيبه لو ماحبتكش انت وبقيت عامل زي المجنون) ساعتها غيرك حيقول عليك اللي إنت كنت بتقوله على الآخَر..
كمان انت لا تعرف الظروف اللي واقع فيها اللي قدامك .. جايز اشتغل في غير تخصصه عشان مش لاقي شغل.. وجايز يحصلك كده.. أو مثلا باع عربيته وراكب الترام ( لأنه اضطر يبيعها عشان عملية أبوه).... ولا قبلت بعريس معين وهي اللي كــانت زي القمر( لأن ماحدش غيره اتقدم) ..
أعذر الناس.. وحُط نفسك مكانهم.. لإنك مش عــارف بـكره فيه إيه..

مع بيتين شعر حول ارضاء الناس

* مين يبتدي.. يعني لو انت جاي تسلم على واحد .. هو كمان لازم يمد إيده .. والعمليه شويه من عندي وشويه من عندك.. حاطّلع ايدي من جيبي.. تتطلعها إنت كمان.. حافردها تفردها.. حابتسم .. تبتسم إنت كمان.. حأمد إيدي.. مد إيدك.. حاسلم سلم.. شوف كام مرحله.. لو إنا لقيت اللي قدامي متكاسل في أي مرحله من دول .. حأتوقف أنا ومش حنسلم على بعض.. وبكده ومرّه ورا مرّه ..حتتقطع الصله اللي بيننا.. وحنعدي في وش بعض وحتى مش حنرفع إيدنا ونقول ( هاي) ..
المثل اللي فات ده تقدر تعمله في كل حاجة .. وتطبقه على كل علاقة.. مراتك مش بتصبّح عليك.. صبّح إنت.. صحابك مش بيسألوا عليك .. اسأل انت .. بس لحدود .. لو صبّحت عليها اسبوع والتاني وهي برضه مش عايزه تبتدي.. خلاص .. حافظ على كرامتك .. لو صاحبك انت سألت عليه مرتين وتلاته.. وهو مطنش.. خلاص ذنبه على جنبه.. كل واحد بيحط نفسه في مكانه بالنسبه للآخر .. ومش قصدي خصام .. بس الوّد هنا بيتقطـّع.. ولو حب يكلمك تاني.. أهلا وسهلا.. بس حافظ على كرامتك.. وخليك كريم انت الأول وابدأ.. وخيركم من يبدأ بالسلام.. السلام والكلام ..الحب والكراهيه .. الوصل والود..كل دول فعل ورد فعل.. حتى النجاح في العمل.. ياترى اشتغل الأول عشان مديري يزود المرتب.. ولا لما يزود المرتب أبقى اشتغل.. ان شاء الله لا هو حيزود المرتب ولا انت حتشتغل .. مهم قوي ان اللي عايز حاجة يبتدي هو الأول.. ولو مازودلكش المرتب .. استقيل وروح للي يقدّرك..


* ابغض حبيبك بعضا ما.. عسى أن يكون عدوك .. يومًا ما ، وأحبب عدوك بعضا مـــا.. عسى أن يكون حبيبك ..يومًا ما ...دي حكمة مهمة قوي.. في علاقاتك مع الناس..ماتحبش قوي ولا تكره قوي.. أترك شعرة معاوية.. ( يعني دايما الباب موارب).. لا تخاصم أحد لدرجة القطيعة.. ولا تحب لدرجة العشق.. ولا تـُعطي لدرجة العبط.. ولا تكره لدرجة القتل.. لا تصدق كل ما يقال.. ولا تكون مخلص لدرجة الهبل.. لإنك لا تعرف من الذي أمامك.. وما هو تصرفه وما هي حساباته..لإن النفس البشرية معقده.. بس على فكرة .. قيل زمان.. أن من تحبه يحبك ومن يكرهك تكرهه.. ويظهر هذا في نظرة العين .. التي كثيرا ما تفضح صاحبها.. بس برضه خليك وسط في علاقاتك مع الناس.. واسأل اللي حواليك .. حتلاقي الكلام ده صح..وده بيأكد كلامنا عن الوسطية.. المبالغات وحشه.. ودايما المبالغات بتيجي مع الشباب.. عشان كده لازم تفرمل نفسك .. بالبلدي ما تتدلقش.. ما تتسرعش.. فكر.. تريث.. ودايما خلي الموضوع رايح جاي.. هات وخد.. ثواب وعقاب.. لإنها لما بتبقى من ناحية واحدة.. عادة بتتعب.. الدنيا عامله زي لعبة تنس الطاوله.. بنج.. بونج.. اسمع كده..تك .. تك.. عمرك ما تلعب لوحدك في علاقاتك مع الآخرين.. لازم يردوا الكوره لك.. بس خليك انت اللعيب الشاطر.. باصي للي جنبك وفي نفس فريقك وما تبقاش أناني.. وشوط جامد في الفريق اللي قدامك.. من غير ما تعـّور نفسك ومن غير ما تقع.. وتقبّل تصرفات الآخرين وخلي رد فعلك على قد فعلهم..

* النظام .. كلمه بايخه .. وثقيله.. ماتعرفش قيمتها إلا لو طلبوا منك عشان تتعين في وظيفه حلوه ومرتبها كبير ، بس قالوا لك: هات لنا شهادة كورس الإنجليزي اللي انت أخدته.. وانت تقعد تدّور وتدّور.. وتقول يـــــــــــــــاه لو كنت حاطيتها في دوسيه.. كنت لقيتها..
كمان لو رتبت دماغك ونظمته حتعرف تجيب اللي فيه.. ده مش كلام انشا.. ده كلام لناس ناجحه ومشهوره.. ناس نفسك تبقى زيهم .. بيل جيتس.. الوليد بن طلال وغيرهم..صحيح هما عندهم ناس ينظموا مواعيدهم وشغلهم .. بس كمان هما ما وصولوش لكده .. إلا عشان كانوا بينظموا كل حاجه وهما صغيرين..نظم يومك.. نظم وقتك .. اكتب ورقه صغيره كل يوم بإيه اللي بتعمله كل نصف ساعة .. وآخر اليوم راجع الورقه.. ممكن تلاقي ان فيه ساعتين تلاته ما عملتش فيهم حاجة .. ساقطين منك.. كمان مكتبك اللي انت قاعد عليه .. لازم تعملـّه يوم في الإسبوع ترتبه.. ده لو ماكنتش بترتبه كل يوم..وفيه طريقه لذيذه لترتيب المكتب.. عباره عن tray للي مفروض تعمله وواحد تاني للي خلصته..وبكده تنجز .. كمان لو جيت تتجوز ومراتك مُنظمه ( مش منظمة التحرير) ومُرتبه ( مش مَرتبه) وانت بترمي هدومك في كل مكان.. حيبقى شكلك بايخ جدا.. وبالنسبه لولادك مش حتبقى قدوة.. طبعا أنا عارف ان ده كلام بايخ.. بس حنعمل ايه.. عايز مصلحتك والله.. وحتعرف كده في يوم من الأيام .. وتقول ياريت.. فياللا ..نظم نفسك شويه... على قد ما تقدر..
ياللا قبل ما تندم..
____________________

ضحكت.. فقــالوا ألا تحتشم .. بكيت فقــــــــالوا ألا تبتسم
بسمت فقـــــــالوا يرائي بهـا .. عبست فقالوا بدا ما كـتـــم
صمت فقالوا كليل اللســــــان.. نطقت فقـــالوا كثير الكلــم
حلمت فقالوا صنيع الجبــان.. ولو كان مُقتــــدرا لأنتقـــم
بسلت فقـــــــالوا لـَطيشٌ به.. وماكــــان مجترئا لو حكـــم
يقــــــــــولون شذ إذا قلت لا.. وإمعــــة حين وافـقتــــــهم
فأيقنت أني ..مهمـــــــــا أرد.. رضا النـاس لابد من أن أذم

محمد ظافر البشري

رجعنـــا .....

* أحلى حاجه في الدنيا دايما بتتعمل مع حد بتحبه
Life's precious moments don't have value,

unless they are shared
خلينا نفكر.. أحسن أروح البحر .. البس المايوه.. أنزل أبلبط وأعوم لـمدة ساعة واتشمس كمان ساعة وأروح لوحدي.. ولاّ أروح مع صحابي ونبلبط ونتشمس ونهيص ونلعب ....خلينا كمان نسأل ياترى الأكل لوحدي وأنا بوزي في الحيطه ولا باتفرج على حاجة بايخه في التليفزيون أحسن .. ولاّ أقعد مع أبويا وأمي اللي واحشني.. ولا مع مراتي اللي سايبها وطول النهار في الشغل.. بس الحقيقة كمان .. لازم صحابك يبقوا عايزين ييجوا البحر.. وبابا وماما عايزين ياكلوا معاك . . ومراتك ماتسيبكش وتدخل تنام.. قصدي إنها مشاركة .. مع أي حد بتحبه بتخلي الحاجة طعمها أحلى.. وبتخلي للفسحة ذكرى حلوة..
ولو قريت كتاب وبعدين اديته لصاحبك يقراه.. حتعرفوا تتكلموا في حاجات كتيرة.. ولو مراتك سمعت شريط مزيكة حلو وأديتهولك تسمعه .. أو شغلت الشريط وانتو بتتعشوا .. حتخليك تقعد في البيت.. وطبعا لو ولعت شمع مع العشا والـمزيكا .. غالبا إنت مش حتروح الشغل وتقعد جنب مراتك حبيبتك..

وعشان خاطري اقرا الجزء بتاع مين يبتدي .. عشان أنا عارف رد الناس على الكتاب والشريط والمزيكه وبالذات المتزوجون.. وطيب وليه الطرف التاني هو اللي ما يبتديش..؟؟؟؟!!! فهمت.. ابتدي انت شارك .. وإن شاء الله حتلاقي اللي يشاركك.. يوما ما .. في زمن ما..

* ماتقولش كلمة (أصل) ولا ( بس) ولا (لكن) كتير ..( أصل نسيت)، ( أصل الحكاية)، ( أصل هو اللي عمل ) ،( أصل كان عندي ظروف )، .... ( بس انت ماجيتش ) ،( بس لو كانت تبقى أكبر ) ... ( لكن أنا مش باحب كده) ..( لكن هو اللي عمل كده).... وهكذا..وهذه الكلمات وأمثالها في بداية كلامك كتير والكلام اللي من هذا القبيل مش حلوة .. لأن ده معناه انك بتبرر أفعالك أمام من يسألك .. أو بتعارض والسلام.. طبعا الغرض واضح.. لإنك ممكن تستخدم الكلمات دي زي مانت عايز .. بس مش بغرض التبرير.. أو الإختلاف عن الناس لمجرد الإختلاف..استخدمها طالما في وضع عادي وصحيح..كمان استغل كل فرصه للتسبيح والاستغفار..تاخد ثواب...وانت طالع السلم اتعود على انك تقول ( سبحان الله وبحمده.. سبحان الله العظيم).. أو وانت مستني الترام تقول .. (لا إله إلا أنت سبحانك إني كنت من الظالمين).. أو وانت في عيادة الدكتور تقول .. (استغفرك وأتوب إليك يا رب).. وهكذا.. حتى وانت بتعمل download وقاعد مستني النت البطيئه تحمّل ..والفرق بين الحالتين .. هو فرق بين الإيجابية والسلبية.. العمل والكسل.. يعني التسبيح والحمد والستغفار جميل وبيديك ثواب وبيشيل عنك خطايا.. والتبرير ومحاولة إيجاد أعذار بيخليك سلبي وتفكيرك سلبي واللي حواليك لما يلاقوا ده يقوموا يبعدوا عنك ..صدقني هو نفس اللسان ونفس الشخص.. فلازم تخلي بالك من كلامك .. ولسانك موديك فين..
طبعا انا مش عايز أقولك انك ماتشتمش وما تقولش ألفاظ قبيحة ..لإنك أصلا مش يتقول كلام وحش

.... (×:

* الدنيا مش حتخلص ولسه الوقت كتير .. يعني لو بتحب تتفرج على الأفلام القديمة مثلا ... وعندكم في البيت قناه بتجيب أفلام على طول ورا بعض .. ما ينفعش تفضل تتفرج على فيلم ورا التاني لغاية الصبح.. لأنك لا حتعرف تروح الشغل أو المدرسه أو الكلية تاني يوم .. ولا حتى حتعرف تتفرج على التليفزيون بكره..وهكذا.. يعني صاحبك اللي جاي من السفر.. وانت عايز تقعد معاه.. وتسهر لوش الصبح.. طب وبعدين مانت حتصحى متأخر ومش حتشوفه بكره.. اسهر معاه ومفيش مانع للصبح .. بس مره واحده وتاني يوم نرتاح وتالت يوم لغاية نص الليل بس.. قصدي ان لسه دايما فيه وقت تاني جديد fresh نقدر نعمل فيه اللي بنحبه.. المهم نستمتع باللي بنعمله .. بدل ما نتفسح واحنا تعبانين .. لمجرد اننا نثبت لنفسنا اننا بنكسر الدنيا وبنتحدى العالم .. لأ طبعا .. اتعلم انك تعمل الحاجه بوقتها.. والأوقات بيجي غيرها تعمل فيها حاجات جديده وهكذا..
واتعلم تعيش سنك .. عندك تمنتاشر.. عيش تمنتاشر.. لا تعيش ان انت خمستاشر ولا عشرين.. وكله بوقته.. والدنيا مش حتخلص.. صدقني.. والبنت اللي بتسابق الزمن عشان تحس إنها أصبحت كبيرة.. بيعدي عليها الوقت وتقول.. ياريتني ما استعجلت.. أديني بقيت 25 ونفسي أرجع 19..
المهم عايز أقولك.. اعمل كل حاجة بوقتها .. وعلى قدها وقد أهميتها.. وما تحاولش تخلص كل الحاجات بسرعة بسرعة.. من غير طعم .. ومن غير تمتع..على مهلك.. وإعط كل ذي حق حقه..

................................استراحة

بعد ما وصلنا عشرة مقالات (حوالي 25 فقرة) ، أحب جدا أن أشكر كل من أطل على هذا البلوج المتواضع ، وطبعا وبكل الود أشكر كل من أضاف تعليقا على الصفحة، وأكيد كل من أرسل برساله على الإيميل أو عن طريق الفيس بوك، الشكر كل الشكر للمعارف والأصدقاء ، والشكر الأكثر الجميل لكل من لا يعرفني من الصبايا و الشباب ، متمنيا من الله سبحانه وتعالى أن يكون قد نفع بهذا الكلام الكثير منكم جميعا، ولو منفعة قليلة، وأرجوا أيضا أن ينفعني أنا نفسي ..

لكل من سأل : طبعا ده كتاب ، كتبته منذ فتره - وإلي الآن لم أنشر سوى ربعه تقريبا أو أقل على هذا البلوج - عبارة عن فقرات ومقاطع من حياتي المتواضعه .. تجاربي القليلة ..وإحتمال مش كبير إني أطبعه في كتاب من ورق... المهم في الموضوع إن أنا عايزكم تراجعوا ما فات تاني... يعني نقرا مره كمان " وذكّر فإن الذكرى تنفع المؤمنين " ... ونحاول نطبق أي فكره أو تجربة عجبتنا ونتمسك بها وتكون من صميم الروتين اليومي لنا ، فقليل دائم ، خير من كثير متقطع..

وإلي أن أبدأ في إستكمال المقالات مرة أخرى بإذن الله تعالى، فإني أشكركم مرة أخرى بل ومرات..
أتمنى أن اراكم على الفيس بوك في group اسمه : لو مش عايز تعيش في جبلاية القرود :
http://www.facebook.com/group.php?gid=30967137623
اسمي محمد البنا.... Mohamed Banna على الفيس بوك
http://www.facebook.com/profile.php?id=609555900&ref=name

my email : banna2020@gmail.com

إن شاء الله كلها كام يوم ونرجع تاني...
مهم قوي وقفة للتفكير..
* * * * * * * * * * * * * * *
على فكرة في فيلم حلو قوووووووووووووووووووووووووووي إسمه

Mamma Mia
http://www.mammamiamovie.com/

ياريت تشوفوه.. كوميدي - استعراضي- رومانسي

وفيه حته مهمة قوي حول إزاي تحدد هدفك في الحياة
أما الكبار اللي زيّ فقد استمتعت جدددددا بذكريات أغاني فريق ABBA

إخراج متمكن... تصوير أكثر من رائع... موسيقى لا تُنسى..... وأكثر

نفسي كمان تاخد بالك من إن كل واحد حتى أصغر كومبارس كان دوره مهم

________________

وإلى لقاء آخر إن شاء الله لكم مني كل الموده والحب وأمنيات السعاده والنجاح

العاشرة... صباحا

* المكتوب مكتوب ، القضاء والقدر نافذ ولا توجد وسيله لتغييره.. فقط الإيمان به ، والمكتوب على الجبين لازم تشوفه العين .. بس ده ما يمنعش انك تاخد بالأسباب وتعمل اللي عليك.. وزي ما باعلم أولادي وتلاميذي..انت مسافر من القاهره للأسكندرية.. سايق على السرعة القانونية... حاطط حزام الأمان.. ماشي في الحارة اليمين.. مش بتستعمل التليفون..وفجأه العربية اللي الناحية التانية عجلتها فرقعت.. لفت .. عدت الجزيرة .. خبطتك .. عملت حادثة.. ده قضاء وقدر.. مش اهمال منك .. بس لازم ناخد بالأسباب..

انما لو ماشي على 160 من غير حزام أمان وبتتخانق في الموبيل .. وعملت حادثة .. يبقى انت الغلطان..

كمان إنت مش ملاك ولا فيه حاجة إسمها الإنسان الأمثل ومفيش حد كامل .. ممكن تعمل حاجتين تلاته صح.. من اصول السواقة.. بس المهم تعمل.. وتفوّت حته صغيرة على سرعة 110 .. وتنسى مره تلبس الحزام.. بس المضمون الأساسي انك بتحاول تعمل الصح اللي عليك .. والباقي مش بتاعك.. ده مكتوب..

وشغلك مكتوب.. وجوازك مكتوب (من واحده بعينها).. بس إنت برضه إعمل اللي عليك.. توكل على الله ولا تتواكل.. ونصيبك حيجيلك لغاية عندك..وارضى بيه.. وتقبله.. وتأكد إنه حلو بس إنت ارضى..اسعى انك تحققك اسطورتك الذاتيه وحلم حياتك.. وحاول ألف مره بعد الفشل.. بس في الآخر ارضى بالمكتوب..وتأكد إنه ما هو مكتوب لك .. هو خير لك.. ممكن يكون عينك في حاجة تانية.. بس مكتوبك أحلى.. لإنه مكتوب لك مخصوص.. متفصل على ظروفك.. ملائم لقدرة تحملك..

* لابد لك من هواية.. لإنها تفرغ شحنات الغضب عندك وتملأ فراغك.. والهواية ليست هي عملك ..بمعنى ماتقولش انك رسام مثلا وهوايتك الرسم.. أو محاسب وهوايتك حل المسائل الرياضيه.. لابد أن تكون هوايتك في اتجاه مخالف لعملك.. يعني لو موظف محترم كده وطول النهار اجتماعات وأوراق .. يبقى تاخد هوايه زي الرسم أو زراعة النباتات أو تربية الحيوانات.. ولو شغلتك إنك طبيب جراح ومشرطك شغال في بطون الناس يبقى تنزل تعوم في حمام السباحة وتفك نفسك، وبعد الضهر تتمشى أو تسجل شريط كاسيت لشوية أغاني بتحبها.. صيد السمك جميل وبيعلم الصبر..لو انت مندوب مبيعات بتجري في الشوارع ..يبقى هوايتك اليوجا مثلا ..وكمان من المفضل إن الهواية يكون فيها نشاط يدوي وجسماني.. يعني القراءة مش هواية ..القراءة أمر يومي حتمي..انما الهواية تكون حاجة تفضي دماغك بيها.. حتعيش معاك.. حتلاقي نفسك فرحان وانت بتعملها .. حتديك طعم لحياتك.. ومهم كمان انها ما تبقاش هواية ضارة.. يعني ما تقوليش ان هوايتك الشيشه.. ولا السهر قدام البلاي ستيشن . كمان الهواية بتعرفك على ناس .. بتجتمعوا وتتفقوا وتناقشوا اللي انتم بتحبوه..وبتعرف رأي الناس كمان فيما تفعله من هواية إذا كان يمكن عرضها على الناس .. زي الرسم والإهتمام بالزهور.. وممكن تهادي الناس من إنتاجك .. يقوموا يحبوك زياده..وأعرف كتير من الناس ندموا ان عمرهم عدا من غير هواية.. وقعدوا يقولوا لأهاليهم ليه ما أصرتوش اننا نلعب تنس من زمان .. مش كان نفعنا دلوقت .. العب انت التنس ..

* انت مفتاح سعادتك.. لو قمت من النوم الصبح .. فخليه يوم حلو.. احمد ربنا انك صحيت في صحة.. صلي واقرا قرآن.. البس لبس بتحبه..بص وتأمل في منظر طبيعي حلو.. كلم حد بتحبه.. اسمع مزيكه هاديه.. وانت راكب الاوتوبيس خليك في حالك.. أو اقرا حاجة.. غير روتين يومك.. قل لمن تحبه أنك تحبه.. طلع صورة قديمه مع صاحبك من زمان وافتكر الأيام الحلوة.. انزل أمشي على البحر.. لا تتردد في إنك تعمل أي حاجة حلوة بتبسطك .. بتريحك.. وابعد عن العكننه و عن المهزومين.. ابعد عن أصحاب الأفكار الهدامة..اللي يقولك البلد حالها زفت .. ومافيش فايدة.. الإكتئاب مـُعدي.. فتجنب المكتئبين.. خليك مع الإيجابيين.. وتأكد إن ربنا بيحبك..ولازم تبادله الحب ده بطاعته .. حترتاح وحيبقى يوم فل وورد..
أنا قصدي .. ما تعكننش نفسك..حتقولي مش بمزاجي .. حاقولك طب وبعدين.. انت اللي حتتضايق.. وانت اللي حتخسر لو ماعملتش كده..أصل فيه حاجات مش ذنبك.. لكن لو ابتديت تشعر وتحس انهم كلهم ضدك.. وانت الضحية .. حيبقى نهار عكننه.. وتأكد ان انت اللي بتعمل يومك..لو فيه شغل وانجاز وعلاقات حلوة وتفكير ايجابي.. حيبقى كويس.. ولو خليتها سخط وتلعن ما حولك .. حيبقى زي مانت عملته..
أنت الفاعل.. مش غيرك .. روح للي زعلان منك وصالحه..روح للي مزعلك وقول له انت زعلان من ايه..فكر انت عملت ايه حلو امبارح.. حتفرح وتسعد.. ولو عملت حاجة وحشه .. توب واستغفر.. واعمل حاجة كويسه بدل منها..

كده تسعة

* القيمة.. عايز أقولك ان قيمة الأشياء مهمه جدا ، يعني ممكن يكون عندك اشياء كتيره وغاليه بس قيمتها اصبحت عندك ولا حاجة.. وممكن اشياء صغيره ورخيصه بس قيمتها عندك غالية.. والقيمه دي بتيجي من حاجات كتير.. زي الحرمان مثلا.. يعني عشان تعرف قيمة اللي عندك لازم تتحرم منه شويه، عشان كده اتعلم تعرف قيمة اللي عندك من غير ما تتحرم منه، اتعلم قيمته وهو معاك ..كمان القيمه بتيجي من الذكريات.. يعني ده مثلا القلم اللي والدك أعطاه لك لما نجحت في بكالوريوس.. حتلاقي نفسك بتحب القلم ده .. حتى لو جبت أغلى منه.. كمان احساسك بانك تقدر تجيب أي حاجة في أي وقت بيخليك مش لاقي طعم للحاجات .. عشان كده عايزك تجرب انك تكون قادر انك تشتري تليفون جديد مثلا ومع ذلك بتقول .. ما أنا عندي تليفون كويس .. المره دي حاتبرع للفقراء.. احساس تــاني خـــالص.. اتعلم تفرح بالحاجات اللي عندك أو اللي ناوي تقتنيها .. صغيره أو كبيره.. رخيصه أو غاليه .. استمتع بالقيمة.. كمان لو كافأت نفسك بهدية لما تعمل كذا أو كذا.. أكيد الهديه اللي جبتها لنفسك حتكون ذات قيمة.. لإنها نتيجه نجاح وجهد.. كمان لازم تعرف قيمة نفسك .. من غير غرور.. وقيمة الوقت .. وقيمة الفلوس.. وقيمة حاجات كتير.. الصحة والوالدين ودينك ,, جيرانك وصحابك.. وإذا كانت دي كلها نعم ربنا عليك .. فلازم تؤدي حق النعمة دي في الحفاظ عليها ومعرفة قيمتها ..
فاضل سطر في الصفحة..... بس مالوش قيمة.... زياده من غير معنى (:

* العيب من أهل العيب مش عيب.. مش أي واحد يشتمك تزعل .. لازم تعرف مين اللي شتمك.. وان كان يستاهل انك تعملّه اعتبار ولا مجرد شخص مالوش لازمة اصلا .. منافق .. لسانه زفر .. كلامه كتير على الفاضي..

وثق في حاجتين.. انه ماحدش بيرمي الحجارة إلا على الأشجار المثمرة.. يعني لو انت مثمر وجميل وناجح.. حتلاقي كتير يهاجموك.. عشان الغيرة والحقد .. ماتهتمش .. وخلى بالك طول ما انت بتعمل الصح من وجهه نظر الدين والمجتمع والتقاليد .. ماتخافش من الهجوم .. لأن انت صح.. انما اذا كنت غلط .. يبقى العيب من عندك يا حلو . كمان ما تاخدش كل الشتايم زي بعضها.. يعنى لو نرفزت أبوك وطلع يجري وراك عشان يضربك ويشتمك .. أكيد ان ده له سبب .. وساعتها دي مش شتيمة .. دي تربيه .. وهو بيعمل كده عشان مصلحتك .. وده غير لـما صاحبك يشتمك عشان يغيظك.. وغير لـما سواق تاكسي يشتمك بالغلط.. وكمان غير لـما أمك تعاتبك بالنظر فقط عشان واخده على خاطرها.. عشان بقالك كتير ماقعدتش معاها .. ومفضل صحابك.. يــــاه.. مش حنطلع بره الموضوع .. الموضوع هو .. مايهمكش الناس يشتموك .. لو إنت صح.. عشان كده حاول تبقى صح.. من غير ماتجلد نفسك وتحملها أكتر من طاقتها.. وكمان أوزن اللي بيتكلم عليك وسايب حاله ومهتم بحال غير.. كمان ما تعملش زيه وتشتم الناس عمّال على بطـّال.. زمان قالوا لنا .. انك لو شتمت حد بأبوه حيشتمك بنفس الشتيمه.. وانت ماترضاش شتيمه لأبوك..
علــّمت معاك ؟..

* بذل الجهد.. والجهد ده هو سبيل النجاح في أي حاجة من أول الست اللي بتعمل الكيك في البيت .. لغاية عالم الذرة.. وأي حاجه عايزه مجهود عشان تتعمل .. حتى الكتاب اللي في إيدك ده أخد جهد كتير.. ومراجعه من كذا شخص.. وقراءه عشرات المرات لغاية ما جه في أيدك..مافيش حاجة بتتطلع من الهوا.. ولازم الجهد ده يكون بجد ..

يعني مش تفتح كتاب وتقعد سرحان وتقول أنا خلاص ذاكرت.. ده جهد ضايع .. روح نام أحسن... وكمان الجهد مش تقدير شخصي.. يعني ما ينفعش اني أقول ان انا عملت مجهود وأقنع نفسي بكده على الرغم ان اللي حوالين مني شايفين ان انا كسلان أو مش باعمل حاجة .. وكمان الجهد بيبان ومش عايز شوشرة .. زي طالب الثانوية العامة اللي مجند البيت كله عشان سيادته بيذاكر أو ينام .. لأن فيه غيره بيبذل جهد أكتر منه .. وبيذاكر في ظروف صعبة وبيجيب مجموع أكتر ( ده بغض النظر عن أهمية الثانوية العامة) .. المهم كمان انك لازم تقـّدر جهد غيرك.. ماتجييش لواحد راسم لوحة حلوة .. وباذل فيها مجهود وتقوله إيه القرف ده.. أو لصنايعي وتعدي عليه من غير ما تقول له الله ينوّر .. لإن ده بيفتح نفسه لشغل أحسن.. وكمان بيوري انك بتقدر الجهد.. وعمرك ما حتقّدر جهد حد إلا إذا كنت إنت كمان بتبذل جهد.. ولازم تتعلم كمان إنك تفرق بين الجهد والبكش.. عشان فيه بكاشين كتير بيحاولوا دايما يقنعوك بإنهم بذلوا جهد.. على فكره .. الناس المجتهده ما بتشاورش على عملها وتقول .. بصوا مجهودي حلو إزاي !!.؟.؟

* النظافة من الإيمان.. وعلى فكره الموضوع من غير احراج ..بسيط وتافهه.. يعني من غير نصايح مني ولا كسل منك.. لازم تغسل اسنانك سواء بمعجون أو سواك أو سائل.. ولازم تستحمى على الأقل تلات مرات في الإسبوع وأحسن لو كل يوم.. وعشان تنجح أكتر مرتين في اليوم.. وفيه فرق بين الإغتسال الشرعي اللي له سبب (الطهارة). وبين انك تاخد دش سريع للإنتعاش والنظافه عشان رائحة العرق تروح ودي نصيحة العمر..

كمان ياريت تحط أي حاجة ريحتها حلوه .. عشان الناس ما تتطفش منك .. بس برضه لازم تستحمى..لأن البارفان على العرق وحش وريحته وحشه..وماتلبس حاجات ألياف صناعيه كمان ..عشان دي مش بتمتص ريحة العرق.. ونظافة أوضتك مهمه.. وعربيتك ومكتبك وكله.. قص أظافرك.. هذب شعرك..غير الجورب ( الشراب) كل يوم .. عشان صحابك مايغيروش أوضتهم في الفندق اللي نزلتوا فيه في الرحله بسبب ريحة رجليك ..ومن غير كسوف احلق شعر الإبط والعانه ( ما حول العضو التناسلي) ..خليك نظيف..

ولو انتِ متزوجه ففيه شبه أمر .. إن زوجك ما يلاقيش منك غير كل ريحه حلوه ..وعلى طول مش مناسبات وبس ... والزوج كمان يتعطر لمراته.. مش عيب..ولا حرام.. قدمي طبيخك في أطباق نضيفه.. وبشكل حلو..عطري بيتك ببخور ولا فواحة جوزك بيحب ريحتها.. غيري له فوطة الحمام .. حاجات كتيره ممكن تفتكروها عبيطه.. بس بجد بجد.. لقيت اللي بيشتكي منها .. لدرجة البكاء.. مش بس كده .. وأعرف ناس اتطلقوا ( بعد الشر عنكم) بسبب قلة النظافة..

ودلوقتي تمانية

* خليك مع الله .. كلـّمه.. ادعيه.. قول يارب..عايزك تحب ربنا..يكون سبب صلاتك وعملك هو حب الله سبحانه وتعالى.. لإنك لازم تعرف ان وجود ربنا.. هو سبب حياتنا .. ودعاؤنا لربنا.. هو المنفذ للحصول على الأشياء( مع العمل)، وأيضا للخروج من المصائب، كمان ربنا موجود في كل حته بنروحها ومش لازم نعصاه على قد مانقدر، والدعاء سبب اساسي للحياه ، وربنا دايما جنبك لو انت بتحبه وخايف من عقابه وطمعان في رضاه ، كمان ربنا أتاح لنا حاجة جميلة وهي أنه سبحانه وتعالى بيتقبل التوبة..ياسلام.. مافيش حد في الدنيا بيحبك الحب ده.. حد ممكن تغلط ويسامحك زي ربنا سبحانه وتعالى.. طبعا دي مش حِجة إننا نغلط .. لأن سر التوبه هو سرعتها..يعني إحنا لازم نتوب ونستغفر يوميا.. عشان يمكن مانلحقش.. وبالتالي أسهل إننا نبطل نعصى ربنا.. بس برضه نتوب ونستغر كل يوم..ياللا نخلى علاقتنا حلوة بربنا عن طريق إننا نحبه.. وعن طريق الطاعة..لإن ده طريق السعادة.. وعلى فكره ...الإحصاءات والإستفتاءات اللي بتتعمل في أمريكا وأوروبا، أثبتت إن 76% من السعداء ...سعداء عشان علاقتهم كويسه بدينهم وبربهم.. وبعد كده بييجي 54% سعداء عشان انجازات نجاحهم في اللي بيعملوه ( مش لازم شغل) ممكن طبيخ أو لعب.. بس عندهم انجازات ..ودي كمان ( أي العمل) ربنا طلبها مننا.. يعني ربنا أسعدنا مرتين في الحاله دي.. مره عشان علاقتنا بيه.. ومره عشان أتاح لنا السعادة عن طريق العمل والإنجازات.. وفي الآخر خالص السعاده اللي جايه من الفلوس أو الفسحه: دي مش سعادة حقيقية.. ليه..؟؟ لأن دي سعاده مؤقته...

* وش السعد،، ووش السعد ده اللي بيقول الأخبار الحلوة ،، وبيبلغ الأفراح والنجاحات ،، وبيديلك أمل في كلامه،، مش اللي بيديلك اكتئاب ، وبيصدرلك غم ،، مثلا لو إنتِ سكرتيره في مكتب ، وتم حصول المكتب على مناقصة أو عقد كويس وده جه عن طريق الإيميل، وانت بتطبعي الإيميل عشان نعرضيه على المدير حصل إن الطابعة باظت، ما تروحيش تشتكي ان البرينتر بايظه والحاله تقرف ومش عارفه تطبعي،، لأ طبعا.. بلغي الـمدير بالخبر الحلو ،، وبعدين حاولي تصلحي البرينتر .. معرفتيش .. ابقى قولي للمدير انها باظت بطريقه لبقه.. عشان هو فرحان بالمناقصه أو العقد الجديد،، وقوليله أهي فرصة نغير البرينتر... وهكذا...
..جبت نمرة كويسه في الإمتحان .. بس الأسانسير بايظ وانت طالع البيت ، مش بأه تدخل تلعن الأسانسير وان الدنيا حر.. بلّغ الأول انك نجحت.. وفرحهم...
جوزك راجع من الشغل تعبان ,, مفيش ميه.. بلاش تديله ( Face ) وتقوليله اصل مافيش ميه في الحنفيه ودي عيشه تقصر العمر ,, و معرفتش أطبخ ، بلغيه الأول ان ابنه نجح في الإمتحان .أو إنك عامله النهارده غدا خفيف عشان صحي ومفيد..
كمان ما تفسدش الفرحة.. زي إنك تقول .. أصلي نجحت بمقبول.. ( وإنت ناجح بجيد) مثلا.. قال إيه عشان تروح فجأة قايلهم .. ما تزعلوش .. أصلي أنا جبت جيد.. ما خلاص.. زعلوا واللي كان كان.. أعرف واحد عمل كده وهو صغير.. وأبويا الله يرحمه معرفش يفرح يومها كفاية بابنه وكنت جايب إمتياز...
اتعلم تبقى انت وش السعد مش جلايب الـمصايب.

* النضج والتطور Growing Up

Unless you do something

beyond what you have already mastered,

you will never grow

كلام كبير.. طيب بالراحة.. نحكيها حكاية ..صاحبي .. ومن غير تعريف خوفا من انه يقرا الكلام ده.. أنا معجب بيه جدا جدا .. ليه.. لإنه على الرغم ان يمكن والده الله يرحمه ماكنش متعلم ولا معاه دكتوراه.. انما هو طوّر نفسه بنفسه.. وكل حاجة بالسؤال والمعرفه .. بالجهد والقراءة.. كان بيحب انه يتطور .. كل حاجة بيحب يعملها على أصولها.. بيستفيد من قراءاته .. بيطبقها.. وحط تحت بيطبقها دي يجي خمسميت خط .. أصلك ممكن تقرا كتير وزي ما دخل من الودن دي ، يطلع من الودن التانيه.. انما هو كان بيطبق .. حتى في أبسط الأشياء.. شاف الخواجه اللي بيشتغل معاه بيلعب رياضه .. لعب رياضه واستفاد منها وخس كتيير.. بص على اللبناني اللي جاي عندهم مندوب مبيعات واكتشف إنه شيك ووسيم.. قلده في لبسه لغاية ما بقى عنده style خاص بلبسه هو..عرف انه لازم يوطي صوته شوية ( أصله كان عالي جدا) فوطى صوته في الحديث.. راقب الناس بتتصرف إزاي في المطعم وفي المطار وعمل زيهم ..الخلاصه اتعلم كتيير واترقى كتير .. لدرجة إني اتخضيت من هذا التطور لما شفته بعد غياب.. وأقولك على سر ! أنا كمان ابتديت أعمل زيه. وحسيت بفرق بيني دلوقت , وبيني من عشرين سنه.. وكان نفسي أطبق ده من زمان. والبركه فيك إنت بأه تتطور أسرع وأحسن... UPGRADE YOUR SKILLS

السابعة.. السما

* الماضي قد مضى وفات ،
والحزن لا يعيده ولا الهم يُصلحه .. يعني اللي حصل.. حصل.. بلاش البكاءعلى اللبن المسكوب .. والأطلال .. وسابني واتجوز غيري.. وانا سقطت في الإمتحان لازم انتحر..وأنا مش حاعيش بعد ما سابتني..استغنوا عني في الشغل وحاتشرد.. اللي حصل حصل.. خد لك دش .. وفوّق.. التفت لبكره.. اعرف ان بكره الدنيا أحلى كتير من امبارح.. وانك تقدر بمجهودك تعمل حاجات أحلى كتير من اللي فاتتك.. حتى لو كان فيلم مالحقتوش في السينما.. حتى لو كان انك ماكنتش بتصلي زمان.. ابتدي دلوقت.. ماتحطش ايدك على خدك.. اخلق لنفسك فرصة تانية.. والفشل مره مش نهاية المشوار.. بالعكس .. ده يمكن بدايته.. ونيتشه قال :
السُم الذي لا يميتني.. يزيدني قوة ..
و الدنيا بكره مش امبارح . Life is what's coming....not what was
خلي عنك أمل.. وثق ان ربنا مش حيخزلك في بكره .. بس ابتدي..
ابتدي والباقي على ربنا .. و لو مش حتبتدي ،، مش حتوصل
If you don't start, it's certain you won't arrive.
وزي ما قالوا : طريق الألف ميل يبدأ بخطوه .. المهم تبتدي.. تعالى على نفسك وانزل لف التراك أو اتمشى على البحر أو النيل.. لوحدك.. وعد خطوتك .. واسرح.. حتلاقي نفسك مشيت ألف متر..موضوع سهل ومش عايز اثبات.. ولو تعبت .. حتلاقي نفسك مشيت خمسميت متر .. حلوين .. بكره تمشي ألف متر.. وصلت .. ولا نقول كمان.

* الصلاة.. والصلاة دي زي التنفس..
ببساطة.. أي بني آدم بيتنفس.. يبقى لسه عايش.. وأي بني آدم عايش يبقى بيتنفس..
بالظبط زي: أي مسلم... يبقى بيصلي..

وأي واحد بيصلي يبقى مسلم..
دي قبل التدين وقبل دخول الجنه وقبل كل حاجة .. الصلاة دي بس عشان تبقى مسلم.. ولو بقيت مسلم حترضي ربنا.. وحتساعدك انك تعمل حاجات تانية كمان.. وده طريقك لعيشه حلوة.. والأهم طريقك للجنة .. طريق واحد بدايته بالصلاة.. وهي حتخليك ماتعملش باقي الحاجات الوحشه..

* حقق اسطورتك وأحلامــك.. أو على الأقل حــاول.... والأسطـــــــورة الـذاتيــة هي حلمك وهدفـــك وأمنيـــاتك.. وفيه هدف قريب وهدف بعيد شوية بس ممكن تحقيقه بعد سنتين تلاته وهدف رئيسي في الحياه يتحقق على مر السنين .. فحدد أهدافك.. واعمل ما يحققها أو يساعد على تحقيقها .. مهما قابلك من مصاعب ومهما واجهت من نحديات ..وياريت لو تقرا كتـــاب : ( ســــاحر الصـحــراء).... أو بالأحرى ( الكيميائي) للمؤلف البرازيلي ( باولو كوليو) .. لأن الرواية دي هي من أصدق وأحسن ما يوضح الأسطورة الذاتية والحلم.. والأمنية.. وأهمية الجهاد إلى تحقيقها.. وخد بالك انه الرواية دي باعت أكتر من 50 مليون نسخة بعدة لغات.. يعني فيه 50 مليون واحد غيرك عايز ينجح.. يا تلحق يا ما تلحقش..

* الـلـهــم اعـطــني..
الشجاعة على تغيير ما أستطيع تغييره ،

والقناعه على تقبل مالا أستطيع تغييره،
والحكمة على معرفة الفرق بينهما.
والأخيرة دي هي الـمفتاح ، يعني لازم تعرف الفرق بين الحاجة اللي تقدر على تغييرها،، والشئ المفروض عليك أو لا تستطيع تغييره،، والفرق جامد.. كل ماهو باختيارك أو تستطيع أن تأخذ قرار بيدك لحل مشكلة ما، فهذا يدخل تحت نطاق ما تستطيع تغييره ، لإن مافيش عوامل خارجية.. أما إذا كان هناك عوامل ليست ضمن حدودك .. فهذا مالاتستطيع تغييره..وكمان فيه حاجات ممكن تقع تحت الإحتمالين ..
زي انك عاوز تحجز في طيارة عشان تسافر وتلاقي حجز ..وساعات برضه تكون عاوز تسافر وما تلاقيش حجز.. ساعتها حاول مرة والتانية انك تلاقي حجز.. وصلي استخارة .. مالقيتش حجز .. خلاص بأه .. مش مكتوب لك سفر.. ماتعاندش..
والحكمة دي بتديلك رضا بما هو مفروض عليك ، وقوة لتغيير اللي تقدر عليه.. كمان بيريحك من انك تفضل تخبط بدماغك في حائط حجر من غير ما توصل لنتيجة، ودايما فكّر كتير قبل ما تتقبل الأشياء ، وكمان فكّر أكتر قبل ما تحاول إنك تغيرها.. ولازم تشوف إيه الفايده اللي حتاخدها لـما تغير الحاجة دي ، لأنه التغيير في حد ذاته مش هدف، انما الهدف هو النتيجه اللي حتاخدها من التغيير.. ورغبتك في التغيير للأصلح.. ربنا بيساعدك فيها.. والعكس صحيح..

سته.. مخصوص

* جمّز بالجميز لحد ما يجيلك التين.. يعني إيه.. أولا الجميز ده نوع رخيص من الفاكهة.. والتين بالنسبه للي بيحبه وبياكله كتير هو الفاكهة الحلوة.. عشان كده مش حيرضى بالجميز.. إنما المثل بيقولك لو مش لاقي غير جميز.. كُله دلوقت.. واستنى التين .. انما لو ماكلتش جميز .. مش حتحلي خالص..فهيه حاجة من الإتنين.. يا إما تحلي بالجميز ( الوحِش نسبيا ) دلوقت.. يا تفضل مستني التين اللي بتحبه.. طيب ممكن حد يقول ان أنا استنى التين.. بس كمان ممكن مايجييش.. أو كمان يتمنع من السوق.. أو مافيش فلوس تجيبه.. طيب.. خليك بأه مستنيه.. أنا شخصيا.. أحب أحلي بالموجود.. لغاية ما إمكانياتي تسمح لي بإني أجيب اللي على مزاجي.. وصلت الرساله يا ترى؟؟ أتمنى..
والغرض والحكمة من المثل.. إنك ممكن تشتغل مثلا مندوب مبيعات مؤقتا .. لغاية ما ربنا يكرم وتشتغل بالمؤهل بتاعك.. ارضى بالمرتب القليل دلوقت.. وبعدين لما تثبت نفسك في الشركة .. ساعتها أطلب المرتب اللي انت عايزه..وافقي ان جوزك يجيب لك خاتم فضة صغير .. لغاية ما يكسب كتير .. ويجيب لك خاتم على مزاجك.. مش تقعدي تقولي يإما سولتيير يا بلاش؟؟ حاجات كتير بالمنظر ده ممكن نقبلها ونسعد بيها .. لغاية ما نجيب اللي في بالنا.. وساعتها .. بعض الناس ممكن يقولوا .. والله أكل الجميز والبال مرتاح .. أحسن من أكل المنجه( مش التين بأه) ..والبال مشغول ومافيش وقت .. وبناكلها في تعجل عشان مش رايقيين.. أو ممنوعين منها عشان الصحة مش ولابد.....!

* الـمـستحيـل هو ارضاء كل الناس، ولن تنال هذا الرضا أبدا.. ما تخليش هدفك ارضاء الناس.. لأن ربنا سبحانه وتعالى أولى بهذا الرضا .. حاول ترضي ربنا .. ربنا وبس.. ساعتها حيرضى عنك الناس.. ( ده لو رضوا) ..ومش مهم لو مارضيوش..وطول ما اللي انت بتعمله في حدود الدين والشرع والقانون والتقاليد الـمعقوله.. يبقى Go Ahead يعني كمل اللي بتعمله.. قصدي ما تلبسش حاجه للناس .. البس اللي يبسطك ويعلّى روحك الـمعنويه.. ، وكمان ماتشتغلش حاجه عشان يقولوا عليك مثلا الدكتور فلان ولا المهندس علان.. اشتغل اللي انت بتحبه..
وطبعا قصة جحا معروفه، باختصار.. جحا وابنه والحمار .. جحا ركب الحمار وابنه ماشي جنبه .. قالوا ساب الواد الصغير وهو ركب وارتاح.. راح نزل هو ومرّكب ابنه.. قالوا .. بُصوا .. الواد سايب أبوه وراكب هو ومرتاح..ركبوا هما الاتنين على الحمار.. قالوا مفتريين حيموتوا الحمار!!.. شالوا الحمار ومشيوا ..قالوا جحا اتجنن..ماشي وشايل حمار.. نزّلوا الحمار ومشيوا الأتنين جنب الحمار.. قالوا .. بص المجانين..أمال شاريين الحمار ليه؟ ..مفيش فايده.. مش حترضيهم يا جحا.. ولا أنا حأرضيهم ولا انت حترضيهم..أصل الناس مشغوله بغيرها..
الخلاصة ..خلي بالك من تصرفاتك قدام ربنا .. وبس.. ولا تحاول مجاراة الناس أو محاولة أن تتصرف على غير طبيعتك عشان الناس.. وتأكد .. إن اللي بتعمله وماتخافش حد يشوفك هو شئ كويس.. أما إذا كنت خايف إن حد يشوفك يبقى أصلا ده شر.. وأولى بيك تعرف إن ربنا شايفك..

خمسه وخميسة

* تهادوا تحابوا........ والهدية حاجة .. والتزاماتك حاجة تانيه.. يعني مش تجيب لبنتك بلوزه وفستان( كسوة الصيف ) تلبسها وتقول لها دي هدية عيد ميلادكِ ، لأن ده من صميم واجبك تجاهها .. والهدية كمان مش انك تروح تدي والدتك خمسين جنيه وتقولها اصل انا احترت اجيبلك ايه فقولت اديكي الفلوس تجيبي اللي على مزاجك.!! لأن دي جليطه..انما الهدية انك تفكر شويه في الشخص اللي حتديله الهدية.. هو بيحب ايه.. والهدية دي ممكن تفرّحه أو لأه .. أو ماكنش عامل حسابه عليها.. ولو كانت في مناسبة قويه تبقى حاجة تعيش معاه.. يعني مثلا ماتجيبش لأخوك قميص أو جزمه عشان نجح في البكالوريوس عشان حيدوبوا.. انما تجيبله قلم حلو مثلا يكتب بيه .. ويفتكرك بيه على طول .. وده طبعا ما يمنعش انك تجيب لوالدك مثلا حاجة بسيطه جدا لو ما معكش فلوس.. المهم انك افتكرت الـمناسبة.. كمان ما ينفعش انك تجيب شنطة وجزمه لمراتك في كل عيد جواز لـمـدة تلاتين سنه.. حاجة تزهق وتفلق..كمان ما تقولش لحد جايبلك هدية كرافته مثلا انك مش بتحب اللون ده أو كان نفسك في شبشب !! أو تقولي لجوزك وهو راجع من السفر .. ايه ده .. دي قماشه وحشه قوي أو بتشكوكني!! الخلاصه ماتكسفش حد جايبلك هديه.. كتر خيره انه افتكرك .. واستعملها قدامه مره او اتنين وبعدين ارميها ولا احرقها انت وذوقك.. واحلى هدية هي اللي من غير سبب.. مجرد لقيت حاجه تليق على فلان قمت جايبها له على طول..عشان فاكره .. هو كمان حيحبك ..

* أمّن على حاجتك.. موبايلك ومفاتيحك ومحفظتك .. بالذات وانت مسافر.. مش عيب .. ناس كتير بالذات الشباب الصغير من 10 – 18 سنة بيفتكروا انه عيب اني آخد بالي من حاجتي.. وده بيسبب ضياع وسرقة حاجات كتير.. وكتير الواحد ضيّع حاجات .. بس مره ورا مرة اكتشفت .. لأ .. وبعدين .. لازم أخلي بالي من نفسي.. ومن حاجتي.. أعدي الشارع صح.. مش عيب إني أعدي من نفق المشاه.. في الخارج لازم.. وأستنى إشارة المرور..عشان العربيه ما تخبطنيش.. مش شطارة اني أعدي كورنيش اسكندرية والعربيات ماشية بسرعة.. وأتخبط .. يا فرحتي.. ولا عيب إني أشوف اني أخدت موبايلي وشنطتي قبل ما أمشي من الكافيه.. لأن كتير الواحد بينسى.. وبعدين اتهم الجرسون .. لأ.. صحصح.. وركّز.. كمان ماينفعش أسافر بالطياره وانا ما عملتش double check إن التذكرة معايا .. وهكذا .. الأمثلة كتيرة جدا.. وماحدش حينفعني في كل الأمثلة دي غير نفسي وتركيزي..وآخد كارنية النادي قبل ما أروح.. وأشيل فلوس في حته مستخبية من شنطتي عشان لو اتزنقت أو اتسرقت..واتأكد إني قفلت باب الشقة .. طيب وإيه الفايده.. الفايده اني ما خسرش حاجتي.. وما أغرّمش أبويا فلوس .. وأبقى شاطر ومركز تقوم الشركة تديني مسئوليات أكتر وترقيني .. لغاية ما أبقى المدير العام أو الرئيس.. أو أعرف أفتح شركة خاصة.. عمركش شفت واحد صاحب شركة .. بينسى مفاتيحه.. ولا وزير نسي الخطبه اللي حيقولها في المؤتمر..

الرابعة

تعلم الوسطيه..
Maximum, Optimum, Minimum
يعني لو بتشتري حاجة .. خلينا نقول عربية مثلا ( عشان دي حاجة مهمة) أولا لازم تعرف انك ان شاء الله حتجيب غيرها..المهم انت معاك فلوس لأقل فئة من العربيات .. بس نفسك في حاجة حلوه أكبر.. وتقدر تقسط جزء.. مش لازم تزنق نفسك .. لازم تعمل حسابك انك تقدر تدفع القسط.. ولو مش قادر اختار حاجة وسط.. وهكذا.. مش لازم تاكل لغاية مابطنك تنتفخ.. أو ماتكلش خالص.. في النص أحسن.. خير الأمور الوسط.. مش لازم تدور على قميص جديد تشتريه لمده اسبوع بتلف.. اعمل حساب وقتك اللي انت بتلف فيه.. هو ده Optimum موازنه بين الوقت والفلوس والجهد..
وكمان الكمال لله وحده Perfection Against Successبمعنى انك ممكن تفضل تشتغل في مشروع وانت تنشد فيه الكمال .. تقوم تتأخر في ميعاد التسليم .. وتخسر أو تسقط.. اتعلم تقول Stop وتعرف امتى تشيل ايدك من اللوحة.. لحسن تبوظها.. وانت نيّتك انك توصل للكمال.. طبعا كل ده مع أهمية أن تنشد وتتطلب الإتقان.. وده كمان بيعلم الرضا.. الرضا بإنك لقيت شقة معقوله.. حلو..بكره لما تكسب تغيرها.. كمان افساد طعم الأشياء بطلب كمالها .. مراتك عملت أكله حلوه .. رضا .. ناقصه شوية ملح.. وماله.. زود انت.. ماتحملش نفسك واللي حواليك أكتر من طاقاتها .. ارضى عن شغل الموظفين لو إنت مدير.. علمهم.. ما تقعدش تقولهم أنا حاعمل أحسن.. لإنك ممكن تقع زيهم في الغلط..

* الإنترفيو لازم بلبس فورمال "Formal".. طب ليه ؟؟ وماله الكاجوال .. وهو يعني الناس حتاخد بالـمنظر,, ثم ان ده مزاجي في اللبس.. همّا لهم انهم يمتحنوني في قدراتي.. مش يبصوا على لبسي.. آآآآآآسف.. طبعا حيبصوا على لبسك وعلى طريقة كلامك لإن هما عايزين شخصية برضه.. والشخصية الـمتكامله : عندها علم ، بتعرف تتصرف، وبتعرف تلبس يعني Presentable وفي اختبارات القبول ااـمعايير كتيره ، مش موضوع شطارة وبس.. يعني مثلا ميكروسوفت عينت 40 مهندس حديثي التخرج في فرع القاهرة، كلهم متفوقين.. ( متفوقين فقط) بس عينتهم في وظائف عادية .. واختارت 10 نص متفوقين بس عندهم شخصية وsmart وعينتهم في الوظائف الجامده اللي بمرتب عالي.. لأنهم واجهة الشركة..لإن أي شركة بتدور على حد يعرف يتصرف ويحل المشاكل..سواء مشاكل مع الزملاء أو العملاء.. مش معنى كده ان اللبس أهم من العلم ,, بس مش معنى كده برضه انها علم وبس..هي معادلة ما بين ده وده..ده غير انهم ( قصدي اللجنه اللي حتمتحنك) ناس جايين لابسيين بدل ورسمي.. وسيادتك جايلهم بالجينز والتي شيرت .. فكّر انت بأه!!؟؟ والكلام كمان له صيغه "Formal" ، يعني مايصحش بعد نهاية المقابله انك تقول لرئيس اللجنه .. قشطة بأه .. أجيلكوا أمتى أتعين !! مع إن قشطه دي بتقولها عادي لصاحبك ومابيزعلش..ويمكن لباباك .. كمان لازم تقفل الموبايل..تقفله .. هه..وحاجات تانيه كتير بتخلي واحد يتعين وعشره لأ..

التالتة

* اعتمد على نفسك ولا تحتاج لشئ.. أي شئ..سواء من الحياة أو من الناس ..لآن ده بيكفيك شر حاجات كتير جدا .. لأن من لا يملك قوت يومه.. لا يملك حريته..والإحتياج لله وحده.. واحساسك بأنك تحتاج لأي انسان أو منه يهزم عندك الحماس..

وهذا لا يعني أننا لا نحتاج للطبيب مثلا أو للمهندس أو غيره.. إنما الإحتياج هنا بمعنى قدرتك على فعل الشئ ولكنك كسول أو مكسوف تعمله ولذلك بتطلب من الآخرين أن يفعلوا هذه الأشياء لك..فإذا كنت تستطيع فعل شئ فافعله ، ولا تنتظر حد يعمله لك..

وإذا كنت تستطيع الإستغناء عن شئ .. فاستغنى عنه .. لأن الإحتياج وحش ..وفيه نوع من الإذلال.. .. بس فيه نقطه .. إدي فرصه الأول للآخرين أن هما يعملوا .. وبعدين وريهم إنك مش محتاج لهم ..لو ماعاملوهاش، كمان لو تقدر تعمل حاجة لحد إعملها على طول .. ما تستناش إنه يطلبها منك .. لإنك كده بتإسره.. على فكره لو عندك موظفين أو مساعدين.. وعرفوا إنك بتعرف تعمل اللي بيعملوه لو هما تكاسلوا.. ده حيحط عندهم قاعده مهمه ، إنهم لازم يشتغلوا وإلا حتستغنى عنهم، وكثيرا ما قمت بكنس ومسح مكتبي لإن الساعي لم يحضر.. أو لإن الموظف الجديد يعتبر ذلك عمل دنئ.. مش بس كده،، انما أول وظيفه لي كانت بمكتب يعمل عنده أكثر من ساعي.. ومع ذلك كنت أصر على القيام بترتيب غرفتي في المكتب حتى ألم بكل ما فيها وأرتبها وفق رغبتي.. مما زاد من مكانتي عند صاحب المكتب والأهم عند السعاه..ولم أجد غضاضه في ذلك..

* مهم قوي يبقالك طعم .. وكمان مهم إنك تعرف تستطعم..يعني ايه يبقالك طعم؟!.. يعني تتميز .. يكون لك إختيارات .. يكون لك رأي دون تعنت.. يبقى صحابك عارفين انه فلان ده عنده الرأي الصح.. عنده الفكره الحلوة.. سواء بأه عايزين يخرجوا يسألوك ..أو عايزين يشتروا لبس روش يجولك..أو أكله حلوة يستشيروك.. إلخ.. سواء بتعرف حاجة أو حاجتين من دول، ولك ذوقك الخاص فيها.. هو ده الطعم.. سواء في الأمثلة اللي فاتت أو في الدين أو الثقافة.. العلوم أو السياسه.. الرياضه أو القراءة.. قصدي انك متميز في مجال أو مجالين من دول.. لما تبقى كده .. الناس حيقدروا يستطعموك.. انت كمان لازم تدور على حاجة تستطعمها وتتعلم ازاي تدور وتلاقي الطعم الحلو.. مش تاخد أي حاجة والسلام.. تشتري حاجة قيّمه.. تتجوز واحده فيها ميزات انت عايزها وبتدور عليها.. تختاري عريس يحتويكِ..أصل الحكاية مش ضل راجل ولا ضل حيطه.. وطبعا الكلام ده كله في حدود المعقول.. مش تقعد لي عشرين سنه بتدور على عروسه لها طعم ..

ولا البنت ترفض عشرين عريس منهم تلاته كويسين لمجرد انها بتدور على Mr. Perfect اللي مش موجود أصلا. وياسلام على البنت اللي اتعلمت طريقة عمل المكرونه وتخصصت في نوع معين حطت لمستها فيه.. وبقت كل الناس بتشهد بعمايلها في المكرونه .. أكيد ده بيديها ميزه في أي قعده.. ويحلفوا بعمايلها.. ساعتها يبقالها طعم .. طبعا أنا مش قصدي المكرونه بس.. كل واحد بيختار طعمـُه .. ومن ثـَم.. تميُزه..كمان عايزك تستطعم .. زي إيه.. تشرب كابتشينو ولا لاتّيه ... وإبه الفرق... وليه أصلا إذا ان انت مش بتحب القهوة من أساسه.. بس الشله كلها طالبه كابتشينو.. فرابتشينو... لاتيه .. موكا... ( أنا شخصيا من زمـــــــان روحت للراجل اللي شغال على الماكينه دي وسألته إيه الفرق )...

اتنين

* اشتري اشياء قيّمة.. الـمثل بيقول ( أنا مش غني عشان أشتري حاجة رخيصة) يعني إيه؟ .. يعني انت محتاج انك تقيّم الحاجة اللي بتشتريها .. لازم قيمتها تكون على قدر الفلوس اللي حاتدفعها.. عشان تعيش معاك..بالذات لومعكش فلوس كتير ..عشان كده المثل بيقول ..لإنك لو حتشتري رخيص حتضطر تشتري غيرها بسرعة لأن عمرها الإفتراضي قليل.. فاشتري حاجة كويسه على قد قيمة الفلوس وماتشتريش حاجة رخيصه قوي لإن ساعتها حتكون رميت الفلوس في الأرض وكمان لازم تشتري حاجة لها لازمة.. محتاج لها.. مش مجرد صرف فلوس والسلام على أشياء قد تبدو جميلة ولكن الخامة وحشة.. أو الجوده سيئة..زي ست البيت اللي بتشتري طقم أطباق بلاستيك غير معلومة المصدر عشان رخيصه.. وكلها تتكسر لأ.. تجيب أربعة أطباق كويسه على قد العيله .. وطبعا عشان أشرح برضه .. محتاج اني أقوللك ما تجريش ولا الـماركات على الفاضي عشان بس تكون لابس قميص من ماركة معينه.. انت هنا بتشتري الإعلانات.. إزاي ؟؟ هي الماركة بقت ماركة من إيه.. من كُتر الإعلانات.. فطبعا بقت غالية عشان كده قصدي عشان التكاليف الإضافية.. وسيادتك رايح تشتري Basic T-Shirt لمجرد ان اسمها كذا ولاّ كذا..لا فكرت في خامة ولا قد ايه فيها قطن ولا نوع القطن .. هي (تي شيرت) ساده.. سودا .. بس لازقين الماركه عليها .. لا فيها design حلو ولا خامة غريبه.. ولا يحزنون.. خلي بالك من فلوسك، كمان لو بتشتري حاجة معمّرة (تليفون أو تليفزيون مثلا) ساعتها اشتري ماركة أثبتت كفاءتها في السوق على مر السنين .. واشتري "Options"على قدر احتياجاتك الفعلية .. مش Options زيادة عن احتياجاتك..ومش حتستعملها.. زي كل واحد ماسك موبايل ولا عُمره استخدم خدمة النت اللي فيه.. ولا حيستخدمها .. إنما عشان يقعد مع أصحابه ويقولك أصل الموبايل ده فيه NET.. والله كلها منظره على الفاضي ..ولا حد بيستعملها .. وأعرف ناس كتير في وظايف تحفه وموبايلتهم عاديه جدا.. لأنهم مش عايزين فيها إمكانيات كتير..هنا لازم تلاحظ إنهم ناس عمليه.. خليك عملي زيهم.. لإنهم وصلوا بكده.. وفي البيت كمان لو اشتريت غساله رخيصه حتبوظ بسرعة وتدفع فلوس كتير في تصليحها.. مش معنى كده اني اشتري ثلاجة 30 قدم عشان غاليه.. لأ اشتري 10 قدم نوع كويس أحسن من 12 قدم نوع سيئ .. وبدل ما اركب سيراميك سيئ لكل المطبخ.. اركب زي بره نوع كويس ولون كويس جنب الحوض بس وكفايه .. هما بره كده..

*******************



* لابد من أن تبدأ السلم من أوله.. لأن ده هو البناء الصحيح لأي شئ.. والصعود له أصوله.. ومش ممكن توصل للدور التاني من غير ما تعدي على الأولاني... مره دُعيت لإلقاء محاضرة لطلبة السنه الرابعة حول تجربتي في العمل الحر.. وذلك بالتعاون مع جهة حكومية تعطي قروض للشباب .. والتطبيق العملي هو كلام العبد لله اللي هو أنا.. فتـَفضّل المسئول بشرح كيفية التقدم للحصول على القرض.. وما هي الـمشاريع الـمتاحة والجاهزة للطلبة فور تخرجهم.. وكيف أن في أوروبا والدول المتقدمة الشباب بيعمل مشاريع ناجحة .. وتناسى سيادته إن الطالب في هذه البلاد بيشتغل ويدرس ويصرف على نفسه وبالتالي لما يتخرج حيكون مر بتجارب عملية كثيرة..المهم الراجل خلص كلامه وأنا اتكلمت في موضوع تاني هو ازاي تدير المشروع وازاي تسوق الفكرة .. وإن كل ده مش حيجي لوحده ... لازم تشوف وتعيش ده في عمل ناجح قائم .. تتدرب فيه وتعرف يعني ايه شغل ويعني ايه قرض .. ويعني ايه حسابات وإدارة وتسويق... الخ.. وبعدين بعد سنتين تلاته .. عشرة ... تبقى تاخد القرض .. اللي ماكنش الطلبة متخيلين إن هما حيردوه بشروط مجحفة لهم وهما لسه عضمهم طري في السوق واي خبطه حتوجعهم.. انا مع الشباب انه يجرب.. ويعمل مشاريع .. بس لازم يدوق الأول .. وياخد مناعة .. ويطلع السلم من أوله.. مش يحط شقا عمره في مشروع بدون دراسة..وفي يوم من الأيام.. حتوصل إنك تكون صاحب مؤسسة كبيرة.. ( لو كانت امكانياتك العقلية وغيرها بتوفرلك ده) وحتوصل .. بس لازم تكون طلعت السلم من أوله عشان تكون اتأسست كويس.. وماحدش يضحك عليك .. أو تخسر خسارة كبيرة.. كمان .. حتكون عرفت خبايا المطبخ .. يعني إيه خبايا المطبخ.. يعني الموظفين بيقولوا ايه على المدير..ايه هي خبايا تليفونات الموظفين.. وبوفيه الشركة.. يعني إزاي تتعامل بدبلوماسية مع الناس حتى لو كرهتهم عشان حتحتاجهم بكره وهكذا.. الشباب مندفع شويه.. فممكن لو ابتدا بدري يكون صاحب عمل حر وهو لسه ورور ( ده لفظ فلاحي معناه طري ) باقول لو لسه طري.. حياخد مقالب كتيره .. اتمنى انه ينشف الأول ويعرف أصول المعاملات قبل ما يدخل في مشاريع كان ممكن تنجح أكتر لو ابتداها من أول السلم.. وأظن فيه خمسميت فيلم وضح ده ومن أحبهم إلى قلبي .. ( النمر الأسود) بطولة أحمد زكي..عن قصة حقيقية لمواطن مصري وصل في المانيا بعد قصة كفاح.. وغيرها وغيرها من قصص النجاح.. بلاش تستعجل.. كله حيوصل .. إنما توصل وانت متين ومتأسس .. أحسن ما تتكعبل ميت مرة وما توصلش ؟؟

الأوله ..... تلاته

* الحب سر مهم جدا من اسرار النجاح .. أول مره عرفت الـموضوع ده ، كان وانا باصور تصوير فوتوغرافي.. لقيت ان الصوره اللي باحبها سواء لشخص أو لـمـكان.. بتطلع حلوه .. لـما أكون باحب اللي باصوره.. أما اللي باصورها مجرد اداء واجب بتطلع عاديه جدا أو وحشه كمان..وماكُنتش عارف ليه ..وبعدين قعدت أقلّب واسأل واقرا.. وعرفت ان السر هو الحب .. وجربت ده كتير في شغلي وفي معاملاتي مع الناس .. وعايزين نتفق على حاجه مهمة.. كلمة الحب أو باحبك ومشتقاتها .. مش لازم تكون للحبيب إياه ( بمعنى ست لراجل أو العكس عشان يتجوزوا) ... اطلاقا.. ممكن تحب مدرستك والبحر..البواب والدكتوره .. أو شغلك والأفلام.. وهكذا .. أي حاجة ممكن تحبها، ولازم تحبها.. بمعنى الناس مش حتحبك.. إلا لو انت حبيتها.. وشغلك مش حيديلك إلا لو انت حبيته.. وواحد من الفلاسفه ( سقراط أو افلاطون غالبا ) قال لتلميذه : قوللي بتحب تعمل ايه ، وانا اضمنلك انك ماتروحش الشغل بقية حياتك .. بمعنى انك حتكون نازل للشغل وانت فرحان عشان بتحبه.. وراجع بيتك مبسوط عشان بتحبه هو واللي فيه، وكمان مردود الحب حلو ، لما تلاقي الناس بتسأل عليك،، والجواز حلو بالحب.. والأكل اللي بتحبه حلو.. وهكذا .....،، بس ماتحبش قوي عشان ماتتجرحش قوي..وأحلى حب في الدنيا.. هو حب الخالق.. (ربنا).. جرب تحبه.. ماتخافش.. أصل ربنا بيحبك .. وخلقك في شكل حلو عشان بيحبك.. حِبه أكتر حب حبيته في الدنيا.. حتعيش سعيد.. بالمناسبه اكتشفوا الحكاية دي في أمريكا .. حب الله هو سر السعاده الوحيد..وبعدين حب العمل.. وبعدين أي حاجة تانيه..

* الكذبة الكبيره في الدنيا دي... هي :( لـما أخد أو أجيب اللي انا عايزه .. حاكون سعيد ..)The biggest lie on the planet: "When I get what I want I will be happy".لأنك زمان وانت صغير.. كنت بتقول لـما تجيب اللعبه الفلانيه حتفرح بيها وهي دي أملك.. وجبت اللعبه بس طلبت اللي بعدها..وبعدين جبت العجله أو الكاسيت أو .. أو .. وبرضه لسه عايز عربيه ولو جبت العربيه حتعوز تتجوز .. ودي سُنة الحياة،، بس لازم تخلي بالك ان الموضوع مالوش نهاية.. life is a Journey .. not a destinationأصل نهاية الرحله الموت.. يبقى اتعلم تعيش سعيد ..والنقطه كلها انك لازم ترضى وتفرح باللي عندك و ( تستمتع به) يعني العملية مش اقتناء والسلام.. لأ .. دي استعمال واستمتاع ومحافظه على اللي عندك..عارف .. بُص على واحد عنده عربيه صغيره قديمة ومحافظ عليها وبيلمعها ويوضبها على قدر امكانياته ،، وواحد تاني عنده عربية آخر موديل ومع ذلك مش محافظ عليها ومبهدلها .. غالبا تلاقي الأولاني سعيد وفرحان والتاني بيقول .. يــووووه بأه.. عايز عربيه جديده مع ان عربيته جديده جدا.. هو ده الفرق.. وهو ده اللي أنا عايزك تفهمه.. استمتع..استمتع باللي عندك.. ماتبصش لحاجات تانية سواء عند غيرك أو في خيالك..والأشياء القابلة للإقتناء كثيرة.. والوقت قليل.. عشان كده استمتع بأي حاجة معاك .. لإن فيه ناس كتير جريوا ورا حاجات كتير .. للإقتناء.. وفضلوا يجروا .. يجروا.. وماتوا من غير ما يستمتعوا...

* ألا ليت الشباب يعود يوما فأخبره بما فعل بي المشيبَ ..دي جملة أو بيت شعر ، قالتها جـِده لحفيدتها وهي بتمسح لها على شعرها وشايفه شبابها فيها، ونِفسها الحفيدة تسمع كلامها عشان تجنبها مخاطر الحياة ، والحقيقه ان ده شبه مستحيل!! لأنه كل الأطفال اتلسعوا بالنار على الرغم من تحذير أهاليهم.. بس الشطاره ان النار ما تسببش لك حرق جامد أو جرح عميق .. جرب كل حاجه بس بالراحة ، ودايما يكون في بالك تحذيرات اللي أكبر منك لأنهم ماقالوش كده من الهوا .. أكيد قالوها عشان مصلحتك ..والشاطر اللي يتعلم من تجارب غيره .. لأنها أرخص .. مش حيدفع فيها حاجة.. لازم كمان تقتنع ان نوع التجربة ومكانة الشخص اللي جرب قبلك مهمين.. يعني أنا مش بقولك خد تجربة واحد فاشل واسمعها.. لأ طبعا ... شوف بتحب مين ومين مثلك الأعلى وشوف تجربته واستفيد منها.. والمشكلة دايما إن العمر بيجري.. والزمن مابيستناش حد ..وفجأة حتحس إنك اتسرقت.. أو كما قال الجميع .. سُرق عمري مني.. وساعتها حتقعد تقول ليت الشباب يعود يوما.. طبعا هو مش حيعود.. فاعمل كل حاجة كويسه دلوقت.. عشان لما تكبر تنفعك.. إمشي .. اقرا.. سافر.. صلي.. تصدق.. كل ده حتبقى تقول لو مرضت بعد الشر.. ياريتني.. ولو معرفتش تتطلع السلم.. حتقول ياليتني .. وهكذا.. طيب .. ياريت بأه تسمع الكلام من دلوقت .. بدل ماتقعد تندب حظك لما تكبر.. يعني من الآخر اللي تقدر تعمله من اللي قريته في الكتاب اللي في إيدك .. اعمله .. صدقني..